‏ Luke 21

1ဒီးကွၢ်ထီၣ်ဝဲ,ဒီးထံၣ်ပှၤအထူးအတီၤတဖၣ်တ့ၢ်လီၤအတၢ်ဟ့ၣ်လၢစ့ပာ်ဖှိၣ်အလီၢ်ပူၤလီၤ. 2ဒီးထံၣ်စ့ၢ်ကီးပှၤအဖှီၣ်အယာ်မုၣ်ကမဲတဂၤ,ဟဲတ့ၢ်လီၤတိၢ်အကးခံဘ့ၣ်လီၤ. 3ဒီးစံးဝဲဒၣ်,ယစံးဘၣ်သုနီၢ်နီၢ်လၢပှၤအဖှီၣ်အယာ်မုၣ်ကမဲတဂၤအံၤ,တ့ၢ်လီၤတၢ်အါန့ၢ်ပှၤတဖၣ်န့ၣ်ခဲလၢာ်တက့ၢ်လီၤ. 4အဂ့ၢ်ဒ်အံၤ,ပှၤတဖၣ်န့ၣ်ခဲလၢာ်ဟံးန့ၢ်ဝဲလၢအတၢ်ပှဲၤလုၣ်ကွံာ်အဘျဲၣ်,ဒီးတ့ၢ်လီၤလၢတၢ်ဟ့ၣ်လၢယွၤန့ၣ်လီၤ.မ့မ့ၢ်ပိာ်မုၣ်တဂၤအံၤဟံးန့ၢ်ဝဲလၢအတၢ်တလၢတပှဲၤဘၣ်အပူၤ,ဒီးတ့ၢ်လီၤတၢ်လၢအဘုၣ်အီၣ်ဘုၣ်အီအသးခဲလၢာ်လီၤ.

5ပှၤတနီၤနီၤကတိၤတၢ်လၢတၢ်လုၢ်အဟံၣ်အဂ့ၢ်,လၢတၢ်ကယၢကယဲလၢၢ်အဂ့ၤ,ဒီးတၢ်မၤဘူၣ်တဖၣ်,ဒီးအဝဲဒၣ်စံးဝဲ, 6တၢ်လၢသုထံၣ်တဖၣ်အံၤ,အနံၤအသီကဘၣ်လၢလၢၢ်ဖဲလၢၢ်အဖီခိၣ်,လၢတၢ်တမၤလီၤပှီၢ်ကွံာ်ဘၣ်န့ၣ်,တအိၣ်လီၤတဲာ်ဘၣ်နီတဖျၢၣ်ဘၣ်. 7ဒီးအဝဲသ့ၣ်သံကွၢ်အီၤဒီးစံးဝဲဒၣ်,သရၣ်ဧၢ,တၢ်န့ၣ်တဖၣ်ကမၤအသးအခါဖဲလဲၣ်,ဒီးတုၤအကမၤအသးဘူးထီၣ်ဒီး,တၢ်ပနီၣ်လီၤလးကမၤအသးလၢမနုၤတမံၤလဲၣ်.

8ဒီးအဝဲဒၣ်စံးဝဲ,ဒ်သိးပှၤသုတလီန့ၢ်သုတဂ့ၤဒီး,ပလီၢ်သုသးတက့ၢ်.အဂ့ၢ်ဒ်အံၤ,ပှၤကဟဲဝဲလၢယမံၤအါဂၤ,ဒီးကစံးဝဲ,ယၤအံၤလီၤ.ဒီးအဆၢအကတီၢ်ဘူးထီၣ်လံ.မၤသးဒ်န့ၣ်ဒီး,သုတပိာ်အခံတဂ့ၤ. 9ဒီးတုၤသုနၢ်ဟူတၢ်ဒုးသုးဒုးသံၣ်,ဒီးတၢ်တၢထီၣ်တၢလီၤအဂ့ၢ်ဒီး,ပျံၤတၢ်တဂ့ၤ.အဂ့ၢ်ဒ်အံၤ,တၢ်န့ၣ်တဖၣ်ဘၣ်မၤဆိအသးလီၤ.မ့မ့ၢ်အကတၢၢ်တအိၣ်ဒံးဘၣ်တကီၢ်ခါဘၣ်.

10တုၤနုၤတစုစံးဘၣ်အီၤ,ပှၤကညီတကလုာ်ဒီးတကလုာ်,တဘီမုၢ်ဒီးတဘီမုၢ်ကထီဒါလိာ်အသးလီၤ. 11ဒီးဟီၣ်ခိၣ်ကဟူးဝးဆှဲးဆှိးနးနးကလဲာ်လၢအံၤတပူၤလၢနုၤတပူၤ,ဒီးတၢ်အိၣ်ဝံၤအိၣ်စ့ၤ,ဒီးတၢ်ဆါသံသတြိာ်ကအိၣ်ထီၣ်ဝဲလီၤ.ဒီးတၢ်ပနီၣ်ဖးဒိၣ်လၢအလီၤပျံၤလီၤဖုးန့ၣ်ကအိၣ်ထီၣ်ဝဲလၢမူကပိာ်လိၤလီၤ. 12ဘၣ်ဆၣ်ဒီး,တၢ်န့ၣ်တဖၣ်တချုးမၤဒံးဘၣ်အသးခဲလၢာ်ဒီး,ပှၤကပာ်အစုလၢသုလိၤ,ဒီးကမၤအၢမၤနးသု,ဒီးကဟ့ၣ်လီၤကွံာ်သုဆူဘူၣ်ဘျီၣ်ပူၤ,ဒီးဆူဃိာ်ပူၤ,ဒီးကလဲၤမိၤသုဆူစီၤပၤဒီးပဒိၣ်ပပှၢ်အအိၣ်,လၢယမံၤအဃိလီၤ. 13ဒီးကကဲလၢတၢ်အုၣ်အသးလၢသုဂီၢ်လီၤ.

14မၤသးဒ်န့ၣ်ဒီးဒ်သိးသုကကတိၤပူၤဖျဲးတၢ်ဒ်အံၤဒ်နုၤဒီး,တိၢ်သုသးလၢသုသုတဆိကမိၣ်ပာ်တဂ့ၤန့ၣ်တက့ၢ်. 15အဂ့ၢ်ဒ်အံၤ,ယကဟ့ၣ်သုထးခိၣ်,ဒီးတၢ်ကူၣ်သ့လၢသုဒုၣ်သုဒါတဖၣ်န့ၣ်ဂ့ၢ်လိာ်ဘှီလိာ်တသ့ဘၣ်နီတဂၤဘၣ်လီၤ. 16ဒီးသုမိၢ်သုပၢ်,ဒီးသုပုၢ်သုဝဲၢ်,ဒီးသုဘူးသုတံၢ်,ဒီးသုတံၤသုသကိးတဖၣ်န့ၣ်,ကဟ့ၣ်လီၤကွံာ်သု,ဒီးကမၤသံကွံာ်သုတနီၤနီၤလီၤ. 17ဒီးပှၤကသးဟ့သုလၢယမံၤအဃိခဲလၢာ်လီၤ. 18မ့မ့ၢ်သုခိၣ်သူတဘိဧိၤတဟါမၢ်ဘၣ်ဝဲဘၣ်. 19မၤန့ၢ်သုသးလၢသုတၢ်ဝံသးစူၤန့ၣ်တက့ၢ်. 20ဒီးတုၤသုထံၣ်သုးမုၢ်သံၣ်ဘိဝီၤဃာ်ယရူၤၡလ့ၣ်ဒီး,သ့ၣ်ညါလၢအတၢ်အိၣ်သယုၢ်ဘူးထီၣ်လံန့ၣ်တက့ၢ်. 21တုၤနုၤတစုပှၤအိၣ်လၢကီၢ်ယူဒၤတဖၣ်န့ၣ်,မ်အဃ့ၢ်စံၣ်ဆူကစၢၢ်ကလိတက့ၢ်.ဒီးပှၤအိၣ်လၢအသးကံၢ်ပူၤတဖၣ်န့ၣ်,မ်အဟးဆူခိတက့ၢ်.ဒီးပှၤအိၣ်လၢခိတဖၣ်န့ၣ်,မ်အသုတက့ၤနုာ်လၢအပူၤတဂ့ၤ. 22အဂ့ၢ်ဒ်အံၤ,တၢ်လၢမုၢ်နံၤတဖၣ်န့ၣ်,မ့ၢ်ဟ့ၣ်ကၣ်တၢ်အမုၢ်နံၤ,ဒ်သိးကယဲၢ်တၢ်ကွဲးအသးခဲလၢာ်ကလၢထီၣ်ပှဲၤထီၣ်ဝဲလီၤ.

23ဒီးလၢမုၢ်နံၤတဖၣ်န့ၣ်,ပှၤလၢအဒၢထီၣ်,ဒီးပှၤလၢအဒုးအီၣ်နုၢ်တၢ်တဖၣ်န့ၣ်ဘၣ်အဖှီၣ်လီၤ.အဂ့ၢ်ဒ်အံၤ,တၢ်ဖှီၣ်ဖးဒိၣ်ကဘၣ်ကီၢ်တဘ့ၣ်အံၤ,ဒီးတၢ်သးထီၣ်ကဘၣ်ပှၤတကလုာ်အံၤလီၤ. 24အဝဲသ့ၣ်တဖၣ်န့ၣ်ကဘၣ်သံလၢနးအကနၣ်,ဒီးတၢ်ကစိာ်မၢကဲကုၢ်အီၤဆူပှၤကိးကလုာ်ဒဲးအကျါ,ဒီးတၢ်ကယီၢ်တံၢ်ဝ့ၢ်ယရူၤၡလ့ၣ်တုၤလီၤလၢပှၤကလုာ်အဂၤအမုၢ်အလါကလၢထီၣ်ပှဲၤထီၣ်လီၤ.

25ဒီးတၢ်ပနီၣ်လီၤလးကအိၣ်ထီၣ်လၢမုၢ်အလိၤ,ဒီးလါအလိၤ,ဒီးဆၣ်ဧိၤဖီဧိၤအလိၤ,ဒီးတၢ်ကီတၢ်ခဲ,တၢ်ကိၢ်တၢ်ဂီၤ,ကဘၣ်ပှၤကညီအကလုာ်ကလုာ်လၢဟီၣ်ခိၣ်ချၢလီၤ.ဒီးပီၣ်လဲၣ်ဒီးလပီတဖၣ်ကသီၣ်ဝဲလီၤ. 26မ့ၢ်ပှၤကညီပျံၤတၢ်,ဒီးဘၣ်ယိၣ်တၢ်လၢတၢ်ကမၤအသးလၢဟီၣ်ခိၣ်အဂ့ၢ်သတးဒီး,ကသံတ့ၢ်လီၤ.အဂ့ၢ်ဒ်အံၤ,မူခိၣ်အစိအကမီၤတဖၣ်န့ၣ်ကဟူးကဝးလီၤ. 27တုၤနုၤတစု,ပှၤကထံၣ်ဘၣ်ပှၤကညီဖိခွါအံၤဟဲလၢတၢ်အၢၣ်အပူၤအိၣ်ဒီးအစိအကမီၤ,ဒီးအလၤဒိၣ်အကပီၤဒိၣ်လီၤ. 28ဒီးတုၤတၢ်န့ၣ်တဖၣ်မၤအသးဒီး,မ့ၢ်တၢ်အုၣ်က့ၤခီၣ်က့ၤသုအမုၢ်အလါဘူးထီၣ်သတးဒီး,ကွၢ်ထီၣ်ဒီးမိာ်ထီၣ်သုခိၣ်တက့ၢ်.

29ဒီးစံးဘၣ်အီၤလၢတၢ်ကတိၤဒိ,ချၢၣ်ဒၢဒီးသ့ၣ်ခဲလၢာ်န့ၣ်,ကွၢ်အီၤတက့ၢ်. 30တုၤအလၣ်ဒိးထီၣ်ဒီး,သုထံၣ်,ဒီးသုသ့ၣ်ညါသုဝဲလၢတၢ်ကိၢ်အခါဘၣ်ဘူးတ့ၢ်လံ. 31ဒ်န့ၣ်အသိးတုၤသုထံၣ်တၢ်တဖၣ်န့ၣ်မၤအသးဒီး,သ့ၣ်ညါလၢယွၤအဘီအမုၢ်အိၣ်ဘူးထီၣ်လံန့ၣ်တက့ၢ်. 32ယစံးဘၣ်သုတီတီလၢပှၤတစိၤအံၤတချုးပူၤကွံာ်ဒံးဘၣ်ဒီး,တၢ်တဖၣ်န့ၣ်ကမၤအသးခဲလၢာ်လီၤ. 33မူခိၣ်ဒီးဟီၣ်ခိၣ်ကပူၤကွံာ်လီၤ.မ့မ့ၢ်ယတၢ်ကတိၤအံၤတပူၤကွံာ်ဘၣ်.

34ပလီၢ်သုသးတက့ၢ်.မ့တမ့ၢ်ဘၣ်ဒ်န့ၣ်ဒီး,သုသးကဃၢဒီးတၢ်အီၣ်လုၣ်ကိအီလုၣ်ကိတၢ်,ဒီးလၢအအံၤတဃၣ်အတၢ်ဘၣ်ယိၣ်ဘၣ်ဘီသတးဒီး,မုၢ်တနံၤန့ၣ်ကဘၣ်သုလၢသုတဆိကမိၣ်ဘၣ်အကတီၢ်လီၤ. 35အဂ့ၢ်ဒ်အံၤ,ကဟဲဘၣ်ကယဲၢ်ပှၤအိၣ်လၢဟီၣ်ခိၣ်ချၢဒီဘ့ၣ်ညါ,ဒ်တစိးအသိးန့ၣ်လီၤ. 36မၤသးဒ်န့ၣ်ဒီး,ဒ်သိးတၢ်ကပာ်သုလၢသုဂ့ၤပူၤဖျဲးဒီးတၢ်လၢအကမၤအသးတဖၣ်ခဲလၢာ်,ဒီးလၢသုဂ့ၤဆၢထၢၣ်လၢပှၤကညီဖိခွါအမဲာ်ညါဒီး,ဆိးသီဒီးဘါထုကဖၣ်တၢ်ကိးအကတီၢ်ဒဲးတက့ၢ်.

37ဒီးသိၣ်တၢ်သီတၢ်လၢမဆါခီလၢတၢ်လုၢ်အဟံၣ်ပူၤ,ဒီးလဲၤအိၣ်လၢမုၢ်နၤလၢကစၢၢ်ကိးဝဲအမံၤလၢသ့ၣ်စၤယံးအလိၤလီၤ. 38ဒီးပှၤဂီၢ်မုၢ်ခဲလၢာ်ဟဲဆူအအိၣ်ဂီၤဂီၤလၢတၢ်လုၢ်အဟံၣ်ပူၤဒ်သိးကဒိကနၣ်တၢ်လီၤ.