‏ Mark 6

1ဒီးဟးထီၣ်ကွံာ်ဖဲန့ၣ်,ဒီးက့ၤက့ၤဝဲဆူအကီၢ်ဒၣ်ဝဲ,ဒီးအပျဲၢ်အဘီၣ်ပိာ်အခံလီၤ. 2ဒီးဘၣ်မုၢ်အိၣ်ဘှံးအနံၤ,ဒီးသိၣ်က့ၤသီက့ၤတၢ်လၢဘူၣ်ဘျီၣ်ပူၤလီၤ.ဒီးပှၤနၢ်ဟူတၢ်အါဂၤ,ဒီးပာ်အသးကမၢကမၣ်,ဒီးစံးဝဲဒၣ်,အဝဲတဂၤအံၤ,မ့ၢ်အန့ၢ်ဘၣ်တၢ်န့ၣ်တဖၣ်ဖဲလဲၣ်.ဒီးတၢ်ကူၣ်သ့ကူၣ်ဘၣ်လၢတၢ်ဟ့ၣ်လီၤအီၤန့ၣ်,မ့ၢ်ဒ်လဲၣ်.ဒီးတၢ်လီၤလးလၢအမၤအသးလၢအစုပူၤထဲထဲအံၤန့ၣ်ကဲထီၣ်ဒ်လဲၣ်. 3ပှၤအံၤမ့ၢ်ပှၤစုသ့နီၢ်မၤရံအဖိခွါ,တမ့ၢ်ဘၣ်ဧါ.မ့ၢ်စီၤယၤကိာ်,စီၤယိၤစ့,ဒီးစီၤယူဒၤ,ဒီးစီၤရှံမိၣ်အဒီပုၢ်ဝဲၢ်,တမ့ၢ်ဘၣ်ဧါ.ဒီးအဒီပုၢ်ဝဲၢ်မုၣ်တဖၣ်အိၣ်လၢပသိးဖဲအံၤ,တမ့ၢ်ဘၣ်ဧါ.ဒီးအသးဆါထီၣ်လၢအဃိလီၤ. 4ဒီးယ့ၣ်ရှူးစံးဘၣ်အီၤ,တၢ်လၢဝံဧိၤမီၣ်ဧိၤ,တမ့ၢ်ဘၣ်အလၤအကပီၤတအိၣ်ဘၣ်န့ၣ်ဘၣ်.အလၤကပီၤတအိၣ်ဘၣ်ထဲလၢအထံအကီၢ်ဒၣ်ဝဲအပူၤန့ၣ်ဧိၤလီၤ. 5ဒီးမ့တမ့ၢ်ဘၣ်အပာ်လီၤအစုလၢပှၤတအိၣ်ဆူၣ်အိၣ်ချ့ဘၣ်စှၤဂၤအလိၤဒီးမၤဘျါက့ၤအီၤဘၣ်ဒီး,မၤတၢ်လီၤလးဖဲန့ၣ်တသ့ဘၣ်နီတမံၤဘၣ်. 6ဒီးကမၢကမၣ်ဝဲလၢပှၤတနာ်ဘၣ်တၢ်အဃိလီၤ.ဒီးဟးဝ့ၤဝီၤသိၣ်က့ၤသီက့ၤတၢ်လၢသဝီတဖၣ်အပူၤလီၤ.

7ဒီးကိးန့ၢ်အပျဲၢ်အဘီၣ်တဆံခံဂၤန့ၣ်,ဒီးမၢအလဲၤတၢ်ခံဂၤခံဂၤန့ၣ်လီၤ.ဒီးဟ့ၣ်လီၤအီၤလၢတၢ်အစိအကမီၤလၢတၢ်နါတဖၣ်အဖီခိၣ်လီၤ. 8ဒီးမၤလိာ်အီၤ,လၢမ့တမ့ၢ်နီၣ်ထိးဘိဘၣ်ဒီး,အသုတစိာ်တၢ်လၢကျဲအဂီၢ်,ထၢၣ်မ့ၢ်ဂ့ၤ,ကိၣ်မ့ၢ်ဂ့ၤ,တိၢ်လၢယီၢ်တကိးအပူၤမ့ၢ်ဂ့ၤန့ၣ်တဂ့ၤ. 9မ့မ့ၢ်လၢအကသိးခီၣ်ဖံး,ဒီးသုတသိးဆ့ခံဘ့ၣ်တဂ့ၤလီၤ. 10ဒီးစံးဘၣ်အီၤ,ဖဲအလီၢ်လၢသုလဲၤနုာ်ဆူဟံၣ်တဖျၢၣ်ဖျၢၣ်အပူၤဒီး,အိၣ်ဖဲန့ၣ်တုၤသုဟးထီၣ်ကွံာ်လၢအလီၢ်ဖဲန့ၣ်တက့ၢ်. 11ဒီးဖဲဒၣ်ပှၤလၢအတတူၢ်လိာ်ဘၣ်သု,ဒီးတကနၣ်ဘၣ်သု,ဒီးတကနၣ်ဘၣ်သုကလုၢ်ဘၣ်န့ၣ်,တုၤသုဟးထီၣ်ကွံာ်ဖဲန့ၣ်ဒီး,ဒ်သိးအကကဲထီၣ်တၢ်အုၣ်အသးလၢအဂ့ၢ်ဒီး,တြုၤလီၤကွံာ်ဟီၣ်ခိၣ်အကမူၣ်လၢသုခီၣ်အဖီလာ်တက့ၢ်.ယစံးဘၣ်တဲဘၣ်သုတီတီအံၤ,လၢတၢ်စံၣ်ညီၣ်အမုၢ်တနံၤန့ၣ်,စဒိၣ်ဒီးဂမိၤရၤကဘၣ်တၢ်ဘီၣ်န့ၢ်ဝ့ၢ်တဖျၢၣ်န့ၣ်တက့ၢ်လီၤ.

12ဒီးအဝဲသ့ၣ်တဖၣ်ဟးထီၣ်,ဒီးစံၣ်တဲၤတဲလီၤတၢ်လၢပှၤဘၣ်ပီၢ်ယၢ်လီၤက့ၤအသးလီၤ. 13ဒီးဟီထီၣ်ကွံာ်တၢ်နါအါဒု,ဒီးဖှူပှၤတအိၣ်ဆူၣ်အိၣ်ချ့ဘၣ်လၢသိအါဂၤ,ဒီးမၤဘျါက့ၤအီၤလီၤ.

14ဒီးစီၤပၤဟ့ၤရိာ်နၢ်ဟူတၢ်,(အဂ့ၢ်ဒ်အံၤ,အမံၤဟူထီၣ်သါလီၤဝဲ)ဒီးစံးဝဲဒၣ်,ပှၤဘျၢ ▼

▼6:14 လၢဟ့းလ့ၣ်အကျိာ်"ဘးပတံစၢ်."

တၢ်စီၤယိၤဟၣ်ဂဲၤဆၢထၢၣ်က့ၤလၢတၢ်သံလီၤ.မၤသးဒ်န့ၣ်ဒီး,တၢ်လီၤလးမၤအသးလၢအီၤလီၤ. 15ဒီးအဂၤတနီၤနီၤစံးလၢအမ့ၢ်ဝံဒ်လၢဝံအကျါတဂၤဂၤအသိးလီၤ. 16မ့မ့ၢ်တုၤစီၤဟ့ၤရိာ်နၢ်ဟူဒီး,စံးဝဲဒၣ်,အအံၤမ့ၢ်စီၤယိၤဟၣ်လၢယဒီၣ်တဲာ်ကွံာ်အကိာ်တဂၤလီၤ.အဝဲဒၣ်ဂဲၤဆၢထၢၣ်က့ၤလၢတၢ်သံလံ. 17အဂ့ၢ်ဒ်အံၤ,မ့ၢ်အဒီပုၢ်ဝဲၢ်စီၤဖံလံးပူးအမါ,နီၢ်ဟ့ၤရိၤဒံ,လၢအန့ၢ်မါလၢအီၤအဃိဒီး,စီၤဟ့ၤရိာ်အကစၢ်ဒၣ်ဝဲမၢပှၤလဲၤဟံးဃာ်စီၤယိၤဟၣ်,ဒီးစၢဃာ်အီၤလၢဃိာ်ပူၤလီၤ. 18အဂ့ၢ်ဒ်အံၤ,စီၤယိၤဟၣ်စံးဘၣ်စီၤဟ့ၤရိာ်နဟံးန့ၢ်နဒီပုၢ်ဝဲၢ်အမါန့ၣ်,တတီဘၣ်လီၤ. 19ဒီးနီၢ်ဟ့ၤရိၤဒံပာ်သးအီၤ,ဒီးတၢ်မိၣ်မၤသံအသးလၢအီၤ,ဒီးမၤဝဲတသ့ဘၣ်လီၤ. 20အဂ့ၢ်ဒ်အံၤ,စီၤဟ့ၤရိာ်သ့ၣ်ညါဝဲလၢစီၤယိၤဟၣ်မ့ၢ်ပှၤအတီအလိၤ,ဒီးပှၤအစီအဆှံသတးဒီး,ပျံၤအီၤ,ဒီးအံးက့ၤကွၢ်က့ၤအီၤ,ဒီးတုၤအနၢ်ဟူအကလုၢ်ဒီး,မၤဝဲအါမံၤ,ဒီးနၢ်ဟူအကလုၢ်လၢအသူၣ်ခုသးခုန့ၣ်လီၤ.

21ဒီးတုၤအဆၢကတီၢ်ဂ့ၤအမုၢ်နံၤဘၣ်,လၢစီၤဟ့ၤရိာ်အိၣ်ဖျဲၣ်အမုၢ်တနံၤဆၢအလီၢ်ဒီး,ဒုးအီၣ်ဒုးအီအပဒိၣ်ပပှၢ်,ဒီးပှၤသုးဖိတကထိအခိၣ်တဖၣ်,ဒီးပှၤကဲအခိၣ်တဖၣ်လၢကၤလံၤလါလီၤ. 22ဒီးနီၢ်ဟ့ၤရိၤဒံအကစၢ်ဒၣ်ဝဲအဖိမုၣ်ဟဲနုာ်,ဒီးဂဲၤကလံၣ်,ဒီးဘၣ်စီၤဟ့ၤရိာ်အသးဒီးပှၤဆ့ၣ်နီၤသန့ၤဃုာ်ဒီးအီၤတဖၣ်အသး,ဒီးစီၤပၤစံးဘၣ်ဖိသၣ်ပိာ်မုၣ်န့ၣ်,ဖဲဒၣ်တၢ်ဘၣ်နသးန့ၣ်,ဃ့လၢယၤတက့ၢ်.ဒီးယကဟ့ၣ်နၤလီၤ. 23ဒီးဆိၣ်လီၤအသးလၢအီၤ,ဖဲဒၣ်တၢ်လၢနဃ့လၢယၤန့ၣ်,ယကဟ့ၣ်နၤတုၤဖးဖီယဘီယမုၢ်လီၤ, 24ဒီးဖိသၣ်ပိာ်မုၣ်န့ၣ်ဟးထီၣ်ဒီးစံးဘၣ်အမိၢ်,မ့ၢ်ယကဃ့မနုၤတမံၤလဲၣ်.ဒီးအဝဲဒၣ်စံးဘၣ်အီၤ,ပှၤဘျၢ ▼

▼6:24 လၢဟ့းလ့ၣ်အကျိာ်"ဘးပတံစၢ်."

တၢ်စီၤယိၤဟၣ်အခိၣ်လီၤ. 25ဒီးလဲၤတကီၢ်ခါချ့သဒံးဆူစီၤပၤအအိၣ်,ဒီးဃ့တၢ်ဒီးစံးဝဲဒၣ်,ယသးအိၣ်လၢနကဟ့ၣ်ယၤပှၤဘျၢ ▼

▼6:25 လၢဟ့းလ့ၣ်အကျိာ်"ဘးပတံစၢ်."

တၢ်စီၤယိၤဟၣ်အခိၣ်လၢသီတ့ၤအပူၤ,ခဲအံၤလီၤ. 26ဒီးစီၤပၤအသူၣ်အုးသးအုးဒိၣ်မးဘၣ်ဆၣ်ဒီး,မ့ၢ်အတၢ်ဆိၣ်တဖၣ်,ဒီးပှၤလၢအဆ့ၣ်နီၤသန့ၤဃုာ်ဒီးအီၤတဖၣ်အဃိဒီး,ဂ့ၢ်လိာ်တၢ်ဒီးဖိသၣ်ပိာ်မုၣ်န့ၣ်အသးတအိၣ်ဘၣ်. 27ဒီးစီၤပၤမၢန့ၢ်တကီၢ်ခါပှၤပၢၤတၢ်တဂၤ,ဒီးမၤလိာ်လၢအကဟဲစိာ်အခိၣ်လီၤ. 28ဒီးအဝဲဒၣ်လဲၤဒီၣ်တဲာ်အကိာ်လၢဃိာ်ပူၤ,ဒီးဟဲက့ၤစိာ်အခိၣ်လၢသီတ့ၤအပူၤ,ဒီးဟ့ၣ်ဖိသၣ်ပိာ်မုၣ်,ဒီးဖိသၣ်ပိာ်မုၣ်န့ၣ်ဟ့ၣ်လီၤလၢအမိၢ်လီၤ. 29ဒီးအပျဲၢ်အဘီၣ်နၢ်ဟူဝဲ,ဒီးဟဲဟံးက့ၤအစိာ်,ဒီးလဲၤခူၣ်လီၤဝဲလၢတၢ်သွၣ်ခိၣ်အပူၤလီၤ.

30ဒီးပှၤတၢ်မၢဖိတဖၣ်ဟဲအိၣ်ဖှိၣ်လၢယ့ၣ်ရှူးအအိၣ်,ဒီးဖဲဒၣ်အမၤတၢ်တဖၣ်,ဒီးဖဲဒၣ်အသိၣ်က့ၤသီက့ၤတၢ်တဖၣ်န့ၣ်,စံးဘၣ်တဲဘၣ်အီၤခဲလၢာ်လီၤ. 31ဒီးစံးဘၣ်အဝဲသ့ၣ်,ဟဲသုကစၢ်ဒၣ်သုဝဲဆူတၢ်တဒၢလၢပှၢ်မုၢ်ကနၢအလီၢ်,ဒီးအိၣ်ဘှံးတစိၢ်တလီၢ်တက့ၢ်.အဂ့ၢ်ဒ်အံၤ,ပှၤဟဲက့ၤက့ၤဝဲအါဂၤသတးဒီးအီၣ်တၢ်အဆၢကတီၢ်တအိၣ်ဘၣ်လီၤ. 32ဒီးလဲၤလၢကဘီပူၤဆူပှၢ်မုၢ်ကနၢအလီၢ်ကစုဒုလီၤ. 33ဒီးပှၤအါဂၤထံၣ်လၢအဝဲသ့ၣ်ဟးထီၣ်ကစုဒု,ဒီးသ့ၣ်ညါဝဲဒီးဟးထီၣ်လၢကယဲၢ်ခူဧိၤဝ့ၢ်ဧိၤခဲလၢာ်န့ၣ်,ဒီးဃ့ၢ်လၢအခီၣ်ဖဲန့ၣ်,ဒီးလဲၤတုၤဆိလၢအဝဲသ့ၣ်အမဲာ်ညါလီၤ. 34ဒီးယ့ၣ်ရှူးဟးထီၣ်ဒီးထံၣ်ပှၤဂီၢ်မုၢ်ဖးဒိၣ်,ဒီးအသးအိၣ်အီၤလီၤ.အဂ့ၢ်ဒ်အံၤ,မၤအသးဒ်သိလၢပှၤကွၢ်အီၤတအိၣ်ဘၣ်အသိး,ဒီးသိၣ်က့ၤသီက့ၤအီၤအါမံၤလီၤ.

35ဒီးတုၤအါနၣ်ရံၣ်ပူၤကွံာ်ဒီး,အပျဲၢ်အဘီၣ်ဟဲဃီၤဆူအအိၣ်ဒီးစံးဝဲဒၣ်,တၢ်ဖဲအံၤမ့ၢ်ပှၢ်မုၢ်ကနၢအလီၢ်,ဒီးခဲကနံၣ်အံၤဘၣ်လံအါနၣ်ရံၣ်လံ. 36ဒ်သိးပှၤကလဲၤပှ့ၤန့ၢ်ကိၣ်လၢအဂီၢ်ဒၣ်ဝဲလၢပှၢ်လၢ်ကျါဝးတရံးဝဲ,ဒီးလၢသဝီတဖၣ်အပူၤဒီး,ပျၢ်ကွံာ်အီၤတက့ၢ်.အဂ့ၢ်ဒ်အံၤ,အတၢ်အီၣ်တၢ်အီတအိၣ်ဘၣ်နီတမံၤဘၣ်. 37ဒီးအဝဲဒၣ်စံးဆၢတၢ်ဒီးစံးဘၣ်အီၤ,သုဝဲသ့ၣ်အံၤ,ဟ့ၣ်အီၣ်အတၢ်တက့ၢ်.ဒီးအဝဲသ့ၣ်စံးဘၣ်အီၤ,မ့ၢ်ပဘၣ်လဲၤပှ့ၤကိၣ်လၢစ့ဒန့ၤရံၤခံကယၤ,ဒီးဟ့ၣ်အီၣ်အတၢ်န့ၣ်ဧါ. 38ဒီးအဝဲဒၣ်စံးဘၣ်အီၤ,သုကိၣ်အိၣ်ပှံၤဖျၢၣ်လဲၣ်.က့ၤကွၢ်တက့ၢ်.ဒီးတုၤအသ့ၣ်ညါဝဲဒီး,စံးဝဲဒၣ်,ယဲၢ်ဖျၢၣ်ဒီးညၣ်ခံဘ့ၣ်လီၤ. 39ဒီးမၤလိာ်ဝဲလၢအကဆ့ၣ်နီၤတကူၢ်သ့ၣ်ခဲလၢာ်လၢနီၣ်သံကစဲာ်အဖီခိၣ်တဖုတဖုလီၤ. 40ဒီးဆ့ၣ်နီၤဝဲတဂ့ၢ်တဂ့ၢ်န့ၣ်တကယၤ,ဒီးတဂ့ၢ်တဂ့ၢ်န့ၣ်ယဲၢ်ဆံလီၤ. 41ဒီးဟံးန့ၢ်ကိၣ်ယဲၢ်ဖျၢၣ်ဒီးညၣ်ခံဘ့ၣ်န့ၣ်,ဒီးကွၢ်ထီၣ်တၢ်ဆူမူခိၣ်ဒီးဆိၣ်ဂ့ၤတၢ်,ဒီးစိၢ်ဘျဲးကိၣ်,ဒီးဟ့ၣ်လီၤအပျဲၢ်အဘီၣ်ဒ်သိးအကပာ်လီၤလၢအဝဲသ့ၣ်အမဲာ်ညါလီၤဒီးညၣ်ခံဘ့ၣ်န့ၣ်,ဟ့ၣ်နီၤပှၤခဲလၢာ်လီၤ. 42ဒီးပှၤခဲလၢာ်အီၣ်ဝဲ,ဒီးဘျဲအီၣ်ဝဲလီၤ. 43ဒီးပှၤထၢထီၣ်အဘျဲၣ်အစဲၣ်ပှဲၤကုတဆံခံဒု,ဒီးလၢညၣ်တနီၤန့ၣ်လီၤ. 44ဒီးပှၤပိာ်ခွါလၢအအီၣ်ကိၣ်တဖၣ်န့ၣ်အိၣ်ယဲၢ်ကထိဃၣ်ဃၣ်လီၤ. 45ဒီးမၢဆူၣ်အပျဲၢ်အဘီၣ်လဲၤနုာ်လၢအကဘီပူၤတကီၢ်ခါ,ဒီးခီဂာ်ဆူဝၢ်ဘးခီဆူဘ့ၤသစဲဒၤ,ဖဲအကစၢ်ပှၢ်ပျၢ်ကွံာ်ပှၤဂီၢ်မုၢ်တဖၣ်အဖၢမုၢ်န့ၣ်လီၤ. 46ဒီးတုၤအပျၢ်ကွံာ်အီၤဝံၤဒီး,လဲၤထီၣ်ဘါထုကဖၣ်တၢ်လၢကစၢၢ်တဖျၢၣ်အလိၤလီၤ. 47ဒီးတုၤမုၢ်ဟါလီၤဒီး,ကဘီန့ၣ်အိၣ်ဝဲလၢပီၣ်လဲၣ်အသးကံၢ်ပူၤ,ဒီးအကစၢ်ဒၣ်ဝဲအိၣ်ဝဲလၢခိတဂၤဃီလီၤ.

48ဒီးထံၣ်အဝဲသ့ၣ်ကၢၢ်တၢ်,ဒီးမၤဘှံးအသးလီၤ.အဂ့ၢ်ဒ်အံၤ,ကလံၤတလိၤဘၣ်လၢအဂီၢ်ဘၣ်.ဒီးလၢတၢ်ပၢၤတၢ်လၢမုၢ်နၤလွံၢ်တီၤတတီၤဃၣ်ဃၣ်န့ၣ်,အဝဲဒၣ်ဟးလၢပီၣ်လဲၣ်အဖီခိၣ်ဒီးဟဲဆူအအိၣ်,ဒီးပာ်အသးဒ်အကလဲၤပူၤကွံာ်အီၤအသိးလီၤ. 49ဒီးတုၤအဝဲသ့ၣ်ထံၣ်ဘၣ်လၢအဟးလၢပီၣ်လဲၣ်အဖီခိၣ်ဒီး,ဆိကမိၣ်ဝဲလၢအမ့ၢ်ပှၤသဃၣ်,ဒီးကဲးကိးပသူထီၣ်ဝဲလီၤ.

50အဂ့ၢ်ဒ်အံၤ,ပှၤခဲလၢာ်ထံၣ်အီၤဒီးအသူၣ်ကိၢ်အသးဂီၤလီၤ.ဒီးအဝဲဒၣ်ကတိၤတၢ်ဒီးအီၤတကီၢ်ခါ,ဒီးစံးဘၣ်အီၤ,ပာ်သုသးခူတလ့ၢ်တက့ၢ်.မ့ၢ်ယၤလီၤပျံၤတၢ်တဂ့ၤ. 51ဒီးလဲၤထီၣ်ဆူအအိၣ်လၢကဘီပူၤ,ဒီးကလံၤတုာ်ဝဲလီၤ.ဒီးတၢ်လီၤလးလၢအမဲာ်ဒိၣ်မး,ဒီးကမၢကမၣ်ဝဲတကူၢ်သ့ၣ်လီၤ. 52အဂ့ၢ်ဒ်အံၤ,မ့ၢ်အသးကီ,ဒီးတဆိကမိၣ်ဘၣ်လၢကိၣ်တဖၣ်အဂ့ၢ်အကျိၤဘၣ်လီၤ.

53ဒီးတုၤအခီဂာ်ဝဲဝံၤဒီး,ဟဲဝဲဆူကီၢ်ကံးန့ၤရ့သး,ဒီးထိးထီၣ်ကဘီဖဲန့ၣ်လီၤ. 54ဒီးတုၤအဟးထီၣ်လၢကဘီပူၤဒီး,ပှၤသ့ၣ်ညါနီၣ်အီၤတကီၢ်ခါ, 55ဒီးလဲၤဃ့ၢ်ဝ့ၤဝီၤတၢ်လၢကီၢ်န့ၣ်ဒီဘ့ၣ်ညါ,ဒီးပှၤလဲၤစိာ်ဝ့ၤဝီၤပှၤမၤတကဲဘၣ်တဖၣ်လၢလီၢ်မံပူၤ,ဆူအလီၢ်ဖဲအနၢ်ဟူလၢအအိၣ်ဝဲန့ၣ်လီၤ. 56ဒီးဖဲအလဲၤနုာ်ဝဲလၢသဝီပူၤမ့ၢ်ဂ့ၤ,လၢဝ့ၢ်ပူၤမ့ၢ်ဂ့ၤ,ပှၢ်လၢ်ကျါမ့ၢ်ဂ့ၤ,ပှၤပာ်လီၤပှၤဘၣ်ဆူးဘၣ်ဆါတဖၣ်လၢဖၠါတဖၣ်အပူၤ,ဒီးဃ့ကညးအီၤဒ်သိးအကထိး,မ့မ့ၢ်ထဲအကူအသိးအနွံဧိၤလီၤ.ဒီးဖဲဒၣ်ပှၤလၢအထိးဘၣ်အီၤတဖၣ်န့ၣ်,ဘျါက့ၤဝဲလီၤ.