‏ Matthew 12

1အကတီၢ်ဖဲန့ၣ်ယ့ၣ်ရှူးလဲၤခီစံာ်ဧိၤပှဲၤဧိၤလၢမုၢ်အိၣ်ဘှံးအနံၤ,ဒီးအပျဲၢ်အဘီၣ်တဖၣ်တၢ်သၣ်ဝံၤအသး,ဒီးဒဲးသီဘုအစဲၤဒီးအီၣ်ဝဲဒၣ်လီၤ. 2ဒီးပှၤဖၤရံၤရှဲသ့ၣ်တဖၣ်ထံၣ်ဘၣ်ဝဲ,ဒီးစံးဘၣ်အီၤ,ကွၢ်ကွၢ်,တၢ်တဂ့ၤမၤဘၣ်လၢမုၢ်အိၣ်ဘှံးအနံၤအံၤ,နပျဲၢ်နဘီၣ်မၤမးလဲၣ်. 3ဒီးအဝဲဒၣ်စံးဘၣ်အီၤ,စီၤဒၤဝံးဒီးပှၤလၢအသိးတဖၣ်,တုၤတၢ်သၣ်ဝံၤအသးဒီး,မၤတၢ်ဒ်လဲၣ်ဒ်လဲၣ်,မ့ၢ်သုတဖးဘၣ်ဧါ. 4မ့ၢ်အလဲၤနုာ်ဆူယွၤအဟံၣ်ပူၤ,ဒီးအီၣ်တၢ်မဲာ်ညါအကိၣ်,လၢအကစၢ်ဒၣ်ဝဲမ့ၢ်ဂ့ၤ,ပှၤလၢအအိၣ်ဒီးအီၤမ့ၢ်ဂ့ၤ,တဂ့ၤအီၣ်ဘၣ်ဝဲဘၣ်,ဂ့ၤအီၣ်ထဲပှၤလုၢ်တၢ်အဒိၣ်တဖၣ်ဧိၤလီၤ. 5လၢမုၢ်အိၣ်ဘှံးအနံၤ,ပှၤလုၢ်တၢ်အဒိၣ်အိၣ်လၢတၢ်လုၢ်အဟံၣ်ပူၤတဖၣ်န့ၣ်,လုၣ်သ့ၣ်ခါပတာ်မုၢ်အိၣ်ဘှံးအနံၤ,ဒီးအတၢ်ကမၣ်တအိၣ်ဘၣ်န့ၣ်,သုတဖးဘၣ်လၢလံာ်တၢ်သိၣ်တၢ်သီအပူၤဘၣ်ဧါ. 6ဒီးယစံးဘၣ်တဲဘၣ်သုလၢတၢ်ဒိၣ်န့ၢ်တၢ်လုၢ်အဟံၣ်အိၣ်မးဖဲအံၤတဂၤလီၤ.

7ဘၣ်ယသးလၢတၢ်သူၣ်ကညီၤတၢ်သးကညီၤ,ဒီးတမ့ၢ်ဘၣ်လၢတၢ်လုၢ်တၢ်ပာ်ဘၣ်, ▼

▼12:7 ဟိၤ.၆း၆

စံးတၢ်န့ၣ်,သုနၢ်မ့ၢ်ပၢၢ်ဒီး,သုတစံၣ်ညီၣ်ဃၣ်ဘၣ်ပှၤလၢအတၢ်ကမၣ်တအိၣ်ဘၣ်န့ၣ်ဘၣ်. 8အဂ့ၢ်ဒ်အံၤ,ပှၤကညီဖိခွါအံၤ,မ့ၢ်မုၢ်အိၣ်ဘှံးအနံၤအကစၢ်လီၤ.

9ဒီးတုၤအဟးထီၣ်ကွံာ်ဖဲန့ၣ်ဒီး,လဲၤနုာ်ဆူအဝဲသ့ၣ်အဘူၣ်ဘျီၣ်ပူၤလီၤ. 10ဒီးကွၢ်ကွၢ်,ပှၤအစုဃ့ထီတခီ,အိၣ်ဝဲတဂၤလီၤ.ဒီးပှၤသံကွၢ်အီၤဒီးစံးဝဲဒၣ်,လၢမုၢ်အိၣ်ဘှံးအနံၤတဖၣ်,မၤဘျါက့ၤတၢ်ဆါဘၣ်ကဂ့ၤဧါ,ဒ်သိးအကဆှိးအီၤအဂ့ၢ်လီၤ. 11ဒီးအဝဲဒၣ်စံးဘၣ်အီၤ,ပှၤကညီလၢသုကျါတဂၤလၢအသိအိၣ်တဒု,ဒီးလၢမုၢ်အိၣ်ဘှံးအနံၤမ့ၢ်လီၤတဲာ်လၢတၢ်ပူၤဒီး,တဟံးန့ၢ်,ဒီးတထုးထီၣ်က့ၤဘၣ်အီၤန့ၣ်,မ့ၢ်မတၤတဂၤလဲၣ်. 12မၤသးဒ်န့ၣ်ဒီးမ့ၢ်ပှၤကညီတဂၤ,ဂ့ၤန့ၢ်သိတဒုဆံးဒိၣ်လဲၣ်.ဒ်န့ၣ်အသိးလၢမုၢ်အိၣ်ဘှံးအနံၤန့ၣ်,ပှၤဂ့ၤမၤတၢ်ဂ့ၤလီၤ. 13တုၤနုၤတစု,စံးဘၣ်ပှၤကညီတဂၤန့ၣ်,ယူာ်ထီၣ်နစုတက့ၢ်.ဒီးယူာ်ထီၣ်အစု,ဒီးအိၣ်ဆူၣ်ထီၣ်က့ၤဝဲ,ဒ်အဝဲတခီအသိးန့ၣ်လီၤ.

14ဒီးပှၤဖၤရံၤရှဲတဖၣ်န့ၣ်ဟးထီၣ်ကွံာ်,ဒီးကမၤဟးဂီၤအီၤဒ်လဲၣ်ဒ်လဲၣ်န့ၣ်,ကူၣ်ထီၣ်ဖးလီၤဝဲလီၤ. 15ဒီးယ့ၣ်ရှူးသ့ၣ်ညါဝဲ,ဒီးဟးထီၣ်ကွံာ်ဝဲဖဲန့ၣ်,ဒီးပှၤဂီၢ်မုၢ်အါဂၤပိာ်ထီၣ်အခံ,ဒီးအဝဲဒၣ်မၤဘျါက့ၤအီၤခဲလၢာ်လီၤ. 16ဒီးမၤလိာ်အီၤဒ်သိးအသုတမၤဖျါထီၣ်အီၤတဂ့ၤလီၤ.

17မၤသးဒ်န့ၣ်ဒီးဝံယရှါယၤအကလုၢ်လၢထီၣ်ပှဲၤထီၣ်ဝဲလီၤ.စံးဝဲဒၣ်,

18ကွၢ်ကွၢ်,ယခ့ယပှၤလၢယဃုထၢလံအီၤ,
ပှၤလၢယအဲၣ်အီၤ,လၢအဘၣ်ယသးလၢအီၤတဂၤအံၤ,
ယကပာ်ယသးလၢအလိၤ,
ဒီးအဝဲဒၣ်ကစံၣ်တဲၤတဲလီၤပှၤကလုာ်တဖၣ်လၢတၢ်စံၣ်ညီၣ်လီၤ.
19တဂ့ၢ်လိာ်ဘှီလိာ်ဘၣ်,တကိးပသူထီၣ်ဘၣ်,
ဒီးပှၤတနၢ်ဟူဘၣ်အကလုၢ်လၢကျဲပူၤနီတဂၤဘၣ်.
20တပိၢ်တဘိလၢအသဘှံးန့ၣ်,တမၤတဲာ်ကွံာ်ဘၣ်ဝဲဘၣ်,
ဒီးမ့ၣ်အူဒၢအပှံာ်လၢအခုၣ်,တမၤလီၤပံာ်ဘၣ်,တုၤလီၤလၢအမၤတၢ်စံၣ်ညီၣ်မၤနၢၤမၤဃၣ်တၢ်အကတီၢ်န့ၣ်လီၤ.
21ဒီးပှၤကလုာ်တဖၣ်န့ၣ်,ကမုၢ်လၢ်တၢ်လၢအမံၤလီၤ. ▼

▼12:21 ရှါ.၄၂း၁-၄

22တုၤနုၤတစုပှၤလၢတၢ်နါအိၣ်လၢအလိၤ,အမဲာ်ဘျီၣ်ဒီးတအုၣ်တဂၤန့ၣ်,ပှၤဟဲစိာ်အီၤဆူအအိၣ်,ဒီးအဝဲဒၣ်မၤဘျါက့ၤအီၤ,တုၤဒၣ်လဲာ်ပှၤမဲာ်ဘျီၣ်ဒီးတအုၣ်တဂၤန့ၣ်,ထံၣ်က့ၤတၢ်ဒီးကတိၤက့ၤတၢ်လီၤ. 23ဒီးပှၤဂီၢ်မုၢ်တဖၣ်န့ၣ်ပာ်ထီၣ်အသးကမၢကမၣ်ခဲလၢာ်,ဒီးစံးဝဲဒၣ်,အအံၤတဂၤမ့ၢ်စီၤဒၤဝံးအဖိခွါ,တမ့ၢ်ဘၣ်ဧါ. 24ဒီးတုၤပှၤဖၤရံၤရှဲသ့ၣ်တဖၣ်နၢ်ဟူဝဲဒီး,စံးဝဲဒၣ်,အအံၤတဂၤအံၤ,မ့ၢ်တမ့ၢ်ဘၣ်တၢ်နါအခိၣ်ဘၤဧၤလစဘူာ်န့ၣ်ဒီး,တဟီထီၣ်ကွံာ်ဘၣ်တၢ်နါဘၣ်.

25ဒီးယ့ၣ်ရှူးသ့ၣ်ညါအတၢ်ဆိကမိၣ်တဖၣ်,ဒီးစံးဘၣ်အီၤ,ကယဲၢ်ဘီဧိၤမုၢ်ဧိၤလၢအမၤလီၤဖးလီၤအသးန့ၣ်ကအိၣ်သယုၢ်ဝဲလီၤ.ဒီးခူဧိၤဝ့ၢ်ဧိၤမ့ၢ်ဂ့ၤ,ဟံၣ်ဧိၤဃီဧိၤမ့ၢ်ဂ့ၤ,မ့ၢ်မၤလီၤဖးလီၤအသးဒီး,တအိၣ်ဂၢၢ်ကျၢၤဘၣ်ဝဲနီတဖျၢၣ်ဘၣ်. 26ဒီးမုၣ်ကီၤလံၢ်မ့ၢ်ဟီၣ်ထီၣ်ကွံာ်မုၣ်ကီၤလံၢ်ဒီး,မ့ၢ်အလီၤဖးဒီးအကစၢ်ဒၣ်ဝဲလီၤ.အကူၣ်မ့ၢ်ဒ်န့ၣ်ဒီး,အဘီအမုၢ်ကအိၣ်ကျၢၤဒ်လဲၣ်. 27ဒီးယမ့ၢ်ဟီထီၣ်ကွံာ်တၢ်နါလၢဘၤဧၤလစဘူာ်ဒီး,်သုဖိခွါတဖၣ်ဟီထီၣ်ကွံာ်အီၤလၢမတၤတဂၤလဲၣ်.မၤသးဒ်န့ၣ်ဒီးအဝဲသ့ၣ်ကကဲထီၣ်ပှၤစံၣ်ညီၣ်သုလီၤ. 28မ့မ့ၢ်ယဲဒၣ်အံၤ,ယမ့ၢ်ဟီထီၣ်ကွံာ်တၢ်နါလၢယွၤအသးဒီး,ယွၤအဘီအမုုၢ်န့ၣ်တုၤသပှၢ်တၢၢ်လံလၢသုအိၣ်လံ. 29ပှၤမ့ၢ်တစၢဃာ်ဆိပှၤဂံၢ်ဆူၣ်ဘါဆူၣ်ဘၣ်ဒီး,လဲၤနုာ်ဆူပှၤဂံၢ်ဆူၣ်ဘါဆူၣ်အဟံၣ်ဒီးဂုာ်န့ၢ်အတၢ်ကသ့ဒ်လဲၣ်.တုၤနုၤတဘျီကဂုာ်န့ၢ်အဟံၣ်လီၤ.

30ပှၤလၢအတအိၣ်ဘၣ်ဒီးယၤဘၣ်,မ့ၢ်အထီဒါယၤလီၤ.ဒီးပှၤလၢအတဂၢ်ဖှိၣ်ဘၣ်တၢ်ဒီးယၤဘၣ်,မ့ၢ်အမၤလီၤပြံလီၤပြါတၢ်လီၤ.

31မၤသးဒ်န့ၣ်ဒီးယစံးဘၣ်တဲဘၣ်သု,ကယဲၢ်တၢ်ဒဲးဘးဒီးတၢ်ကတိၤအၢကတိၤသီခဲလၢာ်န့ၣ်,တၢ်ကပျၢ်န့ၢ်ပှၤကညီလီၤ.မ့မ့ၢ်တၢ်ကတိၤအၢဘၣ်သးစီဆှံန့ၣ်,တၢ်တပျၢ်န့ၢ်ပှၤကညီဘၣ်. 32ဒီးဖဲဒၣ်ပှၤလၢအကတိၤထီဒါဘၣ်ပှၤကညီဖိခွါအံၤလၢတၢ်ကတိၤတဂၤဂၤန့ၣ်,တၢ်ကပျၢ်အတၢ်ဒဲးဘးလီၤ.မ့မ့ၢ်ဖဲဒၣ်ပှၤလၢအကတိၤထီဒါဘၣ်သးစီဆှံတဂၤဂၤန့ၣ်,အအံၤတဃၣ်မ့ၢ်ဂ့ၤ,ခဲကိာ်တဃၣ်မ့ၢ်ဂ့ၤ,တၢ်တပျၢ်ဘၣ်အတၢ်ဒဲးဘးဘၣ်.

33ပာ်သ့ၣ်လၢအဂ့ၤ,ဒီးအသၣ်လၢအဂ့ၤတက့ၢ်.မ့တမ့ၢ်ဘၣ်ဒီးပာ်သ့ၣ်လၢအအၢ,ဒီးအသၣ်လၢအအၢတက့ၢ်.အဂ့ၢ်ဒ်အံၤ,ပှၤသ့ၣ်ညါသ့ၣ်လၢအသၣ်န့ၣ်လီၤ.

34ဂုၢ်ပွ့ၤတဖုဧၢ,မ့ၢ်သုမ့ၢ်တၢ်အၢဒီး,သုကတိၤတၢ်ဂ့ၤကသ့ဒ်လဲၣ်.အဂ့ၢ်ဒ်အံၤ,ဒ်တၢ်ပှဲၤအသးဒီးလုၣ်ကွံာ်အသိးန့ၣ်,ပထးခိၣ်ကတိၤတၢ်လီၤ.

35ပှၤကညီလၢအဂ့ၤတဂၤန့ၣ်,ဟံးထီၣ်ဆံထီၣ်တၢ်ဂ့ၤလၢအပာ်ဖှိၣ်အလီၢ်ဂ့ၤ,ဒီးပှၤကညီလၢအအၢတဂၤန့ၣ်,ဟံးထီၣ်ဆံထီၣ်တၢ်အၢလၢအပာ်ဖှိၣ်အလီၢ်အၢန့ၣ်လီၤ. 36ဒီးယစံးဘၣ်တဲဘၣ်သုပှၤကညီကဘၣ်စံးဆၢတၢ်လၢကယဲၢ်အတၢ်ကတိၤကလီကလီအဂ့ၢ်,လၢတၢ်စံၣ်ညီၣ်အမုၢ်တနံၤန့ၣ်လီၤ. 37အဂ့ၢ်ဒ်အံၤ,နကဘၣ်တၢ်ပာ်တီပာ်လိၤနၤလၢနတၢ်ကတိၤ,ဒီးနကဘၣ်တၢ်စံၣ်ညီၣ်ဃၣ်နၤလၢနတၢ်ကတိၤလီၤ.

38တုၤနုၤတစု,ပှၤလၢပှၤကွဲးလံာ်ဒီးပှၤဖၤရံၤရှဲအကျါန့ၣ်,ကတိၤဆၢတၢ်ဒီးစံးဝဲဒၣ်,သရၣ်ဧၢ,နမၤတၢ်လီၤလးန့ၣ်,တၢ်မိၣ်ထံၣ်ဘၣ်ပသးတမံၤလီၤ. 39ဒီးအဝဲဒၣ်စံးဆၢတၢဒီးစံးဘၣ်အီၤ,ပှၤအအၢအသီ,ဒီးအဲၣ်ဘၢတၢ်တစိၤအံၤ,ဃုတၢ်လီၤလးတမံၤ,ဒီးတၢ်တဟ့ၣ်ဘၣ်တၢ်လီၤလးလၢအီၤဘၣ်. 40ကဟ့ၣ်ထဲဝံစီၤယိၤနါအတၢ်လီၤလးတမံၤဧိၤလီၤ.အဂ့ၢ်ဒ်အံၤ,ဒ်စီၤယိၤနါအိၣ်ဝဲလၢညၣ်ဖးဒိၣ်အဟၢဖၢပူၤသၢနံၤသၢနၤအသိးန့ၣ်,ပှၤကညီဖိခွါအံၤကအိၣ်လၢဟီၣ်ခိၣ်အသးကံၢ်ပူၤသၢနံၤသၢနၤဒ်န့ၣ်အသိးန့ၣ်လီၤ. 41လၢတၢ်စံၣ်ညီၣ်အပူၤန့ၣ်,ပှၤနံၤနဝ့ဖိကဂဲၤဆၢထၢၣ်ဒီးပှၤတစိၤအံၤ,ဒီးကစံၣ်ညီၣ်ဃၣ်အီၤလီၤ.အဂ့ၢ်ဒ်အံၤ,မ့ၢ်စီၤယိၤနါစံၣ်တဲၤတဲလီၤတၢ်အဃိဒီး,အဝဲသ့ၣ်ပီၢ်ယၢ်လီၤက့ၤအသးလီၤ. 42ဒီးကွၢ်ကွၢ်,ပှၤဒိၣ်န့ၢ်စီၤယိၤနါအိၣ်မးဖဲအံၤတဂၤလီၤ.လၢတၢ်စံၣ်ညီၣ်အပူၤန့ၣ်ကလံၤထံးအနီၢ်ပၤမုၣ်ကဂဲၤဆၢထၢၣ်ဒီးပှၤတစိၤအံၤ,ဒီးကစံၣ်ညီၣ်ဃၣ်အီၤလီၤ,အဂ့ၢ်ဒ်အံၤ,အဝဲဒၣ်ဟဲလၢဟီၣ်ခိၣ်အသနၢၣ်,ဒ်သိးအကနၢ်ဟူစီၤရှလိၤမိၤအတၢ်ကူၣ်ဘၣ်ကူၣ်သ့လီၤ.ဒီးကွၢ်ကွၢ်,ပှၤဒိၣ်န့ၢ်စီၤရှလိၤမိၤအိၣ်မးဖဲအံၤတဂၤလီၤ.

43တုၤတၢ်နါဟးထီၣ်လၢပှၤကညီတဂၤအလိၤဒီး,ဟးဝဲလၢတၢ်ဃဲၣ်ခိၣ်ဃဲၣ်ဘၣ်,ဒီးဃုတၢ်အိၣ်ဘှံးအလီၢ်,ဒီးတထံၣ်န့ၢ်ဘၣ်ဝဲဘၣ်. 44တုၤနုၤတစုစံးဝဲဒၣ်,ယကက့ၤက့ၤဆူူယဟံၣ်,လၢယဟးထီၣ်ကွံာ်လၢအပူၤန့ၣ်လီၤ.ဒီးတုၤအဟဲက့ၤဒီးထံၣ်ဘၣ်လၢအအိၣ်ကလီ,အိၣ်ခွဲအသး,ဒီးအိၣ်ကယၢကယဲအသးလီၤ. 45တုၤနုၤတစုလဲၤဟံးန့ၢ်တၢ်နါအၢန့ၢ်အကစၢ်ဒၣ်ဝဲနွံဒု,ဒီးလဲၤနုာ်အိၣ်ဝဲဆိးဝဲဖဲန့ၣ်လီၤ.ဒီးတၢ်လၢပှၤတဂၤန့ၣ်အကတၢၢ်န့ၣ်ကအၢန့ၢ်အခီၣ်ထံးတက့ၢ်လီၤ.ဒီးပှၤအအၢတစိၤအံၤ,ကမၤအသးဒ်န့ၣ်အသိးလီၤ.

46ဒီးကတိၤတၢ်ဒီးပှၤဂီၢ်မုၢ်အဖၢမုၢ်ဒီး,ကွၢ်ကွၢ်,အမိၢ်ဒီးအဒီပုၢ်ဝဲၢ်တဖၣ်န့ၣ်,တၢ်မိၣ်ကတိၤဘၣ်အသးဒီးအီၤ,ဒီးဆၢထၢၣ်ဝဲလၢခိလီၤ. 47ဒီးမတၤတဂၤစံးဝဲဒၣ်,ကွၢ်ကွၢ်,နမိၢ်ဒီးနဒီပုၢ်ဝဲၢ်တဖၣ်,ဃုကတိၤတၢ်ဒီးနၤဒီးဆၢထၢၣ်ဝဲလၢခိလီၤ. 48ဒီးကတိၤဆၢတၢ်ဒီးစံးဘၣ်ပှၤလၢအစံးတ့ၢ်အီၤတဂၤန့ၣ်,ယမိၢ်မ့ၢ်မတၤတဂၤလဲၣ်.ဒီးယဒီပုၢ်ဝဲၢ်မ့ၢ်မတၤတဖၣ်လဲၣ်. 49ဒီးယူာ်ဃီၤအစုဆူအပျဲၢ်အဘီၣ်အအိၣ်,ဒီးစံးဝဲဒၣ်,ကွၢ်ကွၢ်,ယမိၢ်ဒီးယဒီပုၢ်ဝဲၢ်တဖၣ်လီၤ. 50အဂ့ၢ်ဒ်အံၤ,ဖဲဒၣ်ပှၤလၢအမၤဝဲဖဲဒၣ်ယပၢ်အိၣ်လၢမူခိၣ်အသးတဂၤလၢ်လၢ်န့ၣ်,အဝဲဒၣ်မ့ၢ်ယဒီပုၢ်ဝဲၢ်မုၣ်,ဒီးယဒီပုၢ်ဝဲၢ်ခွါ,ဒီးယမိၢ်လီၤ.