Mat 11 | KswSKMB | STEP | ဒီးတၢ်မၤအသးလၢယ့ၣ်ရှူးမၤလိာ်အပျဲၢ်အဘီၣ်တဆံခံဂၤန့ၣ်ဝံၤဒီး,ဟးထီၣ်ကွံာ်ဝဲဖဲန့ၣ်,ဒ်သိးအကသိၣ်က့ၤသီက့ၤတၢ်,ဒီးစံၣ်တဲၤတဲလီၤတၢ်လၢအခူအဝ့ၢ်လီၤ.

‏ Matthew 11

1 ဒီးတၢ်မၤအသးလၢယ့ၣ်ရှူးမၤလိာ်အပျဲၢ်အဘီၣ်တဆံခံဂၤန့ၣ်ဝံၤဒီး,ဟးထီၣ်ကွံာ်ဝဲဖဲန့ၣ်,ဒ်သိးအကသိၣ်က့ၤသီက့ၤတၢ်,ဒီးစံၣ်တဲၤတဲလီၤတၢ်လၢအခူအဝ့ၢ်လီၤ.

2 ဒီးတုၤစီၤယိၤဟၣ်နၢ်ဟူဝဲလၢဃိာ်ပူၤ,လၢယ့ၣ်ရှူးအတၢ်မၤတဖၣ်အဂ့ၢ်ဒီး,မၢလီၤအပျဲၢ်အဘီၣ်ခံဂၤ, 3 ဒီးစံးဘၣ်အီၤ,နဲဒၣ်အံၤနမ့ၢ်ပှၤလၢအဟဲတဂၤန့ၣ်,မ့ၢ်ပဘၣ်ကွၢ်လၢ်ဒံးပှၤအဂၤတဂၤအကျဲလဲၣ်.

4 ဒီးယ့ၣ်ရှူးစံးဘၣ်အီၤ,တၢ်လၢသုနၢ်ဟူ,ဒီးသုထံၣ်ဘၣ်တဖၣ်အံၤ,က့ၤစံးဘၣ်တဲဘၣ်စီၤယိၤဟၣ်တက့ၢ်. 5 ပှၤလၢအမဲာ်ဘျီၣ်တဖၣ်ထံၣ်ထီၣ်က့ၤတၢ်,ဒီးပှၤလၢအခီၣ်ဟးဂီၤတဖၣ်ဟးထီၣ်က့ၤဝဲ,ပှၤလၢအဘၣ်တၢ်ဆါအၢတဖၣ်ကဆှီထီၣ်က့ၤဝဲ,ဒီးပှၤလၢအနၢ်တအၢတဖၣ်,နၢ်ဟူထီၣ်က့ၤတၢ်,ပှၤလၢအသံတဖၣ်န့ၣ်တၢ်ဒုးဂဲၤဆၢထၢၣ်က့ၤအီၤ,ဒီးပှၤလၢအဖှီၣ်အယာ်တဖၣ်န့ၣ်,တၢ်စံၣ်တဲၤတဲလီၤန့ၢ်အီၤလၢတၢ်သးခုကစီၣ်လီၤ. 6 ဒီးဖဲဒၣ်ပှၤလၢအသးတဟးဂီၤဘၣ်လၢယပူၤတဂၤဂၤန့ၣ်,ဘၣ်ဆိၣ်ဂ့ၤဝဲလီၤ.

7 ဒီးဖဲအဝဲသ့ၣ်က့ၤက့ၤဒီး,ယ့ၣ်ရှူးစံးဘၣ်သီပှၤဂီၢ်မုၢ်လၢစီၤယိၤဟၣ်အဂ့ၢ်,သုဟးထီၣ်ဆူပှၢ်မုၢ်ကနၢ,ဒ်သိးသုကကွၢ်ကီမနုၤတမံၤလဲၣ်.မ့ၢ်တပိၢ်တဘိလၢအဟူးဝးလၢကလံၤန့ၣ်ဧါ. 8 မ့တမ့ၢ်ဘၣ်ဒီး,မ့ၢ်သုဟးထီၣ်ဒ်သိးသုကကွၢ်ကီမနုၤတမံၤလဲၣ်.မ့ၢ်ပှၤကူတၢ်သိးတၢ်ကပုာ်လုးန့ၣ်ဧါ.ကွၢ်ကွၢ်,ပှၤလၢအအိၣ်ဒီးအကူအသိးကပုာ်လုးတဖၣ်န့ၣ်,အိၣ်လၢစီၤပၤအဟံၣ်ပူၤလီၤ.မ့တမ့ၢ်ဘၣ်ဒီး,မ့ၢ်သုဟးထီၣ်ဒ်သိးသုကကွၢ်ကီမနုၤတမံၤလဲၣ်.မ့ၢ်ဝံတဂၤဧါ. 9 မ့ၢ်လံ,ယစံးဘၣ်တဲဘၣ်သု,မ့ၢ်အဒိၣ်န့ၢ်ဝံတဂၤတက့ၢ်လီၤ. 10 အဂ့ၢ်ဒ်အံၤ,အဝဲဒၣ်န့ၣ်မ့ၢ်ပှၤလၢတၢ်ကွဲးအသးအဂ့ၢ်.

ကွၢ်ကွၢ်,ယမၢလီၤယကလူးအဂၤလၢနမဲာ်ညါ,
လၢအကမၤက့ၤနကျဲလၢနမဲာ်ညါလီၤ. ^{▼▼11:10 မၤ.၃း၁}

11 ယစံးဘၣ်သုတီတီအံၤ,လၢပှၤလၢပိာ်မုၣ်ဆံးစၢ်န့ၢ်အီၤအကျါန့ၣ်,ပှၤဒိၣ်န့ၢ်ပှၤဘျၢ ^{▼▼11:11 လၢဟ့းလ့ၣ်အကျိာ်"ဘးပတံစၢ်."}တၢ်စီၤယိၤဟၣ်တအိၣ်ထီၣ်ဘၣ်နီတဂၤဘၣ်.ဘၣ်ဆၣ်ဒီးပှၤလၢအဆံးကတၢၢ်တဂၤလၢမူခိၣ်အဘီအမုၢ်အပူၤန့ၣ်,ဒိၣ်န့ၢ်အီၤတက့ၢ်လီၤ. 12 ဒီးလၢပှၤဘျၢ ^{▼▼11:12 လၢဟ့းလ့ၣ်အကျိာ်"ဘးပတံစၢ်."}တၢ်စီၤယိၤဟၣ်အမုၢ်နံၤတဖၣ်တုၤခဲကနံၣ်အံၤ,မူခိၣ်အဘီအမုၢ်ဘၣ်တၢ်ဂုာ်ဆူၣ်အီၤ,ဒီးပှၤဂုာ်ဆူၣ်တၢ်တဖၣ်န့ၣ်,မၤန့ၢ်ဆူၣ်အီၤလီၤ.

13 အဂ့ၢ်ဒ်အံၤ,ကယဲၢ်ဝံသ့ၣ်တဖၣ်ခဲလၢာ်,ဒီးတၢ်သိၣ်တၢ်သီကတိၤတၢ်လၢဝံအကျိာ်တုၤလီၤလၢစီၤယိၤဟၣ်လီၤ. 14 ဒီးသုသးမ့ၢ်အိၣ်လၢသုကတူၢ်လိာ်တၢ်အံၤဒီး,ပှၤတဂၤအံၤမ့ၢ်စီၤအ့ၤလံယၤလၢအကဟဲတဂၤန့ၣ်လီၤ. 15 ပှၤအိၣ်ဒီးအနၢ်လၢအနၢ်ဟူတၢ်န့ၣ်,မ်အနၢ်ဟူတၢ်တက့ၢ်. 16 ဒီးပှၤတစိၤအံၤ,မ့ၢ်ယကဒိလီၤအီၤလၢမနုၤတမံၤလဲၣ်.မ့ၢ်အလီၤဂာ်ဒီးဖိသၣ်တဖၣ်ဆ့ၣ်နီၤလၢဖၠါပူၤ,ဒီးကိးထီၣ်အဂိၤမီၣ်, 17 ဒီးစံးဝဲဒၣ်,ပအူပံလၢသုဂီၢ်,ဒီးသုတဂဲၤကလံၣ်ဘၣ်.ပဟီၣ်တၢ်လၢသုဂီၢ်,ဒီးသုတဒဲလီၤဘၣ်သုသးနၢ်ပှၢ်န့ၣ်ဘၣ်လီၤ. 18 အဂ့ၢ်ဒ်အံၤ,စီၤယိၤဟၣ်ဟဲဝံ,ဒီးတအီၣ်ဘၣ်တၢ်ဘၣ်,ဒီးတအီၤဘၣ်တၢ်ဘၣ်.ဒီးပှၤစံးဝဲဒၣ်,တၢ်နါအိၣ်လၢအလိၤလီၤ. 19 ပှၤကညီအဖိခွါအံၤဟဲဝဲ,ဒီးအီၣ်တၢ်ဒီးအီတၢ်,ဒီးပှၤစံးဝဲဒၣ်,ကွၢ်ကွၢ်,ပှၤတဂၤအံၤ,မ့ၢ်ပှှၤအီၣ်လုၣ်ကိတၢ်,ဒီးပှၤအီစပံးထံ,ပှၤဒီတံၤဒီသကိးဒီးပှၤဃ့သွဲ,ဒီးပှၤတၢ်ဒဲးဘးဖိလီၤ.ဘၣ်ဆၣ်ဒီးတၢ်ကူၣ်ဘၣ်ကူၣ်သ့န့ၣ်ဘၣ်တၢ်ပာ်တီပာ်လိာ်အီၤလၢအဖိဒၣ်ဝဲလီၤ.

20 တုၤနုၤတစုပာ်သီတၢ်ကမၣ်လၢခူဧိၤဝ့ၢ်ဧိၤလၢအမၤတၢ်လီၤလးလၢအပူၤလၢအအါကတၢၢ်တဖၣ်န့ၣ်,လၢအတပီၢ်ယၢ်လီၤက့ၤဘၣ်အသးအဃိလီၤ. 21 ဃၤရၤစံၣ်ဧၢ,နဲဒၣ်အံၤနဘၣ်နဘၣ်အဖှီၣ်လီၤ.ဘ့ၤသစဲဒၤဧၢ,နဲဒၣ်အံၤနဘၣ်အဖှီၣ်လီၤ.အဂ့ၢ်ဒ်အံၤ,တၢ်လီၤလးမၤအသးလၢသုပူၤတဖၣ်န့ၣ်,မ့ၢ်မၤတ့ၢ်အသးလၢစိၢ်ဒီးစံဒိၣ်အပူၤဒီး,ကပီၢ်ယၢ်လီၤက့ၤအသးဃဲးဃဲးတ့ၢ်,လၢထၢၣ်တၢ်ကံးညၣ်,ဒီးလၢဖၣ်ဆါအပူၤလီၤ. 22 ဒီးယစံးဘၣ်တဲဘၣ်သုအံၤ,လၢတၢ်စံၣ်ညီၣ်အမုၢ်နံၤန့ၣ်,စိၢ်ဒီးစံဒိၣ်ကဘၣ်တၢ်ဘီၣ်န့ၢ်သုတက့ၢ်လီၤ.

23 ဒီးနဲဒၣ်ကပ့းရနီၣ်ဧၢ,နထီၣ်ဘးလၢမူခိၣ်ဘၣ်ဆၣ်ဒီး,နကဘၣ်တၢ်ဆီၣ်လီၤပၢၢ်လၢပျုၤပူၤလီၤ.အဂ့ၢ်ဒ်အံၤ,တၢ်လီၤလးမၤအသးလၢနပူၤတဖၣ်န့ၣ်မ့ၢ်မၤတ့ၢ်အသးလၢစဒိၣ်အပူၤဒီး,ကအိၣ်ဒံးတုၤမုၢ်မဆါတနံၤအံၤလီၤ. 24 ဒီးယစံးဘၣ်တဲဘၣ်သုအံၤ,လၢတၢ်စံၣ်ညီၣ်အမုၢ်နံၤန့ၣ်,ကီၢ်စဒိၣ်ကဘၣ်တၢ်ဘီၣ်န့ၢ်နၤတက့ၢ်လီၤ.

25 အကတီၢ်ဖဲန့ၣ်ယ့ၣ်ရှူးကတိၤဆၢတၢ်,ဒီးစံးဝဲဒၣ်,မူခိၣ်ဒီးဟီၣ်ခိၣ်အကစၢ်,ပၢ်ဧၢ,ယစံးထီၣ်ပတြၢၤနၤလီၤ.အဂ့ၢ်ဒ်အံၤ,တၢ်တဖၣ်အံၤနပာ်ခူသူၣ်ကွံာ်လၢပှၤကူၣ်တၢ်သ့ဒီးပှၤအသူၣ်ဆးအသးဆးတဖၣ်အမဲာ်ညါ,ဒီးမၤဖျါထီၣ်အီၤလၢဖိဆံးတဖၣ်လီၤ. 26 မ့ၢ်လံ,ပၢ်ဧၢ,မ့ၢ်အဘၣ်နသးဒ်န့ၣ်အဂ့ၢ်လီၤ.

27 ယပၢ်ဟ့ၣ်လီၤတၢ်ခဲလၢာ်လၢယၤလံ,ဒီးမ့တမ့ၢ်ဘၣ်ပၢ်န့ၣ်ဒီး,ပှၤတသ့ၣ်ညါဘၣ်ဖိခွါနီတဂၤဘၣ်.ဒီးမ့တမ့ၢ်ဘၣ်ဖိခွါဒီးဖဲဒၣ်ပှၤလၢဖိခွါကမၤဖျါထီၣ်ပၢ်လၢအီၤတဂၤဂၤန့ၣ်,ပှၤတသ့ၣ်ညါဘၣ်ပၢ်နီတဂၤဘၣ်.

28 ပှၤလၢတၢ်ဘှံးအသး,ဒီးဝံတၢ်ယိးတၢ်ဃၢခဲလၢာ်သ့ၣ်သုဧၢ,ဟဲဆူယအိၣ်တက့ၢ်.ဒီးယကဒုးအိၣ်ဘှံးသုလီၤ. 29 ဟံးထီၣ်ယနီၣ်ယိးဘိလၢသုလိၤ,ဒီးမၤလိတၢ်လၢယၤတက့ၢ်.အဂ့ၢ်ဒ်အံၤ,ယသးစူၤ,ဒီးယသးဆီၣ်လီၤယသးလီၤ.ဒီးသုကထံၣ်န့ၢ်တၢ်အိၣ်ဘှံးလၢသုအဂီၢ်လီၤ. 30 အဂ့ၢ်ဒ်အံၤ,ယနီၣ်ယိးဘိမ့ၢ်အညီ,ဒီးယတၢ်ဝံတၢ်ယိးမ့ၢ်အဖှံလီၤ.