‏ Mark 4

1ဒီးသိၣ်က့ၤသီက့ၤတၢ်လၢပီၣ်လဲၣ်နံၤ,ဒီးပှၤဂီၢ်မုၢ်ဖးဒိၣ်ဟဲအိၣ်ဖှိၣ်ရိဖှိၣ်လၢအအိၣ်သတးဒီး,အဝဲဒၣ်လဲၤထီၣ်လၢကဘီတဘ့ၣ်အပူၤ,ဒီးဆ့ၣ်နီၤဝဲလၢပီၣ်လဲၣ်ပူၤ,ဒီးပှၤဂီၢ်မုၢ်ခဲလၢာ်အိၣ်လၢပီၣ်လဲၣ်နံၤလၢခိလီၤ. 2ဒီးအဝဲဒၣ်သိၣ်က့ၤသီက့ၤအီၤလၢတၢ်အါမံၤလၢတၢ်ကတိၤဒိ,ဒီးစံးဘၣ်အီၤလၢအတၢ်သိၣ်တၢ်သီအပူၤ,ဒီးစံးဝဲဒၣ်.

3ကနၣ်တက့ၢ်.ကွၢ်ကွၢ်,ပှၤလၢအဖှံတၢ်တဂၤ,လဲၤဖှံတၢ်လီၤ. 4ဒီးတၢ်မၤအသးလၢအဖှံတၢ်န့ၣ်,တနီၤနီၤလီၤဘၣ်လၢကျဲအသရ့ၤ,ဒီးထိၣ်ဖိလံၣ်ဖိဟဲအီၣ်ကွံာ်အီၤလီၤ. 5ဒီးအဂၤတနီၤလီၤဘၣ်ဝဲလၢလၢၢ်ကျါဖဲဟီၣ်ခိၣ်တအါဘၣ်,ဒီးမ့ၢ်ဟီၣ်ခိၣ်တယိာ်ဘၣ်ဒီး,မဲထီၣ်ဝဲတကီၢ်ခါ, 6ဒီးတုၤမုၢ်ဟဲထီၣ်ဒီးဆါဆဲးဘၣ်ဝဲဒီး,မ့ၢ်အဂံၢ်တအိၣ်ဘၣ်ဒီးဃ့ထီၣ်ကွံာ်ဝဲလီၤ. 7ဒီးအဂၤတနီၤလီၤဘၣ်ဝဲလၢတၤဆှုၣ်တၤမဲအကျါဒီးတၤဆှုၣ်တၤမဲန့ၣ်မဲထီၣ်ဒီးခဲဘၢကွံာ်အီၤ,ဒီးတသၣ်ထီၣ်ဘၣ်ဝဲဘၣ်. 8ဒီးအဂၤတနီၤလီၤဘၣ်ဝဲလၢဟီၣ်ခိၣ်ဂ့ၤ,ဒီးသၣ်ထီၣ်,ဒီးအါထီၣ်ဝဲအါန့ၢ်အလီၢ်,တနီၤသၢဆံ,ဒီးတနီၤဃုဆံ,ဒီးတနီၤတကယၤလီၤ. 9ဒီးစံးဝဲဒၣ်,ပှၤအိၣ်ဒီးအနၢ်လၢအနၢ်ဟူတၢ်န့ၣ်,မ်အနၢ်ဟူတၢ်တက့ၢ်.

10ဒီးတုၤအအိၣ်တပူၤဒၣ်,တၢ်မၤအသးလၢပှၤအိၣ်တရံးအီၤ,ဒီးပှၤတဆံခံဂၤန့ၣ်,သံကွၢ်အီၤလၢတၢ်ကတိၤဒိအဂ့ၢ်အကျိၤလီၤ. 11ဒီးစံးဘၣ်တဲဘၣ်အီၤ,ယွၤအဘီအမုၢ်အတၢ်ခူသူၣ်န့ၣ်,တၢ်ဟ့ၣ်သ့ၣ်ညါသုလီၤ.မ့မ့ၢ်လၢပှၤအိၣ်လၢခိတဖၣ်န့ၣ်,တၢ်ခဲလၢာ်ကဲထီၣ်လၢတၢ်ကတိၤဒိလၢအမဲာ်ညါ, 12ဒ်သိးကွၢ်တၢ်ဒီး,ကကွၢ်ဝဲ,ဒီးတထံၣ်ဘၣ်တၢ်ဘၣ်,ဒီးနၢ်ဟူတၢ်ဒီး,ကနၢ်ဟူဝဲ,ဒီးအနၢ်တပၢၢ်ဘၣ်,ဒ်သိးအသုတဃၣ်လိၤအသး,ဒီးတၢ်သုတပျၢ်အတၢ်ဒဲးဘးတဂ့ၤလီၤ. ▼

▼4:12 ရှါ.၆း၉

13ဒီးစံးဘၣ်အီၤတၢ်ကတိၤဒိအံၤ,မ့ၢ်သုနၢ်တပၢၢ်ဘၣ်ဧါ.မ့မ့ၢ်ဒ်န့ၣ်ဒီး,သုနၢ်ကပၢၢ်တၢ်ကတိၤဒိခဲလၢာ်ဒ်လဲၣ်.ပှၤလၢအဖှံတၢ်န့ၣ်,ဖှံတၢ်အကလုၢ်အကထါလီၤ. 14ပှၤလၢအဖှံတၢ်န့ၣ်,ဖှံတၢ်အကလုၢ်အကထါလီၤ. 15အအံၤတဖၣ်မ့ၢ်ပှၤလၢအအိၣ်လၢကျဲအသရ့ၤ,ဖဲတၢ်အကလုၢ်ဖှံအသး,ဒီးတုၤအနၢ်ဟူတၢ်ဒီး,မုၣ်ကီၤလံၢ်ဟဲတကီၢ်ခါဒီးဟံးထီၣ်ကွံာ်တၢ်အကလုၢ်လၢအဖှံအသးလၢအသးကံၢ်ပူၤလီၤ. 16ဒီးဒ်န့ၣ်အသိး,အအံၤတဖၣ်မ့ၢ်ပှၤလၢအဖှံအသးလၢလၢၢ်ကျါ,အဝဲသ့ၣ်တုၤအနၢ်ဟူတၢ်အကလုၢ်ဒီး,ဒိးန့ၢ်လၢအသူၣ်ခုအသးခုတကီၢ်ခါလီၤ. 17ဒီးအဂံၢ်တအိၣ်ဘၣ်လၢအကစၢ်ဒၣ်ဝဲအပူၤ,ဘၣ်ဆၣ်ဒီးအိၣ်ဝဲတစိၢ်ဖိလီၤ.လၢခံက့ၤ,တုၤတၢ်နးတၢ်ဖှီၣ်မ့ၢ်ဂ့ၤ,တၢ်မၤအၢမၤနးမ့ၢ်ဂ့ၤ,အိၣ်ထီၣ်ဝဲလၢတၢ်အကလုၢ်အဃိဒီး,အသူၣ်ဟးဂူာ်ဟးဂီၤတကီၢ်ခါလီၤ. 18ဒီးအဂၤတဖၣ်,မ့ၢ်ပှၤလၢအဖှံအသးလၢတၤဆှုၣ်တၤမဲအကျါ,ပှၤတဖၣ်အံၤမ့ၢ်ပှၤလၢအနၢ်ဟူတၢ်အကလုၢ်, 19ဒီးတၢ်ဘၣ်ယိၣ်ဘၣ်ဃးဒီးအအံၤတဃၣ်,ဒီးတၢ်လီတၢ်ဝ့ၤဘၣ်ဃးဒီးတၢ်ထူးတၢ်တီၤ,ဒီးတၢ်သးကွံအဂုၤအဂၤတဖၣ်,ဟဲနုာ်ဝဲဒီးခဲဘၢကွံာ်တၢ်အကလုၢ်,ဒီးတသၣ်ထီၣ်ဘၣ်ဝဲဘၣ်. 20ဒီးအအံၤတဖၣ်မ့ၢ်ပှၤလၢအဘၣ်တၢ်ဖှံအသးလၢဟီၣ်ခိၣ်ဂ့ၤန့ၣ်,မ့ၢ်ပှၤလၢအနၢ်ဟူတၢ်အကလုၢ်,ဒီးဒိးန့ၢ်ဝဲ,ဒီးသၣ်ထီၣ်ဝဲတနီၤအါန့ၢ်အလီၢ်သၢဆံ,ဒီးတနီၤဃုဆံ,ဒီးတနီၤတကယၤလီၤ.

21ဒီးစံးဘၣ်အဝဲသ့ၣ်တဖၣ်,ပှၤဟဲစိာ်မ့ၣ်အူဒၢဒ်သိးတၢ်ကပာ်အီၤလၢနာ်တဖျၢၣ်အဖီလာ်,မ့တမ့ၢ်ဘၣ်,လၢလီၢ်မံခးအဖီလာ်န့ၣ်ဧါ.မ့ၢ်ဒ်သိးတၢ်ကပာ်ထီၣ်အီၤလၢမ့ၣ်အူဒၢအလီၢ်အဖီခိၣ်,တမ့ၢ်ဘၣ်ဧါ, 22အဂ့ၢ်ဒ်အံၤ,တၢ်ခူသူၣ်လၢတၢ်တပာ်ဖျါထီၣ်ဘၣ်အီၤန့ၣ်,တအိၣ်ဘၣ်နီတမံၤဘၣ်.ဒီးတၢ်ကဲခူသူၣ်လၢအတမ့ၢ်ဘၣ်လၢတၢ်အိၣ်ဖျါထီၣ်အဂီၢ်န့ၣ်,တအိၣ်ဘၣ်နီတမံၤဘၣ်. 23ပှၤအိၣ်ဒီးအနၢ်လၢအနၢ်ဟူတၢ်န့ၣ်,မ်အနၢ်ဟူတၢ်တက့ၢ်. 24ဒီးစံးဘၣ်အီၤ,သုနၢ်ဟူတၢ်မနုၤမနုၤလဲၣ်န့ၣ်,ပလီၢ်သုသးတက့ၢ်.သုကဘၣ်တၢ်ဃီၣ်န့ၢ်သုလၢတၢ်လၢသုဃီၣ်န့ၣ်လီၤ,ဒီးတၢ်ကဟ့ၣ်အါထီၣ်ဒံးတၢ်လၢသုလီၤ. 25အဂ့ၢ်ဒ်အံၤ,ဖဲဒၣ်ပှၤလၢအတၢ်အိၣ်ဝဲတဂၤဂၤန့ၣ်,တၢ်ကဟ့ၣ်တၢ်လၢအီၤလီၤ.ဒီးပှၤလၢအတၢ်တအိၣ်ဘၣ်န့ၣ်,ဖဲအတၢ်အိၣ်န့ၣ်တၢ်ကထုးကွံာ်လၢအီၤလီၤ.

26ဒီးစံးဝဲဒၣ်,ယွၤအဘီအမုၢ်အံၤမၤအသးဒ်အံၤ,မၤအသးဒ်ပှၤကညီဖှံလီၤတၢ်ချံလၢဟီၣ်ခိၣ်, 27ဒီးမံ,ဒီးဂဲၤဆၢထၢၣ်လၢမုၢ်နၤဒီးလၢမုၢ်ဆါ,ဒီးတၢ်ချံမဲထီၣ်,ဒီးဒိၣ်ထီၣ်ဒ်လဲၣ်ဒ်လဲၣ်န့ၣ်,တသ့ၣ်ညါဘၣ်ဝဲဘၣ်အသိးလီၤ. 28အဂ့ၢ်ဒ်အံၤ,ဟီၣ်ခိၣ်ဒုးမဲထီၣ်ဒၣ်အတၤသၣ်,အခီၣ်ထံးန့ၣ်အလၣ်,လၢခံက့ၤအစဲၤ,လၢခံက့ၤဒီး,အသၣ်ပှဲၤထီၣ်လၢအစဲၤလိၤလီၤ. 29ဒီးတုၤအသၣ်ဂီၤထီၣ်ဒီး,ပှၤကူးဝဲလၢထါဂဲၤတကီၢ်ခါလီၤ.အဂ့ၢ်ဒ်အံၤ,ကူးဘုအကတီၢ်ဘၣ်လံဝဲလံ.

30ဒီးစံးဝဲဒၣ်,မ့ၢ်ပကပာ်သတြီၤယွၤအဘီအမုၢ်ဒီးတၢ်မနုၤလဲၣ်.ပကဒိလီၤအီၤလၢတၢ်ကတိၤဒိမနုၤလဲၣ်. 31မ့ၢ်အမၤအသးဒ်သဘၣ်အချံအသိးလီၤ.အဝဲန့ၣ်လၢအဖှံအသးလၢဟီၣ်ခိၣ်အဖီခိၣ်န့ၣ်,ပြံန့ၢ်ကယဲၢ်ချံလၢဟီၣ်ခိၣ်ချၢခဲလၢာ်တက့ၢ်လီၤ. 32ဒီးဖှံအသးဝံၤဒီး,မဲထီၣ်,ဒီးဒိၣ်ထီၣ်ဒိၣ်န့ၢ်နီၣ်ဧိၤမံၤဧိၤခဲလၢာ်,ဒီးအဒ့ထီၣ်ဝဲဒီးအဒ့ဖးဒိၣ်,တုၤထိၣ်ဖိလံာ်ဖိလၢတၢ်ဖးဖီန့ၣ်အိၣ်လၢအကဒုပူၤသ့လီၤ.

33ကတိၤဒိတၢ်ဒ်န့ၣ်အသိးအါမံၤ,ဒီးစံၣ်တဲၤတဲလီၤအီၤလၢတၢ်ကလုၢ်,ဒ်ပှၤဒိကနၣ်တၢ်သ့အသိးန့ၣ်လီၤ. 34ဒီးတၢ်ကတိၤဒိတအိၣ်ဘၣ်ဒီး,တကတိၤဘၣ်တၢ်ဒီးအီၤဘၣ်.ဒီးအိၣ်ဝဲလၢတၢ်တဒၢဒီး,တဲဖျါထီၣ်တၢ်ခဲလၢာ်လၢအပျဲၢ်အဘီၣ်လီၤ.

35ဒီးလၢမုၢ်တနံၤန့ၣ်,တုၤမုၢ်ဟါလီၤဒီး,အဝဲဒၣ်စံးဘၣ်အဝဲသ့ၣ်,မ်ပခီဃီၤဆူဝၢ်ဘးခီတက့ၢ်. 36ဒီးအဝဲသ့ၣ်လဲၤသဒၣ်ပှၤဂီၢ်မုၢ်,ဒီးဟံးန့ၢ်အီၤဒ်အအိၣ်ဝဲအသိးလၢကဘီပူၤန့ၣ်,ဒီးကဘီလၢအဂၤတဖၣ်အိၣ်ဝဲဒီးအီၤလီၤ. 37ဒီးကလံၤတပျုၢ်တပျီၤထီၣ်ဖးဒိၣ်,ဒီးလပီတဖၣ်ဟဲနုာ်ဆူကဘီပူၤတုၤအကပှဲၤတ့ၢ်ကဘီပူၤလီၤ. 38ဒီးအဝဲဒၣ်မံလၢခိၣ်တခၢၣ်အလိၤလၢကဘီအခံ,ဒီးအဝဲသ့ၣ်ထိၣ်ဂဲၤအီၤ,ဒီးစံးဘၣ်အီၤ,သရၣ်ဧၢ,ပကဟးဂီၤန့ၣ်,မ့ၢ်နတပာ်ဘၣ်လၢတၢ်နီတမံၤဘၣ်ဧါ. 39ဒီးအဝဲဒၣ်ဂဲၤဆၢထၢၣ်,ဒီးဒူကလံၤအလိၤ,ဒီးစံးဘၣ်ပီၣ်လဲၣ်,အိၣ်ဂၢၢ်တပၢၢ်,အိၣ်ဃိကလာ်တက့ၢ်,ဒီးကလံၤတုာ်ဝဲ,ဒီးပီၣ်လဲၣ်အိၣ်ဂၢၢ်တပၢၢ်ဒိၣ်မးလီၤ. 40ဒီးစံးဘၣ်အဝဲသ့ၣ်,ဘၣ်မနုၤလၢသုပျံၤတၢ်ဒ်န့ၣ်လဲၣ်.ဘၣ်မနုၤသုတၢ်နာ်တအိၣ်ဘၣ်လဲၣ်. 41ဒီးအဝဲသ့ၣ်တဖၣ်ပျံၤတၢ်လၢအသူၣ်ပျံၤအသးဖုးဒိၣ်မး,ဒီးစံးလိာ်အသးသကိးသကိး,တၢ်အံၤဒီးပှၤတဂၤအံၤမ့ၢ်ပှၤဒ်လဲၣ်.ကလံၤ,ဒီးပီၣ်လဲၣ်ဒၣ်လဲာ်,ဒိကနၣ်မးအကလုၢ်လဲၣ်.