‏ Mark 13

1ဒီးတုၤအဟးထီၣ်ကွံာ်လၢတၢ်လုၢ်ဟံၣ်ပူၤဒီး,အပျဲၢ်အဘီၣ်တဂၤစံးဘၣ်အီၤ,သရၣ်ဧၢ,ကွၢ်ကွၢ်,လၢၢ်တဖၣ်ဒိၣ်မးဒ်လဲၣ်,ဒီးဟံၣ်တဖၣ်ဒိၣ်မးဒ်လဲၣ်. 2ဒီးယ့ၣ်ရှူးစံးဆၢတၢ်ဒီးစံးဘၣ်အီၤ,တၢ်လၢဟံၣ်ဖးဒိၣ်တဖၣ်အံၤနထံၣ်စ့ၢ်ကီးဧါ.လၢၢ်လၢလၢၢ်အဖီခိၣ်လၢတၢ်တမၤလီၤပှီၢ်ကွံာ်ဘၣ်န့ၣ်,တၢ်တဒုးအိၣ်လီၤတဲာ်နီတဖျၢၣ်ဘၣ်.

3ဒီးဆ့ၣ်နီၤဝဲလၢကစၢၢ်သ့ၣ်စၤယံၤအလိၤအိၣ်သဃီၤဒီးတၢ်လုၢ်အဟံၣ်,ဒီးစီၤပ့တရူးဒီးစီၤယၤကိာ်ဒီးစီၤယိၤဟၣ်ဒီးစီၤအၣ်ဒရ့းသ့ၣ်တဖၣ်,သံကွၢ်အီၤကစုဒု, 4တၢ်န့ၣ်တဖၣ်ဆံးယံာ်ကမၤအသးလဲၣ်.ဒီးတၢ်န့ၣ်တဖၣ်ခဲလၢာ်တုၤအကလၢထီၣ်ပှဲၤထီၣ်ဒီး,မ့ၢ်မနုၤတၢ်ပနီၣ်ကမၤအသးတမံၤလၣ်,စံးဘၣ်တဲဘၣ်ပှၤတက့ၢ်.

5ဒီးယ့ၣ်ရှူးစံးဆၢတၢ်ဒီးစံးဘၣ်အီၤ,ဒ်သိးပှၤသုတလီန့ၢ်သုနီတဂၤတဂ့ၤဒီး,ပလီၢ်သုသးတက့ၢ်. 6အဂ့ၢ်ဒ်အံၤ,ပှၤအါဂၤကဟဲလၢယမံၤ,ဒီးစံး,မ့ၢ်ယၤ,ဒီးကလီန့ၢ်ပှၤအါဂၤလီၤ. 7ဒီးတုၤသုနၢ်ဟူတၢ်ဒုးသုးဒုးသံၣ်တဖၣ်အဂ့ၢ်ဒီးတၢ်ဒုးတၢ်ယၤတဖၣ်အကစီၣ်န့ၣ်ဒီး,သုတသူၣ်ကိၢ်သးဂီၤတဂ့ၤ.အဂ့ၢ်ဒ်အံၤ,တၢ်န့ၣ်တဖၣ်ဘၣ်မၤအသးလီၤ.မ့မ့ၢ်တၢ်အကတၢၢ်တအိၣ်ဒံးဘၣ်. 8အဂ့ၢ်ဒ်အံၤ,ပှၤကညီတကလုာ်ကထီဒါပှၤကညီတကလုာ်,ဒီးတဘီတမုၢ်ကထီဒါတဘီတမုၢ်လီၤ.ဒီးဟီၣ်ခိၣ်ကဟူးဝးဆှဲးဆှိးဝဲလၢအံၤတပူၤလၢန့ၣ်တပူၤ,ဒီးတၢ်အိၣ်ဝံၤအိၣ်ဃဲၤ,ဒီးတၢ်မၤကိၢ်မၤဂီၤတဖၣ်ကအိၣ်ထီၣ်လီၤ.တၢ်န့ၣ်တဖၣ်မ့ၢ်တၢ်နးတၢ်ဖှီၣ်အခီၣ်ထံးလီၤ.

9ဒီးပလီၢ်သုသးတက့ၢ်.အဂ့ၢ်ဒ်အံၤ,ပှၤကဟ့ၣ်လီၤကွံာ်သုဆူပှၤသးပှၢ်အတၢ်အိၣ်ဖှိၣ်အပူၤ,ဒီးကတီၢ်သုလၢဘူၣ်ဘျီၣ်ပူၤ,ဒီးသုကဆၢထၢၣ်လၢပဒိၣ်ပပှၢ်,ဒီးစီၤလိာ်စီၤပၤတဖၣ်အမဲာ်ညါလီၤ. 10ဒီးတၢ်သးခုကစီၣ်န့ၣ်ကဘၣ်တၢ်စံၣ်တဲၤတဲလီၤဆိအီၤလၢပှၤကညီအကလုာ်ခဲလၢာ်လီၤ. 11ဒီးတုၤပှၤမိၤဟ့ၣ်လီၤကွံာ်သုဒီး,မ့ၢ်သုကကတိၤတၢ်ဒ်လဲၣ်ဒ်လဲၣ်န့ၣ်,သုတကူၣ်ပာ်တဂ့ၤ,သုတဆိကမိၣ်ပာ်စၢၤတဂ့ၤ,ဒ်တၢ်ဟ့ၣ်ကတိၤသုတစုဃီဖဲန့ၣ်အသိးဒီး,ကတိၤတၢ်တက့ၢ်.အဂ့ၢ်ဒ်အံၤ,တမ့ၢ်ဘၣ်သုကတိၤဒၣ်သုဝဲဘၣ်,မ့ၢ်သးစီဆှံန့ၣ်လီၤ. 12ဒီးပှၤဒီပုၢ်ဝဲၢ်ခွါကဟ့ၣ်လီၤကွံာ်အဒီပုၢ်ဝဲၢ်ခွါဆူတၢ်သံအပူၤ,ဒီးပၢ်အဖိလီၤ.ဒီးဖိတဖၣ်ကထီဒါအမိၢ်အပၢ်,ဒီးကဒုးသံအီၤလီၤ. 13ဒီးကယဲၢ်ပှၤခဲလၢာ်န့ၣ်ကသးဟ့သုလၢယမံၤအဃိလီၤ.မ့မ့ၢ်ပှၤလၢအအိၣ်ဂၢၢ်ဆိးကျၢၤဝဲတုၤအကတၢၢ်န့ၣ်,ကတုၤဝဲလၢတၢ်အုၣ်က့ၤခီၣ်က့ၤအီၤလီၤ.

14ဒီးတုၤသုထံၣ်ဘၣ်တၢ်သးဘၣ်အၢဘၣ်ဃးဒီးတၢ်မၤသယုၢ်,လၢဝံဒၤနံးယ့လးကတိၤဝဲလၢအဂ့ၢ်,ဆၢထၢၣ်ဖဲအတကြၢးအိၣ်ဘၣ်အလီၢ်,(ပှၤလၢအဖးန့ၣ်,မ်အနၢ်ပၢၢ်တၢ်တက့ၢ်)ဒီး,ပှၤအိၣ်ဝဲလၢကီၢ်ယူဒၤတဖၣ်န့ၣ်,မ်အဃ့ၢ်ဆူကစၢၢ်ကလိတက့ၢ်. 15ဒီးပှၤလၢအအိၣ်ဝဲလၢဟံၣ်ခိၣ်န့ၣ်,မ်အသုတယုၢ်လီၤဆူအဟံၣ်ပူၤတဂ့ၤ,မ်အသုတလဲၤနုာ်ဒ်သိးအကဟံးန့ၢ်တၢ်တမံၤမံၤလၢအဟံၣ်ပူၤတဂ့ၤ. 16ဒီးပှၤအိၣ်ဝဲလၢစံာ်ပျီပူၤန့ၣ်,ဒ်သိးအကဟံးန့ၢ်အကူအသိးဒီး,မ်အသုတက့ၤကဒါက့ၤဆူအလီၢ်ခံတဂ့ၤ. 17ဒီးပှၤလၢအဒၢထီၣ်ဝဲ,ဒီးပှၤလၢအဒုးအီၣ်နုၢ်တၢ်လၢမုၢ်နံၤတဖၣ်န့ၣ်,ဘၣ်ဖှီၣ်လီၤ. 18ဒီးဒ်သိးသုဃ့ၢ်န့ၣ်သုတဘၣ်လၢတၢ်ဂိၢ်အခါတဂ့ၤဒီး,ဘါထုကဖၣ်တၢ်တက့ၢ်. 19အဂ့ၢ်ဒ်အံၤ,တၢ်လၢမုၢ်နံၤတဖၣ်န့ၣ်,တၢ်နးတၢ်ဖှီၣ်ကအိၣ်ဝဲလီၤ.တၢ်ဒ်န့ၣ်အသိး,ဒိၣ်ထဲန့ၣ်,လၢတၢ်တ့လီၤသီတၢ်လၢယွၤတ့လီၤဝဲန့ၣ်,တုၤခဲကနံၣ်အံၤ,တအိၣ်ဘၣ်နီတခီၣ်ဘၣ်.ဒီးလၢခံလၢလာ်န့ၣ်တအိၣ်ထီၣ်လၢၤဘၣ်. 20ဒီးယွၤမ့ၢ်တမၤစှၤလီၤမုၢ်နံၤတဖၣ်န့ၣ်ဘၣ်ဒီး,တၢ်ဖံးတၢ်ညၣ်တတုၤဘၣ်လၢတၢ်အုၣ်က့ၤခီၣ်က့ၤနီတဂၤဘၣ်.မ့မ့ၢ်လၢပှၤဘၣ်တၢ်ဃုထၢအီၤလၢအဃုထၢဝဲအဃိဒီး,ကမၤစှၤလီၤမုၢ်နံၤတဖၣ်န့ၣ်လီၤ.

21ဒီးတုၤနုၤတစု,ပှၤတဂၤဂၤမ့ၢ်စံးဘၣ်သု,ကွၢ်ကွၢ်,ခရံာ်န့ၣ်အိၣ်ဖဲအံၤမ့ၢ်ဂ့ၤ,ကွၢ်ကွၢ်,အိၣ်ဖဲန့ၣ်မ့ၢ်ဂ့ၤဒီး.သုတနာ်တဂ့ၤ. 22အဂ့ၢ်ဒ်အံၤ,ခရံာ်အဘျၣ်တဖၣ်ဒီးဝံအဘျၣ်တဖၣ်ကအိၣ်ထီၣ်ဝဲ,ဒီးကဟ့ၣ်တၢ်အပနီၣ်လီၤလးဒီးတၢ်လီၤလိၢ်လီၤလးသ့ၣ်တဖၣ်,ဒ်သိးမ့ၢ်သ့ဒီး,ကလီန့ၢ်ပှၤလၢအဘၣ်တၢ်ဃုထၢအီၤတဖၣ်ဒၣ်လဲာ်လီၤ. 23မ့မ့ၢ်သုဝဲသ့ၣ်အံၤ,ပလီၢ်သုသးတက့ၢ်.ကွၢ်ကွၢ်,ယစံၣ်တဲၤတဲလီၤပာ်သုလၢတၢ်ခဲလၢာ်လီၤ.

24ဘၣ်ဆၣ်ဒီးတၢ်လၢမုၢ်နံၤတဖၣ်န့ၣ်လၢတၢ်နးတၢ်ဖှီၣ်အံၤအလီၢ်ခံ,မုၢ်ကခံးဝဲ,ဒီးလါတဟ့ၣ်လီၤဘၣ်အတၢ်ကပီၤဘၣ်. 25ဒီးဆၣ်ဧိၤဖီဧိၤကလီၤတဲာ်ကွံာ်လၢမူခိၣ်,ဒီးတၢ်စိကမီၤလၢမူခိၣ်တဖၣ်ကဟူးဝးဝဲဒၣ်လီၤ. 26တုၤနုၤတစုပှၤကထံၣ်ဘၣ်ပှၤကညီဖိခွါအံၤဟဲလီၤလၢတၢ်အၢၣ်တဖၣ်အကျါအိၣ်ဒီးအစိဒိၣ်အကမီၤဒိၣ်,ဒီးအလၤအကပီၤလီၤ. 27ဒီးတုၤနုၤတစုကမၢလီၤအကလူးတဖၣ်ဒီးကဒုးအိၣ်ဖှိၣ်ရိဖှိၣ်အပှၤဃုထၢဖိတဖၣ်လၢကလံၤလွံၢ်ကျိၤ,လၢဟီၣ်ခိၣ်အကတၢၢ်ပၢၢ်လၢမူခိၣ်အကတၢၢ်လီၤ.

28အအံၤဒီး,မၤလိတၢ်အဒိအတဲာ်လၢချၢၣ်ဒၢန့ၣ်,တက့ၢ်.တုၤအဒ့အဖီစၢ်ထီၣ်,ဒီးအလၣ်ဒီးထီၣ်န့ၣ်ဒီး,သုသ့ၣ်ညါလၢတၢ်ကိၢ်အခါဘူးထီၣ်လီၤ. 29ဒ်န့ၣ်အသိး,တုၤသုထံၣ်ဘၣ်တၢ်န့ၣ်တဖၣ်မၤအသးဒီး,သ့ၣ်ညါလၢအအိၣ်ဘူးထီၣ်,အအိၣ်လၢကျဲစၢၤအခီၣ်ထံးလံန့ၣ်တက့ၢ်. 30ယစံးဘၣ်တဲဘၣ်သုတီတီ,လၢပှၤတစိၤအံၤတပူၤကွံာ်ဒံးဘၣ်ဒီး,တၢ်န့ၣ်တဖၣ်ကမၤအသးခဲလၢာ်လီၤ. 31မူခိၣ်ဒီးဟီၣ်ခိၣ်ကပူၤကွံာ်,မ့မ့ၢ်ယကလုၢ်ထါန့ၣ်တပူၤကွံာ်ဝဲဘၣ်.

32ဘၣ်ဆၣ်ဒီးတၢ်လၢမုၢ်တနံၤန့ၣ်,ဒီးနၣ်ရံၣ်အဝဲန့ၣ်,ပှၤတသ့ၣ်ညါဘၣ်နီတဂၤဘၣ်,သ့ၣ်ညါထဲပၢ်တဂၤဧိၤလီၤ. 33ပလီၢ်သုသးတက့ၢ်.ဆိးသီဒီးဘါထုကဖၣ်တၢ်တက့ၢ်.အဂ့ၢ်ဒ်အံၤ,အမုၢ်အလါကဘၣ်ဝဲခဲလဲၣ်ခဲလဲၣ်န့ၣ်,သုတသ့ၣ်ညါဘၣ်လီၤ. 34တၢ်မၤအသးဒ်ပှၤတဂၤပာ်လီၤတဲာ်အဟံၣ်,ဒီးလဲၤဆူတခီထံတခီကီၢ်,ဒီးဟ့ၣ်အကုၢ်အပှၤလၢအစိကမီၤ,ဒီးတဂၤအတၢ်မၤလၢအဂီၢ်,တဂၤအတၢ်မၤလၢအဂီၢ်,ဒီးမၤလိာ်ပှၤပၢၤကျဲစၢၤတဂၤဒ်သိးအကဆိးသီလီၤ. 35မၤသးဒ်န့ၣ်ဒီးဆိးသီတက့ၢ်.အဂ့ၢ်ဒ်အံၤ,ဟံၣ်ကစၢ်ကဟဲက့ၤဖဲလဲၣ်ဖဲလဲၣ်,လၢမုၢ်ဟါဧါ,လၢဖးဖီမုၢ်ဧါ,လၢဆီဖါအိၣ်အိထီၣ်ဧါ,လၢမုၢ်ဆ့ၣ်ဝါဧါန့ၣ်,သုတသ့ၣ်ညါဘၣ်လီၤ. 36မ့တမ့ၢ်ဘၣ်ဒီး,ကဟဲက့ၤဘၣ်ဖုးသတူၢ်ကလာ်,ဒီးထံၣ်န့ၢ်သုမံသပ့ၤလီၤ. 37တၢ်လၢယစံးဘၣ်သု,ယစံးဘၣ်ပှၤခဲလၢာ်လီၤ.ဆိးသီတက့ၢ်.