Neh 13 | KswSKMB | STEP | တၢ်လၢမုၢ်တနံၤန့ၣ်ဖးဝဲလၢလံာ်စီၤမိၤရှ့အပူၤလၢပှၤဂီၢ်မုၢ်အနၢ်ပူၤလီၤ.ဒီးထံၣ်န့ၢ်တၢ်ကွဲးအသးလၢအပူၤလၢပှၤဧၣ်မိၣ်ဖိ,ဒီးပှၤမိၤအးဖိတဘၣ်ဟဲနုာ်ဘၣ်လၢယွၤအတၢ်အိၣ်ဖှိၣ်အပူၤလီၤစိၤလီၤထီလီၤ.

‏ Nehemiah 13

1 တၢ်လၢမုၢ်တနံၤန့ၣ်ဖးဝဲလၢလံာ်စီၤမိၤရှ့အပူၤလၢပှၤဂီၢ်မုၢ်အနၢ်ပူၤလီၤ.ဒီးထံၣ်န့ၢ်တၢ်ကွဲးအသးလၢအပူၤလၢပှၤဧၣ်မိၣ်ဖိ,ဒီးပှၤမိၤအးဖိတဘၣ်ဟဲနုာ်ဘၣ်လၢယွၤအတၢ်အိၣ်ဖှိၣ်အပူၤလီၤစိၤလီၤထီလီၤ. 2 အဂ့ၢ်ဒ်အံၤ,တဟဲသဂၢၢ်ဘၣ်ပှၤအံၣ်စရ့လးဖိဒီးကိၣ်,ဒီးထံဘၣ်.မ့မ့ၢ်အငါစီၤဘံးလၣ်လၢစ့ဒ်သိးအကဆိၣ်အၢအီၤလီၤ.ဘၣ်ဆၣ်ဒီးပကစၢ်လဲလိာ်တၢ်ဆိၣ်အၢလၢတၢ်ဆိၣ်ဂ့ၤလီၤ.

3 ဒီးတၢ်မၤအသးတုၤအနၢ်ဟူတၢ်သိၣ်တၢ်သီဒီး,မၤလီၤဖှၣ်ပှၤဂီၢ်မုၢ်ဃါဃုာ်အသးတဖၣ်ဒီးအံၣ်စရ့လးလီၤ.

4 တၢ်န့ၣ်အမဲာ်ညါပှၤလုၢ်တၢ်အဒိၣ်လၢအကွၢ်ပကစၢ်အဟံၣ်အဒၢးစီၤဧ့လယၤၡံာ်ဒီတံၤဒီသကိးဒီးစီၤတိၤဘံယၤ, 5 ဒီးကတဲာ်ကတီၤတ့ၢ်ဒၢးဖးဒိၣ်လၢအဂီၢ်,ဖဲပှၤလၢသီပာ်ဖှိၣ်တၢ်မၤဘူၣ်လီၢ်ဘၣ်,ဒီးတၢ်အဃၢၤအဃိၢ်တဖၣ်,ဒီးဘုဧိၤဟုဧိၤ,ဒီးစပံးထံအသီ,ဒီးသိသ့ၣ်တဖၣ်,ဆံဆဲၣ်ပူတပူ,လၢတၢ်မၤလိာ်ဝဲလၢပှၤဘၣ်ဟ့ၣ်ပှၤလ့ၤဝံဖိ,ဒီးပှၤသးဝံၣ်တၢ်ဖိ,ဒီးပှၤပၢၤပဲတရီဖိ,ဒီးတၢ်မၤဘူၣ်ဘၣ်ဃးဒီးပှၤလုၢ်တၢ်အဒိၣ်လီၤ.

6 ဒီးလၢတၢ်မၤအသးခဲလၢာ်န့ၣ်ယတအိၣ်ဘၣ်လၢယရူၤၡလ့ၣ်အပူၤဘၣ်.အဂ့ၢ်ဒ်အံၤ,လၢဘၤဘူၤလိၣ်အစီၤပၤအၢ်တၤၡါၡတၤအနံၣ်ပှဲၤထီၣ်သၢဆံခံနံၣ်တနံၣ်န့ၣ်ယဟဲဆူစီၤပၤအအိၣ်,ဒီးလၢမုၢ်နံၤတဖၣ်အကတၢၢ်န့ၣ်ယဃ့တၢ်လၢစီၤပၤလီၤ.

7 ဒီးယဟဲက့ၤဆူယရူၤၡလ့ၣ်,ဒီးယနၢ်ပၢၢ်တၢ်အၢလၢစီၤအ့လယၤၡံာ်မၤဝဲလၢစီၤတိၤဘံယၤအဃိ,လၢအကတဲာ်ကတီၤန့ၢ်အီၤလၢအဒၢးတဒၢးလၢယွၤအဟံၣ်အဂၢၤပူၤလီၤ. 8 ဒီးယသးကိၢ်ထီၣ်ဒိၣ်မးလီၤ.ဒီးယကွံာ်တ့ၢ်ကွံာ်စီၤတိၤဘံယၤအဃၢၤအဃိၢ်ခဲလၢာ်လၢအဒၢးပူၤဆူခိလီၤ.

9 ဒီးယမၤလိာ်တၢ်,ဒီးပှၤမၤကဆှီထီၣ်ဒၢးတဖၣ်,ဒီးယဟဲစိာ်က့ၤဖဲန့ၣ်ယွၤအဟံၣ်အဃၢၤအဃိၢ်,ဒီးတၢ်မၤဘူၣ်,ဒီးလီၢ်ဘၣ်လီၤ.

10 ဒီးယသ့ၣ်ညါလၢပှၤလ့ၤဝံဖိအဂီၢ်တဖၣ်န့ၣ်ပှၤတဟ့ၣ်ဘၣ်အီၤဘၣ်.အဂ့ၢ်ဒ်အံၤ,ပှၤလ့ၤဝံဖိ,ဒီးပှၤသးဝံၣ်တၢ်ဖိလၢအမၤတၢ်မၤန့ၣ်ဃ့ၢ်လံတဂၤဆူအဟီၣ်ခိၣ်အကဝီၤဒၣ်ဝဲ,တဂၤဆူအဟီၣ်ခိၣ်အကဝီၤဒၣ်ဝဲလံလီၤ.

11 ဒီးယဂ့ၢ်လိာ်ဘှီလိာ်ဒီးပဒိၣ်တဖၣ်,ဒီးယစံး,ပှၤလဲၤသဒၣ်ယွၤအဟံၣ်န့ၣ်မ့ၢ်အဘၣ်မနုၤလဲၣ်.ဒီးယဒုးအိၣ်ဖှိၣ်ရိဖှိၣ်အီၤ,ဒီးပာ်လီၤအီၤလၢအလီၢ်န့ၣ်လီၤ.

12 တုၤနုၤတစုပှၤယူဒၤဖိခဲလၢာ်ဟဲစိာ်ဘုဧိၤဟုဧိၤ,ဒီးစပံးထံအသီ,ဒီးသိသ့ၣ်တဖၣ်ဆံဆဲၣ်ပူတပူဆူတၢ်ပာ်ဖှိၣ်အလီၢ်န့ၣ်လီၤ.

13 ဒီးယပာ်ပှၤပၢၤတၢ်ပာ်ဖှိၣ်အလီၢ်,ပှၤလုၢ်တၢ်အဒိၣ်စီၤၡလ့မယၤ,ဒီးပှၤကွဲးလံာ်စီၤစၤဒိး,ဒီးလၢပှၤလ့ၤဝံဖိအကျါန့ၣ်စီၤပဒါယၤ,ဒီးလၢအလီၢ်ခံန့ၣ်စီၤဃၤနၣ်,စီၤစးကူၢ်အဖိခွါစီၤမးတၤနယၤအဖိခွါလီၤ.အဂ့ၢ်ဒ်အံၤ,တၢ်ပာ်အီၤလၢပှၤအကလုၢ်တီလီၤ.ဒီးအဝဲသ့ၣ်ဘၣ်ဟ့ၣ်နီၤဖးတၢ်လၢအဒီပုၢ်ဝဲၢ်တဖၣ်န့ၣ်လီၤ.

14 ယကစၢ်ဧၢ,သ့ၣ်နီၣ်ထီၣ်က့ၤယၤလၢတၢ်န့ၣ်တမံၤအဃိတက့ၢ်.ဒီးတၢ်ဘျုးတၢ်ဖှိၣ်လၢအဒုးဘၣ်ယကစၢ်အဟံၣ်,ဒီးယတၢ်ကွၢ်က့ၤအီၤတဖၣ်န့ၣ်ထွါကွံာ်တဂ့ၤ.

15 လၢမုၢ်နံၤတဖၣ်န့ၣ်ယထံၣ်ဘၣ်လၢယူဒၤဖိအကျါပှၤယီၢ်နီၣ်စံၢ်စပံးသၣ်လၢမုၢ်အိၣ်ဘှံးအနံၤ,ဒီးဟဲစိာ်ဘုကဒိၣ်,ဒီးပဒၢးထီၣ်တၢ်လၢကသ့ၣ်ယီၤအလိၤ,ဒီးစပံးထံစ့ၢ်ကီး,ဒီးစပံးသၣ်,ဒီးချၢၣ်ဒၢသၣ်,ဒီးတၢ်ပဒၢးအကလုာ်ကလုာ်လၢအဟဲစိာ်ဆူယရူၤၡလ့ၣ်လၢမုၢ်အိၣ်ဘှံးအနံၤလီၤ.ဒီးယအုၣ်ယသးလၢအဂ့ၢ်အကျိၤလၢမုၢ်တနံၤလၢအဆါတၢ်အီၣ်လီၤ.

16 ဒီးပှၤစိၢ်ဖိအိၣ်ဝဲဆိးဝဲလၢအဟဲစိာ်ညၣ်,ဒီးလဲာ်တၢ်ကၤတၢ်အကလုာ်ကလုာ်,ဒီးလၢမုၢ်အိၣ်ဘှံးအနံၤန့ၣ်ဆါဝဲလၢပှၤယူဒၤဖိ,ဒီးလၢယရူၤၡလ့ၣ်အပူၤလီၤ.

17 ဒီးယဂ့ၢ်လိာ်ဘှီလိာ်ဒီးယူဒၤအပှၤအိၣ်ဖျဲၣ်အပဒိၣ်တဖၣ်,ဒီးယစံးဘၣ်အီၤ,တၢ်အၢအံၤလၢသုမၤ,ဒီးမၤဘၣ်အၢမုၢ်အိၣ်ဘှံးအနံၤန့ၣ်မ့ၢ်မနုၤတမံၤလဲၣ်. 18 သုပၢ်တဖၣ်မၤဒ်န့ၣ်ဒီးပကစၢ်ဒုးဟဲဘၣ်ပှၤဒီးဝ့ၢ်အံၤလၢတၢ်အၢအံၤခဲလၢာ်တမ့ၢ်ဘၣ်ဧါ.ဒီးသုဒုးဘၣ်အံၣ်စရ့လးလၢတၢ်သးထီၣ်အါထီၣ်လၢတၢ်မၤဘၣ်အၢမုၢ်အိၣ်ဘှံးနံၤအဃိလီၤ.

19 ဒီးတုၤတၢ်ခံးလီၤဘၣ်ယရူၤၡလ့ၣ်အပဲတရီတဖၣ်လၢမုၢ်အိၣ်ဘှံးနံၤတချုးဘၣ်ဒံးဘၣ်ဒီး,တၢ်မၤအသးလၢယမၤလိာ်လၢပှၤဘၣ်ကးတံာ်ဃာ်တြဲၤ,ဒီးယမၤလိာ်လၢပှၤအသုတအိးထီၣ်ဘၣ်အီၤတုၤလီၤလၢမုၢ်အိၣ်ဘှံးနံၤပူၤကွံာ်န့ၣ်လီၤ.ဒီးယပာ်ပှၤလၢယခ့ယပှၤတနီၤဖဲပဲတရီတဖၣ်န့ၣ်,ဒ်သိးပှၤအသုတဟဲစိာ်နုာ်တၢ်ဝံတၢ်ယိးလၢမုၢ်အိၣ်ဘှံးနံၤတဂ့ၤလီၤ.

20 ဒီးပှၤကၤတၢ်ဖိ,ဒီးပှၤဆါတၢ်ကၤတၢ်အကလုာ်ကလုာ်တဖၣ်န့ၣ်မံဝဲလၢယရူၤၡလ့ၣ်လၢခိတဘျီခံဘျီလီၤ.

21 ဒီးယအုၣ်ယသးထီဒါအီၤ,ဒီးယစံးဘၣ်အီၤ,သုမံလၢတၢ်ခိၣ်ဒူအဃၢၤန့ၣ်မ့ၢ်အဘၣ်မနုၤလဲၣ်.သုမ့ၢ်မၤကဒီးတဘျီဒီး,ယကပာ်ယစုလၢသုလိၤလီၤ.လၢအဆၢအကတီၢ်လံၤလံၤန့ၣ်တဟဲလၢၤဘၣ်လၢမုၢ်အိၣ်ဘှံးအနံၤဘၣ်.

22 ဒီးယမၤလိာ်ပှၤလ့ၤဝံဖိလၢအကမၤကဆှီအသး,ဒီးဟဲပၢၤပဲတရီတဖၣ်န့ၣ်ဒ်သိးအကမၤစီဆှံမုၢ်အိၣ်ဘှံးအနံၤလီၤ.ယကစၢ်ဧၢ,သ့ၣ်နီၣ်ထီၣ်က့ၤယၤလၢတၢ်အံၤအဃိစ့ၢ်ကီး,ဒီးမၤပူၤမၤဖျဲးယၤဒ်နဘျုးဒိၣ်နဖှိၣ်အါအသိးန့ၣ်တက့ၢ်.

23 တၢ်လၢမုၢ်နံၤတဖၣ်န့ၣ်ယထံၣ်ဘၣ်စ့ၢ်ကီးပှၤယူဒၤဖိလၢအန့ၢ်မါလၢပှၤအၤစဒိးဖိ,လၢပှၤဧၣ်မိၣ်ဖိ,လၢပှၤမိၤအးဖိလီၤ. 24 ဒီးအဖိကတိၤတၢ်တဝာ်လၢပှၤအးစဒိးဖိအကျိာ်,ဒီးကတိၤတၢ်လၢယူဒၤအကျိာ်တသ့ဘၣ်.ကတိၤဒ်ပှၤတကလုာ်အကျိာ်,ပှၤတကလုာ်အကျိာ်အသိးန့ၣ်လီၤ.

25 ဒီးယဂ့ၢ်လိာ်ဘှီလိာ်ဒီးအီၤ,ဒီးယဒုၣ်ဒွဲၣ်အီၤ,ဒီးယတီၢ်တနီၤ,ဒီးယထဲးကွံာ်အခိၣ်သူ,ဒီးဒုးဆိၣ်အီၤလၢယွၤအမဲာ်ညါလၢသုသုတဟ့ၣ်သုဖိမုၣ်လၢအဖိခွါတဂ့ၤ,ဒီးသုသုတဟံးန့ၢ်အဖိမုၣ်လၢသုဖိခွါအဂီၢ်,ဒီးသုဂီၢ်ဒၣ်သုဝဲတဂ့ၤလီၤ.

26 အံၣ်စရ့လးအစီၤပၤစီၤၡလိၤမိၤမၤကမၣ်တၢ်လၢတၢ်န့ၣ်တဖၣ်,တမ့ၢ်ဘၣ်ဧါ.ဒီးလၢပှၤအါကလုာ်အကျါန့ၣ်စီၤပၤဒ်အဝဲဒၣ်အသိးလၢအကစၢ်အဲၣ်အီၤ,ဒီးပာ်အီၤလၢစီၤပၤလၢအံၣ်စရ့လးခဲလၢာ်အဖီခိၣ်န့ၣ်တအိၣ်ဘၣ်နီတဂၤဘၣ်.ဘၣ်ဆၣ်ဒီးပှၤတခီဘီမုၢ်ဖိအဖိမုၣ်ဒုးမၤကမၣ်အီၤလီၤ.

27 ဒီးပကဒိကနၣ်သုကလုၢ်ဒ်သိးပကမၤတၢ်အၢဖးဒိၣ်အံၤ,ဒီးန့ၢ်မါလၢပှၤတခီဘီမုၢ်ဖိသတးဒီး,မၤကမၣ်ဘၣ်ပကစၢ်စ့ၢ်ကီးဧါ.

28 ဒီးစီၤယဟိယဒါအဖိခွါတဂၤ,ပှၤလုၢ်တၢ်အဒိၣ်စီၤအ့လယၤၡံာ်အဖိခွါန့ၣ်မ့ၢ်ပှၤဃိရာ်ဖိစီၤစၤနဘၤလးအမာ်လီၤ.ဒီးယဟီထီၣ်ကွံာ်အီၤလၢယအိၣ်လီၤ.

29 မ့ၢ်အမၤဘၣ်အၢပှၤလုၢ်တၢ်အဒိၣ်အလီၢ်,ဒီးတၢ်အၢၣ်လီၤအီလီၤဘၣ်ဃးဒီးပှၤလုၢ်တၢ်အဒိၣ်,ဒီးပှၤလ့ၤဝံဖိသတးဒီး,ယကစၢ်ဧၢ,သ့ၣ်နီၣ်ထီၣ်က့ၤအီၤတက့ၢ်.

30 ဒီးယမၤပူၤဖျဲးအီၤဒီးကယဲၢ်ပှၤတခီဘီမုၢ်ဖိ,ဒီးယပာ်တၢ်ကွၢ်က့ၤတတီၤတတီၤဘၣ်ဃးဒီးပှၤလုၢ်တၢ်အဒိၣ်ဒီးပှၤလ့ၤဝံဖိ,တဂၤလၢအတၢ်မၤဒၣ်ဝဲ,တဂၤလၢအတၢ်မၤဒၣ်ဝဲန့ၣ်, 31 ဒီးလၢသ့ၣ်မုၣ်ဘၣ်ဃးဒီးတၢ်လုၢ်တၢ်ပာ်လၢအဆၢအကတီၢ်တဖၣ်အဂီၢ်ဒီးလၢတၤသၣ်ဆိအဂီၢ်လီၤ.ယကစၢ်ဧၢ,သ့ၣ်နီၣ်ထီၣ်က့ၤယၤလၢတၢ်ဂ့ၤအဂီၢ်တက့ၢ်.