‏ Mark 10

1ဒီးဂဲၤဆၢထၢၣ်လၢတၢ်အလီၢ်ဖဲန့ၣ်,ဒီးလဲၤကျဲလၢယၢ်ဒ့ၣ်ဝၢ်ဘးခီ,ဆူယူဒၤအကီၢ်ဃၢၤန့ၣ်လီၤ.ဒီးပှၤဂီၢ်မုၢ်ဟဲအိၣ်ဖှိၣ်ကဒီးဆူအအိၣ်,ဒီးအဝဲဒၣ်ဒ်အလုၢ်အလၢ်အသိး,သိၣ်က့ၤသီက့ၤကဒီးအီၤလီၤ.

2ဒီးပှၤဖၤရံၤရှဲတဖၣ်ဟဲဝဲ,ဒီးလ့ပစီအီၤ,ဒီးသံကွၢ်အီၤလၢပှၤပာ်မၢ်အမါဂ့ၤစ့ၢ်ကီးဧါ. 3ဒီးအဝဲဒၣ်စံးဆၢတၢ်ဒီးစံးဘၣ်အီၤ,မ့ၢ်စီၤမိၤရှ့မၤလိာ်သုဒ်လဲၣ်. 4ဒီးအဝဲသ့ၣ်စံးဝဲဒၣ်,စီၤမိၤရှ့ဒုးကွဲးလံာ်လီၤဖှၣ်,ဒီးဒုးပာ်မၢ်အီၤလီၤ. 5ဒီးယ့ၣ်ရှူးစံးဆၢတၢ်ဒီးစံးဘၣ်အီၤမ့ၢ်အကွဲးန့ၢ်သုတၢ်မၤလိာ်တမံၤအံၤ,လၢသုသူၣ်ကိၤသးကိၤအဃိလီၤ. 6လၢအတ့လီၤတၢ်အခီၣ်ထံးန့ၣ်ယွၤတ့လီၤပိာ်မုၣ်ဒီးပိာ်ခွါလီၤ. ▼

▼10:6 ၁မိၤ.၁း၂၇

7အကူၢ်မ့ၢ်ဒ်န့ၣ်ဒီး,ပိာ်ခွါကဟးသဒၣ်အမိၢ်ဒီးအပၢ်,ဒီးကဘျုးအသးဒီးအမါ,ဒီးတၢ်လၢပှၤခံဂၤန့ၣ်ကကဲထီၣ်ပှၤတသွံၣ်ဃီတညၣ်ဃီလီၤ. ▼

▼10:7 ၁မိၤ.၂း၂၄

8မၤသးဒ်န့ၣ်ဒီး,တမ့ၢ်လၢၤဘၣ်,ပှၤခံဂၤဘၣ်,မ့ၢ်ပှၤတသွံၣ်ဃီတညၣ်ဃီလီၤ. 9မၤသးဒ်န့ၣ်ဒီး,တၢ်လၢယွၤပာ်ဃုာ်ဝဲန့ၣ်,မ်ပှၤကညီသုတထုးဖှၣ်တဂ့ၤ. 10ဒီးလၢဟံၣ်ပူၤန့ၣ်,အပျဲၢ်အဘီၣ်သံကွၢ်ကဒီးအီၤလၢတၢ်န့ၣ်တမံၤအဂ့ၢ်အကျိၤလီၤ. 11ဒီးအဝဲဒၣ်စံးဘၣ်အီၤဖဲဒၣ်ပှၤလၢအပာ်မၢ်အမါ,ဒီးအိၣ်ဃုာ်ဒီးပိာ်မုၣ်အဂၤတဂၤဂၤန့ၣ်,မ့ၢ်အအဲၣ်ဘၢအမါလီၤ. 12ဒီးပိာ်မုၣ်မ့ၢ်ပာ်မၢ်အဝၤ,ဒီးအိၣ်ဃုာ်ဒိးပိာ်ခွါအဂၤတဂၤန့ၣ်ဒီး,မ့ၢ်အအဲၣ်ဘၢအဝၤလီၤ.

13ဒီးပှၤဟဲစိာ်ဖိသၣ်တဖၣ်ဆူအအိၣ်,ဒ်သိးအကထိးဘၣ်အီၤ,ဒီးအပျဲၢ်အဘီၣ်ဒူပှၤလၢအဟဲစိာ်အီၤတဖၣ်အလိၤလီၤ. 14ဘၣ်ဆၣ်ဒီးယ့ၣ်ရှူးထံၣ်ဝဲဒီးတဘၣ်ဘၣ်အသးဘၣ်,ဒီးစံးဘၣ်အီၤ,ပျဲဖိသၣ်တဖၣ်န့ၣ်ဟဲဆူယအိၣ်တက့ၢ်.ဒီးတြီအီၤတဂ့ၤ.အဂ့ၢ်ဒ်အံၤ,ယွၤအဘီဖိမုၢ်ဖိမ့ၢ်ပှၤဒ်န့ၣ်အသိးလီၤ. 15ယစံးဘၣ်တဲဘၣ်သုတီတီအံၤ,ဖဲဒၣ်ပှၤလၢအတဒိးန့ၢ်ဘၣ်ယွၤအဘီအမုၢ်ဒ်ဖိသၣ်အသိးတဂၤဂၤန့ၣ်,တနုာ်ဘၣ်လၢအပူၤလ့ၤတက့ၤဘၣ်. 16ဒီးစိာ်ဖိးထီၣ်အီၤလၢအစုဒုၣ်လိၤ,ဒီးပာ်အစုလၢအလိၤ,ဒီးဆိၣ်ဂ့ၤအီၤလီၤ.

17ဒီးတုၤအဟးထီၣ်ဝဲဆူကျဲအပူၤဒီး,ပှၤတဂၤဟဲဃ့ၢ်ဆူအအိၣ်,ဒီးချံးလီၤအခီၣ်,ဒီးသံကွၢ်အီၤ,သရၣ်လၢအဂ့ၤဧၢ,ဒ်သိးယကန့ၢ်ဘၣ်သါတၢ်မူအထူအယိာ်ဒီး,ယဘၣ်မၤတၢ်မနုၤတမံၤလဲၣ်. 18ဒီးယ့ၣ်ရှူးစံးဘၣ်အီၤ,ဘၣ်မနုၤလၢနကိးယၤလၢအဂ့ၤလဲၣ်.ပှၤအဂ့ၤတအိၣ်ဘၣ်,အိၣ်ထဲယွၤတဂၤဧိၤလီၤ. 19တၢ်မၤလိာ်တဖၣ်နသ့ၣ်ညါလံ.မၤသံပှၤကညီတဂ့ၤ.အဲၣ်ဘၢမါအဲၣ်ဘၢဝၤတဂ့ၤ,ဟုၣ်တၢ်တဂ့ၤ,အုၣ်နသးလၢတၢ်ကတိၤကဘျံးကဘျၣ်တဂ့ၤ,လီအီၣ်ပှၤဂၤအတၢ်တဂ့ၤ,ယူးယီၣ်နမိၢ်ဒီးနပၢ်တက့ၢ်လီၤ. ▼

▼10:19 ၂မိၤ.၂၀း၁၂-၁၆

20ဒီးအဝဲဒၣ်စံးဆၢတၢ်ဒီးစံးဘၣ်အီၤ,သရၣ်ဧၢ,တၢ်န့ၣ်တဖၣ်ခဲလၢာ်ယတိၢ်န့ၢ်လၢယဖိၣ်သၣ်ခွါထီၣ်လံၤလံၤန့ၣ်လီၤ. 21ဒီးယ့ၣ်ရှူးကွၢ်အီၤဒီးအဲၣ်အီၤ,ဒီးစံးဘၣ်အီၤ,နတလၢတပှဲၤဘၣ်အိၣ်တမံၤလီၤ.ဖဲဒၣ်နတၢ်အိၣ်တဖၣ်န့ၣ်,လဲၤဆါကွံာ်,ဒီးဟ့ၣ်တၢ်လၢပှၤဖှီၣ်ဖိယာ်ဖိတက့ၢ်.ဒီးနကအိၣ်ဒီးနတၢ်လုၢ်ဒိၣ်ပှ့ၤဒိၣ်လၢမူခိၣ်,ဒီးဟဲပိာ်ယခံတက့ၢ်. 22ဒီးအမဲာ်လီၤသပှၢ်လၢတၢ်ကတိၤတထံၣ်န့ၣ်အဃိ,ဒီးအသူၣ်အုးအသးအုး,ဒီးက့ၤက့ၤဝဲလီၤ.အဂ့ၢ်ဒ်အံၤ,အစုလီၢ်အခီၣ်ခိၣ်အိၣ်အါမးလီၤ.

23ဒီးယ့ၣ်ရှူးကွၢ်တရံးဝဲ,ဒီးစံးဘၣ်အပျဲၢ်အဘီၣ်,ပှၤအထူးအတီၤတဖၣ်လဲၤနုာ်ဆူယွၤအဘီအမုၢ်အပူၤန့ၣ်ကီဆံးဒိၣ်လဲၣ်. 24ဒီးအပျဲၢ်အဘီၣ်ကမၢကမၣ်ဝဲလၢအတၢ်ကတိၤတဖၣ်အဃိလီၤ.ဒီးယ့ၣ်ရှူးစံးဆၢကဒီးတၢ်,ဒီးစံးဘၣ်အီၤ,ဖိသ့ၣ်လံၤသ့ၣ်ဧၢ,ပှၤလၢအသန့ၤအသးလၢအတၢ်ထူးတၢ်တီၤတဖၣ်န့ၣ်,လဲၤနုာ်ဆူယွၤအဘီအမုၢ်အပူၤန့ၣ်ကီဆံးဒိၣ်လဲၣ်. 25ကီၤလၤအူးဝၣ်ဖျိထးအမဲၢ်ခံပူၤန့ၣ်,ညီန့ၢ်ပှၤအထူးအတီၤလဲၤနုာ်ဆူယွၤအဘီအမုၢ်အပူၤတက့ၢ်လီၤ. 26ဒီးအဝဲသ့ၣ်ပာ်အသးကမၢကမၣ်ဒိၣ်ဒိၣ်ကလဲာ်,ဒီးစံးလိာ်အသး,ဒီးမ့ၢ်မတၤတုၤလၢတၢ်အုၣ်က့ၤခီၣ်က့ၤကသ့တဂၤလဲၣ်. 27ဒီးယ့ၣ်ရှူးကွၢ်ထံအီၤ,ဒီးစံးဝဲဒၣ်,တသ့ဘၣ်ဒီးပှၤကညီဘၣ်ဆၣ်ဒီး,တသ့ဘၣ်ဒီးယွၤန့ၣ်တမ့ၢ်ဘၣ်.အဂ့ၢ်ဒ်အံၤ,ယွၤသ့တၢ်လၢာ်လီၤ.

28ဒီးစီၤပ့းတရူးစံးဘၣ်အီၤ,ကွၢ်ကွၢ်,ပဝဲဒၣ်အံၤ,ပဟးသဒၣ်တၢ်ခဲလၢာ်,ဒီးပပိာ်နခံလံ. 29ဒီးယ့ၣ်ရှူးစံးဆၢတၢ်,ဒီးစံးဝဲဒၣ်,ယစံးဘၣ်တဲဘၣ်သုတီတီအံၤ,ပှၤလၢအဟးသဒၣ်အဟံၣ်အဃီမ့ၢ်ဂ့ၤ,အဒီပုၢ်ဝဲၢ်မုၣ်မ့ၢ်ဂ့ၤ,အဒီပုၢ်ဝဲၢ်ခွါမ့ၢ်ဂ့ၤ,အမိၢ်မ့ၢ်ဂ့ၤ,အပၢ်မ့ၢ်ဂ့ၤ,အဖိအမါမ့ၢ်ဂ့ၤ,အဖိအလံၤမ့ၢ်ဂ့ၤ,အစံာ်ဧိၤပှဲၤဧိၤမ့ၢ်ဂ့ၤ,လၢယဃိဒီးလၢတၢ်သးခုကစီၣ်အဃိန့ၣ်, 30ကန့ၢ်က့ၤအါန့ၢ်အလီၢ်တကယၤလၢအအံၤတဃၣ်,ဒီးအဟံၣ်အဃီ,ဒီးအဒီပုၢ်ဝဲၢ်မုၣ်,ဒီးအဒီပုၢ်ဝဲၢ်ခွါ,ဒီးအမိၢ်,ဒီးအဖိအလံၤ,ဒီးစံာ်ဧိၤပှဲၤဧိၤ,အိၣ်ဒီးတၢ်မၤအၢမၤနးအီၤ,ဒီးတၢ်မူအထူအယိာ်လၢခဲကိာ်တဃၣ်န့ၣ်,ကိးဂၤဒဲးလီၤ. 31ဘၣ်ဆၣ်ဒီးပှၤအိၣ်ဝဲလၢညါအါဂၤန့ၣ်ကအိၣ်က့ၤဝဲလၢခံ,ဒီးပှၤအိၣ်ဝဲလၢထံန့ၣ်ကအိၣ်က့ၤဝဲလၢညါလီၤ.

32ဒီးအိၣ်ဝဲလၢကျဲဖဲအလဲၤထီၣ်ဆူယရူၤရှလ့ၣ်လီၤ.ဒီးယ့ၣ်ရှူးလဲၤလၢညါ,ဒီးအဝဲသ့ၣ်ကမၢကမၣ်ဒီးအသူၣ်ပျံၤအသးဖုးဒီးပိာ်ဝဲအခံလီၤ.ဒီးဟံးန့ၢ်ကဒီးပှၤတဆံခံဂၤန့ၣ်,ဒီးစံးဘၣ်တဲဘၣ်အီၤလၢတၢ်လၢအကဟဲဘၣ်အကစၢ်ဒၣ်ဝဲအဂ့ၢ်န့ၣ်လီၤ. 33စံးဝဲ,ကွၢ်ကွၢ်,ပလဲၤထီၣ်ဆူယရူၤရှလ့ၣ်,ဒီးပှၤကညီဖိခွါအံၤကဘၣ်တၢ်ဟ့ၣ်လီၤကွံာ်အီၤဆူပှၤလုၢ်တၢ်အခိၣ်ဒီးပှၤကွဲးလံာ်သ့ၣ်တဖၣ်အစုပူၤ,ဒီးကစံၣ်ညီၣ်ဘၢသံအီၤဒီးကဟ့ၣ်လီၤကွံာ်အီၤဆူပှၤကလုာ်တဖၣ်အစုပူၤ, 34ဒီးအဝဲသ့ၣ်တဖၣ်ကဒုၣ်ဒွဲၣ်အီၤ,ဒီးကတီၢ်အီၤ,ဒီးကထူးပှဲာ်ဘၣ်အီၤ,ဒီးကမၤသံအီၤလီၤ.ဒီးလၢသၢနံၤတနံၤန့ၣ်ကဂဲၤဆၢထၢၣ်က့ၤဝဲလီၤ.

35ဒီးစီၤစ့းဘ့းဒဲအဖိခွါ,စီၤယၤကိာ်ဒီးစီၤယိၤဟၣ်,ဟဲဆူအအိၣ်ဒီးစံးဝဲဒၣ်,သရၣ်ဧၢ,ဖဲဒၣ်ပဃ့တၢ်တမံၤန့ၣ်,ပသးအိၣ်လၢနကမၤန့ၢ်ပှၤလီၤ. 36ဒီးအဝဲဒၣ်စံးဘၣ်အီၤ,သုသးအိၣ်လၢယကမၤန့ၢ်သုလၢမနုၤတမံၤလဲၣ်, 37ဒီးအဝဲသ့ၣ်စံးဘၣ်အီၤ,ဟ့ၣ်ပှၤလၢပကဆ့ၣ်နီၤလၢနစုထွဲတဂၤ,ဒီးလၢနစုစ့ၣ်တဂၤ,လၢနလၤကပီၤအပူၤတက့ၢ်.

38ဒီးယ့ၣ်ရှူးစံးဘၣ်အီၤ,သုဃ့မနုၤမနုၤလဲၣ်န့ၣ်,သုတသ့ၣ်ညါဘၣ်.လီခီလၢယအီန့ၣ်,သုအီဘၣ်ကကဲဧါ.ဒီးတၢ်ဒိးဘျၢ ▼

▼10:38 လၢဟ့းလ့ၣ်အကျိာ်"ဘးပတံစၢ်."

လၢယဒိးဘျၢ ▼

▼10:38 လၢဟ့းလ့ၣ်အကျိာ်"ဘးပတံစၢ်."

န့ၣ်,သုဒိးဘျၢ ▼

▼10:38 လၢဟ့းလ့ၣ်အကျိာ်"ဘးပတံစၢ်."

ဘၣ်ကကဲဧါ. 39ဒီးအဝဲသ့ၣ်စံးဘၣ်အီၤ,ကဲဝဲသၢၣ်.ဒီးယ့ၣ်ရှူးစံးဘၣ်အီၤသုကအီလီခီလၢယအီန့ၣ်သပှၢ်တၢၢ်,ဒီးတၢ်ဒိးဘျၢ ▼

▼10:39 လၢဟ့းလ့ၣ်အကျိာ်"ဘးပတံစၢ်."

လၢယဒိးဘျၢ ▼

▼10:39 လၢဟ့းလ့ၣ်အကျိာ်"ဘးပတံစၢ်."

န့ၣ်,သုကဒိးဘျၢ ▼

▼10:40 လၢဟ့းလ့ၣ်အကျိာ်"ဘးပတံစၢ်."

လီၤ. 40ဘၣ်ဆၣ်ဒီးတၢ်ဆ့ၣ်နီၤလၢယစုထွဲ,ဒီးလၢယစုစ့ၣ်န့ၣ်မ့တမ့ၢ်ဘၣ်ပှၤလၢတၢ်ကတီၤပာ်လၢအဂီၢ်ဒီး,တမ့ၢ်ဘၣ်ယတၢ်လၢယကဟ့ၣ်အီၤဘၣ်.

41ဒီးတုၤပှၤဆံဆဲၣ်ဂၤန့ၣ်နၢ်ဟူဝဲဒီး,အသးဒိၣ်ထီၣ်ဘၣ်စီၤယၤကိာ်,ဒီးစီၤယိၤဟၣ်လီၤ. 42ဒီးယ့ၣ်ရှူးကိးဃီၤအီၤဆူအအိၣ်ဒီးစံးဘၣ်အီၤ,သုသ့ၣ်ညါလၢပှၤလၢအကဲထီၣ်ပှၤကလုာ်တဖၣ်အခိၣ်,ပာ်ကစၢ်အသးလၢအဖီခိၣ်လီၤ.ဒီးအပဒိၣ်ပပှၢ်မၤအီၤလၢအစိကမီၤလီၤ. 43ဘၣ်ဆၣ်ဒီးတၢ်တဘၣ်မၤဘၣ်အသးဒီးသုဒ်န့ၣ်အသိးဘၣ်.မ့မ့ၢ်ဖဲဒၣ်ပှၤလၢတၢ်မိၣ်ကဲဒိၣ်အသးလၢသုကျါတဂၤဂၤန့ၣ်,ကကဲထီၣ်သုခ့သုပှၤလီၤ. 44ဒီးဖဲဒၣ်ပှၤလၢတၢ်မိၣ်ကဲထီၣ်အသးလၢအခိၣ်လၢသုကကျါတဂၤဂၤန့ၣ်,ကကဲပှၤခဲလၢာ်အကုၢ်အပှၤလီၤ. 45အဂ့ၢ်ဒ်အံၤ,ပှၤကညီဖိခွါအံၤ,တဟဲဘၣ်ဝဲဒ်သိးပှၤကမၤအီၤလၢအခ့အပှၤအတၢ်ဘၣ်.မ့ၢ်ဒ်သိးအကမၤအခ့အပှၤအတၢ်မၤ,ဒီးဟ့ၣ်လီၤအသးလၢပှၤကညီအါဂၤအပှ့ၤလီၤ.

46ဒီးဟဲဝဲဆူယရံၤဃိလီၤ.ဒီးဖဲအဟးထီၣ်ကွံာ်ဒီးအပျဲၢ်အဘီၣ်ဒီးပှၤဂီၢ်မုၢ်ဖးဒိၣ်လၢယရံၤဃိဒီး,စီၤတံၤမဲအဖိခွါ,စီၤဘၣ်တံၤမဲအမဲာ်ဘျီၣ်တဂၤ,ဆ့ၣ်နီၤဃ့တၢ်လၢကျဲစၢၤလီၤ. 47ဒီးတုၤအနၢ်ဟူဝဲလၢအမ့ၢ်ပှၤနစၤရ့းဖိယ့ၣ်ရှူးဒီး,ကိးပသူထီၣ်ဒီးစံးဝဲဒၣ်,စီၤဒၤဝံးအဖိခွါ,ယ့ၣ်ရှူးဧၢ,သူၣ်ကညီၤသးကညီၤစာ်ယၤတက့ၢ်. 48ဒီးပှၤအါဂၤဒူအလိၤဒ်သိးအကအိၣ်ဘှီၣ်ကလာ်ဘၣ်ဆၣ်ဒီး,အဝဲဒၣ်ကိးပသူထီၣ်ဒိၣ်န့ၢ်အန့ၣ်တက့ၢ်အါအါကလဲာ်,စီၤဒၤဝံးအဖိခွါဧၢ,သူၣ်ကညီၤသးကညီၤစာ်ယၤတက့ၢ်. 49ဒီးယ့ၣ်ရှူးအိၣ်ကတီၢ်,ဒီးမၤလိာ်ဝဲလၢပှၤကကိးဃီၤအီၤလီၤ.ဒီးပှၤကိးဃီၤပှၤမဲာ်ဘျီၣ်,ဒီးစံးဘၣ်အီၤ,ပာ်နသးခူတလ့ၢ်တက့ၢ်.ဂဲၤဆၢထၢၣ်,အဝဲဒၣ်ကိးနၤလီၤ. 50ဒီးအဝဲဒၣ်ကွံာ်လီၤကွံာ်အယၣ်,ဒီးဂဲၤဆၢထၢၣ်ဒီးလဲၤဃီၤဝဲဆူယ့ၣ်ရှူးအအိၣ်လီၤ. 51ဒီးယ့ၣ်ရှူးကတိၤဆၢတၢ်ဒီးစံးဘၣ်အီၤ,ဘၣ်နသးလၢယကမၤနၤလၢမနုၤတမံၤလဲၣ်.ဒီးပှၤမဲာ်ဘျီၣ်စံးဘၣ်အီၤ,ယကစၢ်ဧၢ,မ်ယကထံၣ်ထီၣ်တၢ်တက့ၢ်. 52ဒီးယ့ၣ်ရှူးစံးဘၣ်အီၤ,လဲၤတၢ်တက့ၢ်.နတၢ်နာ်န့ၣ်အုၣ်က့ၤခီၣ်က့ၤလံနၤလံ.ဒီးထံၣ်ထီၣ်တၢ်တကီၢ်ခါ,ဒီးပိာ်ထီၣ်ယ့ၣ်ရှူးအခံလၢကျဲန့ၣ်လီၤ.