Nehemiah 2
1ဒီးလၢစီၤပၤအၢ်တၤၡါၡတၤအနံၣ်ပှဲၤထီၣ်ခံဆံနံၣ်တနံၣ်,လါနံစၣ်အပူၤန့ၣ်တၢ်မၤအသးလၢစပံးထံအိၣ်ဝဲလၢအမဲာ်ညါ,ဒီးယဟံးထီၣ်စပံးထံ,ဒီးယဟ့ၣ်အီၤလၢစီၤပၤန့ၣ်လီၤ.ဒီးယမဲာ်တလီၤသပှၢ်တ့ၢ်လၢအမဲာ်ညါနီတဘျီဘၣ်. 2ဒီးစီၤပၤစံးဘၣ်ယၤ,နမဲာ်လီၤသပှၢ်မ့ၢ်အဘၣ်မနုၤလဲၣ်.ဒီးနတဆါဘၣ်.တၢ်အံၤတမ့ၢ်ဘၣ်တၢ်ဂၤဘၣ်,မ့ၢ်တၢ်သူၣ်အုးသးအုးလီၤ.ဒီးယပျံၤတၢ်ဒိၣ်ဒိၣ်ကလဲာ်လီၤ. 3ဒီးယစံးဘၣ်စီၤပၤ,မ်စီၤပၤမူဝဲလီၤထူလီၤယိာ်တက့ၢ်.လၢဝ့ၢ်တဖျၢၣ်,ယပၢ်အသွၣ်ခိၣ်အလီၢ်အိၣ်သယုၢ်,ဒီးအတြဲၤတဖၣ်ဘၣ်တၢ်ဆူးကွံာ်အီၤလၢမ့ၣ်အူန့ၣ်ဒီး,ယမဲာ်တလီၤသပှၢ်ဘၣ်မ့ၢ်အဘၣ်မနုၤလဲၣ်. 4ဒီးစီၤပၤစံးဘၣ်ယၤ,နဃ့ကညးတၢ်လၢမနုၤတမံၤလဲၣ်.တုၤနုၤတစုယဘါထုကဖၣ်မူခိၣ်အကစၢ်လီၤ. 5ဒီးယစံးဘၣ်စီၤပၤ,မ့ၢ်ဘၣ်စီၤပၤအသး,ဒီးနခ့နပှၤမ့ၢ်ဘၣ်တၢ်ဘျုးတၢ်ဖှိၣ်လၢနမဲာ်ညါဒီး,မ်နမၢလီၤယၤဆူယူဒၤ,ဆူယပၢ်တဖၣ်အသွၣ်ခိၣ်အဝ့ၢ်ပူၤ,ဒ်သိးယကတ့က့ၤအီၤတက့ၢ်. 6ဒီးစီၤပၤစံးဘၣ်ယၤ,(ဒီးနီၢ်ပၤမုၣ်ဆ့ၣ်နီၤလၢအဃၢၤန့ၣ်,)နလဲၤတၢ်နကအိၣ်ဆံးယံာ်လဲၣ်,ဒီးနကဟဲက့ၤအကတီၢ်ဖဲလဲၣ်.ဒီးဘၣ်စီၤပၤအသးလၢအကမၢလီၤယၤ,ဒီးယသ့ၣ်ဆၢဖးကတီၢ်လၢအဂီၢ်လီၤ. 7ဒီးယစံးဘၣ်စီၤပၤ,မ့ၢ်ဘၣ်စီၤပၤအသးဒီး,မ်ပှၤဟ့ၣ်ယၤလၢလံာ်လၢပဒိၣ်ဖးဒိၣ်လၢထံမိၢ်ပှၢ်ဝၢ်ဘးခီတဖၣ်အဂီၢ်,ဒ်သိးအကဒုးလဲၤခီဂာ်ယၤတုၤယတုၤလၢယူဒၤအပူၤ, 8ဒီးလံာ်တဘ့ၣ်လၢပှၤပၢၤစီၤပၤအသ့ၣ်ပှၢ်,စီၤအၤစာ်အဂီၢ်,ဒ်သိးအကဟ့ၣ်ယၤလၢသ့ၣ်လၢတိာ်အကျဲစၢၤထူၣ်တဖၣ်အဂီၢ်လၢအအိၣ်လၢဟံၣ်အဃၢၤန့ၣ်,ဒီးလၢဝ့ၢ်ခိၣ်ဒူအဂီၢ်,ဒီးလၢဟံၣ်လၢယကလဲၤနုာ်လၢအပူၤအဂီၢ်န့ၣ်တက့ၢ်.ဒီးစီၤပၤဟ့ၣ်လီၤယၤလၢတၢ်,ဒ်ယကစၢ်အစုဂ့ၤအိၣ်ဝဲလၢယလိၤအသိးန့ၣ်လီၤ. 9ဒီးယဟဲဆူပဒိၣ်ဖးဒိၣ်လၢထံမိၢ်ပှၢ်ဝၢ်ဘးခီတဖၣ်အအိၣ်,ဒီးယဟ့ၣ်အီၤလၢစီၤပၤအလံာ်လီၤ.(ဒီးစီၤပၤမၢတ့ၢ်ပှၤသုးဖိအခိၣ်,ဒီးပှၤကသ့ၣ်သုးဖိသ့ၣ်တဖၣ်လဲၤဒီးယၤလီၤ.) 10ဒီးတုၤပှၤဃိရၣ်ဒီးစီၤစၤနဘၤလး,ဒီးပှၤဧၣ်မိၣ်ဖိ,တၢ်အခ့အပှၤစီၤတိၤဘံယၤနၢ်ဟူဝဲဒီး,လၢပှၤတဂၤဟဲဃုပှၤအံၣ်စရ့လးဖိအတၢ်ဂ့ၤန့ၣ်မ့ၢ်တၢ်အၢလၢအမဲာ်ညါဒိၣ်မးလီၤ. 11ဒီးယဟဲဆူယရူၤၡလ့ၣ်,ဒီးယအိၣ်ဖဲန့ၣ်သၢနံၤလီၤ. 12ဒီးယဂဲၤဆၢထၢၣ်လၢမုၢ်နၤ,ဒီးပှၤစှၤဂၤအိၣ်ဝဲဒီးယၤ,ဒီးယတစံးဘၣ်ပှၤကညီလၢတၢ်လၢယွၤပာ်လၢယသးကံၢ်ပူၤလၢယကမၤလၢယရူၤၡလ့ၣ်အပူၤန့ၣ်ဘၣ်.ဒီးမ့တမ့ၢ်ဘၣ်ဆၣ်ဖိကီၢ်ဖိလၢယဒိးအီၤတဒုန့ၣ်ဆၣ်ဖိကီၢ်ဖိအဂၤတအိၣ်ဘၣ်ဒီးယၤဘၣ်. 13ဒီးယဟးထီၣ်လၢမုၢ်နၤလၢကစၢၢ်ကဆူးအပဲတရီဆူထံထီၣ်ပၢၢ်ပယိၤအမဲာ်ညါ,ဒီးဆူတၢ်အ့ၣ်အပဲတရီ,ဒီးယကွၢ်ယရူၤၡလ့ၣ်အခိၣ်ဒူလၢအလီၤပှီၢ်ဝဲ,ဒီးအပဲတရီတဖၣ်လၢအဘၣ်တၢ်ဆူးထီၣ်ကွံာ်အီၤလၢမ့ၣ်အူ, 14ဒီးယလဲၤဆူထံထီၣ်ပၢၢ်အပဲတရီ,ဒီးဆူစီၤပၤအနိၣ်တပူၤလီၤ.ဒီးဒ်သိးဆၣ်ဖိကီၢ်ဖိလၢအအိၣ်လၢယဖီလာ်တဒုကခီဂာ်တၢ်န့ၣ်အလီၢ်တအိၣ်ဘၣ်. 15ဒီးယလဲၤထီၣ်လၢမုၢ်နၤလၢထံကျိဖိအဃၢၤ,ဒီးကွၢ်ဝ့ၢ်ခိၣ်ဒူန့ၣ်,ဒီးယဃၣ်ကဒါက့ၤ,ဒီးလဲၤနုာ်ကစၢၢ်ကဆူးအပဲတရီပူၤ,ဒီးဟဲက့ၤကဒါက့ၤလီၤ. 16ဒီးယလဲၤဆူလဲၣ်ဆူလဲၣ်,ယမၤဒ်လဲၣ်ဒ်လဲၣ်န့ၣ်ပဒိၣ်တဖၣ်တသ့ၣ်ညါဘၣ်.ဒီးပှၤယူဒၤဖိဂ့ၤ,ပှၤလုၢ်တၢ်အဒိၣ်ဂ့ၤ,ပှၤအိၣ်ဖျဲၣ်ပဒိၣ်ဂ့ၤ,ပဒိၣ်ဂ့ၤ,ပှၤအိၣ်လီၤတဲာ်လၢအမၤတၢ်မၤဂ့ၤ,ယတစံးဘၣ်တဲဘၣ်ဒံးဘၣ်တၢ်လၢအီၤဘၣ်. 17တုၤနုၤတစုယစံးဘၣ်အီၤ,သုထံၣ်တၢ်ကိၢ်တၢ်ဂီၤလၢပအိၣ်လၢအပူၤလီၤ.ယရူၤၡလ့ၣ်အိၣ်သယုၢ်လံ.ဒီးအပဲတရီဘၣ်တၢ်ဆူးထီၣ်ကွံာ်အီၤလၢမ့ၣ်အူလံ.ဟဲ,မၤထီၣ်သကိးယရူၤၡလ့ၣ်အခိၣ်ဒူ,ဒ်သိးပသုတကဲလၢၤတၢ်ဒုၣ်ဒွဲၣ်အလီၢ်တဂ့ၤန့ၣ်တက့ၢ်. 18ဒီးယစံးဘၣ်တဲဘၣ်အီၤလၢယွၤအစုအိၣ်ဝဲလၢယလိၤလၢတၢ်ဂ့ၤအဂီၢ်,ဒီးတၢ်ကတိၤလၢစီၤပၤစံးဘၣ်ယၤစ့ၢ်ကီးလီၤ.ဒီးအဝဲသ့ၣ်တဖၣ်န့ၣ်စံးဝဲဒၣ်,ဂဲၤဆၢထၢၣ်ဒီးမၤသကိးတၢ်တက့ၢ်.ဒီးပာ်ဆူၣ်ထီၣ်အစုလၢတၢ်ဂ့ၤအဂီၢ်လီၤ. 19ဒီးတုၤပှၤဃိရၣ်ဖိစီၤစၤနဘၤလး,ဒီးပှၤဧၣ်မိၣ်ဖိ,တၢ်အခ့အပှၤစီၤတိၤဘံယၤ,ဒီးပှၤဧ့ရ့းဖိစီၤက့ၤရှ့ၣ်နၢ်ဟူဝဲဒီး,နံၤဘၣ်ဖၣ်လဲပှၤ,ဒီးမၤတရီတပါပှၤ,ဒီးစံးဝဲဒၣ်,တၢ်လၢသုကမၤန့ၣ်မ့ၢ်မနုၤတမံၤလဲၣ်.သုကပူထီၣ်စီၤပၤစ့ၢ်ကီးဧါ. 20ဒီးယစံးဆၢတၢ်လၢအီၤ,ဒီးယစံးဘၣ်အီၤ,မူခိၣ်အကစၢ်ကဒုးဘီၣ်ထီၣ်ညီထီၣ်ပှၤ,ဒီးပဝဲဒၣ်,အခ့အပှၤ,ပကဂဲၤဆၢထၢၣ်,ဒီးမၤတၢ်လီၤ.မ့မ့ၢ်သုဝဲဒၣ်န့ၣ်သုဂီၢ်မ့ၢ်ဂ့ၤ,သုတီသုလိၤအဂ့ၢ်မ့ၢ်ဂ့ၤ,တၢ်ဒုးသ့ၣ်နီၣ်ထီၣ်က့ၤသုမ့ၢ်ဂ့ၤ,တအိၣ်ဘၣ်လၢယရူၤၡလ့ၣ်အပူၤဘၣ်.
Copyright information for
KswSKMB