Mar 16 | KswSKMB | STEP | ဒီးတုၤအိၣ်ဘှံးအနံၤပူၤကွံာ်ဒီး,နီၢ်မၤရံမၤကဒၤလ့ၣ်,ဒီးစီၤယၤကိာ်အမိၢ်နီၢ်မၤရံ,ဒီးနီၢ်စၤလိၣ်သ့ၣ်တဖၣ်န့ၣ်,ပှ့ၤတၢ်နၢမူဒ်သိးအကလဲၤဖှူအီၤလီၤ.

‏ Mark 16

1 ဒီးတုၤအိၣ်ဘှံးအနံၤပူၤကွံာ်ဒီး,နီၢ်မၤရံမၤကဒၤလ့ၣ်,ဒီးစီၤယၤကိာ်အမိၢ်နီၢ်မၤရံ,ဒီးနီၢ်စၤလိၣ်သ့ၣ်တဖၣ်န့ၣ်,ပှ့ၤတၢ်နၢမူဒ်သိးအကလဲၤဖှူအီၤလီၤ.

2 ဒီးနွံနံၤအကျါမုၢ်ခီၣ်ထံးတနံၤဂီၤဂီၤကလဲာ်ဒီး,ပိာ်မုၣ်တဖၣ်န့ၣ်ဟဲဝဲတုၤလၢတၢ်သွၣ်ခိၣ်ဖဲမုၢ်ဟဲထီၣ်န့ၣ်လီၤ. 3 ဒီးစံးလိာ်အသး,မ့ၢ်မတၤကတလ့ၣ်ကွံာ်န့ၢ်ပှၤလၢလၢၢ်အိၣ်လၢတၢ်သွၣ်ခိၣ်အခိၣ်ထိးတဂၤလဲၣ်. 4 ဒီးကွၢ်ထီၣ်ဝဲဒီးထံၣ်လၢလၢၢ်န့ၣ်တလ့ၣ်ကွံာ်လံအသးလံ.အဂ့ၢ်ဒ်အံၤ,မ့ၢ်တၢ်ဒိၣ်မးလီၤ. 5 ဒီးလဲၤနုာ်ဝဲဆူတၢ်သွၣ်ခိၣ်အပူၤ,ဒီးထံၣ်ဘၣ်ဖိၣ်သၣ်ခွါတဂၤ,သိးဆ့ဝါဖးထီ,ဒီးဆ့ၣ်နီၤဝဲလၢစုထွဲတခီ,ဒီးအဝဲသ့ၣ်ကမၢကမၣ်ဒိၣ်မးလီၤ. 6 ဒီးအဝဲဒၣ်စံးဘၣ်အီၤ,သုတကမၢကမၣ်တဂ့ၤ.သုဃုပှၤနစၤရ့းဖိယ့ၣ်ရှူးလၢပှၤပျၤထီအီၤလၢထူၣ်စုညါအလိၤလီၤ.ဂဲၤဆၢထၢၣ်က့ၤလံဝဲလံ.တအိၣ်ဘၣ်ဖဲအံၤဘၣ်.ကွၢ်ကွၢ်,အလီၢ်ဖဲပှၤပာ်အီၤတက့ၢ်. 7 ဘၣ်ဆၣ်ဒီးက့ၤစံးဘၣ်အပျဲၢ်အဘီၣ်သ့ၣ်တဖၣ်,ဒီးစီၤပ့းတရူး,လၢအလဲၤပာ်လၢသုမဲာ်ညါဆူကၤလံၤလါတက့ၢ်.ဒ်အစံးဘၣ်တ့ၢ်သုအသိးန့ၣ်,သုကထံၣ်အီၤဖဲန့ၣ်လီၤ. 8 ဒီးဟးထီၣ်ကွံာ်ဝဲဒီးဃ့ၢ်ကွံာ်လၢတၢ်သွၣ်ခိၣ်အအိၣ်,ဒီးကနိးဝဲဒီးအသးကတုၤ,ဒီးတစံးဘၣ်ပှၤနီတဂၤလၢတၢ်နီတမံၤဘၣ်.အဂ့ၢ်ဒ်အံၤ,ပျံၤတၢ်လီၤ.

9 ဒီးနွံနံၤအကျါမုၢ်ခီၣ်ထံးတနံၤလၢဂီၤဂီၤန့ၣ်,ယ့ၣ်ရှူးဂဲၤဆၢထၢၣ်က့ၤ,ဒီးဒုးနဲၣ်ဆိအသးလၢနီၢ်မၤရံမၤကဒၤလ့ၣ်,လၢအဟီထီၣ်ကွံာ်တ့ၢ်တၢ်နါနွံဒုလၢအလိၤတဂၤလီၤ. 10 ဒီးအဝဲဒၣ်စံးဘၣ်တဲဘၣ်ပှၤလၢအအိၣ်တ့ၢ်ဒီးယ့ၣ်ရှူးတဖၣ်,ဖဲအဟီၣ်တၢ်ယၢၤတၢ်ဒီးအမဲာ်ထံလီၤအဖၢမုၢ်. 11 ဒီးတုၤအဝဲသ့ၣ်နၢ်ဟူလၢအမူဝဲ,ဒီးလၢပိာ်မုၣ်ထံၣ်အီၤဒီး,တနာ်ဘၣ်ဝဲဘၣ်.

12 တၢ်န့ၣ်တဖၣ်အလီၢ်ခံ,ပှၤလၢအဝဲသ့ၣ်အကျါခံဂၤ,ဟးဝဲဒီးလဲၤဆူပှၢ်လၢ်ကျါအဖၢမုၢ်န့ၣ်,အဝဲဒၣ်လီၣ်ဖျါထီၣ်အသးလၢအီၤ,လၢအက့ၢ်အဂီၤလီၤဆီတမံၤလီၤ. 13 ဒီးအဝဲသ့ၣ်လဲၤစံးဘၣ်တဲဘၣ်ပှၤအိၣ်လီၤတဲာ်တဖၣ်,ဒီးတနာ်စ့ၢ်ကီးဘၣ်အီၤဘၣ်.

14 လၢခံက့ၤန့ၣ်,ပှၤတဆံတဂၤဆ့ၣ်နီၤသန့ၤအဖၢမုၢ်ဒီး,အဝဲဒၣ်လီၣ်ဖျါထီၣ်အသးလၢအီၤ,ဒီးမ့ၢ်အတနာ်ဘၣ်ပှၤလၢအထံၣ်ဘၣ်အီၤလၢအဂဲၤဆၢထၢၣ်က့ၤအလီၢ်ခံဒီး,ဒူဝဲအလိၤလၢအတနာ်ဘၣ်တၢ်ဘၣ်အဃိ,ဒီးလၢအသးကိၤဝဲအဃိလီၤ. 15 ဒီးစံးဘၣ်အီၤ,လဲၤလၢဟီၣ်ခိၣ်ဒီဘ့ၣ်ညါ,ဒီးစံၣ်တဲၤတဲလီၤတၢ်သးခုကစီၣ်လၢကယဲၢ်တၢ်ဘၣ်တ့အသးတဂၤလၢ်လၢ်တက့ၢ်. 16 ပှၤလၢအစူၢ်က့ၤနာ်က့ၤဝဲ,ဒီးဒိးဘျၢ ^{▼▼16:16 လၢဟ့းလ့ၣ်အကျိာ်"ဘးပတံစၢ်."}အသးန့ၣ်,ကတုၤလၢတၢ်အုၣ်က့ၤခီၣ်က့ၤအီၤလီၤ.မ့မ့ၢ်ပှၤလၢအတစူၢ်တနာ်ဘၣ်န့ၣ်,ကဘၣ်တၢ်စံၣ်ညီၣ်ဃၣ်အီၤလီၤ. 17 ဒီးပှၤလၢအစူၢ်က့ၤနာ်က့ၤတၢ်တဖၣ်န့ၣ်,တၢ်ပနီၣ်တဖၣ်ကမၤအသးလၢအီၤဒ်အံၤ,ကဟီထီၣ်ကွံာ်တၢ်နါလၢယမံၤ,ကကတိၤတၢ်လၢပျ့ၤအသီတဖၣ်, 18 ကဟံးထီၣ်ဂုၢ်ဧိၤဒးဧိၤ,ဒီးမ့ၢ်အီတၢ်မူၤသံဘၣ်ဆၣ်ဒီးတဘၣ်ဘၣ်တၢ်နီတမံၤဘၣ်.ကပာ်ထီၣ်အစုလၢပှၤဆူးပှၤဆါတဖၣ်အလိၤ,ဒီးကဘျါက့ၤဝဲလီၤ.

19 မၤသးဒ်န့ၣ်ဒီးကစၢ်န့ၣ်ကတိၤတၢ်ဒီးအဝဲသ့ၣ်အလီၢ်ခံဒီး,ဘၣ်တၢ်စိာ်ထီၣ်အီၤဆူမူခိၣ်,ဒီးဆ့ၣ်နီၤဝဲလၢယွၤအစုထွဲတခီလီၤ. 20 ဒီးအဝဲသ့ၣ်တဖၣ်န့ၣ်လဲၤစံၣ်တဲၤတဲလီၤတၢ်ကိးပူၤဒဲး,ဒီးကစၢ်န့ၣ်မၤဃုာ်တၢ်ဒီးအီၤ,ဒီးမၤဂၢၢ်မၤကျၢၤတၢ်အကလုၢ်အကထါလၢတၢ်ပနီၣ်လၢမၤအသးလၢအီၤလီၤ.