‏ Matthew 10

1ဒီးကိးန့ၢ်အပျဲၢ်အဘီၣ်တဆံခံဂၤဆူအအိၣ်,ဒီးဟ့ၣ်လီၤအီၤလၢတၢ်စိတၢ်ကမီၤလၢသးအၢတဖၣ်အဖီခိၣ်,ဒ်သိးအကဟီထီၣ်ကွံာ်အီၤ,ဒီးမၤဘျါက့ၤကယဲၢ်တၢ်ဆူးတၢ်ဆါ,ဒီးတၢ်အက့အကွဲၣ်ခဲလၢာ်လီၤ.

2ဒီးအပှၤတၢ်မၢဖိခံဂၤန့ၣ်,အမံၤမ့ၢ်အအံၤ,အခီၣ်ထံးမ့ၢ်စီၤရှံမိၣ်ကိးဝဲလၢစီၤပ့းတရူး,ဒီးအဒီပုၢ်ဝဲၢ်စီၤအၣ်ဒရ့း,စီၤစ့းဘ့းဒဲအဖိခွါစီၤယၤကိာ်ဒီးအဒီပုၢ်ဝဲၢ်စီၤယိၤဟၣ်, 3စီၤဖံးလံးပူးဒီးစီၤဘၢ်သလီးမဲ,စီၤသိၤမါဒီးပှၤဃ့သွဲစီၤမးသဲ,စီၤအၤလဖဲအဖိခွါစီၤယၤကိာ်ဒီးစီၤလ့းဘဲကိးဝဲအမံၤသီလၢစီၤသးဒဲ, 4ပှၤကနၤဧၣ်ဖိစီၤရှံမိၣ်,ဒီးစီၤယူဒၤအံၣ်စကၤရံၤအိာ်,လၢအဟ့ၣ်လီၤကွံာ်စ့ၢ်ကီးအီၤလီၤ.

5တၢ်လၢပှၤတဆံခံဂၤန့ၣ်,ယ့ၣ်ရှူးမၢအလဲၤတၢ်,ဒီးမၤလိာ်အီၤဒီးစံးဝဲဒၣ်,လဲၤပိာ်ကျဲဆူပှၤကလုာ်တဖၣ်အအိၣ်တဂ့ၤ,လဲၤနုာ်လၢပှၤရှၤမရံအဝ့ၢ်ပူၤတဂ့ၤ. 6မ့မ့ၢ်လဲၤဆူအံၣ်စရ့လးအဟံၣ်အသိလၢအဟါမၢ်တဖၣ်အအိၣ်တက့ၢ်.

7ဒီးလဲၤစံၣ်တဲၤတဲလီၤတၢ်ဒီးစံး,မူခိၣ်အဘီအမုၢ်န့ၣ်ဘူးထီၣ်လံ. 8မၤဘျါက့ၤပှၤဆါတဖၣ်,ဒုးဂဲၤဆၢထၢၣ်က့ၤပှၤသံတဖၣ်,မၤကဆှီထီၣ်က့ၤပှၤဘၣ်တၢ်ဆါအၢတဖၣ်,ဟီထီၣ်ကွံာ်တၢ်နါတဖၣ်န့ၣ်တက့ၢ်.သုဒိးန့ၢ်ကလီတၢ်လံ,ဟ့ၣ်ကလီတၢ်တက့ၢ်.

9ထူမ့ၢ်ဂ့ၤ,စ့မ့ၢ်ဂ့ၤ,တိၢ်လၢသုယီၢ်တကိးအပူၤမ့ၢ်ဂ့ၤ, 10ထၢၣ်တဖျၢၣ်လၢကျဲအဂီၢ်မ့ၢ်ဂ့ၤ,ဆ့ခံဘ့ၣ်မ့ၢ်ဂ့ၤ,ခီၣ်ဖံးတဖၣ်မ့ၢ်ဂ့ၤ,နီၣ်ထိးမ့ၢ်ဂ့ၤ,သုတကတဲာ်ကတီၤတဂ့ၤ,အဂ့ၢ်ဒ်အံၤ,ပှၤလၢအမၤတၢ်န့ၣ်ကြၢးဒီးအတၢ်အီၣ်တၢ်အီလီၤ.

11ဒီးဖဲဒၣ်ဝ့ၢ်မ့ၢ်ဂ့ၤ,သဝီမ့ၢ်ဂ့ၤ,လၢသုလဲၤနုာ်တဖျၢၣ်ဖျၢၣ်ဒီး,ပှၤအဂ့ၤအိၣ်လၢအပူၤမ့ၢ်မတၤမတၤတဂၤလဲၣ်လဲၣ်န့ၣ်,သံကွၢ်ဒၣ်ကလိာ်,ဒီးအိၣ်ဖဲန့ၣ်တုၤသုဟးထီၣ်ကွံာ်န့ၣ်တက့ၢ်. 12ဒီးတုၤသုလဲၤနုာ်လၢဟံၣ်ပူၤဒီး,ဆိၣ်ဂ့ၤအီၤတက့ၢ်. 13ဒီးတၢ်လၢဟံၣ်တဖျၢၣ်န့ၣ်,မ့ၢ်ကြၢးဒီး,မ်သုတၢ်ဃူတၢ်ဖိးကဘၣ်အီၤတက့ၢ်,မ့မ့ၢ်,မ့ၢ်တကြၢးဘၣ်ဒီး,မ်သုတၢ်ဃူတၢ်ဖိးဟဲက့ၤကဒါက့ၤဆူသုအိၣ်တက့ၢ်.

14ဒီးဖဲဒၣ်ပှၤလၢအတတူၢ်လိာ်ဘၣ်သု,ဒီးတကနၣ်ဘၣ်သုကလုၢ်တဂၤဂၤန့ၣ်,တုၤသုဟးထီၣ်ကွံာ်လၢအဟံၣ်မ့ၢ်ဂ့ၤ,အဝ့ၢ်မ့ၢ်ဂ့ၤ,တြုၤလီၤကွံာ်တၢ်ကမူၣ်လၢသုခီၣ်လၣ်တက့ၢ်. 15ယစံးဘၣ်တဲဘၣ်သုတီတီအံၤ,လၢတၢ်စံၣ်ညီၣ်အမုၢ်တနံၤန့ၣ်,စဒိၣ်ဒိးဂမိရၤအကီၢ်ကဘၣ်တၢ်ဘီၣ်န့ၢ်ဝ့ၢ်တဖျၢၣ်န့ၣ်တက့ၢ်လီၤ.

16ကွၢ်ကွၢ်,ယမၤလီၤသုဒ်သိတဖၣ်လၢထွံၣ်မံၤအကျါအသိးန့ၣ်လီၤ.မၤသးဒ်န့ၣ်ဒီးကဲထီၣ်ပှၤကူၣ်တၢ်သ့ဒ်ဂုၢ်အသိး,ဒီးတကူၣ်ဘၣ်တၢ်အၢဒ်ထိၣ်လွံၢ်အသိးတက့ၢ်. 17ပလီၢ်သုသးလၢပှၤကညီတက့ၢ်.အဂ့ၢ်ဒ်အံၤ,အဝဲသ့ၣ်ကဟ့ၣ်လီၤကွံာ်သုဆူပှၤသးပှၢ်အတၢ်အိၣ်ဖှိၣ်,ဒီးကတီၢ်သုလၢဘူၣ်ဘျီၣ်ပူၤ, 18ဒီးပှၤကမိၤသုဆူပဒိၣ်ပပှၢ်ဒီးစီၤလိၣ်စီၤပၤအမဲာ်ညါလၢယဃိ,လၢတၢ်အုၣ်အသးလၢအဝဲသ့ၣ်ဒီးလၢပှၤကလုာ်တဖၣ်အမဲာ်ညါလီၤ. 19ဘၣ်ဆၣ်ဒီးတုၤအဟ့ၣ်လီၤကွံာ်သုဒီး,မ့ၢ်သုကကတိၤတၢ်ဒ်လဲၣ်မ့ၢ်ဂ့ၤ,မနုၤမနုၤလဲၣ်မ့ၢ်ဂ့ၤ,သုတဘၣ်ယိၣ်တဂ့ၤ.အဂ့ၢ်ဒ်အံၤ,တၢ်ကဟ့ၣ်လီၤသုလၢတၢ်လၢသုကကတိၤတၢ်န့ၣ်တစုဃီဖဲန့ၣ်လီၤ. 20အဂ့ၢ်ဒ်အံၤ,တမ့ၢ်ဘၣ်သုကတိၤတၢ်သုဝဲဘၣ်,မ့ၢ်သုပၢ်အသးကတိၤတၢ်လၢသုပူၤလီၤ.

21ဒီးဒီပုၢ်ဝဲၢ်ကဟ့ၣ်လီၤကွံာ်အဒီပုၢ်ဝဲၢ်ဆူတၢ်သံအပူၤ,ဒီးပၢ်အဖိလီၤ.ဒီးဖိတဖၣ်န့ၣ်ကဂဲၤဆၢထၢၣ်ထီဒါအမိၢ်အပၢ်,ဒီးကဒုးသံအီၤလီၤ. 22ဒီးသုကဘၣ်တၢ်သးဟ့သုလၢပှၤကညီခဲလၢာ်လၢယမံၤအဃိလီၤ.မ့မ့ၢ်ပှၤလၢအအိၣ်ဂၢၢ်ဆိးကျၢၤဝဲတုၤအကတၢၢ်န့ၣ်,ကဘၣ်တၢ်အုၣ်က့ၤခီၣ်က့ၤအီၤလီၤ.

23ဒီးတုၤပှၤမၤအၢမၤနးသုလၢဝ့ၢ်တဖျၢၣ်အံၤဒီး,ဃ့ၢ်ထီၣ်ဆူအဂၤတဖျၢၣ်တက့ၢ်.အဂ့ၢ်ဒ်အံၤ,ယစံးဘၣ်သုတီတီအံၤ,သုလဲၤလၢအံၣ်စရ့လးအခူအဝ့ၢ်တချုးသကုၤဒံးဘၣ်ဒီး,ပှၤကညီဖိခွါအံၤကဟဲဝဲလီၤ.

24အပျဲၢ်တအိၣ်ဘၣ်လၢအသရၣ်အဖီခိၣ်ဘၣ်,ဒီးအကုၢ်တအိၣ်ဘၣ်လၢအကစၢ်အဖီခိၣ်ဘၣ်. 25အပျဲၢ်မ့ၢ်ဒ်သိးဒီးအသရၣ်ဒီးအကုၢ်မ့ၢ်ဒ်သိးဒီးအကစၢ်ဒီး,အါလံလၢအဂီၢ်လံ.ပှၤမ့ၢ်ကိးဟံၣ်ကစၢ်လၢဘဧၤလစဘူာ်ဒီး,ကကိးအပှၤဟံၣ်ဖိအါန့ၢ်အန့ၣ်တက့ၢ်ဆံးဒိၣ်လဲၣ်.

26မၤသးဒ်န့ၣ်ဒီးပျံၤအီၤတဂ့ၤ.အဂ့ၢ်ဒ်အံၤ,တၢ်ကျၢၢ်ဘၢအသးလၢတၢ်တမၤဖျါထီၣ်အီၤဘၣ်န့ၣ်,တအိၣ်ဘၣ်နီတမံၤဘၣ်.ဒီးတၢ်အိၣ်ခူသူၣ်လၢတၢ်တသ့ၣ်ညါထီၣ်အီၤဘၣ်န့ၣ်,တအိၣ်ဘၣ်နီတမံၤဘၣ်. 27တၢ်လၢယစံးဘၣ်သုလၢတၢ်ခံးကျါန့ၣ်,စံးဘၣ်က့ၤလၢတၢ်ကပီၤအကျါတက့ၢ်.ဒီးတၢ်လၢသုနၢ်ဟူလၢသုနၢ်ပူၤန့ၣ်,စံၣ်တဲၤတဲလီၤလၢဟံၣ်ခိၣ်အဖီခိၣ်တက့ၢ်.

28ဒီးပှၤလၢအမၤသံပနီၢ်ခိ,ဒီးမၤသံပသးတသ့ဘၣ်တဖၣ်န့ၣ်,သုတပျံၤအီၤတဂ့ၤ,မ့မ့ၢ်ဂ့ၤန့ၢ်အန့ၣ်ပျံၤပှၤလၢအမၤဟးဂီၤပသးဒီးပနီၢ်ခိလၢလရာ်ပူၤသ့တဂၤန့ၣ်တက့ၢ်.

29ပှၤဆါကွံာ်ထိၣ်ဖှံးခံဘ့ၣ်လၢတိၢ်တဘ့ၣ်တမ့ၢ်ဘၣ်ဧါ.ဒီးသုပၢ်တအိၣ်ဘၣ်ဒီး,တလီၤတဲာ်ဘၣ်လၢဟီၣ်ခိၣ်အဖီခိၣ်နီတဘ့ၣ်ဘၣ်. 30ဒီးသုခိၣ်သူအဘိဒၣ်လဲာ်ဘၣ်တၢ်ဂံၢ်အီၤခဲလၢာ်လီၤ. 31မၤသးဒ်န့ၣ်ဒီးပျံၤတၢ်တဂ့ၤ.သုဂ့ၤန့ၢ်ထိၣ်ဖှံးအါဘ့ၣ်တက့ၢ်လီၤ.

32မၤသးဒ်န့ၣ်ဒီး,ကယဲၢ်ပှၤလၢအအၢၣ်လီၤအီလီၤယၤလၢပှၤကညီအမဲာ်ညါကိးဂၤဒဲးန့ၣ်,ယကအၢၣ်လီၤအီလီၤစ့ၢ်ကီးအီၤလၢယပၢ်အိၣ်လၢမူခိၣ်အမဲာ်ညါလီၤ. 33မ့မ့ၢ်ဖဲဒၣ်ပှၤလၢအသမၢယၤလၢပှၤကညီအမဲာ်ညါတဂၤဂၤန့ၣ်,ယကသမၢစ့ၢ်ကီးအီၤလၢယပၢ်အိၣ်လၢမူခိၣ်အမဲာ်ညါလီၤ.

34သုတဆိကမိၣ်လၢယဟဲမၢလီၤတၢ်ဃူတၢ်ဖိးလၢဟီၣ်ခိၣ်ချၢအံၤတဂ့ၤ.တမ့ၢ်ဘၣ်ယဟဲမၢလီၤတၢ်ဃူတၢ်ဖိးဘၣ်.မ့ၢ်နးတဘ့ၣ်လီၤ. 35အဂ့ၢ်ဒ်အံၤ,ယဟဲမၤလီၤမုၢ်လီၤဖးပှၤတဂၤဒီးအပၢ်,ဒီးဖိမုၣ်ဒီးအမိၢ်,ဒီးဒဲၣ်ဒီးအမံၤပှၢ်ပိာ်မုၣ်လီၤ. 36ဒီးပှၤကညီအဒုၣ်အဒါကမ့ၢ်အပှၤဟံၣ်ဖိဒၣ်ဝဲလီၤ.

37ပှၤလၢအအဲၣ်အမိၢ်မ့ၢ်ဂ့ၤ,အပၢ်မ့ၢ်ဂ့ၤ,အါန့ၢ်အအဲၣ်ယၤအံၤ,တကြၢးဘၣ်ဒီးယၤဘၣ်,ဒီးပှၤလၢအအဲၣ်အဖိမုၣ်မ့ၢ်ဂ့ၤ,အဖိခွါမ့ၢ်ဂ့ၤ,အါန့ၢ်အအဲၣ်ယၤအံၤ,တကြၢးဘၣ်ဒီးယၤဘၣ်. 38ဒီးပှၤလၢအတဟံးန့ၢ်ဘၣ်အထူၣ်စုညါဒီးပိာ်ယခံဘၣ်တဂၤန့ၣ်,တကြၢးဘၣ်ဒီးယၤဘၣ်. 39ပှၤလၢအထံၣ်န့ၢ်အသးသမူန့ၣ်,ကမၤဟါမၢ်ကွံာ်အီၤလီၤ.ဒီးပှၤလၢအဒုးဟါမၢ်အသးသမူလၢယဃိအံၤ,ကထံၣ်န့ၢ်ဘၣ်အီၤလီၤ.

40ပှၤလၢအတူၢ်လိာ်သုန့ၣ်မ့ၢ်အတူၢ်လိာ်ယၤ,ဒီးပှၤလၢအတူၢ်လိာ်ယၤအံၤ,မ့ၢ်အတူၢ်လိာ်ပှၤလၢအမၢလီၤယၤလီၤ. 41ပှၤလၢအတူၢ်လိာ်ဝံတဂၤလၢဝံအမံၤအဃိန့ၣ်,ကန့ၢ်ဘၣ်ဝံအဘျုး,ဒီးပှၤလၢအတူၢ်လိာ်ပှၤအတီအလိၤလၢပှၤအတီအလိၤအမံၤအဃိန့ၣ်,ကန့ၢ်ဘၣ်ပှၤအတီအလိၤအဘျုးလီၤ. 42ဒီးဖဲဒၣ်ပှၤလၢအဟ့ၣ်အီပှၤတဂၤ,လၢပှၤအဆံးတဖၣ်အံၤအကျါ,ထဲထံခုၣ်တလီခီလၢအပျဲၢ်အဘီၣ်အမံၤအဃိန့ၣ်,ယစံးဘၣ်သုတီတီအံၤ,အဘျုးတဟါမၢ်ဘၣ်ဝဲဘၣ်.