‏ Mark 15

1ဒီးမုၢ်ဆ့ၣ်ထီၣ်တကီၢ်ခါ,ပှၤလုၢ်တၢ်အခိၣ်တဖၣ်ကူၣ်လိာ်အသးဒီးပှၤသူၣ်က့သးပှၢ်ဒီးပှၤကွဲးလံာ်ဒီးပှၤသးပှၢ်အတၢ်အိၣ်ဖှိၣ်ခဲလၢာ်,ဒီးစၢဃာ်ယ့ၣ်ရှူး,ဒီးလဲၤဆှၢအီၤ,ဒီးဟ့ၣ်လီၤကွံာ်အီၤလၢစီၤပံၤလးလီၤ. 2ဒီးစီၤပံၤလးသံကွၢ်အီၤ,နဲဒၣ်အံၤနမ့ၢ်ပှၤယူဒၤဖိအစီၤပၤဧါ.ဒီးအဝဲဒၣ်စံးဆၢတၢ်ဒီးစံးဘၣ်အီၤ,နစံးတၢ်လီၤ. 3ဒီးပှၤလုၢ်တၢ်အခိၣ်တဖၣ်ပာ်တၢ်ကမၣ်လၢအလိၤအါမံၤလီၤ.

4ဒီးစီၤပံၤလးသံကွၢ်ကဒီးအီၤဒီးစံးဝဲဒၣ်,နတစံးဆၢဘၣ်တၢ်နီတမံၤဘၣ်ဧါ.မ့ၢ်ပှၤအုၣ်အသးထီဒါနၤဆံးအါဆံးအါလဲၣ်န့ၣ်,ကွၢ်တက့ၢ်. 5ဘၣ်ဆၣ်ဒီး,ယ့ၣ်ရှူးတစံးဆၢလၢၤဘၣ်တၢ်နီတမံၤဘၣ်.မၤသးဒ်န့ၣ်ဒီး,စီၤပံၤလးကမၢကမၣ်ဝဲလီၤ.

6ဒီးတၢ်လၢဘူၣ်န့ၣ်,ပဒိၣ်ပျၢ်ပှၤဃိာ်ဖိတဂၤလၢအဝဲသ့ၣ်အဂီၢ်,ဖဲဒၣ်အဃ့ပှၤတဂၤဂၤန့ၣ်လီၤ. 7ဒီးပှၤတဂၤကိးဝဲအမံၤလၢစီၤဘၤရးဘါအိၣ်ဒီးအသကိးတဖၣ်,ဘၣ်တၢ်စၢဃာ်လၢဃိာ်ပူၤ,လၢအမၤတ့ၢ်တၢ်တၢထီၣ်တၢလီၤဒီးမၤသံပှၤကညီလၢတၢ်တၢထီၣ်တၢလီၤအပူၤလီၤ. 8ဒီးပှၤဂီၢ်မုၢ်ကိးပသူထီၣ်ဒီးဃ့ဝဲဒ်သိးအကမၤတၢ်လၢအီၤဒ်အလုၢ်အလၢ်အိၣ်ဝဲအသိးလီၤ. 9ဘၣ်ဆၣ်ဒီးစီၤပံၤလးစံးဆၢအီၤဒီးစံးဝဲဒၣ်,ဘၣ်သုသးလၢယကပျၢ်န့ၢ်သုလၢပှၤယူဒၤဖိအစီၤပၤဧါ. 10အဂ့ၢ်ဒ်အံၤ,သ့ၣ်ညါဝဲလၢပှၤလုၢ်တၢ်အခိၣ်တဖၣ်န့ၣ်,လၢအသးက့ၣ်အီၤအဃိဒီးဟ့ၣ်လီၤကွံာ်အီၤလီၤ. 11ဒီးပှၤလုၢ်တၢ်အဒိၣ်တဖၣ်န့ၣ်သဆၣ်ထီၣ်ပှၤဂီၢ်မုၢ်အခံဒ်သိးကပျၢ်စီၤဘၤရးဘါလၢအီၤလီၤ. 12ဒီးစီၤပံၤလးစံးဆၢအီၤ,မ့မ့ၢ်ဒ်န့ၣ်ဒီး,ဘၣ်သုသးလၢယကမၤပှၤလၢသုကိးအီၤလၢပှၤယူဒၤဖိအစီၤပၤတဂၤန့ၣ်ဒ်လဲၣ်. 13ဒီးပှၤကိးပသူထီၣ်ကဒီး,ပျၤထီကွံာ်အီၤလၢထူၣ်စုညါအလိၤတက့ၢ်. 14ဒီးစီၤပံၤလးစံးဘၣ်အီၤ,ဘၣ်မနုၤလဲၣ်.မ့ၢ်အမၤတၢ်အၢမနုၤတမံၤလဲၣ်.ဒီးအဝဲသ့ၣ်ကိးပသူထီၣ်ဝဲဒိၣ်န့ၢ်အန့ၣ်တက့ၢ်,ပျၤထီကွံာ်အီၤလၢထူၣ်စုညါအလိၤတက့ၢ်.

15ဒီးစီၤပံၤလးန့ၣ်အသးအိၣ်လၢအကမၤတၢ်ဘၣ်ပှၤဂီၢ်မုၢ်အသး,ဒီးပျၢ်စီၤဘၤရးဘါလၢအဂီၢ်,ဒီးတီၢ်ယ့ၣ်ရှူးဒီးဟ့ၣ်လီၤကွံာ်အီၤ,ဒ်သိးအကဘၣ်တၢ်ပျၤထီကွံာ်အီၤလၢထူၣ်စုညါအလိၤလီၤ, 16ဒီးပှၤသုးဖိတဖၣ်ဆှၢအီၤဆူဂၢၤပူၤလၢအမ့ၢ်ပဒိၣ်အသုးဖိအလီၢ်,ဒီးကိးဖှိၣ်ပှၤသုးဖိဒီဖုညါ, 17ဒီးဒုးကူဒုးသိးအဝဲဒၣ်လၢတၢ်လုးတကုာ်,ဒီးထ့ခိၣ်သလုးလၢတၤဆှုၣ်,ဒီးဒုးကုာ်ထီၣ်ဝဲလီၤ. 18ဒီးကတိၤဒိၣ်အီၤ,ဒီးစံးဝဲဒၣ်,ပှၤယူဒၤဖိအစီၤပၤဧၢ, 19ဒီးဒိအခိၣ်လၢတပိၢ်တဘိ,ဒီးထူးပှဲာ်ဘၣ်အီၤ,ဒီးချံးလီၤအခီၣ်လၢအမဲာ်ညါ,ဒီးဘါထီၣ်အီၤတကူၢ်သ့ၣ်လီၤ. 20ဒီးတုၤအဒုၣ်ဒွဲၣ်အီၤဝံၤဒီး,ဘ့ၣ်လီၤကွံာ်အကူအသိးလုးတကုာ်,ဒီးဒုးကူဒုးသိးက့ၤအကူအသိးဒၣ်ဝဲ,ဒီးလဲၤဆှၢအီၤ,ဒ်သိးအကပျၤထီအီၤလၢထူၣ်စုညါအလိၤလီၤ.

21ဒီးမၤဆူၣ်ပှၤကူၤရ့ၤန့ဖိ,စီၤအလ့းစၣ်ဒြူးဒီးစီၤရူၤပၤအပၢ်,စီၤရှံမိၣ်တဂၤ,အဟဲဝဲလၢပှၢ်လၢ်ကျါဒီးလဲၤတြူာ်ဝဲတဂၤ,ဒ်သိးအကယိးအထူၣ်စုညါန့ၣ်လီၤ. 22ဒီးဆှၢအီၤပၢၢ်လၢတၢ်အလီၢ်ကီၤလၤကီၤသါ,(အခီပညီမ့ၢ်ခိၣ်ဃံအလီၢ်,) 23ဒီးဟ့ၣ်အီအီၤလၢစပံးထံဃါဃုာ်ဒီးမူရၣ်,ဘၣ်ဆၣ်ဒီး,တဟံးန့ၢ်ဘၣ်ဝဲဘၣ်. 24ဒီးပျၤထီအီၤလၢထူၣ်စုညါအလိၤ,ဒီးနီၤဖးအကူအသိး,ဒီးပှၤတဂၤဒီးတဂၤကဟံးန့ၢ်မနုၤမနုၤန့ၣ်ဒီး,ဖးဝဲလၢအီၤလီၤ. 25ဒီးဘၣ်သၢနၣ်ရံၣ်,ဒီးပျၤထီအီၤလီၤ. 26ဒီးလံာ်ပာ်ကမၣ်အိၣ်ကွဲးအသးလၢအဖီခိၣ်,ပှၤယူဒၤဖိအစီၤပၤလီၤ.

27ဒီးပျၤထီဃုာ်ဒီးအီၤတၢ်ဘျၣ်ခံဂၤ,လၢအစုထွဲတဂၤဒီးလၢအစုစ့ၣ်တဂၤလီၤ. 28ဒီးတၢ်ကွဲးအသးတထံၣ်လၢထီၣ်ပှဲၤထီၣ်ဝဲ,စံးဝဲဒၣ်,အဝဲဒၣ်,တၢ်ဂံၢ်အီၤလၢပှၤမၤကမၣ်တၢ်ဖိအကျါလီၤ. ▼

▼15:28 ရှါ.၅၃း၅

. 29ဒီးပှၤလ့ၢ်လိၤလ့ၢ်ထီၣ်တဖၣ်ကျၢၢ်ကျာ်အခိၣ်,ဒီးဒုၣ်ဒွဲၣ်အီၤ,ဒီးစံးဝဲဒၣ်,ဟဲး,ပှၤလၢအမၤလီၤပှီၢ်ကွံာ်တၢ်လုၢ်အဟံၣ်,ဒီးမၤက့ၤအီၤလၢသၢနံၤအတီၢ်ပူၤတဂၤဧၢ. 30အုၣ်က့ၤခီၣ်က့ၤလီၤနသးဒၣ်နဲ,ဒီးဟဲက့ၤလီၤလၢထူၣ်စုညါအလိၤတက့ၢ်. 31ဒ်န့ၣ်အသိး,ပှၤလုၢ်တၢ်အခိၣ်တဖၣ်ဒုၣ်ဒွဲၣ်အီၤစ့ၢ်ကီး,ဒီးစံးလိာ်အသးဒီးပှၤကွဲးလံာ်သ့ၣ်တဖၣ်,အဝဲဒၣ်အုၣ်က့ၤခီၣ်က့ၤပှၤဂၤ,အုၣ်က့ၤခီၣ်က့ၤလီၤအသးဒၣ်ဝဲတသ့ဘၣ်. 32မ်ခရံာ်အံၣ်စရ့လးအစီၤပၤ,ဟဲက့ၤလီၤလၢထူၣ်စုညါအလိၤခဲကနံၣ်အံၤ,ဒ်သိးပကထံၣ်ဒီးနာ်တၢ်တက့ၢ်.ဒီးပှၤလၢအဘၣ်ပျၤထီဃုာ်ဒီးအီၤလၢထူၣ်စုညါအလိၤန့ၣ်,ဒုၣ်ဒွဲၣ်အီၤလီၤ.

33ဒီးတုၤဃုနၣ်ရံၣ်ဘၣ်ဒီး,တၢ်ခံးဝဲလၢကီၢ်ဒီဘ့ၣ်ညါတုၤလီၤလၢခွံနၣ်ရံၣ်လီၤ, 34ဒီးဘၣ်ခွံနၣ်ရံၣ်ဒီး,ယ့ၣ်ရှူးကိးထီၣ်လၢအကလုၢ်ဖးဒိၣ်ဒီးစံးဝဲဒၣ်,အ့းလိအံၤ,အ့းလိအံၤ,လၤမါစၤဘၤဃသၤနံ,အခီပညီမ့ၢ်,ယကစၢ်ဧၢ,ယကစၢ်ဧၢ,ဘၣ်မနုၤလဲၤသဒၣ်ယၤလဲၣ်. 35 ▼

▼15:35 စံး.၂၂း၁

.ဒီးပှၤဆၢထၢၣ်ဘၣ်လၢအဃၢၤတနီၤနီၤ,တုၤအနၢ်ဟူတၢ်န့ၣ်ဒီး,စံးဝဲဒၣ်,ကွၢ်ကွၢ်,မ့ၢ်အကိးစီၤအ့ၤလံယၤလီၤ. 36ဒီးပှၤတဂၤဃ့ၢ်ဝဲဒီးစုၣ်စီၣ်ကုၤပီၣ်လဲၣ်တလိၣ်လၢတၤဆံၣ်ထံ,ဒီးစဲထိၣ်ဝဲလၢတပိၢ်တဘိ,ဒီးဒုးအီအီၤဒီးစံးဝဲဒၣ်,ကအိၣ်ဒၣ်ဝဲတက့ၢ်.မ့ၢ်စီၤအ့ၤလံယၤကဟဲစိာ်လီၤအီၤ,တဟဲဘၣ်လဲၣ်န့ၣ်,ကွၢ်သကိးတက့ၢ်. 37ဒီးယ့ၣ်ရှူးကိးထီၣ်လၢအကလုၢ်ဖးဒိၣ်,ဒီးအသးဟးထီၣ်ကွံာ်ဝဲလီၤ. 38ဒီးတၢ်လုၢ်ဟံၣ်အယၣ်ဘျးလီၤအသးန့ၣ်,သ့ၣ်ဖးလၢအစိးပၢၢ်လၢအခီၣ်ထံး,ခံခီလီၤ. 39ဒီးပှၤသုးဖိတကယၤအခိၣ်တဂၤ,လၢအဆၢထၢၣ်သဃီၤဒီးအီၤ,ထံၣ်ဝဲလၢအကိးပသူထီၣ်ဒ်န့ၣ်ဒီးအသးဟးဂီၤကွံာ်ဝဲဒီး,စံးဝဲဒၣ်,ပှၤကညီတဂၤအံၤ,မ့ၢ်မးယွၤအဖိခွါနီၢ်နီၢ်လီၤ.

40ဒီးပှၤပိာ်မုၣ်လၢအကွၢ်သကွ့ၤတၢ်တနီၤနီၤအိၣ်ဝဲလီၤ.နီၢ်မၤရံမၤကဒၤလ့ၣ်,ဒီးစီၤယၤကိာ်သးစၢ်ဒီးစီၤယိၤစ့ၣ်အမိၢ်နီၢ်မၤရံ,ဒီးနီၢ်စၤလိၣ်သ့ၣ်တဖၣ်အိၣ်ဝဲလၢအကျါ, 41ဒီးဖဲယ့ၣ်ရှူးအိၣ်တ့ၢ်လၢကၤလံၤလါန့ၣ်,အဝဲသ့ၣ်တဖၣ်ပိာ်အခံ,ဒီးမၤအခ့အပှၤအတၢ်မၤ,ဒီးပိာ်မုၣ်အဂၤလၢအဟဲပိာ်အခံဆူယရူၤရှလ့ၣ်,အိၣ်ဝဲအါဂၤစ့ၢ်ကီးလီၤ.

42ဒီးတုၤမုၢ်ဟါလီၤတ့ၢ်,ဒီးမ့ၢ်မုၢ်ကတဲာ်ကတီၤတနံၤ,ဒ်ပစံးတၢ်အသိး,မုၢ်အိၣ်ဘှံးအနံၤတချုးဘၣ်ဒံးဘၣ်တနံၤသတးဒီး, 43ပှၤအရံၤမၤသဲဖိ,စီၤယိၤသး,ပှၤကူၣ်လိာ်အသးဖိအိၣ်ဒီးအလၤကပီၤ,လၢအကစၢ်ဒၣ်ဝဲစ့ၢ်ကီးကွၢ်လၢ်ယွၤအဘီအမုၢ်အကျဲတဂၤ,ဟဲဝဲဒီးပာ်အသးခူတလ့ၢ်,ဒီးလဲၤနုာ်ဝဲစီၤပံၤလးအအိၣ်,ဒီးဃ့က့ၤယ့ၣ်ရှူးအစိၣ်လီၤ. 44ဒီးမ့ၢ်အသံတ့ၢ်လံဒီး,စီၤပံၤလးကမၢကမၣ်,ဒီးကိးန့ၢ်ပှၤသုးဖိတကယၤအခိၣ်တဂၤဆူအအိၣ်,ဒီးမ့ၢ်အသံယံာ်တ့ၢ်လံဧါန့ၣ်သံကွၢ်ဝဲဒၣ်လီၤ. 45ဒီးတုၤအသ့ၣ်ညါဝဲလၢပှၤသုးဖိတကယၤအခိၣ်န့ၣ်ဒီး,ဟ့ၣ်လီၤအစိၣ်လၢစီၤယိၤသးလီၤ. 46ဒီးအဝဲဒၣ်ပှ့ၤဖှီဝါဆှၣ်,ဒီးဟံးလီၤက့ၤအစိာၣ်,ဒီးဘိၣ်ဃာ်ဝဲလၢဖှီဝါကဆှၣ်န့ၣ်,ဒီးပာ်ဝဲလၢတၢ်သွၣ်ခိၣ်လၢအစးကျိၤန့ၢ်ဝဲလၢလၢၢ်ပူၤလီၤ. 47ဒီးနီၢ်မၤရံမၤကဒၤလ့ၣ်,ဒီးစီၤယိၤစ့ၣ်အမိၢ်နီၢ်မၤရံ,ထံၣ်အလီၢ်ဖဲတၢ်ပာ်လီၤအီၤန့ၣ်လီၤ.