Mic 3 | KswSKMB | STEP | ဒီးယစံး,ယၤကိာ်အခိၣ်သ့ၣ်ဧၢ,ဒီးအံၣ်စရ့လးအပှၤစံၣ်ညီၣ်ကွီၢ်သ့ၣ်ဧၢ,ကနၣ်လၢ်တက့ၢ်.တၢ်သ့ၣ်ညါတၢ်စံၣ်ညီၣ်တီကြၢးအိၣ်ဒီးသုတမ့ၢ်ဘၣ်ဧါ.

‏ Micah 3

1 ဒီးယစံး,ယၤကိာ်အခိၣ်သ့ၣ်ဧၢ,ဒီးအံၣ်စရ့လးအပှၤစံၣ်ညီၣ်ကွီၢ်သ့ၣ်ဧၢ,ကနၣ်လၢ်တက့ၢ်.တၢ်သ့ၣ်ညါတၢ်စံၣ်ညီၣ်တီကြၢးအိၣ်ဒီးသုတမ့ၢ်ဘၣ်ဧါ.

2 မ့မ့ၢ်သုမ့ၢ်ပှၤသးဟ့တၢ်ဂ့ၤ,ဒီးအဲၣ်ဒိးတၢ်အၢလီၤ.ပှၤလၢအထုးထီၣ်ကွံာ်အဖံးလၢအလိၤ,ဒီးအညၣ်လၢအဃံလိၤ, 3 ဒီးအီၣ်ယပှၤဂီၢ်မုၢ်အညၣ်,ဒီးကုၣ်ကွံာ်အဖံးလၢအလိၤ,ဒီးမၤကၢ်အဃံ,ဒီးကူးတဲာ်အီၤတကူာ်တကူာ်ဒ်လၢသပၢၤပူၤအဂီၢ်,ဒီးဒ်လၢတၢ်ညၣ်လၢသပၢၤချီတၢ်အပူၤအသိးန့ၣ်လီၤ.

4 တုၤနုၤတစုကကိးထီၣ်ဆူယွၤဘၣ်ဆၣ်ဒီး,တစံးဆၢဘၣ်ဝဲဘၣ်.တၢ်လၢအကတီၢ်န့ၣ်ကပာ်တဒၢအမဲာ်ဒီးအီၤလၢအမၤတၢ်အၢအဃိလီၤ.

5 ဝံတဖၣ်လၢအဒုးမၤကမၣ်ယပှၤဂီၢ်မုၢ်,လၢအအ့ၣ်တၢ်လၢအမဲ,ဒီးကိးထီၣ်တၢ်ဃူတၢ်ဖိး,မ့မ့ၢ်ပှၤလၢအတဒၢနုာ်တၢ်လၢအကိာ်ပူၤန့ၣ်ကတဲာ်ကတီၤဒုးသုးလၢအဂီၢ်န့ၣ်ယွၤစံးလၢအဂ့ၢ်ဒ်အံၤ, 6 မၤသးဒ်န့ၣ်ဒီးသုကအိၣ်ဒီးမုၢ်နၤ,လၢထံၣ်တၢ်လၢညါခီတအိၣ်ဘၣ်,သုကအိၣ်ဒီးတၢ်ခံးလၢဖးတၢ်တအိၣ်ဘၣ်,ဒီးမုၢ်ကလီၤနုာ်လၢဝံအဖီခိၣ်,ဒီးမုၢ်ဆါကခံးလီၤလၢအဖီခိၣ်လီၤ. 7 တုၤနုၤတဘျီပှၤထံၣ်တၢ်လၢညါခီအမဲာ်ကဆှး,ဒီးပှၤဖးတၢ်တဖၣ်န့ၣ်အသးကကတုၤလီၤ.ဒီးကကျၢၢ်ဘၢအခၣ်ဆူၣ်ခဲလၢာ်လီၤ.အဂ့ၢ်ဒ်အံၤ,တၢ်စံးဆၢလၢယွၤတအိၣ်ဘၣ်.

8 ဘၣ်ဆၣ်ဒီးယပှဲၤဒီးတၢ်အစိအကမီၤလၢယွၤအသးအဃိန့ၣ်,ဒီးတၢ်စံၣ်ညီၣ်,ဒီးတၢ်ဂံၢ်ဆူၣ်ဘါဆူၣ်ဒ်သိးယကဒုးနဲၣ်ယၤကိာ်လၢအတၢ်ကမၣ်,ဒီးအံၣ်စရ့လးလၢအတၢ်ဒဲးဘးလီၤ.

9 ယၤကိာ်အဟံၣ်အခိၣ်သ့ၣ်ဧၢ,ဒီးအံၣ်စရ့လးအပှၤစံၣ်ညီၣ်ကွီၢ်သ့ၣ်ဧၢ,ပှၤလၢအသးဘၣ်အၢတၢ်စံၣ်ညီၣ်တီ,ဒီးမၤဒၢကူဒၢက့ၣ်တၢ်တီတၢ်လိၤ, 10 ပှၤလၢအမၤထီၣ်စံယိၣ်လၢတၢ်သွံၣ်,ဒီးယရူၤၡလ့ၣ်လၢတၢ်မၤအၢလီၤ.

11 အခိၣ်တဖၣ်န့ၣ်စံၣ်ညီၣ်တၢ်လၢခိၣ်ဖးအဂီၢ်,ဒီးပှၤလုၢ်တၢ်အဒိၣ်သိၣ်လိတၢ်လၢအဘူးအလဲအဂီၢ်,ဒီးအဝံတဖၣ်ဖးတၢ်လၢစ့အဂီၢ်လီၤ.ဘၣ်ဆၣ်ဒီးသန့ၤအသးလၢယွၤ,ဒီးစံးဝဲ,ယွၤအိၣ်ဝဲလၢပကျါတမ့ၢ်ဘၣ်ဧါ.တၢ်အၢတဘၣ်ဘၣ်ပှၤနီတမံၤဘၣ်.

12 မၤသးဒ်န့ၣ်ဒီးပှၤကထဲၣ်စံယိၣ်လၢသုဃိဒ်စံာ်တလီၢ်အသိး,ဒီးယရူၤၡလ့ၣ်ကကဲထီၣ်တၢ်ပူတဖၣ်,ဒီးဟံၣ်အကစၢၢ်န့ၣ်တၢ်စိခိၣ်လၢပှၢ်လၢ်ကျါလီၤ.