Mat 8 | KswSKMB | STEP | တုၤအဟဲလီၤလၢကစၢၢ်လိၤန့ၣ်ဒီး,ပှၤဂီၢ်မုၢ်အါဂၤပိာ်ထီၣ်အခံလီၤ.

‏ Matthew 8

1 တုၤအဟဲလီၤလၢကစၢၢ်လိၤန့ၣ်ဒီး,ပှၤဂီၢ်မုၢ်အါဂၤပိာ်ထီၣ်အခံလီၤ.

2 ဒီးကွၢ်ကွၢ်,ပှၤဘၣ်တၢ်ဆါအၢတဂၤဟဲဆူအအိၣ်,ဒီးဘါအီၤ,ဒီးစံးဝဲဒၣ်,ကစၢ်ဧၢ,နသးမ့ၢ်အိၣ်ဒီး,နမၤကဆှီထီၣ်ယၤသ့လီၤ. 3 ဒီးယ့ၣ်ရှူးယူာ်ဃီၤအစု,ဒီးထိးဘၣ်အီၤ,ဒီးစံးဝဲဒၣ်,ယသးအိၣ်,မ်နကဆှီထီၣ်က့ၤတက့ၢ်.ဒီးအတၢ်ဆါအၢန့ၣ်ကဆှီထီၣ်က့ၤဝဲတကီၢ်ခါလီၤ.

4 ဒီးယ့ၣ်ရှူးစံးဘၣ်အီၤ,ပလီၢ်နသးဒ်သိးတသုတစံးဘၣ်ပှၤနီတဂၤတဂ့ၤန့ၣ်တက့ၢ်.မ့မ့ၢ်လဲၤဒုးနဲၣ်နသးလၢပှၤလုၢ်တၢ်အဒိၣ်တဂၤ,ဒီးမၤဘူၣ်တၢ်လၢစီၤမိၤရှ့မၤလိာ်လၢတၢ်အုၣ်အသးလၢအဝဲသ့ၣ်အဂီၢ်တက့ၢ်.

5 ဒီးတုၤအလဲၤနုာ်ဝဲလၢကပ့းရနီၣ်အပူၤဒီး,သုးဖိတကယၤအခိၣ်တဂၤဟဲဆူအအိၣ်,ဒီးဃ့ကညးအီၤ, 6 ဒီးစံးဝဲဒၣ်,ကစၢ်ဧၢ,ယဖိသၣ်တဂၤသံတခီပၤ,ဒီးဆိးကဲးနးမး,ဒီးမံလီၤလၢဟံၣ်ပူၤန့ၣ်လီၤ. 7 ဒီးယ့ၣ်ရှူးစံးဘၣ်အီၤ,ယကဟဲမၤဘျါက့ၤအီၤလီၤ.

8 ဒီးသုးဖိတကယၤအခိၣ်န့ၣ်စံးဆၢအီၤ,ဒီးစံးဝဲဒၣ်,ကစၢ်ဧၢ,နဟဲနုာ်လၢယဟံၣ်ခိၣ်အဖီလာ်န့ၣ်ယတဂ့ၤတဘၣ်ဘၣ်.မ့မ့ၢ်ထဲနစံးနကလုၢ်တဘီဒီး,ယဖိသၣ်ကဘျါက့ၤလီၤ. 9 အဂ့ၢ်ဒ်အံၤ,ယဲဒၣ်အံၤယအိၣ်စ့ၢ်ကီးလၢတၢ်စိတၢ်ကမီၤအဖီလာ်ဒီးယအိၣ်ဒီးသုးဖိတဖၣ်လၢယဖီလာ်လီၤ.ဒီးယစံးဘၣ်အအံၤတဂၤ,လဲၤ,ဒီးလဲၤဝဲလီၤ.ဒီးအန့ၣ်တဂၤ,ဟဲဒီးဟဲဝဲလီၤ.ဒီးယကုၢ်,မၤတၢ်အံၤ,ဒီးမၤဝဲလီၤ.

10 တုၤယ့ၣ်ရှူးနၢ်ဟူဒီး,ကမၢကမၣ်ဝဲ,ဒီးစံးဘၣ်ပှၤလၢအပိာ်အခံတဖၣ်န့ၣ်,ယစံးဘၣ်တဲဘၣ်သုတီတီအံၤ,လၢအံၣ်စရ့လးဒၣ်လဲာ်အပူၤန့ၣ်တၢ်နာ်ထဲအံၤယတထံၣ်န့ၢ်ဘၣ်. 11 ဒီးယစံးဘၣ်တဲဘၣ်သုပှၤအါဂၤကဟဲလၢမုၢ်ထီၣ်,ဒီးလၢမုၢ်နုာ်,ဒီးကဆ့ၣ်နီၤဝဲဒီးစီၤအၤဘြၤဟၣ်,ဒီးစီၤအံၤစဲး,ဒီးစီၤယၤကိာ်လၢမူခိၣ်အဘီအမုၢ်အပူၤလီၤ. 12 မ့မ့ၢ်ဘီမုၢ်အဖိခွါတဖၣ်ကဘၣ်တၢ်ဟီထီၣ်ကွံာ်အီၤဆူတၢ်ခံးကျါလၢခိ,ဒီးတၢ်ဘၣ်ဟီၣ်တၢ်ဘၣ်ယၢၤ,ဒီးတၢ်မဲအ့ၣ်တဃံးန့ၣ်ကအိၣ်ဝဲဖဲန့ၣ်လီၤ.

13 ဒီးယ့ၣ်ရှူးစံးဘၣ်သုးဖိတကယၤအခိၣ်တဂၤန့ၣ်,က့ၤက့ၤတက့ၢ်.ဒ်နနာ်တၢ်အသိးန့ၣ်,မ်တၢ်ကဲထီၣ်လိၣ်ထီၣ်လၢနဂီၢ်တက့ၢ်.ဒီးအဖိသၣ်ဘျါက့ၤတစုဃီဖဲန့ၣ်လီၤ.

14 ဒီးယ့ၣ်ရှူးလဲၤနုာ်ဝဲဆူစီၤပ့းတရူးအဟံၣ်ပူၤ,ဒီးထံၣ်စီၤပ့းတရူးအမံၤပှၢ်ပိာ်မုၣ်မံလီၤ,ဒီးညၣ်ဂိၢ်ဝဲလီၤ. 15 ဒီးထိးဘၣ်ဝဲအစု,ဒီးတၢ်ညၣ်ဂိၢ်န့ၣ်ဟးထီၣ်ကွံာ်လၢအလိၤ,ဒီးအဝဲဒၣ်ဂဲၤဆၢထၢၣ်မၤအခ့အပှၤအတၢ်မၤလၢအဂီၢ်လီၤ.

16 ဒီးတုၤမုၢ်ဟါလီၤဒီး,ပှၤဟဲစိာ်ပှၤလၢတၢ်နါအိၣ်လၢအလိၤအါဂၤဆူအအိၣ်,ဒီးအဝဲဒၣ်ဟီထီၣ်ကွံာ်သးတဖၣ်န့ၣ်လၢအကလုၢ်တဘီ,ဒီးမၤဘျါက့ၤကယဲၢ်ပှၤလၢအမၤတကဲဘၣ်တဖၣ်န့ၣ်ခဲလၢာ်လီၤ. 17 ဒ်သိးဝံယရှါယၤအကလုၢ်ကလၢထီၣ်ပှဲၤထိၣ်ဝဲလီၤ.စံးဝဲဒၣ်,အဝဲဒၣ်အကစၢ်ဝဲဟံးန့ၢ်ပတၢ်ဆိးက့မံနီၤ,ဒီးစိာ်ပတၢ်ဆူးတၢ်ဆါလီၤ. ^{▼▼8:17 ရှါ.၅၃း၄}

18 ဒီးတုၤယ့ၣ်ရှူးထံၣ်ပှၤဂီၢ်မုၢ်အါဂၤအိၣ်ဝးတရံးအီၤဒီး,မၤလိာ်လၢပှၤကလဲၤခီဂာ်ဆူဝၢ်ဘးခီလီၤ.

19 ဒီးပှၤကွဲးလံာ်တဂၤဟဲဝဲ,ဒီးစံးဘၣ်အီၤ,သရၣ်ဧၢ,ဖဲဒၣ်နလဲၤတၢ်တပူၤပူၤန့ၣ်,ယကပိာ်နခံလီၤ. 20 ဒီးယ့ၣ်ရှူးစံးဘၣ်အီၤ,ထွံၣ်မံၤန့ၣ်အိၣ်ဝဲဒီးအတဝၢ,ဒီးထိၣ်လၢတၢ်ဖးဖီန့ၣ်အိၣ်ဝဲဒီးအလီၢ်,မ့မ့ၢ်ပှၤကညီဖိခွါတဂၤအံၤဖဲအကပာ်မံလီၤအခိၣ်န့ၣ်အလီၢ်တအိၣ်ဘၣ်.

21 ဒီးပှၤလၢအပျဲၢ်အဘီၣ်အကျါအဂၤတဂၤစံးဘၣ်အီၤကစၢ်ဧၢ,ဒုးက့ၤဆိဒၣ်ကလိာ်ယၤဒ်သိးယကခူၣ်လီၤကွံာ်ယပၢ်တက့ၢ်. 22 ဒီးယ့ၣ်ရှူးစံးဘၣ်အီၤပိာ်ယခံတက့ၢ်.ဒီးမ်ပှၤသံတဖၣ်ခူၣ်လီၤအပှၤသံဒၣ်ဝဲတက့ၢ်.

23 ဒီးတုၤအလဲၤနုာ်လၢကဘီပူၤဒီးအပျဲၢ်အဘီၣ်ပိာ်အခံလီၤ. 24 ဒီးကွၢ်ကွၢ်,ကလံၤမုၢ်တွၤဖးဒိၣ်အိၣ်ထီၣ်ဝဲလၢပီၣ်လဲၣ်ပူၤတုၤကဘီန့ၣ်ဘံၣ်ဝဲလၢလပီတဖၣ်လီၤ.မ့မ့ၢ်အဝဲဒၣ်န့ၣ်မံသပ့ၤဝဲလီၤ. 25 ဒီးအပျဲၢ်အဘီၣ်လဲၤမၤဖုသံနီၣ်ထီၣ်အီၤ,ဒီးစံးဝဲဒၣ်,ကစၢ်ဧၢ,အုၣ်က့ၤခီၣ်က့ၤပှၤတက့ၢ်,ပကဟးဂီၤလီၤ.

26 ဒီစံးဘၣ်အီၤ,ပှၤနာ်တၢ်စှၤသ့ၣ်ဧၢ,ဘၣ်မနုၤလၢသုပျံၤတၢ်လဲၣ်.တုၤနုၤတစုဂဲၤဆၢထၢၣ်ဒူကလံၤဒီးပီၣ်လဲၣ်အလိၤ,ဒီးအတၢ်အိၣ်က့ၤမးဂၢၢ်တပၢၢ်လီၤ.

27 ဒီးပှၤကညီတဖၣ်န့ၣ်ကမၢကမၣ်ဝဲ,ဒီးစံးဝဲဒၣ်,အဝဲဒၣ်တဂၤအံၤမ့ၢ်ပှၤဒ်လဲၣ်.ကလံၤသီၣ်ဂီၤ,ဒီးပီၣ်လဲၣ်န့ၣ်ဒိကနၣ်မးအကလုၢ်လဲၣ်.

28 ဒီးတုၤအတုၤလၢဝၢ်ဘးခီ,လၢပှၤကဒါရၤဖိအကီၢ်န့ၣ်ဒီး,ပှၤလၢတၢ်နါအိၣ်လၢအလိၤခံဂၤဟဲသဂၢၢ်အီၤလၢလိပူၤလီၤ.အဝဲသ့ၣ်ဒူဝဲဒူဒူကလဲာ်တုၤပှၤလဲၤလၢကျဲန့ၣ်တသ့နီတဂၤဘၣ်. 29 ဒီးကွၢ်ကွၢ်,ကိးပသူထီၣ်ဒီးစံးဝဲဒၣ်,ယွၤအဖိခွါဧၢ,တၢ်ဘၣ်ဃးဒီးပှၤဒီးနၤမ့ၢ်မနုၤလဲၣ်.အမုၢ်အလါတချုးဘၣ်ဒံးဘၣ်ဒီး,မ့ၢ်နဟဲမၤနးမၤဖှီၣ်ပှၤဧါ.

30 ဒီးထိးတဖုအါဒုအီၣ်အဆၣ်လၢဘးန့ၣ်စၢၢ်တလၢၢ်ဒီးအဝဲသ့ၣ်အအိၣ်, 31 ဒီးတၢ်နါတဖၣ်ဃ့ကညးအီၤ,ဒီးစံးဝဲဒၣ်,နမ့ၢ်ဟီထီၣ်ကွံာ်ပှၤဒီး,မၢပလဲၤဆူထိးတဖုန့ၣ်အပူၤတက့ၢ်. 32 ဒီးစံးဘၣ်အီၤ,လဲၤတ့ၢ်,ဒီးအဝဲသ့ၣ်ဟးထီၣ်ကွံာ်ဒီးလဲၤဝဲဆူထိးတဖုန့ၣ်အပူၤလီၤ.ဒီးကွၢ်ကွၢ်,ထိးဒီဖုညါန့ၣ်ဃ့ၢ်စံၣ်လီၤလၢကၢၢ်ဖးထီဆူပီၣ်လဲၣ်ပူၤ,ဒီးလီၤအုးသံလၢထံကျါလီၤ.

33 ဒီးပှၤကွၢ်ထိးတဖၣ်န့ၣ်ဃ့ၢ်ဝဲ,ဒီးလဲၤဆူဝ့ၢ်ပူၤ,ဒီးစံၣ်တဲၤတဲလီၤတၢ်ခဲလၢာ်,ဒီးတၢ်လၢအဘၣ်ဃးဒီးပှၤလၢတၢ်နါအိၣ်လၢအလိၤတဖၣ်အဂ့ၢ်လီၤ. 34 ဒီးကွၢ်ကွၢ်,ပှၤဝ့ၢ်ဖိဒီဝ့ၢ်ညါ,ဟဲထီၣ်သဂၢၢ်ယ့ၣ်ရှူး,ဒီးတုၤအထံၣ်အီၤဒီး,ဃ့ကညးအီၤလၢအကဟးထီၣ်ကွံာ်လၢအကီၢ်အဃၢၤလီၤ.