Luk 13 | KswSKMB | STEP | ဒီးအကတီၢ်ဖဲန့ၣ်,ပှၤအိၣ်ဝဲတနီၤနီၤလၢအစံးဘၣ်တဲဘၣ်အီၤလၢပှၤကၤလံၤလါဖိတဖၣ်လၢစီၤပံၤလးမၤကျီၣ်ကျဲအသွံၣ်ဒီးအတၢ်လုၢ်အဂ့ၢ်အကျိၤလီၤ.

‏ Luke 13

1 ဒီးအကတီၢ်ဖဲန့ၣ်,ပှၤအိၣ်ဝဲတနီၤနီၤလၢအစံးဘၣ်တဲဘၣ်အီၤလၢပှၤကၤလံၤလါဖိတဖၣ်လၢစီၤပံၤလးမၤကျီၣ်ကျဲအသွံၣ်ဒီးအတၢ်လုၢ်အဂ့ၢ်အကျိၤလီၤ. 2 ဒီးယ့ၣ်ရှူးကတိၤဆၢတၢ်ဒီးစံးဘၣ်အီၤ,ပှၤကၤလံၤလါဖိတဖၣ်အံၤဘၣ်တၢ်ဒ်န့ၣ်ဒီး,မ့ၢ်သုဆိကမိၣ်လၢအမ့ၢ်ပှၤတၢ်ဒဲးဘးဖိအၢန့ၢ်ကယဲၢ်ပှၤကၤလံၤလါဖိခဲလၢာ်တက့ၢ်ဧါ. 3 ယစံးဘၣ်သု,တမ့ၢ်ဘၣ်.မ့မ့ၢ်သုမ့ၢ်တပီၢ်ယၢ်လီၤက့ၤသုသးဘၣ်ဒီး,သုဝဲဒ်န့ၣ်အသိးကတုၤလၢတၢ်ဟးဂီၤခဲလၢာ်လီၤ. 4 ဒီးပှၤတဆံဃိးဂၤလၢတၢးထီၡံလိၣ်လီၤပှီၢ်လၢအဖီခိၣ်,ဒီးမၤသံအီၤန့ၣ်,မ့ၢ်သုဆိကမိၣ်အမ့ၢ်ပှၤတၢ်ဒဲးဘးဖိအၢန့ၢ်ပှၤအိၣ်လၢယရူၤၡလ့ၣ်ခဲလၢာ်တက့ၢ်ဧါ. 5 ယစံးဘၣ်သု,တမ့ၢ်ဘၣ်.မ့မ့ၢ်သုမ့ၢ်တပီၢ်ယၢ်လီၤက့ၤသုသးဘၣ်ဒီး,သုဝဲဒ်န့ၣ်အသိးကတုၤလၢတၢ်ဟးဂီၤခဲလၢာ်လီၤ.

6 ဒီးကတိၤဒိတၢ်အံၤ,မတၤတဂၤအချၢၣ်ဒၢသူၣ်အသးလၢအတၤသၣ်အလီၢ်ပူၤအိၣ်ဝဲတထံး,ဒီးလဲၤဃုတၤသၣ်လၢအလိၤ,ဒီးတထံၣ်န့ၢ်ဘၣ်ဝဲဘၣ်. 7 ဒီးစံးဘၣ်ပှၤလၢအပၢၤတၤသၣ်အလီၢ်တဂၤန့ၣ်,ကွၢ်ကွၢ်,ယဟဲဃုလံမးတၤသၣ်လၢချၢၣ်ဒၢတထံးအံၤသၢနံၣ်လံ,ဒီးယတထံၣ်န့ၢ်ဘၣ်.ကူာ်ကွံာ်အီၤတက့ၢ်.ဘၣ်မနုၤလၢအအိၣ်နိးစ့ၢ်ကီးဟီၣ်ခိၣ်လဲၣ်. 8 ဒီးအဝဲဒၣ်ကတိၤဆၢတၢ်ဒီးစံးဘၣ်အီၤ,ကစၢ်ဧၢ,အအံၤတနံၣ်အံၤစ့ၢ်ကီးကအိၣ်ဒၣ်ကလိာ်ဝဲ,တုၤယခူၣ်ဘှဲၣ်တရံးအီၤ,ဒီးပာ်တၢ်အ့ၣ်လၢအခီၣ်ထံးတက့ၢ်.ဒီးကသၣ်ထီၣ်ဝဲသ့ၣ်သ့ၣ်လီၤ. 9 မ့တမ့ၢ်ဘၣ်ဒီးနကကူာ်ကွံာ်အီၤလၢခံလီၤ.

10 ဒီးလၢမုၢ်အိၣ်ဘှံးနံၤတနံၤန့ၣ်,သိၣ်က့ၤသီက့ၤတၢ်လၢဘူၣ်ဘျီၣ်တဖျၢၣ်အပူၤ, 11 ဒီးကွၢ်ကွၢ်,ပှၤလၢတၢ်နါအိၣ်လၢအလိၤ,ဒီးဘၣ်တၢ်နးတၢ်ဖှီၣ်တဆံဃိးနံၣ်,ပိာ်မုၣ်အိၣ်ဝဲတဂၤလီၤ.ဒီးသကူးဝဲဒီးစူၣ်ဘျၢထီၣ်အသးတကဲဘၣ်လ့ၤတက့ၤဘၣ်. 12 ဒီးယ့ၣ်ရှူးထံၣ်အီၤ,ဒီးကိးဃီၤအီၤ,ဒီးစံးဘၣ်အီၤ,နီၢ်ဧၢ,နတၢ်ဆါဘျါက့ၤလံ. 13 ဒီးပာ်အစုလၢအလိၤ,ဒီးစူၣ်ဘျၢထီၣ်က့ၤအသးတကီၢ်ခါဒီးစံးထီၣ်ပတြၢၤထီၣ်ယွၤလီၤ. 14 ဒီးယ့ၣ်ရှူးမၤဘျါက့ၤတၢ်လၢအိၣ်ဘှံးအနံၤသတးဒီး,ပှၤဘူၣ်ဘျီၣ်အခိၣ်တဂၤအသးဒိၣ်ထီၣ်ဝဲ,ဒီးကတိၤဆၢတၢ်ဒီးစံးဘၣ်ပှၤဂီၢ်မုၢ်,ပှၤမၤတၢ်အနံၤအိၣ်ဃုနံၤလီၤ.မၤသးဒ်န့ၣ်ဒီးလၢနံၤအန့ၣ်တဖၣ်ဟဲဒိးမၤဘျါက့ၤသုသးတက့ၢ်,ဒီးတမ့ၢ်ဘၣ်လၢမုၢ်အိၣ်ဘှံးအနံၤဘၣ်. 15 မၤသးဒ်န့ၣ်ဒီးကစၢ်ကတိၤဆၢတၢ်ဒီးစံးဘၣ်အီၤ,ပှၤလီတၢ်ဖိသ့ၣ်ဧၢ,သုဝဲကိးဂၤဒဲးန့ၣ်,သုဂီၤဖံးမ့ၢ်ဂ့ၤ,သုကသ့ၣ်ယီၤမ့ၢ်ဂ့ၤ,သုပျၢ်အီၤလၢအလီၢ်,ဒီးလဲၤမိၤဒုးအီအထံလၢအိၣ်ဘှံးအနံၤတမ့ၢ်ဘၣ်ဧါ. 16 ဒီးပှၤလၢမုၣ်ကီၤလံၢ်စၢဃာ်အီၤ,ကွၢ်ကွၢ်,တဆံဃိးနံၣ်ညါ,စီၤအၤဘြၤဟၣ်အဖိမုၣ်တဂၤအံၤ,ဘၣ်တၢ်ပျၢ်ကွံာ်အီၤလၢအတၢ်စၢဃာ်လၢမုၢ်အိၣ်ဘှံးအနံၤန့ၣ်,တဘၣ်ဘၣ်ဧါ. 17 ဒီးကတိၤတၢ်န့ၣ်တဖၣ်ဒီး,အဒုၣ်အဒါခဲလၢာ်အမဲာ်ဆှး,ဒီးမ့ၢ်ကယဲၢ်တၢ်လီၤဆီလီၤလးလၢအမၤအသးလၢအစုပူၤဒီး,ပှၤဂီၢ်မုၢ်အသူၣ်ခုသးခုခဲလၢာ်လီၤ.

18 ဒီးစံးဝဲဒၣ်,ယွၤအဘီအမုၢ်န့ၣ်လီၤဂာ်မနုၤလဲၣ်,ဒီးမ့ၢ်ယကဒိလီၤအီၤလၢမနုၤတမံၤလဲၣ်. 19 မ့ၢ်အလီၤဂာ်သဘၣ်အချံလၢပှၤတဂၤသူၣ်လီၤဝဲလၢအတၤသၣ်အလီၢ်အသိးန့ၣ်လီၤ.ဒီးမဲထီၣ်ဝဲ,ဒီးကဲထီၣ်လၢအထံဖးဒိၣ်,ဒီးထိၣ်ဖိလံၣ်ဖိယူၤလၢတၢ်ဖးဖီန့ၣ်,ဟဲစီၢ်လီၤအိၣ်ဘှံးလၢအဒ့ခံဒ့လိၤလီၤ.

20 ဒီးစံးကဒီးဝဲ,ယွၤအဘီအမုၢ်န့ၣ်,ယကဒိလီၤအီၤလၢမနုၤတမံၤလဲၣ်. 21 လီၤဂာ်ကိၣ်မံၣ်လၢပိာ်မုၣ်တဂၤဟံးန့ၢ်ဒီးဒၢနုာ်လၢကိၣ်ကမူၣ်သၢစ့အၤအပူၤတုၤအဖးထီၣ်ဝဲခဲလၢာ်န့ၣ်လီၤ.

22 ဒီးလဲၤဝဲလၢခူဧိၤဝ့ၢ်ဧိၤဒီးဒူဧိၤသဝီဧိၤကွ့ၢ်ကွ့ၢ်,ဒီးသိၣ်က့ၤသီက့ၤတၢ်,ဒီးလဲၤကျဲဆူယရူၤၡလ့ၣ်လီၤ.

23 ဒီးမတၤတဂၤစံးဘၣ်အီၤ,ကစၢ်ဧၢ,ပှၤလၢအတုၤဝဲလၢတၢ်အုၣ်က့ၤခီၣ်က့ၤအီၤန့ၣ်,မ့ၢ်အစှၤဂၤဧါ. 24 ဒီးအဝဲဒၣ်စံးဘၣ်ပှၤတဖၣ်န့ၣ်,ဂုာ်လဲၤနုာ်ဖျိကျဲစၢၤအအံၣ်တက့ၢ်.အဂ့ၢ်ဒ်အံၤ,ယစံးဘၣ်သု,ပှၤအါဂၤကဃုလဲၤနုာ်ဝဲ,ဒီးလဲၤနုာ်တသ့ဘၣ်. 25 တုၤဟံၣ်ကစၢ်ဂဲၤဆၢထၢၣ်,ဒီးကးတံာ်ဃာ်တြဲၤ,ဒီးသုဆၢထၢၣ်လၢခိ,ဒီးဒိတကျိာ်တြဲၤဒီးစံး,ကစၢ်ဧၢ,ကစၢ်ဧၢ,အိးထီၣ်န့ၢ်ပဂီၢ်တက့ၢ်,ဒီးကစံးဆၢတၢ်,ဒီးကစံးဘၣ်သု,သုဟဲလၢလဲၣ်လၢလဲၣ်န့ၣ်,ယတသ့ၣ်ညါဘၣ်သုဘၣ်. 26 တုၤနုၤတစုသုကစံး,ပဝဲဒၣ်အံၤ,ပအီၣ်တၢ်ဒီးပအီတၢ်လၢနမဲာ်ညါ,ဒီးနသိၣ်က့ၤသီက့ၤတၢ်လၢပကျဲအပူၤလီၤ. 27 ဒီးအဝဲဒၣ်ကစံး,ယစံးဘၣ်သု,သုဟဲလၢလဲၣ်လၢလဲၣ်န့ၣ်,ယတသ့ၣ်ညါဘၣ်သုဘၣ်.သုမၤတၢ်အၢတၢ်သီခဲလၢာ်သ့ၣ်ဧၢ,ဟးဖးဒီးယၤတက့ၢ်. 28 တုၤသုထံၣ်ဘၣ်စီၤအၤဘြၤဟၣ်ဒီးစီၤအံၤစဲး,ဒီးစီၤယၤကိာ်,ဒီးဝံခဲလၢာ်အိၣ်လၢယွၤအဘီအမုၢ်အပူၤ,ဒီးသုဘၣ်ဟီထီၣ်ကွံာ်လၢခိဒီး,တၢ်ဘၣ်ဟီၣ်တၢ်ဘၣ်ယၢၤဒီးတၢ်မဲအ့ၣ်တဃံးကအိၣ်ဝဲဖဲန့ၣ်လီၤ. 29 ဒီးပှၤကဟဲလၢမုၢ်နုာ်,ဒီးမုၢ်ထီၣ်,ဒီးကလံၤစိး,ဒီးကလံၤထံး,ဒီးကဆ့ၣ်နီၤလၢယွၤအဘီအမုၢ်အပူၤလီၤ. 30 ဒီးကွၢ်ကွၢ်,ပှၤအိၣ်လၢခံတဖၣ်န့ၣ်ကအိၣ်က့ၤလၢညါဒီးပှၤအိၣ်လၢညါတဖၣ်န့ၣ်,ကအိၣ်က့ၤလၢခံလီၤ.

31 တၢ်လၢမုၢ်တနံၤန့ၣ်,ပှၤဖၤရံၤၡဲတနီၤနီၤဟဲဆူအအိၣ်ဒီးစံးဘၣ်အီၤ,ဟးထီၣ်ကွံာ်ဖဲအံၤတက့ၢ်.အဂ့ၢ်ဒ်အံၤ,စီၤဟ့ၤရိာ်အသးအိၣ်လၢအကမၤသံနၤလီၤ. 32 ဒီးစံးဘၣ်အဝဲသ့ၣ်,လဲၤစံးဘၣ်တဲဘၣ်ထွံၣ်ဟီၣ်ခိၣ်အဝဲန့ၣ်,ကွၢ်ကွၢ်,မုၢ်မဆါတနံၤအံၤ,ဒီးခဲဂီၤန့ၣ်,ယဟီထီၣ်ကွံာ်တၢ်နါဒီးမၤဘျါက့ၤတၢ်ဆူးတၢ်ဆါ,ဒီးလၢသၢနံၤတနံၤန့ၣ်ယကလၢထီၣ်ပှဲၤထီၣ်လီၤ. 33 မ့မ့ၢ်မုၢ်မဆါတနံၤအံၤ,ဒီးခဲဂီၤ,ဒီးခဲတဂီၤအံၤ,ယဘၣ်လဲၤတၢ်လီၤ.အဂ့ၢ်ဒ်အံၤ,မ့တမ့ၢ်ဘၣ်လၢယရူၤၡလ့ၣ်အပူၤဘၣ်ဒီး,ဝံတုၤတၢ်ဟးဂီၤတသ့ဘၣ်လီၤ.

34 ယရူၤၡလ့ၣ်ဧၢ,ယရူၤၡလ့ၣ်ဧၢ,နဲဒၣ်အံၤ,နမၤသံဝံတဖၣ်,ဒီးပှၤလၢတၢ်မၢလီၤအီၤဆူနအိၣ်တဖၣ်နကွံာ်အီၤလၢလၢၢ်လီၤ.ဒ်ဆီမိၢ်ပှၢ်ဒုးအိၣ်ဖှိၣ်အဖိလၢအဒံးဆ့လာ်အသိးန့ၣ်,ယသးအိၣ်လၢယကဒုးအိၣ်ဖှိၣ်နဖိအဘျီဆံးအါလဲၣ်မ့မ့ၢ်သုဝဲသ့ၣ်အံၤ,သုသးတအိၣ်ဘၣ်. 35 ကွၢ်ကွၢ်,တၢ်လဲၤသဒၣ်သုဟံၣ်(အိၣ်သယုၢ်)လီၤဒီးယစံးဘၣ်တဲဘၣ်သုတီတီ,လၢသုတထံၣ်လၢၤဘၣ်ယၤတုၤလီၤလၢအမုၢ်အလါဘၣ်လၢသုကစံး,ပှၤလၢအဟဲလၢယွၤအမံၤန့ၣ်,မ်အဘၣ်တၢ်ဆိၣ်ဂ့ၤတက့ၢ်န့ၣ်လီၤ.