Mar 11 | KswSKMB | STEP | ဒီးတုၤအလဲၤဘူးထီၣ်ဒီးယရူၤရှလ့ၣ်လၢဘ့ၤသဖၤက့ဒီးဘ့ၤသနံပၢၢ်လၢကစၢၢ်သ့ၣ်စၤယံးဒီး,မၢလီၤဝဲအပျဲၢ်အဘီၣ်ခံဂၤဒီးစံးဘၣ်အီၤ,

‏ Mark 11

1 ဒီးတုၤအလဲၤဘူးထီၣ်ဒီးယရူၤရှလ့ၣ်လၢဘ့ၤသဖၤက့ဒီးဘ့ၤသနံပၢၢ်လၢကစၢၢ်သ့ၣ်စၤယံးဒီး,မၢလီၤဝဲအပျဲၢ်အဘီၣ်ခံဂၤဒီးစံးဘၣ်အီၤ, 2 လဲၤထီၣ်ဆူသဝီအိၣ်သဃီၤဒီးသုတက့ၢ်.ဒီးဖဲသုလဲၤနုာ်လၢအပူၤဒီး,သုကထံၣ်န့ၢ်တကီၢ်ခါကသ့ၣ်ယီၤဖိ,လၢပှၤတဒိးဘၣ်အီၤနီတဂၤဘၣ်,အိၣ်စၢဃာ်အသးတဒုလီၤ.ဃ့ၣ်လီၤကွံာ်အီၤ,ဒီးဟဲက့ၤမိၤအီၤတက့ၢ်. 3 ဒီးပှၤတဂၤဂၤမ့ၢ်စံးဘၣ်သု,သုမၤတၢ်အံၤဘၣ်မနုၤလဲၣ်ဒီး,စံးလၢကစၢ်မၤအီၤအလီၢ်အိၣ်န့ၣ်တက့ၢ်.ဒီးကဟ့ၣ်ယုၢ်အီၤတကီၢ်ခါဆူအံၤလီၤ. 4 ဒီးအဝဲသ့ၣ်ဟးထီၣ်ဝဲ,ဒီးထံၣ်န့ၢ်ကသ့ၣ်ယီၤဖိဘၣ်စၢဃာ်အသးလၢကျဲစၢၤလၢခိဖဲကျဲခံဘိဖးဒ့ထီၣ်အခီၣ်ထံး,ဒီးဃ့ၣ်လီၤကွံာ်အီၤလီၤ. 5 ဒီးပှၤလၢအဆၢထၢၣ်ဖဲန့ၣ်တနီၤနီၤစံးဘၣ်အီၤ,ဘၣ်မနုၤလၢသုဃ့ၣ်လီၤကွံာ်ကသ့ၣ်ယီၤဖိလဲၣ်. 6 ဒီးအဝဲသ့ၣ်စံးဘၣ်အီၤဒ်ယ့ၣ်ရှူးမၤလိာ်ဝဲအသိးန့ၣ်,ဒီးပှၤပျဲအီၤလီၤ. 7 ဒီးဟဲက့ၤမိၤကသ့ၣ်ယီၤဖိဆူယ့ၣ်ရှူးအအိၣ်,ဒီးပာ်ထီၣ်အယၣ်တဖၣ်လၢအလိၤ,ဒီးယ့ၣ်ရှူးဆ့ၣ်နီၤလၢအဖီခိၣ်လီၤ. 8 ဒီးပှၤအါဂၤဒါလီၤအယၣ်တဖၣ်လၢကျဲ,ဒီးအဂၤတဖၣ်ပဲာ်လီၤသနူလၢသ့ၣ်,ဒီးကလ့ၣ်လီၤအီၤလၢကျဲပူၤလီၤ. 9 ဒီးပှၤလဲၤလၢညါဒီးပှၤပိာ်အခံတဖၣ်န့ၣ်,ကိးပသူထီၣ်ဒီးစံးဝဲဒၣ်,အုၣ်က့ၤခီၣ်က့ၤခဲကနံၣ်အံၤတက့ၢ်.ပှၤလၢအဟဲလၢကစၢ်အမံၤတဂၤအံၤ,မ်အဘၣ်တၢ်ဆိၣ်ဂ့ၤတက့ၢ်. 10 ပပၢ်စီၤဒၤဝံးအဘီအမုၢ်လၢအဟဲန့ၣ်,မ်အဘၣ်တၢ်ဆိၣ်ဂ့ၤတက့ၢ်.အုၣ်က့ၤခီၣ်က့ၤခဲကနံၣ်အံၤ,လၢတၢ်ထီၣ်ထီကတၢၢ်တက့ၢ်. 11 ဒီးယ့ၣ်ရှူးလဲၤနုာ်ဆူယရူၤရှလ့ၣ်,ဒီးဆူတၢ်လုၢ်ဟံၣ်ပူၤ,ဒီးကွၢ်တရံးတၢ်ခဲလၢာ်ဒီးမ့ၢ်မုၢ်ဟါလံဒီး,ဟးထီၣ်ဝဲဒီးပှၤတဆံခံဂၤန့ၣ်,ဆူဘ့ၤသနံအပူၤလီၤ.

12 ဒီးမုၢ်ဆ့ၣ်ထီၣ်တနံၤန့ၣ်ဟးထီၣ်ဝဲလၢဘ့ၤသနံအပူၤ,ဒီးတၢ်သၣ်ဝံၤအသးလီၤ. 13 ဒီးထံၣ်သကွ့ၤချၢၣ်ဒၢတထံးအိၣ်ဒီးအလၣ်,ဒီးဘၣ်တဘၣ်ကထံၣ်န့ၢ်တၢ်အိၣ်လၢအလိၤတမံၤမံၤဒီး,လဲၤဃီၤဝဲ,ဒီးတထံၣ်ဘၣ်တၢ်နီတမံၤဘၣ်,ထံၣ်န့ၢ်ထဲအဒိးအလၣ်ဧိၤလီၤ.အဂ့ၢ်ဒ်အံၤ,ချၢၣ်ဒၢသၣ်အခါတဘၣ်ဒံးဘၣ်လီၤ. 14 ဒီးကတိၤဆၢတၢ်ဒီးစံးဘၣ်အီၤ,မ်ပှၤသုတအီၣ်လၢၤတၤသၣ်လၢနလိၤနီတဂၤနီတခီၣ်တဂ့ၤ.ဒီးအပျဲၢ်အဘီၣ်နၢ်ဟူဝဲလီၤ.

15 ဒီးလဲၤဝဲဆူယရူၤရှလ့ၣ်,ဒီးလဲၤနုာ်ဆူတၢ်လုၢ်အဟံၣ်ပူၤ,ဒီးဟီထီၣ်ကွံာ်ပှၤပှ့ၤတၢ်ဒီးပှၤဆါတၢ်လၢတၢ်လုၢ်ဟံၣ်ပူၤ,ဒီးမၤလီၤဃံၤပှၤတိာ်လီၤစ့အလီၢ်,ဒီးပှၤဆါထိၣ်လွံၢ်အလီၢ်ဆ့ၣ်နီၤတဖၣ်န့ၣ်လီၤ. 16 ဒီးတဒုးစိာ်ခီဂာ်ပှၤလၢအသပၢၤလၢတၢ်လုၢ်ဟံၣ်ပူၤနီတဂၤဘၣ်. 17 ဒီးသိၣ်က့ၤသီက့ၤတၢ်ဒီးစံးဘၣ်အီၤ,တၢ်ကွဲးအသးလၢယဟံၣ်ကဘၣ်တၢ်ကိးအီၤလၢတၢ်ဘါထုကဖၣ်အဟံၣ်လၢပှၤကိးကလုာ်ဒဲးအဂီၢ်န့ၣ်,တမ့ၢ်ဘၣ်ဧါ.မ့မ့ၢ်သုမၤအီၤလၢတၢ်ဟုၣ်တၢ်ဘျၣ်အတၢ်ပူၤလီၤ. ^{▼▼11:17 ယံး.၇း၁၁} 18 ဒီးပှၤကွဲးလံာ်,ဒီးပှၤလုၢ်တၢ်အခိၣ်သ့ၣ်တဖၣ်န့ၣ်,နၢ်ဟူဝဲ,ဒီးကမၤဟးဂီၤအီၤဒ်လဲၣ်န့ၣ်ဃုဝဲလီၤ.အဂ့ၢ်ဒ်အံၤ,ပျံၤအီၤလီၤ.အဂ့ၢ်ဒ်အံၤ,ပှၤဂီၢ်မုၢ်ပာ်အသးကမၢကမၣ်လၢအသိၣ်တၢ်သီတၢ်အဃိခဲလၢာ်လီၤ. 19 ဒီးတုၤမုၢ်ဟါလီၤဒီး,အဝဲဒၣ်ဟးထီၣ်ကွံာ်ဝဲဆူဝ့ၢ်အချၢလီၤ.

20 ဒီးတုၤမုၢ်ဆ့ၣ်ထီၣ်န့ၣ်အဝဲသ့ၣ်လဲၤတြူာ်ဝဲအဖၢမုၢ်ဒီး,ထံၣ်လၢချၢၣ်ဒၢတထံးန့ၣ်,ဃ့ထီၣ်ကွံာ်လၢအဂံၢ်လီၤ. 21 ဒီးစီၤပ့းတရူးသ့ၣ်နီၣ်ထီၣ်က့ၤတၢ်,ဒီးစံးဘၣ်အီၤ,ကစၢ်ဧၢ,ကွၢ်ကွၢ်,ချၢၣ်ဒၢလၢနဆိၣ်အၢအီၤတထံၣ်န့ၣ်,ဃ့ထီၣ်ကွံာ်လံ. 22 ဒီးယ့ၣ်ရှူးစံးဆၢတၢ်ဒီးစံးဘၣ်အီၤ,အိၣ်ဒီးတၢ်နာ်ယွၤတက့ၢ်. 23 အဂ့ၢ်ဒ်အံၤ,ယစံးဘၣ်တဲဘၣ်သုတီတီအံၤ,ဖဲဒၣ်ပှၤလၢအစံးဘၣ်ကစၢၢ်အံၤ,သုးကွံာ်နသး,ဒီးကွံာ်လီၤနသးဆူပီၣ်လဲၣ်ပူၤတက့ၢ်,ဒီးအသးမ့ၢ်တဒ့ဒီဘၣ်,ဒီးမ့ၢ်နာ်ဝဲလၢတၢ်ကမၤအသးဒ်အစံးဝဲအသိးန့ၣ်ဒီး,ဖဲဒၣ်အစံးတၢ်န့ၣ်ကမၤအသးလၢအဂီၢ်လီၤ. 24 မၤသးဒ်န့ၣ်ဒီးယစံးဘၣ်သု,ဖဲဒၣ်သုဃ့ဘါထုကဖၣ်ဒီးဃ့တၢ်တဖၣ်ခဲလၢာ်န့ၣ်,နာ်လၢသုဒိးန့ၢ်အီၤတက့ၢ်.ဒီးကကဲထီၣ်န့ၢ်သုဂီၢ်လီၤ.ဒီးတုၤသုဆၢထၢၣ်ဘါထုကဖၣ်တၢ်န့ၣ်ဒီး,သုမ့ၢ်ပာ်ကမၣ်လၢပှၤဂၤအလိၤဒီး,ပျၢ်အီၤဒ်သိးသုပၢ်အိၣ်လၢမူခိၣ်ကပျၢ်ကွံာ်သုလီၤကမၣ်တၢ်စ့ၢ်ကီးတက့ၢ်. 25 ဒီးတုၤသုဆၢထၢၣ်လါထုကဖၣ်တၢ်န့ၣ်ဒီး,သုမ့ၢ်ပာ်ကမၣ်လၢပှၤဂၤအလိၤဒီး,ပျၢ်အီၤဒ်သိးသုပၢ်အိၣ်လၢမူခိၣ်ကပျၢ်ကွံာ်သုလီၤကမၣ်တၢ်စ့ၢ်ကီးတက့ၢ်.

26 ဒီးသုမ့ၢ်တပျၢ်ဘၣ်ဒီး,သုပၢ်အိၣ်လၢမူခိၣ်န့ၣ်,တပျၢ်စ့ၢ်ကီးဘၣ်သုလီၤကမၣ်တၢ်ဘၣ်လီၤ. 27 ဒီးဟဲကဒီးဝဲဆူယရူၤရှလ့ၣ်,ဒီးဟးယဲၤယီၤဝဲလၢတၢ်လုၢ်ဟံၣ်အပူၤအဖၢမုၢ်ဒီး,ပှၤလုၢ်တၢ်အခိၣ်ဒီးပှၤကွဲးလံာ်ဒီးပှၤသူၣ်က့သးပှၢ်သ့ၣ်တဖၣ်ဟဲဆူအအိၣ်,ဒီးစံးဘၣ်အီၤ, 28 နမၤတၢ်တဖၣ်အံၤလၢမတၤအစိကမီၤလဲၣ်.ဒီးဒ်သိးနကမၤတၢ်တဖၣ်အံၤဒီး,မ့ၢ်မတၤဟ့ၣ်နစိနကမီၤအံၤတဂၤလဲၣ်. 29 ဒီးယ့ၣ်ရှူးစံးဆၢတၢ်ဒီးစံးဘၣ်အီၤ,ယကသံကွၢ်စ့ၢ်ကီးသုတၢ်တမံၤလီၤ.ဒီးစံးဆၢယၤတက့ၢ်.ဒီးယမၤတၢ်တဖၣ်အံၤလၢမတၤမတၤအစိကမီၤန့ၣ်,ယကစံးဘၣ်သုလီၤ. 30 စီၤယိၤဟၣ်အတၢ်ဘျၢ ^{▼▼11:30 လၢဟ့းလ့ၣ်အကျိာ်"ဘးပတံစၢ်."}န့ၣ်,မ့ၢ်အဟဲလၢမူခိၣ်,မ့ၢ်အဟဲလၢပှၤကညီလဲၣ်.စံးဆၢယၤတက့ၢ်. 31 ဒီးအဝဲသ့ၣ်ကူၣ်ထီၣ်ဖးလီၤလိာ်အသးဒီးစံးဝဲဒၣ်,ပမ့ၢ်စံးလၢမူခိၣ်န့ၣ်ဒီး,ကစံးဆၢပှၤ,မ့မ့ၢ်ဒ်န့ၣ်ဒီးဘၣ်မနုၤလၢသုတနာ်ဘၣ်အီၤလဲၣ်. 32 မ့မ့ၢ်ပမ့ၢ်စံးလၢပှၤကညီဒီးအဝဲသ့ၣ်ပျံၤပှၤဂီၢ်မုၢ်လီၤ.အဂ့ၢ်ဒ်အံၤ,ပှၤခဲလၢာ်ပာ်စီၤယိၤဟၣ်လၢဝံနီၢ်နီၢ်လီၤ. 33 ဒီးစံးဆၢတၢ်ဒီးစံးဘၣ်ယ့ၣ်ရှူး,ပတသ့ၣ်ညါဘၣ်.ဒီးယ့ၣ်ရှူးစံးဆၢတၢ်ဒီးစံးဘၣ်အီၤ,ယဲဒၣ်ယမၤတၢ်တဖၣ်အံၤလၢမတၤအစိကမီၤန့ၣ်,ယတစံးဘၣ်တဲဘၣ်စ့ၢ်ကီးသုဘၣ်.