‏ Luke 24

1ဒီးနွံနံၤအကျါ,လၢမုၢ်ခီၣ်ထံးအနံၤဂီၤဂီၤန့ၣ်အဝဲသ့ၣ်တဖၣ်,ဒီးပှၤအဂၤတနီၤနီၤ,လဲၤစိာ်တၢ်နၢမူလၢအကတဲာ်ကတီၤပာ်ဝဲ,ဆူတၢ်သွၣ်ခိၣ်အအိၣ်လီၤ. 2ဒီးထံၣ်န့ၢ်လၢလၢၢ်တဖျၢၣ်န့ၣ်တလ့ၣ်ကွံာ်လံအသးလၢတၢ်သွၣ်ခိၣ်အပူၤလံ. 3ဒီးလဲၤနုာ်ဝဲဒီး,တထံၣ်န့ၢ်ဘၣ်ကစၢ်ယ့ၣ်ရှူးအစိၣ်ဘၣ်. 4ဒီးတၢ်မၤအသးလၢအသးဒ့ဒီလၢတၢ်န့ၣ်အဃိအဖၢမုၢ်ဒီး,ကွၢ်ကွၢ်,ပှၤခံဂၤအကူအသိးကပြုၢ်ကပြီၤ,ဆၢထၢၣ်လၢအဃၢၤလီၤ. 5ဒီးအဝဲသ့ၣ်ပျံၤတၢ်,ဒီးကျးလီၤအမဲာ်လၢဟီၣ်ခိၣ်အဖီခိၣ်အဖၢမုၢ်ဒီး,ကလူးစံးဘၣ်အီၤ,သုဃုပှၤအမူလၢပှၤအသံအကျါန့ၣ်မ့ၢ်အဘၣ်မနုၤလဲၣ်. 6တအိၣ်ဘၣ်ဖဲအံၤဘၣ်.မ့ၢ်အဂဲၤဆၢထၢၣ်က့ၤလံ.ဖဲအအိၣ်ဒံးလၢကၤလံၤလါန့ၣ်ဒီး,စံးဘၣ်သုဒ်အံၤဒ်နုၤန့ၣ်,သ့ၣ်နီၣ်ထီၣ်တက့ၢ်. 7စံးဝဲဒၣ်,ပှၤကညီဖိခွါအံၤကဘၣ်တၢ်ဟ့ၣ်လီၤကွံာ်အီၤလၢပှၤတၢ်ဒဲးဘးဖိအစုပူၤ,ဒီးကဘၣ်တၢ်ပျၤထီအီၤလၢထူၣ်စုညါအလိၤ,ဒီးသၢနံၤတနံၤန့ၣ်ကဂဲၤဆၢထၢၣ်က့ၤဝဲလီၤ. 8ဒီးသ့ၣ်နီၣ်ထီၣ်အတၢ်ကတိၤတကူၢ်သ့ၣ်လီၤ.

9ဒီးက့ၤက့ၤဝဲလၢတၢ်သွၣ်ခိၣ်,ဒီးစံးဘၣ်တဲဘၣ်ပှၤတဆံတဂၤန့ၣ်,ဒီးပှၤအဂၤတဖၣ်ခဲလၢာ်,လၢတၢ်မၤအသးန့ၣ်ခဲလၢာ်လီၤ. 10ဒီးပှၤမၤကဒၤလ့ၣ်ဖိ,နီၢ်မၤရံ,ဒီးနီၢ်ယိၤအၣ်နၣ်,ဒီးစီၤယၤကိာ်အမိၢ်နီၢ်မၤရံ,ဒီးပှၤဂၤအိၣ်ဒီးအီၤတဖၣ်န့ၣ်,မ့ၢ်ပှၤလၢအစံးဘၣ်တဲဘၣ်ပှၤတၢ်မၢဖိတဖၣ်လၢတၢ်မၤအသးန့ၣ်လီၤ. 11ဒီးတၢ်ကတိၤတဖၣ်န့ၣ်မၤအသးလၢအမဲာ်ညါဒ်ပှၤကတိၤနါစိၤတၢ်အသိး,ဒီးတစူၢ်တနာ်ဘၣ်အီၤဘၣ်.

12ဘၣ်ဆၣ်ဒီးစီၤပ့းတရူးဂဲၤဆၢထၢၣ်,ဒီးလဲၤဃ့ၢ်ဆူတၢ်သွၣ်ခိၣ်,ဒီးဆုးလီၤအခိၣ်,ဒီးကွၢ်နုာ်ဝဲ,ဒီးထံၣ်ထဲဖှီဝါကဆှၣ်အိၣ်လီၤတဲာ်,ဒီးကမၢကမၣ်လၢတၢ်မၤအသးအဃိ,ဒီးက့ၤက့ၤဝဲဆူအလီၢ်လီၤ.

13ဒီးကွၢ်ကွၢ်,လၢအဝဲသ့ၣ်တဖၣ်အကျါ,ပှၤခံဂၤလဲၤတၢ်လၢမုၢ်တနံၤန့ၣ်ဆူသဝီတဖျၢၣ်,အမံၤမ့ၢ်အ့းမၤအူ,ယံၤဝဲဒီးယရူၤၡလ့ၣ်ဃုဆံစတၤဒံအူၢ်လီၤ. 14ဒီးကတိၤလိာ်အသးလၢတၢ်မၤအသးန့ၣ်အဂ့ၢ်အကျိၤခဲလၢာ်လီၤ. 15ဒီးတၢ်မၤအသးဖဲအကတိၤလိာ်အသး,ဒီးသံကွၢ်လိာ်အသးအဖၢမုၢ်ဒီး,ယ့ၣ်ရှူးသုးဘူးဃီၤအသးဒီးလဲၤဃုာ်ဒီးအီၤလီၤ. 16ဒီးတၢ်တြီဃာ်အမဲာ်ဒ်သိးအသုတသ့ၣ်ညါအီၤတဂ့ၤလီၤ. 17ဒီးစံးဘၣ်အီၤ,သုလဲၤတၢ်အဖၢမုၢ်,ဒီးသုကတိၤလိာ်သုသး,ဒီးသုသးအုၣ်သပှီၤအံၤမ့ၢ်တၢ်ကတိၤမနုၤလဲၣ်. 18ဒီးပှၤအမံၤစီၤကျ့အီးပၤတဂၤန့ၣ်,ကတိၤဆၢတၢ်ဒီးစံးဘၣ်အီၤ,နဲဒၣ်အံၤ,နမ့ၢ်ထဲပှၤတမှံၤလၢယရူၤၡလ့ၣ်အပူၤ,ဒီးနတသ့ၣ်ညါဘၣ်တၢ်မၤအသးလၢမုၢ်နံၤတဖၣ်အံၤဘၣ်ဧါ. 19ဒီးစံးဘၣ်အီၤ,မနုၤတဖၣ်လဲၣ်.ဒီးအဝဲသ့ၣ်စံးဘၣ်အီၤ,တၢ်လၢပှၤနစၤရ့းဖိယ့ၣ်ရှူးအဂ့ၢ်အကျိၤလီၤ.အဝဲဒၣ်န့ၣ်မ့ၢ်ဝံအိၣ်ဒီးအစိအကမီၤလၢအကလုၢ်ဒီးလၢအတၢ်မၤ,လၢယွၤအမဲာ်ညါဒီးပှၤကညီခဲလၢာ်အမဲာ်ညါလီၤ. 20ဒီးဒ်သိးအကဒိးဘၣ်တၢ်စံၣ်ညီၣ်ဘၢသံဒီး,ပှၤလုၢ်တၢ်အခိၣ်ဒီးပဒိၣ်ပပှၢ်တဖၣ်န့ၣ်,ဟ့ၣ်လီၤကွံာ်အီၤ,ဒီးပျၤထီအီၤလၢထူၣ်စုညါအလိၤလီၤ. 21ဒီးပမုၢ်လၢ်တ့ၢ်လၢအဝဲဒၣ်မ့ၢ်ပှၤလၢအအုၣ်က့ၤခီၣ်က့ၤအံၣ်စရ့လးလီၤ.လၢန့ၣ်အမဲာ်ညါ,လၢတၢ်မၤအသးအလီၢ်ခံန့ၣ်အအံၤတနံၤမ့ၢ်မုၢ်သၢနံၤတနံၤလီၤ. 22ဒီးမ့မ့ၢ်ပိာ်မုၣ်လၢပကျါတနီၤနီၤ,လဲၤဂီၤဂီၤဆူတၢ်သွၣ်ခိၣ်လီၤ. 23ဒီးတထံၣ်န့ၢ်ဘၣ်အစိၣ်ဘၣ်ဒီး,ဟဲက့ၤစံးဝဲလၢအထံၣ်တၢ်လၢညါခီ,ဒီးထံၣ်ဘၣ်ကလူးတဖၣ်,လၢအစံးဘၣ်အီၤလၢအမူထီၣ်က့ၤဝဲသတးဒီးဒုးကမၢကမၣ်ပှၤလီၤ. 24ဒီးပှၤတနီၤနီၤလၢပကျါလဲၤဆူတၢ်သွၣ်ခိၣ်,ဒီးထံၣ်န့ၢ်တၢ်ဒ်ပိာ်မုၣ်စံးဝဲအသိးဘၣ်ဆၣ်ဒီး,တထံၣ်ဘၣ်အီၤဘၣ်.

25ဒီးအဝဲဒၣ်စံးဘၣ်အီၤ,ပှၤအတၢ်ကူၣ်တအိၣ်,ဒီးအသးဃၢလၢအတစူၢ်တနာ်ဘၣ်ဝံအကလုၢ်ခဲလၢာ်သ့ၣ်ဧၢ, 26ခရံာ်န့ၣ်ဘၣ်ဒိးတၢ်ဒ်န့ၣ်,ဒီးလဲၤနုာ်ဆူအတၢ်လၤကပီၤအပူၤတမ့ၢ်ဘၣ်ဧါ. 27ဒီးမၤဆိဝဲလၢစီၤမိၤရှ့,ဒီးလၢဝံခဲလၢာ်,ဒီးဒုးနဲၣ်ဖျါထီၣ်တၢ်ကွဲးအသးခဲလၢာ်ဘၣ်ဃးဒီးအကစၢ်ဒၣ်ဝဲလီၤ.

28ဒီးအဝဲသ့ၣ်လဲၤဘူးထီၣ်ဒီးသဝီဖဲအကလဲၤတၢ်,ဒီးအဝဲဒၣ်ပာ်အသးလီၤဂာ်လၢအကလဲၤပူၤကွံာ်တၢ်ဖဲန့ၣ်အသိးလီၤ. 29ဒီးအဝဲသ့ၣ်ဃ့ကညးအီၤသပှၢ်ပှၢ်,ဒီးစံးဘၣ်အီၤ,အိၣ်ဒီးပှၤတက့ၢ်.အဂ့ၢ်ဒ်အံၤ,မုၢ်ကဟါတ့ၢ်,ဒီးမုၢ်ဘၣ်လံ.ဒီးလဲၤနုာ်အိၣ်ဒီးအီၤလီၤ.

30ဒီးတၢ်မၤအသးလၢအဆ့ၣ်နီၤသန့ၤဃုာ်ဒီးအီၤဒီး,ဟံးန့ၢ်ကိၣ်ဒီးဆိၣ်ဂ့ၤဝဲ,ဒီးစိၢ်ဘျဲးဝဲ,ဒီးဟ့ၣ်လီၤအဝဲသ့ၣ်လီၤ. 31ဒီးအဝဲသ့ၣ်အမဲာ်အိးထီၣ်အသး,ဒီးသ့ၣ်ညါအီၤလီၤ.ဒီးအဝဲဒၣ်သုးတဒၢကွံာ်အသးလၢအီၤလီၤ. 32ဒီးအဝဲသ့ၣ်စံးလိာ်အသးသကိးသကိးလၢ,အဝဲဒၣ်ကတိၤတၢ်ဒီးပှၤလၢကျဲ,ဒီးဒုးနဲၣ်တၢ်ကွဲးအသးအဂ့ၢ်အပီၢ်ဒီး,ပသးဂဲၤဆူၣ်ထီၣ်လၢပပူၤတမ့ၢ်ဘၣ်ဧါ.

33ဒီးအဝဲသ့ၣ်ဂဲၤဆၢထၢၣ်တစုဃီဖဲန့ၣ်,ဒီးက့ၤက့ၤဝဲဆူယရူၤၡလ့ၣ်,ဒီးထံၣ်န့ၢ်ပှၤတဆံတဂၤန့ၣ်,ဒီးပှၤအိၣ်ဒီးအီၤ, 34အိၣ်ဖှိၣ်ရိဖှိၣ်,ဒီးစံးတကူၢ်သ့ၣ်လၢကစၢ်ဂဲၤဆၢထၢၣ်က့ၤလံနီၢ်နီၢ်,ဒီးဒုးနဲၣ်လံအသးလၢစီၤၡံမိၣ်လံ. 35ဒီးအဝဲသ့ၣ်စံၣ်တဲၤတဲလီၤတၢ်မၤအသးလၢကျဲန့ၣ်,ဒီးလၢအဒုးသ့ၣ်ညါအသးလၢအီၤလၢတၢ်စိၢ်ဘျဲးကိၣ်အဂ့ၢ်န့ၣ်လီၤ.

36ဒီးကတိၤလိာ်အသးလၢတၢ်န့ၣ်တဖၣ်အဖၢမုၢ်ဒီး,ယ့ၣ်ရှူးအိၣ်ဆၢထၢၣ်လၢအကျါ,ဒီးစံးဘၣ်အီၤ,မ်တၢ်ဃူတၢ်ဖိးအိၣ်ဒီးသုတက့ၢ်. 37ဒီးအဝဲသ့ၣ်ဆိကမိၣ်ဝဲလၢအထံၣ်ပှၤအကလၤ,ဒီးအသူၣ်ပျံၤအသးဖုး,ဒီးအသူၣ်ကနိးအသးကနိးဝဲလီၤ. 38ဒီးစံးဘၣ်အီၤ,သုသူၣ်ကနိးသးကနိးဘၣ်မနုၤလဲၣ်.ဒီးတၢ်သးဒ့ဒီတဖၣ်အိၣ်ထီၣ်လၢသုသးဘၣ်မနုၤလဲၣ်. 39ကွၢ်ယစုလၣ်,ဒီးယခီၣ်လၣ်တက့ၢ်.အဂ့ၢ်ဒ်အံၤ,မ့ၢ်ယၤနီၢ်နီၢ်လီၤ.ဟံးကွၢ်ယၤဒီးသ့ၣ်ညါယၤတက့ၢ်.အဂ့ၢ်ဒ်အံၤ,ပှၤအကလၤန့ၣ်တအိၣ်ဘၣ်ဒီးအဃံဒီးအညၣ်,ဒ်သုထံၣ်ယၤအသိးဘၣ်. 40ဒီးစံးဝဲဒ်န့ၣ်ဝံၤဒီး,ဒုးနဲၣ်အစုလၣ်ဒီးအခီၣ်လၣ်လၢအီၤလီၤ. 41ဒီးမ့ၢ်အသူၣ်ခုအသးခုဒီးကမၢကမၣ်အဃိဒီး,တစူၢ်တနာ်တဝၢ်ဒံးဘၣ်.ဒီးစံးဘၣ်အီၤ,တၢ်အီၣ်ဖဲအံၤအိၣ်တမံၤမံၤဧါ. 42ဒီးအဝဲသ့ၣ်ဟ့ၣ်အီၤလၢညၣ်အကၣ်တစဲးဒီးကနဲစီ, 43ဒီးဟံးန့ၢ်အီၣ်ဝဲလၢအဝဲသ့ၣ်အမဲာ်ညါလီၤ. 44ဒီးစံးဘၣ်အီၤ,တၢ်ကတိၤတဖၣ်လၢယစံးဘၣ်သုဖဲယအိၣ်ဒံးဒီးသု,လၢကယဲၢ်တၢ်ကွဲးအသးလၢစီၤမိၤရှ့အတၢ်သိၣ်တၢ်သီအပူၤ,ဒီးဝံသ့ၣ်တဖၣ်အပူၤ,ဒီးလံာ်စံးထီၣ်ပတြၢၤတၢ်အပူၤ,လၢယဂ့ၢ်ယကျိၤန့ၣ်,ဘၣ်လၢထီၣ်ပှဲၤထီၣ်ခဲလၢာ်လီၤ. 45တုၤနုၤတစု,ဒ်သိးအဝဲသ့ၣ်အနၢ်ကပၢၢ်တၢ်ကွဲးအသးန့ၣ်ဒီး,အိးထီၣ်အသူၣ်အသး, 46ဒီးစံးဘၣ်အီၤလၢတၢ်ကွဲးအသးဒ်န့ၣ်,ဒီးလၢခရံာ်ဘၣ်ဒိးတၢ်,ဒီးလၢသၢနံၤတနံၤန့ၣ်,ဘၣ်ဂဲၤဆၢထၢၣ်က့ၤဝဲလီၤ. 47ဒီးလၢပှၤဘၣ်စံၣ်တဲၤတဲလီၤတၢ်လၢအမံၤလၢတၢ်ပီၢ်ယၢ်လီၤက့ၤသးဒီးတၢ်ပျၢ်တၢ်ဒဲးဘးအဂ့ၢ်,အဆိလၢယရူၤၡလ့ၣ်ဒီးပၢၢ်လၢပှၤကလုာ်ခဲလၢာ်န့ၣ်လီၤ. 48ဒီးသုမ့ၢ်ပှၤအုၣ်အသးလၢတၢ်န့ၣ်တဖၣ်အဂ့ၢ်လီၤ.

49ဒီးကွၢ်ကွၢ်,ယမၢလီၤယပၢ်အတၢ်စံးပာ်န့ၣ်ဆူသုအိၣ်လီၤ.ဘၣ်ဆၣ်ဒီးတၢ်တချုးဒုးသိးထီၣ်သုလၢတၢ်စိတၢ်ကမီၤလၢထးန့ၣ်ဘၣ်ဒီး,အိၣ်ဒၣ်သုဝဲလၢဝ့ၢ်ယရူၤၡလ့ၣ်အပူၤတက့ၢ်.

50ဒီးဆှၢထီၣ်အီၤဆူဘ့ၤသနံ,ဒီးယူာ်ထီၣ်အစု,ဒီးဆိၣ်ဂ့ၤအီၤလီၤ. 51ဒီးတၢ်မၤအသးလၢအဆိၣ်ဂ့ၤအီၤအဖၢမုၢ်ဒီး,လီၤဖးဝဲဒီးအီၤ,ဒီးဘၣ်တၢ်စိာ်ထီၣ်အီၤဆူမူခိၣ်လီၤ. 52ဒီးအဝဲသ့ၣ်တဖၣ်ဘူၣ်ထီၣ်ဘါထီၣ်အီၤ,ဒီးအသူၣ်ခုသးခုဒိၣ်မး,ဒီးက့ၤက့ၤဝဲဆူယရူၤၡလ့ၣ်လီၤ. 53ဒီးအိၣ်သးဝံၣ်တၢ်ဒီးစံးထီၣ်ပတြၢၤယွၤလၢတၢ်လုၢ်အဟံၣ်ပူၤတဘိယူၢ်ဃီလီၤ.အၤမ့ၣ်.