Mar 1 | KswSKMB | STEP | ယွၤအဖိခွါ,ယ့ၣ်ရှူးခရံာ်အတၢ်သးခုကစီၣ်အခီၣ်ထံး,

‏ Mark 1

1 ယွၤအဖိခွါ,ယ့ၣ်ရှူးခရံာ်အတၢ်သးခုကစီၣ်အခီၣ်ထံး,

2 ဒ်တၢ်ကွဲးအသးလၢဝံယရှါယၤအပူၤအသိးန့ၣ်,
ကွၢ်ကွၢ်,ယမၢလီၤယကလူးတဂၤလၢနမဲာ်ညါ,
လၢအကမၤက့ၤနကျဲန့ၣ်လီၤ.
3 တၢ်အကလုၢ်သီၣ်ထီၣ်လၢပှၢ်မုၢ်ကနၢ,
ကတဲာ်ကတီၤယွၤအကျဲ,
မၤလိၤအကျဲမုၢ်တဖၣ်န့ၣ်တက့ၢ်. ^{▼▼1:3 ရှါ.၄၀း၃}

4 စီၤယိၤဟၣ်အိၣ်ထီၣ်ဒီးဘျၢ ^{▼▼1:4 လၢဟ့းလ့ၣ်အကျိာ်"ဘးပတံစၢ်."}တၢ်လၢပှၢ်မုၢ်ကနၢ,ဒီးစံၣ်တဲၤတဲလီၤတၢ်ဒိးဘျၢ ^{▼▼1:4 လၢဟ့းလ့ၣ်အကျိာ်"ဘးပတံစၢ်."}ဘၣ်ဃးဒီးတၢ်ပီၢ်ယၢ်လီၤက့ၤအသးလၢတၢ်ပျၢ်တၢ်ဒဲးဘးအဂ့ၢ်လီၤ. 5 ဒီးကီၢ်ယူဒၤဒီကီၢ်ညါ,ဒီးပှၤယရူၤရှလ့ၣ်ဖိခဲလၢာ်န့ၣ်,လဲၤဆူအအိၣ်,ဒီးတဲလီၤကျဲၤလီၤအတၢ်ဒဲးဘး,ဒီးဒိးဘျၢ ^{▼▼1:5 လၢဟ့းလ့ၣ်အကျိာ်"ဘးပတံစၢ်."}အသးလၢအစုပူၤ,လၢထံမိၢ်ပှၢ်ယၢ်ဒ့ၣ်အပူၤလီၤ.

6 ဒီးစီၤယိၤဟၣ်န့ၣ်ကူသိးဝဲလၢကီၤလၢအူးအဆူၣ်,ဒီးကံၢ်တူာ်အယီၢ်ဒ့လၢယီၢ်တကိးတၢ်ဖံး,ဒီးအီၣ်ဒွဲၣ်ဧိၤတြၤဧိၤ,ဒီးကနဲမံၤအစီလီၤ. 7 ဒီးစံၣ်တဲၤတဲလီၤတၢ်ဒီးစံးဝဲဒၣ်,ပှၤဟဲလၢယလီၢ်ခံတဂၤန့ၣ်,သ့န့ၢ်ယၤတက့ၢ်လီၤ.အဝဲဒၣ်န့ၣ်ယသကူးလီၤယသးဒီးဃ့ၣ်လီၤကွံာ်အခီၣ်ဖံးအပျံၤန့ၣ်,ယတဂ့ၤတဘၣ်ဘၣ်. 8 ယဲဒၣ်အံၤယဘျၢ ^{▼▼1:8 လၢဟ့းလ့ၣ်အကျိာ်"ဘးပတံစၢ်."}သုလၢထံကျါလီၤ.မ့မ့ၢ်အဝဲဒၣ်န့ၣ်ကဘျၢ ^{▼▼1:8 လၢဟ့းလ့ၣ်အကျိာ်"ဘးပတံစၢ်."}သုလၢသးစီဆှံအပူၤလီၤ.

9 ဒီးလၢမုၢ်နံၤတဖၣ်န့ၣ်,တၢ်မၤအသးလၢယ့ၣ်ရှူးဟဲလၢနစၤရ့းဘၣ်ဃးဒီးကီၢ်ကၤလံၤလါ,ဒီးဒိးဘျၢ ^{▼▼1:9 လၢဟ့းလ့ၣ်အကျိာ်"ဘးပတံစၢ်."}အသးလၢစီၤယိၤဟၣ်အစုပူၤ,လၢယၢ်ဒ့ၣ်အပူၤလီၤ. 10 ဒီးဟဲက့ၤထီၣ်လၢထံကျါတကီၢ်ခါ,ဒီးထံၣ်ဝဲလၢမူခိၣ်သ့ၣ်ဖးအသး,ဒီးသးန့ၣ်,မၤသးဒ်ထိၣ်လွံၢ်အသိး,ဟဲလီၤလၢအလိၤလီၤ. 11 ဒီးတၢ်ကလုၢ်သီၣ်လီၤလၢမူခိၣ်ဒီးစံးဝဲဒၣ်,နဲဒၣ်အံၤနမ့ၢ်ယဖိခွါလၢယအဲၣ်,ဘၣ်ယသးလၢနၤလီၤ.

12 ဒီးသးန့ၣ်မၢဆူၣ်အီၤဆူပှၢ်မုၢ်ကနၢတကီၢ်ခါလီၤ. 13 ဒီးအိၣ်ဝဲလၢပှၢ်မုၢ်ကနၢန့ၣ်အသီလွံၢ်ဆံ,ဒီးဘၣ်တၢ်လ့ပစီလၢမုၣ်ကီၤလံၢ်,ဒီးအိၣ်ဝဲဒီးဆၣ်ဖိကီၢ်ဖိအမံၤ,ဒီးကလူးသ့ၣ်တဖၣ်ဟဲမၤအခ့အပှၤအတၢ်မၤလၢအဂီၢ်လီၤ.

14 ဒ်စီၤယိၤဟၣ်ဘၣ်တၢ်ဟ့ၣ်လီၤကွံာ်အီၤအလီၢ်ခံန့ၣ်,ယ့ၣ်ရှူးဟဲဆူကၤလံၤလါ,ဒီးစံၣ်တဲၤတဲလီၤယွၤအဘီအမုၢ်အတၢ်သးခုအကစီၣ်, 15 ဒီးစံးဝဲဒၣ်,အဆၢကတီၢ်လၢထီၣ်ပှဲၤထီၣ်လံ,ဒီးယွၤအဘီအမုၢ်ဘူးထီၣ်လံ,ပီၢ်ယၢ်လီၤက့ၤသုသး,ဒီးစူၢ်က့ၤနာ်က့ၤတၢ်သးခုကစီၣ်တက့ၢ်. 16 ဒီးလဲၤဟးဝဲလၢပီၣ်လဲၣ်ကၤလံၤလါအနံၤ,ဒီးထံၣ်စီၤရှံမိၣ်,ဒီးအဒီပုၢ်ဝဲၢ်စီၤအၣ်ဒရ့း,တ့ၢ်လီၤစၤလၢပီၣ်လဲၣ်ပူၤလီၤ. 17 အဂ့ၢ်ဒ်အံၤ,မ့ၢ်ပှၤမၤညၣ်ဖိလီၤ. 18 ဒီးယ့ၣ်ရှူးစံးဘၣ်အီၤ,ပိာ်ယခံတက့ၢ်.ဒီးယကဒုးကဲထီၣ်သုလၢပှၤမၤညၣ်ပှၤကညီဖိလီၤ. ဒီးအဝဲသ့ၣ်ဟးသဒၣ်အစၤတဖၣ်တကီါ,ဒီးပိာ်ထီၣ်အခံလီၤ.

19 ဒီးလဲၤပူၤကွံာ်ဝဲဖဲန့ၣ်တစဲးဖိ,ဒီးထံၣ်စီၤစ့းဘ့းဒဲအဖိခွါစီၤယၤကိာ်,ဒီးအဒီပုၢ်ဝဲၢ်စီၤယိၤဟၣ်,ဒီးအဝဲသ့ၣ်အိၣ်ဆးက့ၤအစၤတဖၣ်လၢကဘီပူၤလီၤ. 20 ဒီးကိးန့ၢ်အီၤတကီၢ်ခါ,ဒီးအဝဲသ့ၣ်ဟးသဒၣ်အပၢ်စီၤစ့းဘ့းဒဲ,လၢကဘီပူၤ,အိၣ်ဒီးပှၤဒိးလဲအသးတဖၣ်,ဒီးပိာ်ထီၣ်အခံလီၤ. 21 ဒီးလဲၤနုာ်ဆူကပ့းရနီၣ်အပူၤ,ဒီးလၢအိၣ်ဘှံးနံၤန့ၣ်လဲၤနုာ်ဝဲတကီၢ်ခါဆူဘူၣ်ဘျီၣ်ပူၤ,ဒီးသိၣ်က့ၤသီက့ၤတၢ်လီၤ. 22 ဒီးပှၤပာ်အသးကမၢကမၣ်လၢအသိၣ်တၢ်သီတၢ်အဃိလီၤ.အဂ့ၢ်ဒ်အံၤ,သိၣ်က့ၤသီက့ၤအီၤဒ်ပှၤအိၣ်ဒီးအစိအကမီၤအသိး,ဒီးတမ့ၢ်ဘၣ်ဒ်ပှၤကွဲးလံာ်တဖၣ်အသိးန့ၣ်လီၤ.

23 ဒီးပှၤလၢတၢ်နါအိၣ်လၢအလိၤ,အိၣ်ဝဲလၢဘူၣ်ဘျီၣ်ပူၤန့ၣ်တဂၤ,ဒီးကိးပသူထီၣ်ဒီးစံးဝဲဒၣ်, 24 အၣ်လါ,ပှၤနစၤရ့းဖိယ့ၣ်ရှူးဧၢ,တၢ်ဘၣ်ဃးဒီးပှၤဒီးနၤမ့ၢ်မနုၤလဲၣ်,မ့ၢ်နဟဲမၤဟးဂီၤပှၤဧါ.နဲဒၣ်အံၤ,နမ့ၢ်မတၤမတၤယသ့ၣ်ညါ,နမ့ၢ်ယွၤအတၢ်စီဆှံတဂၤန့ၣ်လီၤ. 25 ဒီးယ့ၣ်ရှူးဒူအလိၤဒီးစံးဝဲဒၣ်,အိၣ်ဘှီၣ်ကလာ်,ဒီးဟးထီၣ်ကွံာ်လၢအလိၤတက့ၢ်. 26 ဒီးတၢ်နါန့ၣ်မၤဒိၣ်ပျုၢ်အီၤ,ဒီးကိးပသူထီၣ်လၢအကလုၢ်ဖးဒိၣ်,ဒီးဟးထီၣ်ကွံာ်လၢအလိၤလီၤ. 27 ဒီးပှၤခဲလၢာ်ကမၢကမၣ်တုၤဒၣ်လဲာ်အသံကွၢ်လိာ်အသးဒီးစံးဝဲဒၣ်,တၢ်အံၤမ့ၢ်မနုၤလဲၣ်.တၢ်သိၣ်တၢ်သီအသီအံၤမးလဲၣ်.အဂ့ၢ်ဒ်အံၤ,မၤလိာ်တၢ်နါတဖၣ်လၢတၢ်အစိအကမီၤဒီးအတၢ်ဒိကနၣ်မးလဲၣ်. 28 ဒီးအကစီၣ်န့ၣ်ဟူထီၣ်သါလီၤတကီၢ်ခါလၢကၤလံၤလါဒီကီၢ်ညါလီၤ.

29 ဒီးအဝဲသ့ၣ်ဟးထီၣ်ကွံာ်လၢဘူၣ်ဘျီၣ်ပူၤန့ၣ်တကီၢ်ခါ,ဒီးအိၣ်ဒီးစီၤယၤကိာ်ဒီးစီၤယိၤဟၣ်န့ၣ်,လဲၤနုာ်ဝဲလၢစီၤရှံမိၣ်ဒီးစီၤအၣ်ဒရ့းအဟံၣ်ပူၤလီၤ. 30 စီၤရှံမိၣ်အမံၤပှၢ်ပိာ်မုၣ်တဂၤ,ဘၣ်တၢ်ညၣ်ဂိၢ်,ဒီးမံနီၤဝဲ,ဒီးအဝဲသ့ၣ်စံးဘၣ်တၢ်ဘၣ်အီၤတကီၢ်ခါလၢအဂ့ၢ်အကျိၤလီၤ. 31 ဒီးလဲၤဟံးဃာ်အစု,ဒီးဝံၣ်ဆၢထၢၣ်အီၤ,ဒီးအညၣ်ဂိၢ်ဟးထီၣ်ကွံာ်လၢအလိၤတကီၢ်ခါလီၤ.ဒီးမၤအခ့အပှၤအတၢ်မၤလၢအဝဲသ့ၣ်အဂီၢ်လီၤ.

32 ဒီးမုၢ်ဟါလီၤဖဲမုၢ်လီၤနုာ်န့ၣ်,ပှၤဟဲစိာ်ကယဲၢ်ပှၤလၢအမၤတကဲဘၣ်ခဲလၢာ်,ဒီးပှၤလၢတၢ်နါအိၣ်လၢအလိၤတဖၣ်ဆူအအိၣ်လီၤ. 33 ဒီးပှၤဝ့ၢ်ဖိဒီဝ့ၢ်ညါဟဲအိၣ်ဖှိၣ်လၢဟံၣ်ကျဲအစၢၤန့ၣ်လီၤ. 34 ဒီးမၤဘျါက့ၤပှၤလၢအမၤတကဲဘၣ်,လၢတၢ်ဆူးတၢ်ဆါအကလုာ်ကလုာ်အါဂၤ,ဒီးဟီထီၣ်ကွံာ်တၢ်နါအါဒု,ဒီးမ့ၢ်တၢ်နါတဖၣ်သ့ၣ်ညါအီၤဒီး,တဒုးကတိၤဘၣ်အီၤဘၣ်လီၤ.

35 ဒီးမုၢ်ဆ့ၣ်ထီၣ်တၢ်ခံးဒံးဒီး,ဂဲၤဆၢထၢၣ်ဒီးဟးထီၣ်ဝဲ,ဒီးလဲၤဝဲဆူပှၢ်မုၢ်ကနၢအလီၢ်,ဒီးဘါထုကဖၣ်တၢ်ဖဲန့ၣ်လီၤ. 36 ဒီးစီၤရှံမိၣ်,ဒီးပှၤအိၣ်ဒီးအီၤတဖၣ်လူၤပိာ်ထွဲအခံလီၤ. 37 ဒီးတုၤအထံၣ်န့ၢ်အီၤဒီးစံးဘၣ်အီၤပှၤခဲလၢာ်ဃုနၤလီၤ. 38 ဒီးစံးဘၣ်အဝဲသ့ၣ်,မ်ပလဲၤဆူခူဧိၤဝ့ၢ်ဧိၤအဘူးတဖၣ်,ဒ်သိးယကစံၣ်တဲၤတဲလီၤတၢ်ဖဲန့ၣ်စ့ၢ်ကီးတက့ၢ်.အဂ့ၢ်ဒ်အံၤ,ယဟဲထီၣ်လၢတၢ်န့ၣ်အဂ့ၢ်လီၤ. 39 ဒီးလဲၤစံၣ်တဲၤတဲလီၤတၢ်လၢဘူၣ်ဘျီၣ်တဖၣ်အပူၤလၢကၤလံၤလါဒီကီၢ်ညါ,ဒီးဟီထီၣ်ကွံာ်တၢ်နါတဖၣ်လီၤ. 40 ဒီးပှၤဘၣ်တၢ်ဆါအၢတဂၤဟဲဆူအအိၣ်ဒီးဃ့ကညးအီၤ,ဒီးချံးလီၤအခီၣ်လၢအမဲာ်ညါ,ဒီးစံးဘၣ်အီၤ,နသးမ့ၢ်အိၣ်လၢနကမၤကဆှီထီၣ်က့ၤယၤဒီး,နမၤသ့လီၤ. 41 ဒီးယ့ၣ်ရှူးသးကညီၤအီၤ,ဒီးယူာ်ဃီၤအစု,ဒီးထိးဘၣ်အီၤ,ဒီးစံးဝဲဒၣ်ယသးအိၣ်,မ်နကဆှီထီၣ်က့ၤတက့ၢ်.

42 ဒီးဖဲအကတိၤတၢ်န့ၣ်,အတၢ်ဆါအၢန့ၣ်ဟးထီၣ်ကွံာ်လၢအလိၤတကီၢ်ခါ,ဒီးကဆှီထီၣ်က့ၤဝဲလီၤ. 43 ဒီးယ့ၣ်ရှူးမၤလိာ်အီၤဆူၣ်ဆူၣ်ကလဲာ်,ဒီးပျၢ်က့ၤအီၤတကီၢ်ခါ, 44 ဒီးစံးဘၣ်အီၤ,ပလီၢ်နသးဒ်သိးနသုတစံးဘၣ်တဲဘၣ်ပှၤနီတဂၤတဂ့ၤ,လဲၤတၢ်,ဒုးနဲၣ်နသးလၢပှၤလုၢ်တၢ်အဒိၣ်,ဒီးမၤဘူၣ်တၢ်လၢနကဆှီထီၣ်က့ၤအဂ့ၢ်,ဒ်စီၤမိၤရှ့မၤလိာ်ဝဲအသိး,လၢတၢ်အုၣ်အသးလၢအဝဲသ့ၣ်အဂီၢ်တက့ၢ်. 45 ဒီးအဝဲဒၣ်ဟးထီၣ်ဒီးစံးဘၣ်တဲဘၣ်သီတၢ်အါအါကလဲာ်,ဒီးမၤဟူထီၣ်သါလီၤတၢ်န့ၣ်အဂ့ၢ်အကျိၤ,တုၤယ့ၣ်ရှူးလဲၤနုာ်အိၣ်ဖျါလၢဝ့ၢ်ပူၤတသ့လၢၤဘၣ်.မ့မ့ၢ်အိၣ်ဝဲလၢခိလၢပှၢ်မုၢ်ကနၢအလီၢ်တဖၣ်,ဒီးပှၤဟဲလၢကိးပူၤဒဲးဆူအအိၣ်လီၤ.