Mal 3 | KswSKMB | STEP | ကွၢ်ကွၢ်,ယကမၢလီၤယကလူးတဂၤ,ဒီးကကတဲာ်ကတီၤကျဲဧိၤကပူၤဧိၤလၢယမဲာ်ညါ,ဒီးကစၢ်လၢသုဃုအီၤကဟဲဆူအတၢ်လုၢ်ဟံၣ်ပူၤသတူၢ်ကလာ်,တၢ်အၢၣ်လီၤအီလီၤအကလူးလၢအဘၣ်သုသးတဂၤဒၣ်လဲာ်လီၤ.ကွၢ်ကွၢ်,ကဟဲဝဲလီၤ,တၢ်သုးမုၢ်ဂီၢ်မုၢ်အယွၤစံးဝဲဒၣ်.

‏ Malachi 3

1 ကွၢ်ကွၢ်,ယကမၢလီၤယကလူးတဂၤ,ဒီးကကတဲာ်ကတီၤကျဲဧိၤကပူၤဧိၤလၢယမဲာ်ညါ,ဒီးကစၢ်လၢသုဃုအီၤကဟဲဆူအတၢ်လုၢ်ဟံၣ်ပူၤသတူၢ်ကလာ်,တၢ်အၢၣ်လီၤအီလီၤအကလူးလၢအဘၣ်သုသးတဂၤဒၣ်လဲာ်လီၤ.ကွၢ်ကွၢ်,ကဟဲဝဲလီၤ,တၢ်သုးမုၢ်ဂီၢ်မုၢ်အယွၤစံးဝဲဒၣ်.

2 ဒီးမုၢ်တနံၤလၢအဟဲန့ၣ်မ့ၢ်မတၤအိၣ်ကဲတဂၤလဲၣ်.ဒီးတုၤအအိၣ်ဖျါထီၣ်ဒီး,မ့ၢ်မတၤကဆၢထၢၣ်တဂၤလဲၣ်.အဂ့ၢ်ဒ်အံၤ,မၤအသးဒ်ပှၤသိတၢ်ဖိအမ့ၣ်အူအသိး,ဒီးဒ်ပှၤအစုၣ်တၢ်ကံးညာ်အဆးပၠၣ်အသိးန့ၣ်လီၤ. 3 ဒီးကဆ့ၣ်နီၤဒ်ပှၤမၤပှံၢ်,ဒီးပှၤမၤစီစ့အသိး,ဒီးကမၤစီပှၤလ့ၤဝံဖိ,ဒီးပှံၢ်အီၤဒ်ထူဒီးစ့အသိးန့ၣ်ဒ်သိးအကလုၢ်ယွၤလၢတၢ်လုၢ်တီလီၤ.

4 တုၤနုၤတစုယူဒၤဒီးယရူၤၡလ့ၣ်အတၢ်မၤဘူၣ်န့ၣ်ကဘၣ်ယွၤအသးဒ်လၢမုၢ်နံၤလၢပျၢၤအသိးန့ၣ်,ဒီးဒ်နံၣ်ဧိၤလါဧိၤလၢအခီၣ်ထံးအသိးန့ၣ်လီၤ.

5 ဒီးယကသုးဘူးယသးဆူသုအိၣ်လၢတၢ်စံၣ်ညီၣ်အဂီၢ်,ဒီးယကကဲထီၣ်ပှၤအုၣ်အသးချ့ချ့ထီဒါပှၤမၤကဒါပမဲာ်,ပှၤမၤကမၣ်ပမါပဝၤ,ဒီးပှၤဆိၣ်တၢ်တတီဘၣ်,ဒီးပှၤမၤန့ၢ်ပှၤဒိးလဲဖိအဘူးအလဲ,ပှၤမုၣ်ကမဲအတၢ်,ဒီးပှၤဖိၣ်ဃဲအတၢ်,ဒီးပှၤလၢအဒုးဘၣ်ပှၤတခီဘီမုၢ်ဖိလၢတၢ်တတီဘၣ်,ဒီးတပျံၤဘၣ်ယၤဘၣ်,တၢ်သုးမုၢ်ဂီၢ်မုၢ်အယွၤစံးဝဲဒၣ်.

6 ယဲဒၣ်အံၤ,ယမ့ၢ်ယွၤလီၤ,ယတကဒံကဒါဘၣ်.မၤသးဒ်န့ၣ်ဒီးစီၤယၤကိာ်အဖိခွါသ့ၣ်ဧၢ,သုတတုၤဘၣ်လၢတၢ်ဟးဂူာ်ဟးဂီၤဘၣ်.

7 လၢသုပၢ်တဖၣ်အမုၢ်နံၤလံၤလံၤန့ၣ်သုလုၣ်သ့ၣ်ခါပတာ်ယတၢ်မၤလိာ်တဖၣ်,ဒီးတတိၢ်န့ၢ်ဘၣ်အီၤဘၣ်.ဟဲကဒါက့ၤဆူယအိၣ်တက့ၢ်.ဒီးယကဟဲကဒါက့ၤဆူသုအိၣ်န့ၣ်,တၢ်သုးမုၢ်ဂီၢ်မုၢ်အယွၤစံးဝဲဒၣ်.ဒီးသုစံး,ပကဟဲကဒါက့ၤဒ်လဲၣ်.

8 ပှၤကညီကဟုၣ်ယွၤအတၢ်စ့ၢ်ကီးဧါ.ဘၣ်ဆၣ်ဒီးသုဟုၣ်လံယတၢ်လံ.ဒီးသုစံး,ပဟုၣ်နတၢ်လၢမနုၤလဲၣ်.လၢတၢ်ဆံဆဲၣ်ပူတပူ,ဒီးလၢတၢ်မၤဘူၣ်တဖၣ်လီၤ.

9 သုဘၣ်တၢ်ဆိၣ်အၢသုသပှၢ်တၢၢ်လီၤ.အဂ့ၢ်ဒ်အံၤ,သုဝဲဒၣ်,ပှၤတကလုာ်ခဲလၢာ်အံၤသုဟုၣ်လံယတၢ်လံလီၤ.

10 ဟဲစိာ်တၢ်ဆံဆဲၣ်ပူတပူခဲလၢာ်ဆူတၢ်ပာ်ဖှိၣ်အဟံၣ်ပူၤ,ဒ်သိးတၢ်အီၣ်ကအိၣ်လၢယဟံၣ်ပူၤတက့ၢ်.ယကအိးထီၣ်မူခိၣ်အတၢ်ထူၣ်ဖျိ,ဒီးလူလီၤန့ၢ်သုလၢတၢ်ဆိၣ်ဂ့ၤတုၤအလီၢ်တတြီၢ်ဘၣ်,ယတအိးထီၣ်ဘၣ်လဲၣ်န့ၣ်မၤကွၢ်ယၤလၢတၢ်တမံၤန့ၣ်တက့ၢ်,တၢ်သုးမုၢ်ဂီၢ်မုၢ်အယွၤစံးဝဲဒၣ်.

11 ဒီးယကသိၣ်ဃီၣ်တၢ်မၤဟးဂီၤတၢ်လၢသုဃိ,ဒီးတမၤဟးဂီၤဘၣ်ဝဲလၢသုဟီၣ်ခိၣ်အတၤသၣ်ဘၣ်.ဒီးသုစပံးမုၢ်လၢစပံးအလီၢ်ပူၤန့ၣ်အသၣ်တလီၤဘီဘၣ်,တၢ်သုးမုၢ်ဂီၢ်မုၢ်အယွၤစံးဝဲဒၣ်.

12 ဒီးပှၤကိးကလုာ်ဒဲးကကိးသုလၢတၢ်ဆိၣ်ဂ့ၤလီၤ.အဂ့ၢ်ဒ်အံၤ,သုကကဲထီၣ်ထံဧိၤကီၢ်ဧိၤလၢအဘၣ်တၢ်အသးလီၤ,တၢ်သုးမုၢ်ဂီၢ်မုၢ်အယွၤစံးဝဲဒၣ်.

13 သုကတိၤတၢ်ဆူၣ်ထီဒါယၤလီၤ,ယွၤစံးဝဲဒၣ်.ဘၣ်ဆၣ်ဒီးသုစံး,ပကတိၤတၢ်ထီဒါနၤလၢမနုၤလဲၣ်.

14 သုစံး,ပမၤယွၤအတၢ်န့ၣ်မ့ၢ်တၢ်တဂိာ်တသီၣ်ဘၣ်တၢ်,ဒီးပတိၢ်န့ၢ်အတၢ်မၤလိာ်,ဒီးလဲၤတၢ်လၢပသူၣ်အုးပသးအုးလၢတၢ်သုးမုၢ်ဂီၢ်မုၢ်အယွၤအမဲာ်ညါန့ၣ်မ့ၢ်အဘျုးမနုၤတမံၤလဲၣ်.

15 ဒီးခဲကနံၣ်အံၤပှၤလၢအပာ်ထီၣ်ထီအသးန့ၣ်ပစံးလၢအဘၣ်တၢ်ဆိၣ်ဂ့ၤဝဲလီၤ.ဒီးပှၤလၢအမၤတၢ်တတီတလိၤန့ၣ်ဘီၣ်ထီၣ်ညီထီၣ်,ဒီးပှၤလၢအလ့ပစီယွၤန့ၣ်ပူၤဖျဲးဝဲလီၤ.

16 တုၤနုၤတစုပှၤလၢအပျံၤယွၤန့ၣ်ကတိၤလိာ်အသးတဂၤဒီးတဂၤ,ဒီးယွၤကနၣ်ဝဲ,ဒီးနၢ်ဟူဝဲ,ဒီးတၢ်ကွဲးလံာ်သ့ၣ်နီၣ်ထီၣ်က့ၤတၢ်လၢအမဲာ်ညါ,လၢပှၤလၢအပျံၤယွၤဒီးဆိကမိၣ်တၢ်လၢအမံၤအဂ့ၢ်အကျိၤအဂီၢ်လီၤ.

17 လၢမုၢ်တနံၤလၢယသ့ၣ်နံၤဖးသီအပူၤန့ၣ်ကကဲထီၣ်တၢ်လုၢ်ဒိၣ်ပှ့ၤဒိၣ်လၢယဂီၢ်လီၤ,တၢ်သုးမုၢ်ဂီၢ်မုၢ်အယွၤစံးဝဲဒၣ်,ဒီးယကသးအိၣ်အီၤဒ်ပှၤသးအိၣ်အဖိခွါလၢအမၤအတၢ်အသိးန့ၣ်လီၤ. 18 တုၤနုၤတစုသုကဃၣ်သုသးဒီးသ့ၣ်ညါနီၤဖးပှၤတီဒီးပှၤတတီဘၣ်အဆၢ,ပှၤလၢအမၤယွၤအတၢ်,ဒီးပှၤလၢအတမၤဘၣ်ယွၤအတၢ်အဆၢလီၤ.