‏ Mark 5

1ဒီးဟဲဝဲဆူပီၣ်လဲၣ်ဝၢ်ဘးခီ,ဆူပှၤကဒါရၤဖိအကီၢ်လီၤ. 2ဒီးတုၤအဟးထီၣ်ကွံာ်လၢကဘီပူၤဒီး,ပှၤလၢတၢ်နါအိၣ်လၢအလိၤတဂၤ,ဟဲသဂၢၢ်အီၤတကီၢ်ခါ,လၢလိပူၤလီၤ. 3အဝဲန့ၣ်အိၣ်ဝဲဆိးဝဲလၢလိပူၤ,ဒီးပှၤစၢဃာ်အီၤလၢထးသွဲဒၣ်လဲာ်,တသ့ဘၣ်နီတဂၤဘၣ်. 4အဂ့ၢ်ဒ်အံၤ,ပှၤသိးဃာ်တ့ၢ်အခီၣ်,ဒီးစၢဃာ်တ့ၢ်အီၤလၢထးသွဲတလီၢ်လီၢ်တလီၢ်လီၢ်,ဒီးထုးထီၣ်တဲာ်ထးသွဲ,ဒီးဘိးကၢ်ကွံာ်သိး,ဒီးပှၤမၤဘှါအီၤတသ့ဘၣ်နီတဂၤဘၣ်. 5ဒီးအိၣ်လၢလိပူၤဒီးလၢကစၢၢ်ကလိလၢမုၢ်နံၤဒီးမုၢ်နၤထီဘိ,ဒီးကိးပသူထီၣ်ဒီးဂဲာ်လီၤအသးလၢလၢၢ်လီၤ. 6ဒီးထံၣ်သကွ့ၤယ့ၣ်ရှူး,ဒီးလဲၤဃ့ၢ်ဝဲဆူအအိၣ်,ဒီးတီၤလီၤကဒွံကျိာ်, 7ဒီးကိးပသူထီၣ်လၢအကလုၢ်ဖးဒိၣ်,ဒီးစံးဝဲဒၣ်,တၢ်ထီကတၢၢ်ယွၤအဖိခွါယ့ၣ်ရှူးဧၢ,တၢ်ဘၣ်ဃးဒီးယၤဒီးနၤမ့ၢ်မနုၤလဲၣ်.ဒ်သိးနသုတမၤနးမၤဖှီၣ်ယၤတဂ့ၤဒီး,ယဃ့ကညးနၤလၢယွၤအမဲာ်ညါလီၤ. 8အဂ့ၢ်ဒ်အံၤ,အဝဲဒၣ်စံးဘၣ်တ့ၢ်အီၤ,တၢ်နါဧၢ,ဟးထီၣ်လၢပှၤန့ၣ်အလိၤတက့ၢ်န့ၣ်လီၤ. 9ဒီးသံကွၢ်အီၤ,နမံၤမ့ၢ်ဒ်လဲၣ်.ဒီးစံးဘၣ်အီၤ,ယမံၤမ့ၢ်လ့းကူၣ်လီၤ.အဂ့ၢ်ဒ်အံၤပမ့ၢ်အါဒုလီၤ. 10ဒီးဃ့ကညးအီၤသပှၢ်ပှၢ်ဒ်သိးအသုတဟီထီၣ်ကွံာ်အီၤလၢကီၢ်န့ၣ်အပူၤတဂ့ၤလီၤ.

11ဒီးထိးတဖုဖးဒိၣ်အီၣ်အဆၣ်လၢကစၢၢ်အလိၤဖဲန့ၣ်, 12ဒီးတၢ်နါဃ့ကညးအီၤဒီးစံးဝဲဒၣ်,မၢပလဲၤဆူထိးတဖၣ်အအိၣ်,ဒ်သိးပကနုာ်လၢအပူၤတက့ၢ်. 13ဒီးယ့ၣ်ရှူးဒုးလဲၤအီၤတကီၢ်ခါလီၤ.ဒီးတၢ်နါတဖၣ်ဟးထီၣ်ကွံာ်,ဒီးလဲၤနုာ်ဝဲလၢထိးတဖၣ်အပူၤ,ဒီးထိးတဖုန့ၣ်,ဃ့ၢ်လီၤလၢကၢၢ်ဖးထီအလိၤဆူပီၣ်လဲၣ်ပူၤ,ဒီးအိၣ်ဝဲခံကထိဃၣ်ဃၣ်,ဒီးလီၤအုးသံကွံာ်ဝဲလၢပီၣ်လဲၣ်ပူၤလီၤ. 14ဒီးပှၤကွၢ်ထိးတဖၣ်န့ၣ်ဃ့ၢ်ထီၣ်ဝဲ,ဒီးစံးဘၣ်တဲဘၣ်တၢ်လၢဝ့ၢ်ပူၤ,ဒီးလၢပှၢ်လၢ်ကျါလီၤ.ဒီးတၢ်မၤအသးမ့ၢ်တၢ်ဒ်လဲၣ်ဒ်လဲၣ်န့ၣ်,ပှၤဟဲကွၢ်ဝဲလီၤ. 15ဒီးဟဲဝဲဆူယ့ၣ်ရှူးအအိၣ်ဒီးထံၣ်ဘၣ်ပှၤလၢတၢ်နါလ့းကူၣ်အိၣ်တ့ၢ်လၢအလိၤတဂၤန့ၣ်,ဆ့ၣ်နီၤဒီးကူတၢ်သိးတၢ်ဒီးအသးဂ့ၤထီၣ်က့ၤ,ဒီးအသူၣ်ပျံၤအသးဖုးဝဲတကူၢ်သ့ၣ်လီၤ. 16ဒီးတၢ်မၤအသးဘၣ်ဃးဒီးပှၤလၢတၢ်နါအိၣ်လၢအလိၤ,ဒီးထိးတဖၣ်အဂ့ၢ်အကျိၤန့ၣ်,ပှၤလၢအထံၣ်ဝဲတဖၣ်,စံၣ်တဲၤတဲလီၤပှၤတဖၣ်န့ၣ်လီၤ. 17ဒီးပှၤတဖၣ်န့ၣ်ဃ့ကညးယ့ၣ်ရှူးဒ်သိးအကဟးထီၣ်ကွံာ်လၢအထံအကီၢ်လီၤ.

18ဒီးတုၤအလဲၤနုာ်လၢကဘီပူၤဒီး,ပှၤလၢတၢ်နါအိၣ်တ့ၢ်လၢအလိၤတဂၤန့ၣ်,ဃ့ကညးအီၤဒ်သိးအကအိၣ်ဒီးအီၤလီၤ. 19ဒီးတဒုးအိၣ်အီၤဘၣ်.မ့မ့ၢ်စံးဘၣ်အီၤ,က့ၤက့ၤဆူနဟံၣ်,ဆူနတံၤသကိး,ဒီးဖဲဒၣ်ကစၢ်မၤနၤဒီးသးကညီနၤန့ၣ်,စံးဘၣ်တဲဘၣ်အဝဲသ့ၣ်တက့ၢ်. 20ဒီးက့ၤဝဲ,ဒီးဖဲဒၣ်ယ့ၣ်ရှူးမၤအီၤတဖၣ်န့ၣ်,စံးဘၣ်တဲဘၣ်ဝဲလၢဒ့းကၤပလံၣ်အပူၤ,ဒီးပှၤခဲလၢာ်ကမၢကမၣ်ဝဲလီၤ.

21ဒီးတုၤယ့ၣ်ရှူးခီဃီၤက့ၤကဒီးလၢကဘီပူၤဆူဝၢ်ဘးခီဒီး,ပှၤဂီၢ်မုၣ်ဖးဒိၣ်ဟဲအိၣ်ဖှိၣ်ရိဖှိၣ်ဆူအအိၣ်,ဒီးအိၣ်ဝဲဘူးဒီးပီၣ်လဲၣ်လီၤ. 22ဒီးကွၢ်ကွၢ်,ပှၤဘူၣ်ဘျီၣ်အခိၣ်အကျါ,အမံၤစီၤယၤအ့ၤရူးတဂၤဟဲဝဲလီၤ.ဒီးထံၣ်အီၤဒီးထိၣ်လီၤပှီၤအသးလၢအခီၣ်ထံး, 23ဒီးဃ့ကညးအီၤသပှၢ်ပှၢ်ဒီးစံးဝဲဒၣ်,ယဖိမုၣ်လၢအနီၢ်ဆံးတဂၤကသံတ့ၢ်လီၤ.ဟဲပာ်နစုလၢအခိၣ်လိၤဒ်သိးအကဘျါက့ၤဒီးမူဝဲတက့ၢ်. 24ဒီးအဝဲဒၣ်လဲၤဒီးအီၤ,ဒီးပှၤဂီၢ်မုၢ်ဖးဒိၣ်လဲၤပိာ်အခံဒီးတနံးအီၤလီၤ.

25ဒီးပိာ်မုၣ်တဂၤလၢအအိၣ်ဒီးအဆါသွံၣ်လီၤတဆံခံနံၣ်, 26ဒီးဒိးတၢ်နးတၢ်ဖှီၣ်အါမံၤလၢကသံၣ်သရၣ်အါဂၤအစုပူၤ,ဒီးလၢာ်အစုလီၢ်အခီၣ်ခိၣ်ခဲလၢာ်ဒီးတဘျါဘၣ်အခိၣ်တလိၣ်နးထီၣ်တခီန့ၣ်, 27နၢ်ဟူဝဲလၢယ့ၣ်ရှူးအဂ့ၢ်အကျိၤ,ဒီးဟဲလၢပှၤဂီၢ်မုၢ်အကျါလၢအချၢဃံ,ဒီးထိးဘၣ်အကူအသိးလီၤ. 28အဂ့ၢ်ဒ်အံၤ,စံးဝဲဒၣ်,ယမ့ၢ်ထိးဘၣ်ထဲအကူအသိးဧိၤဒီးယကဘျါက့ၤလီၤ. 29ဒီးအသွံၣ်လီၤန့ၣ်ဃ့ထီၣ်တကီၢ်ခါ,ဒီးသ့ၣ်ညါလၢအနီၢ်ခိလၢအတၢ်ဆါဘျါက့ၤဝဲလီၤ. 30ဒီးယ့ၣ်ရှူးသ့ၣ်ညါဒၣ်ဝဲတကီၢ်ခါလၢတၢ်စိတၢ်ကမီၤဟးထီၣ်လၢအလိၤန့ၣ်,ဒီးဃၣ်ဃီၤအသးလၢပှၤဂီၢ်မုၢ်အကျါ,ဒီးစံးဝဲဒၣ်,မ့ၢ်မတၤထိးဘၣ်ယကူယသိးတဂၤလဲၣ်. 31ဒီးအပျဲၢ်အဘီၣ်စံးဘၣ်အီၤ,နထံၣ်ပှၤဂီၢ်မုၢ်တနံးနၤ,ဒီးနစံး,မ့ၢ်မတၤထိးယၤတဂၤလဲၣ်န့ၣ်ဧါ. 32ဒီးဒ်သိးအကထံၣ်ဘၣ်ပှၤလၢအမၤတၢ်အံၤတမံၤဒီး,ကွၢ်တရံးတၢ်လီၤ. 33ဒီးပိာ်မုၣ်န့ၣ်သ့ၣ်ညါတၢ်မၤအသးလၢအလိၤ,ဒီးပျံၤဝဲ,ဒီးကနိးဝဲ,ဒီးဟဲဃီၤဝဲ,ဒီးထိၣ်လီၤပှီၤအသးလၢအဂီၤထံး,ဒီးစံးဘၣ်တဲဘၣ်အီၤလၢတၢ်အမ့ၢ်အတီခဲလၢာ်လီၤ. 34ဒီးအဝဲဒၣ်စံးဘၣ်အီၤ,ဖိမုၣ်ဧၢ,နတၢ်နာ်မၤဘျါက့ၤလံနၤလံ.က့ၤမုာ်မုာ်,ဒီးအိၣ်ဘျါက့ၤလၢနတၢ်ဆါတက့ၢ်.

35ကတိၤတၢ်အဖၢမုၢ်ဒီး,ပှၤတဖၣ်ဟဲလၢဘူၣ်ဘျီၣ်အခိၣ်တဂၤအဟံၣ်,ဒီးစံးဝဲဒၣ်,နဖိမုၣ်သံလံ.ဘၣ်မနုၤလၢနမၤတံာ်တာ်ဒံးသရၣ်လဲၣ်. 36ဒီးယ့ၣ်ရှူးနၢ်ဟူတကီၢ်ခါတၢ်ကတိၤလၢပှၤစံးဘၣ်တဲဘၣ်,ဒီးစံးဘၣ်ပှၤဘူၣ်ဘျီၣ်အခိၣ်တဂၤန့ၣ်,ပျံၤတၢ်တဂ့ၤ,ထဲနာ်တၢ်တက့ၢ်. 37ဒီးတဒုးပိာ်ဘၣ်ပှၤလၢအခံနီတဂၤဘၣ်.ဒုးပိာ်ထဲစီၤပ့းတရူး,ဒီးစီၤယၤကိာ်,ဒီးစီၤယၤကိာ်အဒီပုၢ်ဝဲၢ်စီၤယိၤဟၣ်တဖၣ်ဧိၤလီၤ. 38ဒီးလဲၤနုာ်ဆူပှၤဘူၣ်ဘျီၣ်အခိၣ်အဟံၣ်ပူၤ,ဒီးထံၣ်တၢ်ကလာ်အဲးအဲး,ဒီးပှၤဟီၣ်တၢ်ယၢၤတၢ်,ဒီးပှၤကဲးပသူကဲးပသီ, 39ဒီးလဲၤနုာ်ဝဲ,ဒီးစံးဘၣ်အီၤဘၣ်မနုၤလၢသုကလာ်အဲးအဲးဒီးဟီၣ်တၢ်ယၢၤတၢ်လဲၣ်.တမ့ၢ်ဘၣ်ပိာ်မုၣ်ဖိသၣ်သံဘၣ်,မ့ၢ်အမံသပ့ၤလီၤ. 40ဒီးအဝဲသ့ၣ်နံၤဘၣ်ဖၣ်လဲအီၤလီၤ.ဒီးအဝဲဒၣ်ဟီထီၣ်ကွံာ်အီၤခဲလၢာ်,ဒီးဟံးန့ၢ်ဖိသၣ်အမိၢ်ဒီးအပၢ်ဒီးပှၤအိၣ်ဒီးအသိးတဖၣ်,ဒီးလဲၤနုာ်ဆူဖိသၣ်အိၣ်ဝဲအလီၢ်လီၤ. 41ဒီးဟံးဖိသၣ်အစု,ဒီးစံးဘၣ်အီၤ,တၤလံၤသၤကူမံၤ,ဒ်ပစံးတၢ်အသိး,ပိာ်မုၣ်ဖိသၣ်ဧၢ,ယစံးဘၣ်နၤ,ဂဲၤဆၢထၢၣ်တက့ၢ်. 42ဒီးပိာ်မုၣ်ဖိသၣ်န့ၣ်ဂဲၤဆၢထၢၣ်,ဒီးဟးဝဲတကီၢ်ခါလီၤ.အဂ့ၢ်ဒ်အံၤ,အနံၣ်အိၣ်တဆံခံနံၣ်လီၤ.ဒီးအဝဲသ့ၣ်တဖၣ်ပာ်အသးကမၢကမၣ်ဒိၣ်နီၢ်မးလီၤ. 43ဒီးမၤလိာ်အီၤသပှၢ်ပှၢ်,ဒ်သိးအသုတဘိးဘၣ်သ့ၣ်ညါပှၤလၢတၢ်မၤအသးနီတဂၤတဂ့ၤ.ဒီးမၤလိာ်ဝဲလၢပှၤကဟ့ၣ်အီၣ်အတၢ်လီၤ.