‏ Luke 23

1ဒီးပှၤဂီၢ်မုၢ်ခဲလၢာ်န့ၣ်ဂဲၤဆၢထၢၣ်,ဒီးဆှၢအီၤဆူစီၤပံၤလးအအိၣ်လီၤ. 2ဒီးပာ်တၢ်ကမၣ်လၢအလိၤဒီးစံးဝဲဒၣ်,အဝဲတဂၤအံၤ,ပထံၣ်န့ၢ်အီၤလၢအဒုးလီၤကမၣ်ပှၤတကလုာ်အံၤ,ဒီးတြီပှၤဟ့ၣ်သွဲလၢကဲစၢ်,ဒီးစံးလီၤအသးလၢခရံာ်,စီၤပၤတဂၤလီၤ. 3ဒီးစီၤပံၤလးသံကွၢ်အီၤဒီးစံးဝဲဒၣ်,နဲဒၣ်အံၤနမ့ၢ်ပှၤယူဒၤဖိအစီၤပၤန့ၣ်ဧါ.ဒီးအဝဲဒၣ်ကတိၤဆၢအီၤဒီးစံးဝဲဒၣ်,နစံးလံတၢ်လံ. 4ဒီးစံးဘၣ်ပှၤလုၢ်တၢ်အခိၣ်ဒီးပှၤဂီၢ်မုၢ်တဖၣ်န့ၣ်,အဝဲတဂၤအံၤ,ယတထံၣ်န့ၢ်ဘၣ်တၢ်ကမၣ်လၢအလိၤနီတမံၤဘၣ်. 5ဒီးအဝဲသ့ၣ်ပာ်အသးဆူၣ်န့ၢ်အလီၢ်တက့ၢ်.ဒီးစံးဝဲဒၣ်,အဝဲတဂၤအံၤ,သိၣ်က့ၤသီက့ၤတၢ်လၢကီၢ်ယူဒၤဒီကီၢ်ညါ,လၢကၤလံၤလါတုၤဖဲအံၤ,ဒီးသဆၣ်ထီၣ်ပှၤဂီၢ်မုၢ်အခံလီၤ.

6ဒီးစီၤပံၤလးနၢ်ဟူလၢကၤလံၤလါတဘီဒီး,သံကွၢ်ဝဲ,ပှၤအံၤမ့ၢ်ပှၤကၤလံၤလါဖိဧါ. 7ဒီးတုၤအသ့ၣ်ညါလၢအဘၣ်ဃးဒီးစီၤဟ့ၤရိာ်အစိအကမီၤ,ဒီးမ့ၢ်လၢစီၤဟ့ၤရိာ်အိၣ်လၢယရူၤၡလ့ၣ်လၢမုၢ်နံၤတဖၣ်န့ၣ်သတးဒီး,မၢအလဲၤဆူအအိၣ်လီၤ.

8ဒီးတုၤစီၤဟ့ၤရိာ်ထံၣ်ဘၣ်ယ့ၣ်ရှူးဒီး,အသးခုဒိၣ်မးလီၤ.အဂ့ၢ်ဒ်အံၤ,နၢ်ဟူတ့ၢ်အဂ့ၢ်အကျိၤအါမံၤ,ဒီးတၢ်မိၣ်ထံၣ်ဘၣ်အသးလၢအီၤဃဲးဃဲး,ဒီးမုၢ်လၢ်ဝဲလၢအကထံၣ်တၢ်လီၤလးမၤအသးလၢအီၤတမံၤမံၤလီၤ. 9ဒီးသံကွၢ်အီၤလၢတၢ်ကတိၤအါဘီ,ဒီးအဝဲဒၣ်တစံးဆၢဘၣ်အီၤနီတဘီဘၣ်. 10ဒီးပှၤလုၢ်တၢ်အခိၣ်ဒီးပှၤကွဲးလံာ်သ့ၣ်တဖၣ်,ဆၢထၢၣ်ဒီးပာ်ထီၣ်တၢ်ကမၣ်လၢအလိၤနးမးလီၤ. 11ဒီးစီၤဟ့ၤရိာ်ဒီးအပှၤသုးဖိတဖၣ်,မၤအီၤတရီတပါ,ဒီးဒုၣ်ဒွဲၣ်အီၤ,ဒီးဒုးသိးထီၣ်အဆ့ကပြုၢ်ကပြီၤ,ဒီးဒုးက့ၤက့ၤအီၤဆူစီၤပံၤလးအအိၣ်လီၤ. 12ဒီးလၢမုၢ်တနံၤန့ၣ်,စီၤပံၤလးဒီးစီၤဟ့ၤရိာ်ဘၣ်လိာ်က့ၤအသးလီၤ.အဂ့ၢ်ဒ်အံၤ,လၢထံးလၢမကိာ်န့ၣ်,ထီဒါလိာ်အသးလီၤ.

13ဒီးစီၤပံၤလးကိးဖှိၣ်ပှၤလုၢ်တၢ်အခိၣ်ဒီးပဒိၣ်ပပှၢ်ဒီးပှၤဂီၢ်မုၢ်တဖၣ်, 14ဒီးစံးဘၣ်အီၤ,သုဟဲဆှၢပှၤတဂၤအံၤဆူယအိၣ်ဒ်ပှၤလၢအဒုးလီၤကမၣ်ပှၤဂီၢ်မုၢ်အသိးလီၤ.ဒီးကွၢ်ကွၢ်,ယသံကွၢ်သံဒိးအီၤလၢသုမဲာ်ညါဘၣ်ဆၣ်ဒီး,တၢ်ကမၣ်လၢသုပာ်လၢအလိၤန့ၣ်,ယတထံၣ်န့ၢ်ဘၣ်နီတမံၤဘၣ်. 15လၢန့ၣ်အမဲာ်ညါ,စီၤဟ့ၤရိာ်တထံၣ်ဘၣ်.အဂ့ၢ်ဒ်အံၤ,ယမၢသုလဲၤဆူအအိၣ်,ဒီးကွၢ်ကွၢ်,တၢ်ဂ့ၤဘၣ်သံန့ၣ်,တမၤဘၣ်ဝဲနီတမံၤဘၣ်. 16မၤသးဒ်န့ၣ်ဒီးယကသိၣ်ဃီၣ်အီၤဒီး,ယကပျၢ်အီၤလီၤ. 17(အဂ့ၢ်ဒ်အံၤ,လၢဘူၣ်ပူၤန့ၣ်,ဘၣ်ပျၢ်ပှၤတဂၤဂၤလၢအဂီၢ်လီၤ.) 18ဒီးအဝဲသ့ၣ်ကိးပသူထီၣ်တဘျီဃီဒီးစံးဝဲဒၣ်,အအံၤတဂၤမၤကွံာ်,ဒီးပျၢ်န့ၢ်ပှၤလၢစီၤဘၤရးဘါတက့ၢ်. 19စီၤဘၤရးဘါန့ၣ်မ့ၢ်ပှၤလၢအမၤတၢထီၣ်တၢလီၤတၢ်လၢဝ့ၢ်ပူၤဒီးမၤသံပှၤကညီအဃိဒီး,လီၤဘၣ်လၢဃိာ်ပူၤလီၤ.

20မၤသးဒ်န့ၣ်ဒီးစီၤပံၤလးမိၣ်ပျၢ်အသးလၢယ့ၣ်ရှူးဒီး,ကတိၤထီၣ်ကဒီးလၢအဝဲသ့ၣ်လီၤ. 21ဘၣ်ဆၣ်ဒီးအဝဲသ့ၣ်ကိးပသူထီၣ်ဒီးစံးဝဲဒၣ်,ပျၤထီကွံာ်အီၤလၢထူၣ်စုညါအလိၤတက့ၢ်.ပျၤထီကွံာ်အီၤလၢထူၣ်စုညါအလိၤတက့ၢ်. 22ဒီးအဝဲဒၣ်စံးဘၣ်အီၤသၢစုတစု,ဘၣ်မနုၤလဲၣ်.မ့ၢ်အမၤကမၣ်တၢ်မနုၤတမံၤလဲၣ်.တၢ်ကမၣ်လၢဘၣ်သံအဂ့ၢ်န့ၣ်,ယတထံၣ်န့ၢ်ဘၣ်လၢအလိၤဘၣ်.မၤသးဒ်န့ၣ်ဒီးယကသိၣ်ဃီၣ်အီၤ,ဒီးယကပျၢ်ကွံာ်အီၤလီၤ. 23ဘၣ်ဆၣ်ဒီးအဝဲသ့ၣ်ဂုာ်မၤဝဲလၢအကလုၢ်ဖးဒိၣ်,ဒီးဃ့လၢအကဘၣ်တၢ်ပျၤထီအီၤလၢထူၣ်စုညါအလိၤလီၤ.ဒီးပှၤတဖၣ်အကလုၢ်,ဒီးပှၤလုၢ်တၢ်အခိၣ်တဖၣ်အကလုၢ်,မၤနၢၤတၢ်လီၤ. 24ဒီးဒ်အဝဲသ့ၣ်ဃ့တၢ်အသိး,စီၤပံၤလးစံၣ်ညီၣ်ဝဲ, 25ဒီးပျၢ်ကွံာ်ပှၤလၢအမၤတၢ်တၢထီၣ်တၢလီၤတၢ်,ဒီးမၤသံပှၤကညီဒီးလီၤဘၣ်လၢဃိာ်ပူၤ,လၢအဝဲသ့ၣ်ဃ့အီၤတဂၤန့ၣ်,မ့မ့ၢ်ဟ့ၣ်လီၤကွံာ်ယ့ၣ်ရှူး,ဒ်အဝဲသ့ၣ်အသးအသိးန့ၣ်လီၤ.

26ဒီးဆှၢအီၤအဖၢမုၢ်ဒီး,ဟံးဃာ်ပှၤကူၤရ့ၤန့ဖိ,စီၤၡံမိၣ်,ဟဲလၢပှၢ်လၢ်ကျါတဂၤ,ဒီးပာ်ထူၣ်စုညါလၢအလိၤ,ဒ်သိးအကယိးဝဲ,ဒီးပိာ်ယ့ၣ်ရှူးအခံလီၤ. 27ဒီးပှၤဂီၢ်မုၢ်ဖးဒိၣ်,ဒီးပိာ်မုၣ်တဖၣ်ပိာ်ထီၣ်အခံ,ဒီးဒဲလီၤအသးနါပှၢ်,ဒီးဟီၣ်တၢ်ယၢၤတၢ်လၢအဃိလီၤ. 28ဒီးယ့ၣ်ရှူးဃၣ်ဃီၤအသးဆူအအိၣ်ဒီးစံးဝဲဒၣ်,ပှၤယရူၤၡလ့ၣ်ဖိမုၣ်သ့ၣ်ဧၢ,ဟီၣ်လၢယဃိတဂ့ၤ,ဟီၣ်လၢသုဃိဒၣ်သုဝဲ,ဒီးလၢသုဖိအဃိတက့ၢ်. 29အဂ့ၢ်ဒ်အံၤ,ကွၢ်ကွၢ်,မုၢ်နံၤတဖၣ်ကဘၣ်လၢပှၤကစံးဝဲ,ပှၤတူာ်ဖိပိာ်မုၣ်,ဒီးပှၤဒၢလီၢ်လၢအတဒၢထီၣ်နီတဘျီဘၣ်,ဒီးပှၤနုၢ်ခိၣ်မီၣ်လၢအတဒုးအီၣ်နုၢ်ဘၣ်နီတဘျီဘၣ်တဖၣ်န့ၣ်,ဘၣ်ဆိၣ်ဂ့ၤဝဲလီၤ. 30တုၤနုၤတစု,အဝဲသ့ၣ်ကစံးဘၣ်ကစၢၢ်ကလိ,လီၤတဲာ်လၢပလိၤတက့ၢ်.ဒီးကစံးဘၣ်တၢ်စိခိၣ်,မၤဘၢပှၤတက့ၢ်. 31အဂ့ၢ်ဒ်အံၤ,ပှၤမ့ၢ်မၤသ့ၣ်သံကစဲာ်ဒ်အံၤဒီး,ကမၤတၢ်ဃ့ဒ်လဲၣ်.

32ဒီးတၢ်မိၤထီၣ်ဃုာ်ဒီးအီၤစ့ၢ်ကီးပှၤမၤအၢတၢ်ခံဂၤ,ဒ်သိးအကဘၣ်တၢ်မၤသံအီၤလီၤ. 33ဒီးလဲၤဝဲတုၤလၢအလီၢ်ကိးဝဲလၢကရၤနံ,ဒီးပှၤပျၤထီအီၤဖဲန့ၣ်,ဒီးပှၤမၤအၢတၢ်ခံဂၤ,တဂၤလၢစုထွဲ,ဒီးတဂၤလၢစုစ့ၣ်လၢထူၣ်စုညါအလိၤလီၤ. 34ဒီးယ့ၣ်ရှူးစံးဝဲဒၣ်,ပၢ်ဧၢ,ပျၢ်အတၢ်ဒဲးဘးတက့ၢ်.အဂ့ၢ်ဒ်အံၤ,မ့ၢ်အမၤဝဲဒ်လဲၣ်ဒ်လဲၣ်န့ၣ်တသ့ၣ်ညါဘၣ်.ဒီးပှၤဖးဝဲသတးဒီး,နီၤဖးအကူအသိးအဆၢလီၤ.

35ဒီးပှၤဂီၢ်မုၢ်အိၣ်ဆၢထၢၣ်ကွၢ်တၢ်တကူၢ်သ့ၣ်လီၤ.ဒီးပှၤတဖၣ်န့ၣ်,ဒီးပဒိၣ်ပပှၢ်န့ၣ်,ဒုၣ်ဒွဲၣ်တၢ်ဒီးစံးဝဲဒၣ်,အုၣ်က့ၤခီၣ်က့ၤပှၤဂၤလီၤ.အဝဲဒၣ်မ့မ့ၢ်ခရံာ်,ပှၤလၢယွၤဃုထၢအီၤတဂၤဒီး,မ်အအုၣ်က့ၤခီၣ်က့ၤဒၣ်အသးတက့ၢ်. 36ဒီးပှၤသုးဖိလဲၤဆူအအိၣ်,ဒီးဟ့ၣ်ဒုးအီအီၤလၢတၤဆံၣ်အထံ,ဒီးဒုၣ်ဒွဲၣ်စ့ၢ်ကီးအီၤ, 37ဒီးစံးဝဲဒၣ်,နမ့မ့ၢ်ပှၤယူဒၤဖိအစီၤပၤဒီး,အုၣ်က့ၤခီၣ်က့ၤဒၣ်နသးတက့ၢ်. 38ဒီးလံာ်ဒုးနဲၣ်တၢ်,အိၣ်ကွဲးအသးလၢဟ့းလ့ၣ်အကျိာ်,ဒီးရိမ့ၤအကျိာ်,ဒီးဧ့ၤဘြံၤအကျိာ်,ဘၣ်စဲထီၣ်ဝဲလၢအဖီခိၣ်,အအံၤတဂၤမ့ၢ်ပှၤယူဒၤဖိအစီၤပၤလီၤ.

39ဒီးပှၤမၤအၢတၢ်လၢအဘၣ်ပျၤထီဝဲ,ဒုၣ်ဒွဲၣ်အီၤတဂၤဒီးစံးဝဲဒၣ်,နမ့မ့ၢ်ခရံာ်န့ၣ်ဒီး,အုၣ်က့ၤခီၣ်က့ၤနသးဒီးပှၤတက့ၢ်. 40မ့မ့ၢ်အဝဲတဂၤကတိၤဆၢတၢ်,ဒီးဒူအလိၤ,ဒီးစံးဝဲဒၣ်,နဘၣ်တၢ်စံၣ်ညီၣ်တမံၤဃီန့ၣ်ဒီး,နတပျံၤဘၣ်ယွၤဘၣ်ဧါ. 41ဒီးပဝဲဒၣ်အံၤပဘၣ်တၢ်စံၣ်ညီၣ်တီတီလီၤ.အဂ့ၢ်ဒ်အံၤ,ပဘၣ်တၢ်ဖဲပဂ့ၤဘၣ်လၢပမၤတၢ်အဃိလီၤ.မ့မ့ၢ်အဝဲတဂၤအံၤတမၤကမၣ်ဘၣ်တၢ်နီတမံၤဘၣ်. 42ဒီးစံးဘၣ်ယ့ၣ်ရှူး,ကစၢ်ဧၢ,တုၤနဟဲလၢနဘီနမုၢ်အပူၤဒီး,သ့ၣ်နီၣ်ထီၣ်က့ၤယၤတက့ၢ်. 43ဒီးယ့ၣ်ရှူးစံးဘၣ်အီၤ,ယစံးဘၣ်နၤတီတီအံၤ,ခဲမုၢ်ဆါအံၤနကအိၣ်ဒီးယၤလၢပၤရဒံစူးအပူၤလီၤ.

44ဒီးဘၣ်ဃုနၣ်ရံၣ်ဃၣ်ဃၣ်,ဒီးတၢ်ခံးမးလၢကီၢ်ဒီဘ့ၣ်ညါတုၤလီၤလၢခွံနၣ်ရံၣ်လီၤ. 45ဒီးမုၢ်ခံးလီၤဝဲ,ဒီးတၢ်လုၢ်ဟံၣ်အယၣ်ဘျးလီၤအသးန့ၣ်,သ့ၣ်ဖးထီၣ်လၢအသးကံၢ်ပူၤလီၤ. 46ဒီးယ့ၣ်ရှူးကိးပသူထီၣ်လၢအကလုၢ်ဖးဒိၣ်ဒီးစံးဝဲဒၣ်,ပၢ်ဧၢ,ယဟ့ၣ်လီၤယသးလၢနစုပူၤလီၤ. ▼

▼23:46 စံး.၃၁း၅

ဒီးစံးတၢ်န့ၣ်ဝံၤဒီး,အသးဟးထီၣ်ကွံာ်လီၤ.

47ဒီးပှၤသုးဖိတကယၤအခိၣ်,ထံၣ်တၢ်မၤအသးသတးဒီး,စံးထီၣ်ပတြၢၤယွၤဒီးစံးဝဲဒၣ်,တၢ်လၢပှၤတဂၤအံၤ,မ့ၢ်မးပှၤအတီလီၤ. 48ဒီးကယဲၢ်ပှၤခဲလၢာ်လၢအဟဲအိၣ်ဖှိၣ်ကွၢ်ကီတၢ်န့ၣ်,တုၤအထံၣ်တၢ်မၤအသးဒီး,ဒဲလီၤအသးနါပှၢ်,ဒီးက့ၤက့ၤဝဲလီၤ. 49ဒီးပှၤလၢအသ့ၣ်ညါအီၤခဲလၢာ်,ဒီးပိာ်မုၣ်လၢအဟဲပိာ်အခံလၢကၤလံၤလါတဖၣ်န့ၣ်,ဆၢထၢၣ်စၢၢ်တလၢၢ်ဒီးကွၢ်တၢ်တဖၣ်န့ၣ်လီၤ.

50ဒီးကွၢ်ကွၢ်,ပှၤလၢကီၢ်ယူဒၤဝ့ၢ်အရံၤမၤသဲဖိကိးဝဲအမံၤလၢစီၤယိၤသး,ပှၤသးပှၢ်တဂၤန့ၣ်,မ့ၢ်ပှၤအဂ့ၤအဝါ,ဒီးအတီအလိၤ, 51ဒီးတအၢၣ်လီၤအီလီၤဘၣ်ပှၤသးပှၢ်အဂၤတဖၣ်အတၢ်မၤန့ၣ်ဘၣ်.ဒီးမ့ၢ်ပှၤလၢအကွၢ်လၢ်ယွၤအဘီအမုၢ်အကျဲတဂၤ, 52အဝဲဒၣ်န့ၣ်လဲၤဆူစီၤပံၤလးအအိၣ်,ဒီးဃ့က့ၤယ့ၣ်ရှူးအစိၣ်လီၤ. 53ဒီးဟံးလီၤအစိၣ်,ဒီးဘိၣ်ဘံဃာ်လၢဖှီဝါကဆှၣ်,ဒီးပာ်နုာ်အီၤလၢသွၣ်ခိၣ်စိးကျိးအသးလၢလၢၢ်ပူၤ,လၢတၢ်တပာ်နုာ်ဒံးဘၣ်ပှၤနီတဂၤဘၣ်အပူၤလီၤ. 54ဒီးမုၢ်တနံၤန့ၣ်,မ့ၢ်လၢကတဲာ်ကတီၤတၢ်အနံၤ,ဒီးမုၢ်အိၣ်ဘှံးအနံၤကဘၣ်ဘူးတ့ၢ်လီၤ. 55ဒီးပှၤဟဲဒီးအီၤလၢကၤလံၤလါ,ပိာ်မုၣ်တဖၣ်ပိာ်ထီၣ်စ့ၢ်ကီးအခံ,ဒီးကွၢ်နီၣ်တၢ်သွၣ်ခိၣ်,ဒီးတၢ်ပာ်လီၤအစိၣ်ဒ်လဲၣ်ဒ်လဲၣ်န့ၣ်လီၤ. 56ဒီးက့ၤက့ၤဝဲ,ဒီးကတဲာ်ကတီၤတၢ်နၢမူဒီးမူရၣ်လီၤ.ဒီးဒ်တၢ်မၤလိာ်အသိးန့ၣ်,အိၣ်ဘှံးဝဲလၢအိၣ်ဘှံးအနံၤလီၤ.