‏ Luke 19

1ဒီးလဲၤခီဂာ်ယရံၤဃိ, 2ဒီးကွၢ်ကွၢ်,ပှၤကိးဝဲအမံၤလၢစီၤစးဃဲအိၣ်တဂၤလီၤ.ဒီးအဝဲဒၣ်မ့ၢ်ပှၤဃ့သွဲအခိၣ်,ဒီးမ့ၢ်ပှၤအထူးအတီၤလီၤ. 3ဒီးယ့ၣ်ရှူးမ့ၢ်မတၤမတၤန့ၣ်ဃုထံၣ်ဝဲ,ဒီးထံၣ်ဝဲတသ့ဘၣ်လၢပှၤဂီၢ်မုၢ်အဃိလီၤ.အဂ့ၢ်ဒ်အံၤ,အနီၢ်ဖုၣ်လီၤ. 4ဒီးလဲၤဃ့ၢ်ဝဲလၢညါဒီးလဲၤထီၣ်လၢသိးဝံာ်ဒၢတထံးအခံဒ်သိးအကထံၣ်ဘၣ်အီၤလီၤ.အဂ့ၢ်ဒ်အံၤ,ကဟဲတ့ၢ်ဝဲလၢကျဲန့ၣ်လီၤ. 5ဒီးတုၤယ့ၣ်ရှူးလဲၤတုၤအလီၢ်ဖဲန့ၣ်ဒီး,ကွၢ်ထီၣ်ဒီးထံၣ်အီၤဒီးစံးဘၣ်အီၤ,စီၤစးဃဲဧၢ,ယုၢ်လီၤချ့ချ့တက့ၢ်.အဂ့ၢ်ဒ်အံၤ,ခဲမုၢ်ဆါအံၤယဘၣ်အိၣ်ကတီၢ်လၢနဟံၣ်ပူၤလီၤ. 6ဒီးယုၢ်လီၤချ့ချ့ဒီးတူၢ်လိာ်အီၤလၢအသူၣ်ခုသးခုလီၤ. 7ဒီးပှၤထံၣ်ဝဲဒီး,ကဒူးကဒ့ၣ်တၢ်ခဲလၢာ်ဒီးစံးဝဲဒၣ်,လၢအလဲၤနုာ်ဆူပှၤတၢ်ဒဲးဘးဖိအအိၣ်ဒ်သိးအကမံဝဲလၢအဟံၣ်ပူၤလီၤ.

8ဒီးစီၤစးဃဲဆၢထၢၣ်ဒီးစံးဘၣ်ကစၢ်န့ၣ်,ကွၢ်ကွၢ်,ကစၢ်ဧၢ,ယစုလီၢ်ယခီၣ်ခိၣ်,ခံပူန့ၣ်,ယဟ့ၣ်လီၤပှၤဖှီၣ်ဖိယာ်ဖိတပူလီၤ.ဒီးယမ့ၢ်အီၣ်ကဘျံးအီၣ်ကဘျၣ်ပှၤတဂၤအတၢ်တမံၤမံၤဒီးယဟ့ၣ်လီၤက့ၤအီၤအါန့ၢ်အလီၢ်လွံၢ်စးလီၤ. 9ဒီးယ့ၣ်ရှူးစံးဘၣ်အီၤ,တၢ်အုၣ်က့ၤခီၣ်က့ၤတုၤလၢဟံၣ်ပူၤအံၤ,လၢမုၢ်မဆါတနံၤအံၤလံ.အဂ့ၢ်ဒ်အံၤ,မ့ၢ်စ့ၢ်ကီးစီၤအၤဘြၤဟၣ်အဖိခွါလီၤ. 10အဂ့ၢ်ဒ်အံၤ,ပှၤကညီဖိခွါအံၤဟဲလီၤဝဲဒ်သိးအကဃုန့ၢ်,ဒီးအုၣ်က့ၤခီၣ်က့ၤပှၤလၢအဟါမၢ်တဖၣ်လီၤ.

11ဒီးတုၤပှၤနၢ်ဟူတၢ်န့ၣ်တဖၣ်ဒီး,မ့ၢ်အအိၣ်ဘူးဒီးယရူၤၡလ့ၣ်ဒီးပှၤဆိကမိၣ်လၢယွၤအဘီအမုၢ်ကအိၣ်ထီၣ်တကီၢ်ခါ, 12သတးဒီး,ပာ်အါထီၣ်တၢ်ကတိၤအဒိဒီးစံးဝဲဒၣ်,မတၤတဂၤပဒိၣ်တဂၤလဲၤဆူထံယံၤကီၢ်ယံၤဒ်သိးအကမၤန့ၢ်အဘီအမုၢ်,ဒီးဟဲက့ၤကဒါက့ၤလီၤ. 13ဒီးကိးန့ၢ်အခ့အပှၤအကျါဆံဆဲၣ်ဂၤ,ဒီးဟ့ၣ်လီၤအီၤလၢစ့ဆံဆဲၣ်မနါ,ဒီးစံးဘၣ်အီၤ,ကၤတၢ်တုၤလီၤလၢယဟဲက့ၤတက့ၢ်.

14ဘၣ်ဆၣ်ဒီးအထံဖိကီၢ်ဖိတဖၣ်သးဟ့အီၤ,ဒီးမၢကလူးတဖၣ်လဲၤပိာ်အခံ,ဒီးစံးဝဲဒၣ်,အဝဲတဂၤအံၤကဲစီၤပၤလၢပဖီခိၣ်,ပသးတအိၣ်ဘၣ်လီၤ. 15ဒီးတၢ်မၤအသးလၢအမၤန့ၢ်အဘီအမုၢ်ဝံၤဒီး,ဟဲက့ၤကဒါက့ၤဝဲ,ဒီးမၢပှၤကိးန့ၢ်အခ့အပှၤလၢအဟ့ၣ်လီၤတ့ၢ်အီၤလၢစ့တဖၣ်,ဒ်သိးအကသ့ၣ်ညါလၢပှၤတဂၤဒီးတဂၤမၤအါထီၣ်အတၢ်ဆံးအါဆံးအါအဂ့ၢ်န့ၣ်လီၤ. 16ဒီးအခီၣ်ထံးတဂၤဟဲဃီၤဒီးစံးဝဲဒၣ်,ကစၢ်ဧၢ,နစ့တမနါန့ၣ်,န့ၢ်အါထီၣ်စ့ဆံဆဲၣ်မနါလံလီၤ. 17ဒီးစံးဘၣ်အီၤ,ဘၣ်လံ,ကုၢ်လၢအဂ့ၤတဂၤဧၢ,မ့ၢ်နမၤနကလုၢ်တီလၢတၢ်စှၤကိာ်အပူၤဒီး,အိၣ်လၢဝ့ၢ်ဆံဆဲၣ်အဖီခိၣ်တက့ၢ်.

18ဒီးပှၤခံဂၤတဂၤဟဲဃီၤဒီးစံးဝဲဒၣ်,ကစၢ်ဧၢ,နစ့တမနါန့ၣ်,န့ၢ်အါထီၣ်စ့ယဲၢ်မနါလံ. 19ဒီးစံးစ့ၢ်ကီးလၢအီၤ,နဲဒၣ်အံၤ,အိၣ်လၢဝ့ၢ်ယဲၢ်ဝ့ၢ်အဖီခိၣ်တက့ၢ်. 20ဒီးအဂၤတဂၤဟဲဃီၤဒီးစံးဝဲဒၣ်,ကစၢ်ဧၢ,ကွၢ်,နစ့တမနါလၢယပာ်လၢတၢ်ဘိၣ်တၢ်စှၢၤအပူၤန့ၣ်တက့ၢ်. 21အဂ့ၢ်ဒ်အံၤ,ယပျံၤနၤလီၤ.အဂ့ၢ်ဒ်အံၤ,နမ့ၢ်ပှၤအကီ,ဒီးတၢ်လၢနတပာ်ဘၣ်န့ၣ်နဟံးန့ၢ်နဲ,ဒီးတၢ်လၢနတဖှံဘၣ်န့ၣ်နကူးနဲလီၤ. 22ဒီးစံးဘၣ်အီၤ,ကုၢ်လၢအအၢတဂၤဧၢ,ယကစံၣ်ညီၣ်ဃၣ်နၤလၢနထးခိၣ်ဒၣ်နဲလီၤ.နသ့ၣ်ညါလၢယမ့ၢ်ပှၤအကီ,ဒီးတၢ်လၢယတပာ်ဘၣ်န့ၣ်ယဟံးန့ၢ်ယဲ,ဒီးတၢ်လၢယတဖှံဘၣ်န့ၣ်ယကူးယဲလီၤ. 23မၤသးဒ်န့ၣ်ဒီးတုၤယဟဲက့ၤဒီးဒ်သိးယကန့ၢ်ဘၣ်ယစ့ဒီးအအ့ၣ်ထီၣ်န့ၣ်,ဘၣ်မနုၤလၢနတဒုးလိၢ်ဘၣ်ယတၢ်န့ၣ်လဲၣ်. 24ဒီးစံးဘၣ်ပှၤဆၢထၢၣ်လၢအဃၢၤတဖၣ်န့ၣ်,ဟံးန့ၢ်အစ့တမနါဒီးဟ့ၣ်လီၤပှၤလၢအအိၣ်ဒီးစ့ဆံဆဲၣ်မနါတဂၤန့ၣ်တက့ၢ်. 25(ဒီးအဝဲသ့ၣ်စံးဘၣ်အီၤ,ကစၢ်ဧၢ,အဝဲဒၣ်န့ၣ်အစ့အိၣ်ဆံဆဲၣ်မနါလံ.) 26အဂ့ၢ်ဒ်အံၤ,ယစံးဘၣ်သုလၢကယဲၢ်ပှၤလၢအတၢ်အိၣ်ဝဲန့ၣ်,တၢ်ကဟ့ၣ်အတၢ်လီၤ.ဒီးပှၤလၢအတၢ်တအိၣ်ဘၣ်န့ၣ်,ဖဲအတၢ်အိၣ်ဝဲဒီး,တၢ်ကဟံးထီၣ်ကွံာ်လၢအီၤလီၤ.

27မ့မ့ၢ်ယဒုၣ်ယဒါလၢအသးတအိၣ်ဘၣ်လၢယကကဲအစီၤပၤတဖၣ်န့ၣ်,ဟဲစိာ်အီၤဖဲအံၤ,ဒီးမၤသံအီၤလၢယမဲာ်ညါတက့ၢ်.

28ဒီးစံးတၢ်တဖၣ်န့ၣ်ဝံၤဒီး,လဲၤလၢညါလၢအကလဲၤထီၣ်ဆူယရူၤၡလ့ၣ်လီၤ. 29ဒီးတၢ်မၤအသးဖဲအလဲၤပၢၢ်လၢသဝီဘ့ၤသဖးက့ဒီးဘ့ၤသနံဖဲကစၢၢ်ကိးဝဲအမံၤလၢသ့ၣ်စၤယံးအအိၣ်ဒီး,မၢလီၤအပျဲၢ်အဘီၣ်ခံဂၤ, 30ဒီးစံးဝဲဒၣ်,လဲၤဆူသဝီအိၣ်လၢသုမဲာ်ညါတက့ၢ်.တုၤသုလဲၤနုာ်ဒီးသုကထံၣ်န့ၢ်ကသ့ၣ်ယီၤဖိလၢပှၤတဒိးဘၣ်နီတခီၣ်ဘၣ်တဒု,ဘၣ်စၢဃာ်အသးလီၤ.ဃ့ၣ်လီၤအီၤဒီးဟဲက့ၤမိၤအီၤတက့ၢ်. 31ဒီးပှၤတဂၤဂၤမ့ၢ်သံကွၢ်ဝဲ,သုဃ့ၣ်လီၤဘၣ်မနုၤလဲၣ်န့ၣ်ဒီးစံးဘၣ်အီၤဒ်အံၤ,မ့ၢ်ကစၢ်မၤအီၤအလီၢ်အိၣ်လီၤ. 32ဒီးပှၤလၢအဒိးမၢလီၤအသးတဖၣ်န့ၣ်,လဲၤဝဲဒီးထံၣ်န့ၢ်တၢ်ဒ်အစံးဘၣ်အီၤအသိးန့ၣ်လီၤ. 33ဒီးဃ့ၣ်လီၤကသ့ၣ်ယီၤဖိအဖၢမုၢ်ဒီးအကစၢ်တဖၣ်စံးဘၣ်အီၤ,သုဃ့ၣ်လီၤကသ့ၣ်ယီၤဖိန့ၣ်ဘၣ်မနုၤလဲၣ်. 34ဒီးအဝဲသ့ၣ်စံးဝဲဒၣ်,ကစၢ်မၤအီၤအလီၢ်အိၣ်လီၤ. 35ဒီးဟဲက့ၤမိၤအီၤဆူယ့ၣ်ရှူးအအိၣ်လီၤ.ဒီးဒါလီၤအကူအသိးလၢကသ့ၣ်ယီၤဖိအလိၤ,ဒီးပာ်ထီၣ်ယ့ၣ်ရှူးလၢအဖီခိၣ်လီၤ. 36ဒီးလဲၤတၢ်အဖၢမုၢ်ဒီးပှၤဒါလီၤအကူအသိးလၢကျဲပူၤလီၤ.

37တုၤအဘူးထီၣ်ဝဲ,ဒီးတုၤအလီၢ်ဖဲကစၢၢ်သ့ၣ်စၤယံးအကျဲလဲၤလီၤဝဲဒီး,အပျဲၢ်အဘီၣ်ဂီၢ်မုၢ်အသူၣ်ခုအသးခု,ဒီးသးဝံၣ်ထီၣ်ယွၤ,လၢအကလုၢ်ဖးဒိၣ်လၢကယဲၢ်တၢ်လီၤလးတဖၣ်လၢအထံၣ်တ့ၢ်ဝဲအဃိ, 38ဒီးစံးဝဲဒၣ်,စီၤပၤလၢအဟဲလၢယွၤအမံၤတဂၤန့ၣ်,မ်အဘၣ်ဆိၣ်ဂ့ၤတက့ၢ်.တၢ်ဃူတၢ်ဖိးအိၣ်လၢမူခိၣ်,ဒီးတၢ်လၤကပီၤအိၣ်လၢတၢ်ထီၣ်ထီကတၢၢ်လီၤ.

39ဒီးပှၤဖၤရံၤၡဲအိၣ်လၢပှၤဂီၢ်မုၢ်အကျါတနီၤနီၤစံးဘၣ်အီၤ,သရၣ်ဧၢ,ဒူနပျဲၢ်နဘီၣ်အလိၤတက့ၢ်. 40ဒီးကတိၤဆၢတၢ်ဒီးစံးဘၣ်အီၤ,ယစံးဘၣ်သုလၢပှၤတဖၣ်န့ၣ်မ့ၢ်အိၣ်ဘှီၣ်ဝဲဒီးလၢၢ်တဖၣ်န့ၣ်ကကိးပသူထီၣ်လီၤ.

41ဒီးလဲၤဘူးထီၣ်ဒီးကွၢ်ဝ့ၢ်န့ၣ်,ဒီးအမဲာ်ထံလီၤလၢအဃိ, 42ဒီးစံးဝဲဒၣ်,နမ့ၢ်သ့ၣ်ညါနဲဒၣ်လဲာ်တၢ်လၢအဘၣ်ဃးဒီးနတၢ်ဃူတၢ်ဖိးလၢနနံၤနသီအံၤအပူၤဒီး,ဂ့ၤလၢနဂီၢ်လီၤ.မ့မ့ၢ်ခဲကနံၣ်အံၤအိၣ်တဒၢလၢနမဲာ်လီၤ. 43အဂ့ၢ်ဒ်အံၤ,မုၢ်နံၤတဖၣ်ကဘၣ်နၤဒီး,နဒုၣ်နဒါကမၤတၢ်အခိၣ်ဒူဝးတရံးနၤ,ဒီးကကဝီၤဃာ်နၤ,ဒီးကတြီနၤတပူၤလၢ်လၢ်, 44ဒီးကမၤနၤဒီးနဖိအိၣ်လၢနပူၤန့ၣ်လီၤဒါဒီးဟီၣ်ခိၣ်,ဒီးလၢၢ်တဖျၢၣ်လၢလၢၢ်အဖီခိၣ်န့ၣ်,တဒုးအိၣ်လီၤတဲာ်ဘၣ်နီတဖျၢၣ်ဘၣ်.အဂ့ၢ်ဒ်အံၤ,တၢ်ဟဲအံးက့ၤကွၢ်က့ၤနၤအမုၢ်အလါန့ၣ်,နတသ့ၣ်ညါဘၣ်.

45ဒီးလဲၤနုာ်ဆူတၢ်လုၢ်အဟံၣ်ပူၤ,ဒီးဟီထီၣ်ကွံာ်ပှၤပှ့ၤတၢ်ဒီးဆါတၢ်လၢအပူၤ, 46ဒီးစံးဘၣ်အီၤ,တၢ်ကွဲးအသး,ယဟံၣ်မ့ၢ်တၢ်ဘါထုကဖၣ်အဟံၣ်လီၤ.မ့မ့ၢ်သုဝဲသ့ၣ်အံၤ,သုမၤလံမးအီၤလၢတၢ်ဟုၣ်တၢ်ဘျၣ်အပူၤလီၤ. ▼

▼19:46 ၡါ.၅၆း၇,ယံး.၇း၁၁

47ဒီးသိၣ်က့ၤသီက့ၤတၢ်လၢတၢ်လုၢ်အဟံၣ်ပူၤသ့သ့တနံၤလီၤ.ဒီးပှၤလုၢ်တၢ်အခိၣ်ဒီးပှၤကွဲးလံာ်,ဒီးပှၤအဒိၣ်အပှၢ်သ့ၣ်တဖၣ်န့ၣ်,ဃုမၤသံအီၤလီၤ. 48ဒီးကမၤအီၤဒ်လဲၣ်ဒ်လဲၣ်န့ၣ်,ဃုဝဲတဘၣ်ဘၣ်.အဂ့ၢ်ဒ်အံၤ,ပှၤဂီၢ်မုၢ်ဒိကနၣ်အကလုၢ်ဒီးအသးစဲဘူးဒီးအီၤခဲလၢာ်လီၤ.