Mar 12 | KswSKMB | STEP | ဒီးကတိၤတၢ်ဒီးအီၤလၢတၢ်ကတိၤဒိတဖၣ်လီၤပှၤတဂၤသူၣ်စပံးအလီၢ်ဒီးကရၢဃာ်ဝဲ,ဒီးခူၣ်လီၤနီၣ်စံၢ်စပံးသၣ်အပူၤဒီးမၤတၢးထီတဖျၢၣ်,ဒီးငါလီၤဝဲလၢပှၤမၤဟီၣ်ခိၣ်ဖိအစုပူၤ,ဒီးဟးဝဲဆူတခီထံတခီကီၢ်လီၤ.

‏ Mark 12

1 ဒီးကတိၤတၢ်ဒီးအီၤလၢတၢ်ကတိၤဒိတဖၣ်လီၤပှၤတဂၤသူၣ်စပံးအလီၢ်ဒီးကရၢဃာ်ဝဲ,ဒီးခူၣ်လီၤနီၣ်စံၢ်စပံးသၣ်အပူၤဒီးမၤတၢးထီတဖျၢၣ်,ဒီးငါလီၤဝဲလၢပှၤမၤဟီၣ်ခိၣ်ဖိအစုပူၤ,ဒီးဟးဝဲဆူတခီထံတခီကီၢ်လီၤ.

2 ဒီးအဆၢကတီၢ်ဘၣ်ဒီး,ဒ်သိးအကန့ၢ်ဘၣ်စပံးလီၢ်အသၣ်လၢပှၤမၤဟီၣ်ခိၣ်ဖိအစုပူၤဒီး,မၢအကုၢ်တဂၤလဲၤဆူပှၤမၤဟီၣ်ခိၣ်ဖိအအိၣ်န့ၣ်လီၤ. 3 ဒီးအဝဲသ့ၣ်ဟံးန့ၢ်အီၤ,ဒီးတီၢ်အီၤ,ဒီးဒုးက့ၤအီၤအိၣ်ကလီလီၤ. 4 ဒီးမၤကဒီးတဘျီမၢအကုၢ်အဂၤတဂၤလဲၤဆူအအိၣ်ဒီးအဝဲသ့ၣ်ကွံာ်အီၤလၢလၢၢ်,ဒီးမၤဘၣ်ဒိအခိၣ်ဒီးမၤအီၤတရီတပါ,ဒီးဒုးက့ၤက့ၤအီၤလီၤ. 5 ဒီးမၤကဒီးတဘျီ,မၢလီၤအဂၤတဂၤ,ဒီးအဝဲသ့ၣ်မၤသံအီၤ,ဒီးအဂၤအါဂၤန့ၣ်,တီၢ်ဝဲတနီၤ,မၤသံဝဲတနီၤလီၤ. 6 မၤသးဒ်န့ၣ်ဒီး,အဖိခွါလၢအအဲၣ်အီၤတဂၤအိၣ်ဒံးဝဲ,ဒီးမၢလီၤစ့ၢ်ကီးအီၤလၢခံကတၢၢ်တဘျီဆူအအိၣ်,ဒီးစံးဝဲဒၣ်,အဝဲသ့ၣ်တဖၣ်န့ၣ်ကယူးယီၣ်ယဖိခွါလီၤ. 7 ဘၣ်ဆၣ်ဒီးပှၤမၤဟီၣ်ခိၣ်ဖိတဖၣ်အံၤစံးလိာ်အသးတဂၤဒီးတဂၤ,အဝဲဒၣ်အံၤမ့ၢ်ပှၤန့ၢ်ဘၣ်သါတၢ်တဂၤန့ၣ်လီၤ.ဟဲဃီၤမၤသံသကိးအီၤတက့ၢ်.ဒီးတၢ်န့ၢ်သါန့ၣ်ကကဲလၢပတၢ်လီၤ.

8 ဒီးအဝဲသ့ၣ်ဖီၣ်ဃာ်အီၤ,ဒီးမၤသံအီၤ,ဒီးညိကွံာ်အီၤဆူစပံးလီၢ်အချၢလီၤ. 9 မၤသးဒ်န့ၣ်ဒီးစပံးလီၢ်အကစၢ်ကမၤဝဲဒ်လဲၣ်.ကဟဲမၤဟးဂီၤပှၤမၤဟီၣ်ခိၣ်ဖိတဖၣ်န့ၣ်,ဒီးကဟ့ၣ်စပံးလီၢ်လၢပှၤဂၤလီၤ. 10 တၢ်ကွဲးအသးတထံၣ်အံၤမ့ၢ်သုတဖးဘၣ်ဧါ.

လၢၢ်လၢပှၤသူၣ်ဟံၣ်တဖၣ်ညိကွံာ်ဝဲတဖျၢၣ်န့ၣ်,ကဲထီၣ်လၢတၢ်သနၢၣ်အခိၣ်လီၤ.
11 တၢ်အံၤဟဲလၢယွၤဒီးမ့ၢ်တၢ်လီၤလးလၢပမဲာ်ညါလီၤ. ^{▼▼12:11 စံး.၁၁၈း၂၂}

12 ဒီးအဝဲသ့ၣ်သုဟံးဃာ်အီၤဘၣ်ဆၣ်ဒီး,ပျံၤပှၤဂီၢ်မုၢ်န့ၣ်လီၤ.အဂ့ၢ်ဒ်အံၤ,သ့ၣ်ညါဝဲလၢအကတိၤတၢ်ကတိၤဒိန့ၣ်ထီဒါအီၤလီၤ.ဒီးပာ်လီၤတဲာ်အီၤဒီးဟးကွံာ်ဝဲတကူၢ်သ့ၣ်လီၤ. 13 ဒီးအဝဲသ့ၣ်တဖၣ်န့ၣ်,ဒ်သိးအကတုၢ်န့ၢ်အတၢ်ကတိၤဒီး,မၢလီၤပှၤဖၤရံၤရှဲဒီးပှၤဟ့ၤရိာ်ဖိတနီၤနီၤ,လဲၤဆူအအိၣ်လီၤ. 14 ဒီးဟဲဝဲဒီးစံးဘၣ်အီၤ.သရၣ်ဧၢ,ပသ့ၣ်ညါလၢနမ့ၢ်ပှၤအမ့ၢ်အတီ,ဒီးနတပျံၤဘၣ်ပှၤကညီနီတဂၤဘၣ်.အဂ့ၢ်ဒ်အံၤ,နတကွၢ်မဲာ်ပှၤကညီဘၣ်.မ့မ့ၢ်နသိၣ်တၢ်သီတၢ်လၢယွၤအကျဲနီၢ်နီၢ်လီၤ.ပဟ့ၣ်သွဲလၢကဲစၢ်မ့ၢ်အကြၢး,မ့ၢ်အတကြၢးဘၣ်လဲၣ်.မ့ၢ်ပဘၣ်ဟ့ၣ်,မ့ၢ်ပတဘၣ်ဟ့ၣ်ဘၣ်လဲၣ်. 15 ဒီးအဝဲဒၣ်သ့ၣ်ညါအတၢ်လီတၢ်ဝ့ၤ,ဒီးစံးဘၣ်အီၤ,ဘၣ်မနုၤသုလ့ပစီယၤလဲၣ်.ဟဲစိာ်န့ၢ်ယၤလၢစ့ဒန့ၤရံတဘ့ၣ်,ဒ်သိးယကထံၣ်ဘၣ်အီၤတက့ၢ်. 16 ဒီးဟဲစိာ်ဝဲလီၤ.ဒီးစံးဘၣ်အီၤ,အအံၤမ့ၢ်မတၤအက့ၢ်အဂီၤ,ဒီးမ့ၢ်မတၤအတၢ်ကွဲးအိၣ်လၢအလိၤလဲၣ်.ဒီးအဝဲသ့ၣ်စံးဘၣ်အီၤ,ကဲစၢ်အဝဲလီၤ. 17 ဒီးယ့ၣ်ရှူးစံးဆၢတၢ်ဒီးစံးဘၣ်အီၤ,ဟ့ၣ်ကဲစၢ်လၢကဲစၢ်အတၢ်,ဒီးယွၤလၢယွၤအတၢ်တက့ၢ်.ဒီးကမၢကမၣ်ဝဲတကူၢ်သ့ၣ်လၢအဃိလီၤ.

18 ဒီးပှၤစးဒူၤကဲလၢအစံးဝဲ,တၢ်ဂဲၤဆၢထၢၣ်က့ၤတအိၣ်ဘၣ်န့ၣ်,ဟဲဆူအအိၣ်,ဒီးသံကွၢ်အီၤ,ဒီးစံးဝဲဒၣ်, 19 သရၣ်ဧၢ,စီၤမိၤရှ့ကွဲးန့ၢ်ပှၤလၢပှၤတဂၤဂၤမ့ၢ်သံသဒၣ်အမါဒီးအဖိတအိၣ်လီၤတဲာ်ဒီး,အဒီပုၢ်ဝဲၢ်ခွါဘၣ်ဟံးန့ၢ်အမါ,ဒီးဒုးအိၣ်ထီၣ်န့ၢ်အဒီပုၢ်ဝဲၢ်ခွါအချံအသၣ်လီၤ. ^{▼▼12:19 ၅မိၤ.၂၅း၅} 20 ပှၤဒီပုၢ်ဝဲၢ်ခွါအိၣ်နွံဂၤလီၤ.ဒီးအခီၣ်ထံးတဂၤဟံးန့ၢ်အမါဒီးသံဝဲ,ဒီးအချံအသၣ်တအိၣ်လီၤတဲၣ်ဘၣ်ဝဲဘၣ်. 21 ဒီးခံဂၤတဂၤန့ၣ်ဟံးန့ၢ်ပိာ်မုၣ်န့ၣ်ဒီးသံဝဲ,ဒီးအချံအသၣ်တအိၣ်လီၤတဲာ်စ့ၢ်ကီးဘၣ်.ဒ်န့ၣ်အသိး,သၢဂၤတဂၤလီၤ. 22 ဒီးပှၤနွံဂၤန့ၣ်ဟံးန့ၢ်ပိာ်မုၣ်န့ၣ်ဒီးအချံအသၣ်တပာ်လီၤတဲာ်ဘၣ်လီၤ.ဒီးလၢပှၤခဲလၢာ်န့ၣ်အခံကတၢၢ်ပိာ်မုၣ်န့ၣ်သံစ့ၢ်ကီးဝဲလီၤ. 23 မၤသးဒ်န့ၣ်ဒီးလၢတၢ်ဂဲၤဆၢထၢၣ်က့ၤအပူၤ,တုၤအဂဲၤဆၢထၢၣ်ဝဲဒီး,မ့ၢ်အကကဲဝဲလၢပှၤတဖၣ်န့ၣ်အမါဖဲလဲၣ်တဂၤလဲၣ်.အဂ့ၢ်ဒ်အံၤ,ပှၤနွံဂၤန့ၣ်န့ၢ်မါလၢအီၤလီၤ. 24 ဒီးယ့ၣ်ရှူးစံးဆၢတၢ်ဒီးစံးဘၣ်အီၤ,မ့ၢ်သုတသ့ၣ်ညါဘၣ်တၢ်ကွဲးအသး,ဒီးယွၤအစိကမီၤဘၣ်သတးဒီး,သုနာ်ကမၣ်တၢ်,တမ့ၢ်ဘၣ်ဧါ. 25 အဂ့ၢ်ဒ်အံၤ,တုၤအဂဲၤဆၢထၢၣ်က့ၤလၢတၢ်သံအပူၤဒီး,ပှၤတန့ၢ်မါန့ၢ်ဝၤဘၣ်.မ့ၢ်အအိၣ်ဝဲဒ်ယွၤအကလူးတဖၣ်လၢမူခိၣ်အသိးန့ၣ်လီၤ. 26 ဒီးတၢ်လၢအပှၤသံအဂ့ၢ်အကျိၤလၢအကဂဲၤဆၢထၢၣ်က့ၤန့ၣ်,မ့ၢ်သုတဖးဘၣ်လၢစီၤမိၤရှ့အလံာ်အပူၤ,ဖဲယွၤစံးဘၣ်အီၤလၢသ့ၣ်တၤဆှုၣ်တခိၣ်အပူၤဘၣ်ဧါ.တၢ်လၢယၤအံၤယမ့ၢ်စီၤအၤဘြၤဟၣ်အကစၢ်,ဒီးစီၤအံၤစဲးအကစၢ်,ဒီးစီၤယၤကိာ်အကစၢ်လီၤ. ^{▼▼12:26 ၂မိၤ.၃း၆} 27 အဝဲဒၣ်န့ၣ်တမ့ၢ်ဘၣ်ပှၤသံအကစၢ်ဘၣ်,မ့ၢ်ပှၤမူအကစၢ်လီၤ.မၤသးဒ်န့ၣ်ဒီး,သုနာ်ကမၣ်တၢ်ယိာ်မးလီၤ,

28 ဒီးပှၤကွဲးလံာ်တဂၤဟဲဒီးနၢ်ဟူလၢအဝဲသ့ၣ်အတၢ်သံကွၢ်လိာ်အသး,ဒီးသ့ၣ်ညါဝဲလၢအစံးဆၢတၢ်ဘၣ်ဒီးသံကွၢ်အီၤ,တၢ်မၤလိာ်ခဲလၢာ်အကျါန့ၣ်,အခိၣ်သ့ၣ်မ့ၢ်ဖဲလဲၣ်တထံၣ်လဲၣ်. 29 ဒီးယ့ၣ်ရှူးစံးဆၢအီၤ,လၢတၢ်မၤလိာ်ခဲလၢာ်အကျါအခိၣ်သ့ၣ်စံးဝဲဒၣ်,ကနၣ်တက့ၢ်,အံၣ်စရ့လးဧၢ,ယွၤပကစၢ်န့ၣ်မ့ၢ်ယွၤတဂၤဃီလီၤ.

30 ဒီးနဘၣ်အဲၣ်ယွၤနကစၢ်လၢနသူၣ်ကံၢ်သးလဲ,ဒီးနသးဒီဖျၢၣ်ညါ,ဒီးနတၢ်ကူၣ်တၢ်ဆးတုၤအလၢာ်,ဒီးနဂံၢ်နဘါခဲလၢာ်တက့ၢ်. ^{▼▼12:30 ၅မိၤ.၆း၄},အအံၤမ့ၢ်တၢ်မၤလိာ်အခိၣ်သ့ၣ်တထံၣ်လီၤ. 31 ဒီးခံထံၣ်တထံၣ်န့ၣ်လီၤဂာ်လၢအီၤလီၤ.အဲၣ်ပှၤလၢနဃၢၤဒ်နအဲၣ်လီၤနသးဒၣ်နဲအသိးန့ၣ်တက့ၢ်. ^{▼▼12:31 ၃မိၤ.၁၉း၁၈}.တၢ်မၤလိာ်အဂုၤအဂၤဒိၣ်န့ၢ်အဝဲတဖၣ်န့ၣ်တအိၣ်ဘၣ်. 32 ဒီးပှၤကွဲးလံာ်တဂၤန့ၣ်စံးဘၣ်အီၤ,ဘၣ်မးလီၤ,သရၣ်ဧၢ,နစံးလံတၢ်မ့ၢ်တၢ်တီလီၤ.အဂ့ၢ်ဒ်အံၤ,ကစၢ်အိၣ်တဂၤဃီလီၤ.ဒီးလၢအဝဲဒၣ်အမဲာ်ညါန့ၣ်,ကစၢ်အဂုၤအဂၤတအိၣ်ဘၣ်. 33 ဒီးပှၤအဲၣ်အီၤလၢအသးဒီဖျၢၣ်ညါ,ဒီးလၢအသးသ့ၣ်ညါနၢ်ပၢၢ်ခဲလၢာ်ဒီးအသူၣ်ကံၢ်သးလဲ,ဒီးလၢအဂံၢ်အဘါခဲလၢာ်,ဒီးတၢ်အဲၣ်ပှၤအိၣ်လၢအဃၢၤဒ်အကစၢ်ဒၣ်ဝဲအသိးန့ၣ်,ဂ့ၤန့ၢ်တၢ်လုၢ်ဆိၣ်ကဲၤဒီဒု,ဒီးတၢ်လုၢ်ခဲလၢာ်တက့ၢ်လီၤ. 34 ဒီးယ့ၣ်ရှူးသ့ၣ်ညါဝဲလၢအစံးဆၢတၢ်လၢအသူၣ်ဆးအသးဆးဒီးစံးဘၣ်အီၤ,နဲဒၣ်အံၤနတယံၤဘၣ်ဒီးယွၤအဘီအမုၢ်ဘၣ်,ဒီးပှၤသံကွၢ်အီၤတဘူၣ်လၢၤဘၣ်နီတဂၤဘၣ်.

35 ဒီးဖဲအသိၣ်က့ၤသီက့ၤတၢ်လၢတၢ်လုၢ်အဟံၣ်ပူၤန့ၣ်,ယ့ၣ်ရှူးကတိၤဆၢတၢဒီးစံးဝဲဒၣ်,ပှၤကွဲးလံာ်သ့ၣ်တဖၣ်စံးဝဲလၢခရံာ်န့ၣ်မ့ၢ်စီၤဒၤဝံးအဖိခွါဒ်လဲၣ်. 36 အဂ့ၢ်ဒ်အံၤ,စီၤဒၤဝံးအကစၢ်ဒၣ်ဝဲစံးလၢအသးစီဆှံအပူၤ,

ယွၤစံးဘၣ်ယကစၢ်,
ဆ့ၣ်နီၤလၢယစုထွဲ,
တုၤယပာ်နဒုၣ်နဒါတဖၣ်လၢနခီၣ်ယီၢ်လီၤအလီၢ်န့ၣ်တက့ၢ်. ^{▼▼12:36 စံး.၁၁၀း၁} 37 မၤသးဒ်န့ၣ်ဒီးစီၤဒၤဝံးအကစၢ်ဒၣ်ဝဲန့ၣ်,ကိးအီၤလၢအကစၢ်,ဒီးကမ့ၢ်အဖိခွါဒ်လဲၣ်.ဒီးပှၤဂီၢ်မုၢ်ဖးဒိၣ်ဒိကနၣ်ဝဲမုာ်မးတကူၢ်သ့ၣ်လီၤ.

38 ဒီးဖဲအသိၣ်က့ၤသီက့ၤတၢ်န့ၣ်ဒီး,စံးဘၣ်အီၤ,ပလီၢ်သုသးလၢပှၤကွဲးလံာ်တဖၣ်တက့ၢ်.အဝဲသ့ၣ်တဖၣ်န့ၣ်အဲၣ်ဒိးဝဲအလဲၤတၢ်လၢအသိးဆ့ထီထီကလဲာ်,ဒီးတၢ်ကတိၤဒိၣ်အီၤလၢဖၠါပူၤ, 39 ဒီးအလီၢ်ဆ့ၣ်နီၤလၢအဂ့ၤကတၢၢ်လၢဘူၣ်ဘျီၣ်ပူၤ,ဒီးတၢ်အလီၢ်လၢအဂ့ၤကတၢၢ်လၢပှၤအီၣ်တၢ်အီတၢ်အကျါလီၤ. 40 ဒီးအီၣ်ကွံာ်ပှၤမုၣ်ကမဲအဟံၣ်,ဒီးလၢတၢ်အိၣ်ဖျါအဂီၢ်န့ၣ်,ဘါထုကဖၣ်တၢ်ထီထီကလဲာ်လီၤ.အဝဲသ့ၣ်တဖၣ်န့ၣ်ကဘၣ်ဒိးတၢ်စံၣ်ညီၣ်နးတက့ၢ်လီၤ.

41 ဒီးယ့ၣ်ရှူးဆ့ၣ်နီၤသဃီၤဒီးစ့ပာ်ဖှိၣ်အလီၢ်,ဒီးကွၢ်ဝဲလၢပှၤဂီၢ်မုၢ်ခဲလၢာ်တ့ၢ်လီၤတိၢ်လၢတၢ်ပာ်ဖှိၣ်အလီၢ်အပူၤလီၤ.ဒီးပှၤအထူးအတီၤအါဂၤတ့ၢ်လီၤဝဲလၢအအါလီၤ. 42 ဒီးပှၤမုၣ်ကမဲအဖှီၣ်အယာ်တဂၤဟဲဝဲ,ဒီးတ့ၢ်လီၤကးခံဘ့ၣ်.လၢအမ့ၢ်တိၢ်တဘ့ၣ်လီၤ. 43 ဒီးကိးန့ၢ်အပျဲၢ်အဘီၣ်ဆူအအိၣ်ဒီးစံးဘၣ်အီၤ,ယစံးဘၣ်သုတီတီ,လၢပှၤလၢအတ့ၢ်လီၤတၢ်လၢတၢ်ပာ်ဖှိၣ်အလီၢ်ပူၤန့ၣ်,ပှၤမုၣ်ကမဲအဖှီၣ်အယာ်တဂၤအံၤ,တ့ၢ်လီၤတၢ်အါန့ၢ်အဝဲသ့ၣ်ခဲလၢာ်တက့ၢ်လီၤ. 44 အဂ့ၢ်ဒ်အံၤ,အဝဲသ့ၣ်ခဲလၢာ်တ့ၢ်လီၤလၢအတၢ်ပှဲၤလုၣ်ကွံာ်န့ၣ်လီၤ.မ့မ့ၢ်ပိာ်မုၣ်တဂၤအံၤ,လၢအတၢ်တလၢဘၣ်အပူၤန့ၣ်တ့ၢ်လီၤဖဲဒၣ်အတၢ်အိၣ်ဒီးအီၤခဲလၢာ်,လၢအမ့ၢ်အတၢ်လုၢ်အီၣ်လုၢ်အီအီၤခဲလၢာ်လီၤ.