‏ Matthew 5

1ဒီးထံၣ်ပှၤဂီၢ်မုၢ်တဖၣ်ဒီး,လဲၤထီၣ်ဆူကစၢၢ်တဖျၢၣ်န့ၣ်အလိၤ,ဒီးဆ့ၣ်နီၤဝဲဝံၤဒီး,အပျဲၢ်အဘီၣ်ဟဲဆူအအိၣ်လီၤ. 2ဒီးအဲးထီၣ်အထးခိၣ်,ဒီးသိၣ်က့ၤသီက့ၤအီၤ,ဒီးစံးဝဲဒၣ်, 3ပှၤလၢအသးဖှီၣ်တဖၣ်န့ၣ်ဘၣ်ဆိၣ်ဂ့ၤဝဲလီၤ.အဂ့ၢ်ဒ်အံၤ,မူခိၣ်အဘီအမုၢ်န့ၣ်မ့ၢ်ပှၤတဖၣ်န့ၣ်အတၢ်လီၤ.

4ပှၤလၢအသူၣ်ကၢ်သးလီၤတဖၣ်န့ၣ်ဘၣ်ဆိၣ်ဂ့ၤဝဲလီၤ.အဂ့ၢ်ဒ်အံၤ,အဝဲသ့ၣ်တဖၣ်န့ၣ်ကဘၣ်တၢ်မၤမုာ်ထီၣ်က့ၤအီၤလီၤ.

5ပှၤလၢအသးစူၤတဖၣ်န့ၣ်ဘၣ်ဆိၣ်ဂ့ၤဝဲလီၤ.အဂ့ၢ်ဒ်အံၤ,အဝဲသ့ၣ်တဖၣ်န့ၣ်ကန့ၢ်ဘၣ်သါထံဧိၤကီၢ်ဧိၤလီၤ.

6ပှၤလၢတၢ်သၣ်ဝံၤအသးဒီးတၢ်သူအသးလၢတၢ်တီတၢ်လိၤတဖၣ်န့ၣ်ဘၣ်ဆိၣ်ဂ့ၤဝဲလီၤ.အဂ့ၢ်ဒ်အံၤ,အဝဲသ့ၣ်တဖၣ်န့ၣ်ကဘျဲးအီၣ်ဘျဲးအီဝဲလီၤ.

7ပှၤလၢအသးကညီၤတၢ်တဖၣ်န့ၣ်ဘၣ်ဆိၣ်ဂ့ၤဝဲလီၤ.အဂ့ၢ်ဒ်အံၤ,အဝဲသ့ၣ်တဖၣ်န့ၣ်ကဘၣ်တၢ်သးကညီၤအီၤလီၤ.

8ပှၤလၢအသးကဆှီတဖၣ်န့ၣ်ဘၣ်ဆိၣ်ဂ့ၤဝဲလီၤ.အဂ့ၢ်ဒ်အံၤ,အဝဲသ့ၣ်တဖၣ်န့ၣ်ကထံၣ်ဘၣ်ယွၤလီၤ.

9ပှၤလၢအမၤဃူမၤဖိးတၢ်တဖၣ်န့ၣ်ဘၣ်ဆိၣ်ဂ့ၤဝဲလီၤ.အဂ့ၢ်ဒ်အံၤ,အဝဲသ့ၣ်တဖၣ်န့ၣ်ကဘၣ်တၢ်ကိိးအီၤလၢယွၤအဖိခွါလီၤ.

10ပှၤလၢအဘၣ်တၢ်မၤအၢမၤနးအီၤလၢတၢ်တီတၢ်လိၤအဃိတဖၣ်န့ၣ်ဘၣ်ဆိၣ်ဂ့ၤဝဲလီၤ.အဂ့ၢ်ဒ်အံၤ,မူခိၣ်အဘီအမုၢ်မ့ၢ်ပှၤတဖၣ်န့ၣ်အတၢ်လီၤ.

11တုၤပှၤဒုၣ်ဒွဲၣ်သု,ဒီးမၤအၢမၤနးသု,ဒီးစံးအၢသုကဘျံးကဘျၣ်လၢကယဲၢ်တၢ်အၢတၢ်သီလၢယဃိဒီး,သုဘၣ်ဆိၣ်ဂ့ၤဆိၣ်ဝါလီၤ. 12သူၣ်ခုသးခု,ဒီးသူၣ်ဖှံသးညီတက့ၢ်.အဂ့ၢ်ဒ်အံၤ,သုဘျုးအိၣ်ဝဲလၢမူခိၣ်န့ၣ်ဒိၣ်ဝဲလီၤ.အဂ့ၢ်ဒ်အံၤ,ပှၤမၤအၢမၤနးဝံလၢအအိၣ်ထီၣ်လၢသုမဲာ်ညါတဖၣ်ဒ်န့ၣ်အသိးလီၤ.

13သုဝဲဒၣ်အံၤသုမ့ၢ်ဟီၣ်ခိၣ်အအံသၣ်လီၤ.မ့မ့ၢ်အံသၣ်အဟီမ့ၢ်ဘျါဒီး,ကဟီက့ၤဝဲလၢမနုၤတမံၤလဲၣ်.တဂိာ်တသီၣ်လၢၤဘၣ်တၢ်ဘၣ်.ဂိာ်ထဲပှၤကွံာ်တ့ၢ်ကွံာ်အီၤလၢခိ,ဒီးဘၣ်တၢ်ယီၢ်တံၢ်လၢပှၤကညီလီၤ.

14သုဝဲဒၣ်အံၤသုမ့ၢ်ဟီၣ်ခိၣ်အကပီၤလီၤ.ဝ့ၢ်တဝ့ၢ်အိၣ်ဝဲလၢကစၢၢ်ဒီခိၣ်န့ၣ်အိၣ်တဒၢတသ့ဘၣ်.

15ပှၤဒွဲၣ်ထီၣ်မ့ၣ်အူဒၢ,ဒီးပာ်အီၤလၢနာ်အဖီလာ်န့ၣ်တအိၣ်ဘၣ်နီတဂၤဘၣ်.မ့ၢ်ပာ်အီၤလၢမ့ၣ်အူဒၢအလီၢ်အဖီခိၣ်,ဒီးကပီၤထီၣ်န့ၢ်ပှၤလၢဟံၣ်ပူၤခဲလၢာ်လီၤ. 16ဒ်န့ၣ်အသိးသုတၢ်ကပီၤန့ၣ်ဒုးကပီၤထီၣ်အီၤလၢပှၤကညီအမဲာ်ညါဒ်သိးအကထံၣ်ဘၣ်သုမၤတၢ်ဂ့ၤ,ဒီးစံးထီၣ်ပတြၢၤသုပၢ်အိၣ်လၢမူခိၣ်န့ၣ်တက့ၢ်.

17တၢ်သိၣ်တၢ်သီမ့ၢ်ဂ့ၤ,ဝံသ့ၣ်တဖၣ်အကလုၢ်မ့ၢ်ဂ့ၤ,ယဟဲမၤဟးဂီၤအီၤန့ၣ်သုတဆိကမိၣ်တဂ့ၤ.တမ့ၢ်ဘၣ်ယဟဲမၤဟးဂီၤဘၣ်.မ့ၢ်ယဟဲမၤလၢထီၣ်ပှဲၤထီၣ်လီၤ. 18အဂ့ၢ်ဒ်အံၤ,ယစံးဘၣ်တဲဘၣ်သုတီတီအံၤ,မူခိၣ်ဒီးဟီၣ်ခိၣ်တချုးဒံမုၢ်ဒံဖျိးကွံာ်ဒံးဘၣ်ဒီး,လံာ်တၢ်မၤလိာ်အဖျၢၣ်ဆံးတဖျၢၣ်မ့ၢ်ဂ့ၤ,အနၢၣ်ဖိတနၢၣ်မ့ၢ်ဂ့ၤ,တချုးလၢထီၣ်ပှဲၤထီၣ်ဒံးဘၣ်ခဲလၢာ်ဒီး,တဟးဂီၤဘၣ်ဝဲဘၣ်.

19မၤသးဒ်န့ၣ်ဒီးဖဲဒၣ်ပှၤလၢအလုၣ်သ့ၣ်ယခါပတာ်တၢ်မၤလိာ်အဆံးကတၢၢ်တထံၣ်လၢတၢ်အံၤအကျါန့ၣ်,ဒီးသိၣ်လိပှၤကညီဒ်န့ၣ်သိးတဂၤဂၤန့ၣ်ကဘၣ်တၢ်ကိးအီၤလၢအဆံးကတၢၢ်လၢမူခိၣ်အဘီအမုၢ်အပူၤလီၤ.မ့မ့ၢ်ဖဲဒၣ်ပှၤလၢအတိၢ်န့ၢ်ဝဲ,ဒီးသိၣ်လိဝဲတဂၤဂၤန့ၣ်ကဘၣ်တၢ်ကိးအီၤလၢအဒိၣ်လၢမူခိၣ်အဘီအမုၢ်အပူၤလီၤ. 20အဂ့ၢ်ဒ်အံၤ,ယစံးဘၣ်တဲဘၣ်သုလၢသုတၢ်တီတၢ်လိၤမ့ၢ်တအါန့ၢ်ဘၣ်ပှၤကွဲးလံာ်ဒီးပှၤဖၤရံၤရှဲအတၢ်တီတၢ်လိၤဘၣ်ဒီး,သုတလဲၤနုာ်ဘၣ်ဆူမူခိၣ်အဘီအမုၢ်အပူၤဘၣ်.

21သုနၢ်ဟူလံလၢတၢ်စံးဘၣ်ပမှံၤပပှၢ်,သုတမၤသံပှၤကညီတဂ့ၤ,ဒီးဖဲဒၣ်ပှၤလၢအမၤသံဝဲတဂၤဂၤန့ၣ်ဂ့ၤဘၣ်တၢ်စံၣ်ညီၣ်ကွီၢ်လီၤ.

22မ့မ့ၢ်ယဲဒၣ်အံၤယစံးဘၣ်သု,လၢကယဲၢ်ပှၤလၢအသးထီၣ်အဒီပုၢ်ဝဲၢ်ကလီကလီတဂၤန့ၣ်ဂ့ၤဘၣ်တၢ်စံၣ်ညီၣ်ကွီၢ်ကိးဂၤဒဲးလီၤ.ဒီးဖဲဒၣ်ပှၤလၢအစံးဘၣ်အဒီပုၢ်ဝဲၢ်,ပှၤကလီကလီဧၢ,တဂၤဂၤန့ၣ်ဂ့ၤဘၣ်တၢ်လၢပှၤသးပှၢ်အတၢ်အိၣ်ဖှိၣ်လီၤ.ဒီးဖဲဒၣ်ပှၤလၢအစံးဘၣ်အဒီပုၢ်ဝဲၢ်,ပှၤဟးဂီၤဖိဧၢ,တဂၤဂၤန့ၣ်ဂ့ၤဘၣ်လရာ်မ့ၣ်အူလီၤ.

23မၤသးဒ်န့ၣ်ဒီးနမ့ၢ်လဲၤစိာ်နတၢ်မၤဘူၣ်ဆူတၢ်လုၢ်လီၢ်,ဒီးဖဲန့ၣ်နမ့ၢ်သ့ၣ်နီၣ်ထီၣ်က့ၤလၢနဒီပုၢ်ဝဲၢ်ပာ်တၢ်ကမၣ်လၢနလိၤတမံၤမံၤဒီး, 24ပာ်တ့ၢ်နတၢ်မၤဘူၣ်ဖဲန့ၣ်လၢတၢ်လုၢ်လီၢ်အမဲာ်ညါ,ဒီးက့ၤက့ၤတက့ၢ်.အိၣ်ဃူလိာ်ဒီးနဒီပုၢ်ဝဲၢ်တက့ၢ်.တုၤနုၤတစုဟဲစိာ်နတၢ်မၤဘူၣ်တက့ၢ်.

25ဖဲနအိၣ်လၢကျဲဒီးပှၤလိာ်နၤလၢကွီၢ်အဖၢမုၢ်ဒီး,မၤဘၣ်လိာ်ဖိးလိာ်နသးဒီးအီၤချ့ချ့တက့ၢ်.မ့တမ့ၢ်ဘၣ်ဒီးပှၤလိာ်နၤလၢကွီၢ်န့ၣ်ကဟ့ၣ်လီၤဘၣ်ဖုးနၤလၢပှၤစံၣ်ညီၣ်ကွီၢ်,ဒီးပှၤစံၣ်ညီၣ်ကွီၢ်န့ၣ်ကဟ့ၣ်လီၤနၤလၢတၢ်အခ့အပှၤ,ဒီးနကဘၣ်တၢ်တ့ၢ်လိၤနၤဆူဃိာ်ပူၤလီၤ. 26ယစံးဘၣ်တဲဘၣ်နၤတီတီအံၤနတချုးလိးတူာ်လၢာ်ဒံးဘၣ်တိၢ်လၢအကတၢၢ်တဘ့ၣ်ဒီး,နတထူၣ်ဖိးထီၣ်ဖဲန့ၣ်ဘၣ်.

27သုနၢ်ဟူလံလၢတၢ်စံးဝဲဒၣ်,သုတအဲၣ်ဘၢမါအဲၣ်ဘၢဝၤတဂ့ၤ.

28မ့မ့ၢ်ယဲဒၣ်အံၤယစံးဘၣ်သု,ကယဲၢ်ပှၤလၢအကွၢ်ပိာ်မုၣ်ဒီးအသးကတၢကိးဂၤဒဲးန့ၣ်အဲၣ်ဘၢလံတၢ်ဒီးအီၤလၢအသးကံၢ်ပူၤလံ.

29ဒီးနမဲာ်ထွဲတခီမ့ၢ်မၤလီၤဃံၤနၤဒီး,အူခွဲးထီၣ်ကွံာ်အီၤ,ဒီးကွံာ်တ့ၢ်ကွံာ်အီးလၢတအိၣ်တက့ၢ်.အဂ့ၢ်ဒ်အံၤ,နဂီၤတမံၤမ့ၢ်ဟးဂီၤဒီး,ဂ့ၤန့ၢ်နဘၣ်တၢ်တ့ၢ်လီၤကွံာ်နၤဆူလရာ်ပူၤဒီဂၤညါတက့ၢ်လီၤ.

30ဒီးနစုထွဲတခီမ့ၢ်မၤလီၤဃံၤနၤဒီး,ဒီၣ်တဲာ်ကွံာ်အီၤ,ဒီးကွံာ်န့ၢ်ကွံာ်အီၤလၢနအိၣ်တက့ၢ်.အဂ့ၢ်ဒ်အံၤ,နဂီၤတမံၤမ့ၢ်ဟးဂီၤဒီး,ဂ့ၤန့ၢ်နဘၣ်တၢ်တ့ၢ်လိၤကွံာ်နၤဆူလရာ်ပူၤဒီဂၤညါတက့ၢ်လီၤ.

31ဒီးပှၤစံးတ့ၢ်ဝဲဒၣ်,ဖဲဒၣ်ပှၤလၢအပာ်မၢ်ကွံာ်အမါတဂၤဂၤန့ၣ်မ်အဟ့ၣ်အီၤလၢလံာ်လီၤဖှၣ်တဘ့ၣ်တက့ၢ်.

32မ့မ့ၢ်ယဲဒၣ်အံၤယစံးဘၣ်တဲဘၣ်သု,ဖဲဒၣ်ပှၤလၢအပာ်မၢ်ကွံာ်အမါလၢအတမ့ၢ်ဘၣ်တၢ်အဲၣ်ဘၢဝၤအဃိဘၣ်တဂၤဂၤန့ၣ်မ့ၢ်အမၢအမါအဲၣ်ဘၢဝၤလီၤ.ဒီးဖဲဒၣ်ပှၤလၢအအိၣ်ဃုာ်ဒီးပိာ်မုၣ်လၢအဘၣ်တၢ်ပာ်မၢ်ကွံာ်အီၤတဂၤန့ၣ်မ့ၢ်အမၤကမၣ်ပှၤမါလီၤ.

33မၤကဒီးတစုသုနၢ်ဟူလံလၢတၢ်စံးဘၣ်ပမှံၤပပှၢ်,နတၢ်ဆိၣ်န့ၣ်သုတမၤဟးဂီၤအီၤတဂ့ၤ,မ့မ့ၢ်လိးက့ၤနတၢ်ဆိၣ်လၢယွၤတက့ၢ်.

34မ့မ့ၢ်ယဲဒၣ်အံၤယစံးဘၣ်သု,ဆိၣ်တၢ်ထုတၢ်လ့ၤတက့ၤတဂ့ၤ,ဆိၣ်တၢ်လၢမူခိၣ်အမဲာ်ညါတဂ့ၤ.အဂ့ၢ်ဒ်အံၤ,မ့ၢ်ယွၤအလီၢ်ပစိာ်လီၤ.

35ဆိၣ်တၢ်လၢဟီၣ်ခိၣ်အမဲာ်ညါတဂ့ၤ.အဂ့ၢ်ဒ်အံၤ,မ့ၢ်အခီၣ်ယီၢ်လီၤအလီၢ်လီၤ.ဆိၣ်တၢ်လၢယရူၤရှလ့ၣ်အမဲာ်ညါတဂ့ၤ.အဂ့ၢ်ဒ်အံၤ,မ့ၢ်စီၤပၤဖးဒိၣ်အဝ့ၢ်လီၤ. 36ဆိၣ်တၢ်လၢနခိၣ်အမဲာ်ညါတဂ့ၤ.အဂ့ၢ်ဒ်အံၤ,ထဲခိၣ်သူတဘိန့ၣ်သူမ့ၢ်ဂ့ၤ,ဝါမ့ၢ်ဂ့ၤ,နမၤတ့သဘၣ်လီၤ. 37မ်သုကတိၤတၢ်လၢအမ့ၢ်,အမ့ၢ်,တမ့ၢ်ဘၣ်,တမ့ၢ်ဘၣ်,န့ၣ်တက့ၢ်.တၢ်အါန့ၢ်အန့ၣ်တဖၣ်ဟဲလၢတၢ်အၢတၢ်သီအပူၤလီၤ.

38သုနၢ်ဟူလံလၢပှၤစံးတ့ၢ်ဝဲဒၣ်,ပမဲာ်တတိၣ်အဂီၢ်တတိၣ်,ဒီးပမဲတဘ့ၣ်အဂီၢ်တဘ့ၣ်လီၤ.

39မ့မ့ၢ်ယဲဒၣ်အံၤယစံးဘၣ်သု,သုတတြီဆၢတၢ်အၢတဂ့ၤ.မ့မ့ၢ်ပှၤလၢအဒဲနဘိးအထွဲတဂၤန့ၣ်ဃၣ်ဃီၤန့ၢ်အီၤလၢအဝဲတခီတက့ၢ်.

40ဒီးပှၤလၢတၢ်မိၣ်ဟံးန့ၢ်ဘၣ်အသးလၢနဆ့,ဒီးလိာ်နၤလၢကွီၢ်န့ၣ်ဒုးဟံးန့ၢ်စ့ၢ်ကီးအီၤလၢနယၣ်တက့ၢ်.

41ဒီးဖဲဒၣ်ပှၤလၢအမၢဆူၣ်နလဲၤဒီးအီၤတတီၤလဲၤန့ၣ်လဲၤယုၤအီၤခံတီၤလဲၤတက့ၢ်.

42ပှၤလၢအဃ့တၢ်လၢနၤန့ၣ်ဟ့ၣ်အီၤတက့ၢ်.ဒီးပှၤလၢတၢ်မိၣ်လိၢ်အသးလၢနတၢ်န့ၣ်ဃၣ်ဒူၣ်ချၢနသးလၢအီၤတဂ့ၤ.

43သုနၢ်ဟူလံလၢပှၤစံးတ့ၢ်ဝဲဒၣ်,အဲၣ်ပှၤလၢနဃၢၤ,ဒီးသးဟ့နဒုၣ်နဒါတက့ၢ်. 44မ့မ့ၢ်ယဲဒၣ်အံၤယစံးဘၣ်သု,အဲၣ်သုဒုၣ်သုဒါတက့ၢ်.ဒီးပှၤလၢအဆိၣ်အၢသုန့ၣ်ဆိၣ်ဂ့ၤအီၤတက့ၢ်.ဒီးပှၤလၢအသးဟ့သုန့ၣ်မၤဂ့ၤအီၤတက့ၢ်.ဒီးပှၤလၢအမၤတရီတပါသု,ဒီးမၤအၢမၤနးသုန့ၣ်ဘါထုကဖၣ်န့ၢ်အဂီၢ်တက့ၢ်. 45ဒ်သိးသုကကဲထီၣ်လၢသုပၢ်အိၣ်လၢမူခိၣ်အဖိခွါတဖၣ်န့ၣ်လီၤ.အဂ့ၢ်ဒ်အံၤ,အဝဲဒၣ်မၢအမုၢ်ဟဲထီၣ်န့ၢ်ပှၤအဂ့ၤ,ဒီးပှၤအအၢ,ဒီးမၢအတၢ်ဟဲစူၤလၢပှၤအတီ,ဒီီးပှၤတတီဘၣ်အလိၤလီၤ.

46အဂ့ၢ်ဒ်အံၤသုမ့ၢ်အဲၣ်ပှၤလၢအအဲၣ်သုဒီး,သုအိၣ်ဒီးသုဘျုးမနုၤတမံၤလဲၣ်.ပှၤဃ့သွဲဒၣ်လဲၣ်မၤဝဲဒ်န့ၣ်တမ့ၢ်ဘၣ်ဧါ. 47ဒီးသုမ့ၢ်ကတိၤဒိၣ်ထဲသုဒီပုၢ်ဝဲၢ်ဒီး,သုမၤအါတက့ၢ်လၢမနုၤတမံၤလဲၣ်.ပှၤကလုာ်တဖၣ်မၤစ့ၢ်ကီးဝဲဒ်န့ၣ်တမ့ၢ်ဘၣ်ဧါ. 48မၤသးဒ်န့ၣ်ဒီးမ်သုလၢထီၣ်ပှဲၤထီၣ်ဒ်သုပၢ်အိၣ်လၢမူခိၣ်လၢထီၣ်ပှဲၤထီၣ်အသိးန့ၣ်တက့ၢ်.