Neh 8 | KswSKMB | STEP | ဒီးပှၤဂီၢ်မုၢ်ခဲလၢာ်အိၣ်ဖှိၣ်ရိဖှိၣ်ဒ်ပှၤတဂၤဃီအသိးလၢကျဲပူၤလၢအအိၣ်ဝဲလၢပဲတရီထံအမဲာ်ညါ,ဒီးစံးဘၣ်ပှၤကွဲးလံာ်စီၤဧ့စြၤဒ်သိးအကဟဲစိာ်လံာ်စီၤမိၤရှ့အတၢ်သိၣ်တၢ်သီလၢယွၤမၤလိာ်အံၣ်စရ့လးလီၤ.

‏ Nehemiah 8

1 ဒီးပှၤဂီၢ်မုၢ်ခဲလၢာ်အိၣ်ဖှိၣ်ရိဖှိၣ်ဒ်ပှၤတဂၤဃီအသိးလၢကျဲပူၤလၢအအိၣ်ဝဲလၢပဲတရီထံအမဲာ်ညါ,ဒီးစံးဘၣ်ပှၤကွဲးလံာ်စီၤဧ့စြၤဒ်သိးအကဟဲစိာ်လံာ်စီၤမိၤရှ့အတၢ်သိၣ်တၢ်သီလၢယွၤမၤလိာ်အံၣ်စရ့လးလီၤ.

2 ဒီးလၢလါနွံလါတလါထီၣ်တနံၤန့ၣ်ပှၤလုၢ်တၢ်အဒိၣ်စီၤဧ့စြၤဟဲစိာ်တၢ်သိၣ်တၢ်သီဆူတၢ်အိၣ်ဖှိၣ်အမဲာ်ညါ,ဒီးပိာ်မုၣ်,ဒီးပိာ်ခွါ,ဒီးကယဲၢ်ပှၤလၢအနၢ်ဟူတၢ်ဒီးနၢ်ပၢၢ်တၢ်သ့န့ၣ်လီၤ.

3 ဒီးဖးဝဲလၢအပူၤလၢကျဲလၢအအိၣ်ဝဲလၢပဲတရီထံအမဲာ်ညါလၢမုၢ်ဂီၤပၢၢ်လၢမုၢ်ထူၣ်,လၢပိာ်မုၣ်,ဒီးပိာ်ခွါ,ဒီးလၢကယဲၢ်ပှၤလၢအနၢ်ပၢၢ်တၢ်သ့အမဲာ်ညါလီၤ.ဒီးပှၤဂီၢ်မုၢ်ခဲလၢာ်န့ၣ်ဒိကနၣ်လံာ်တၢ်သိၣ်တၢ်သီန့ၣ်လီၤ.

4 ဒီးပှၤကွဲးလံာ်စီၤဧ့စြၤဆၢထၢၣ်လၢတၢ်အလီၢ်ထီၣ်ထီသ့ၣ်အဖီခိၣ်လၢပှၤမၤဝဲလၢတၢ်န့ၣ်တမံၤအဂီၢ်,ဒီးစီၤမၤတံးသယၤ,ဒီးစီၤၡမၤ,ဒီးစီၤဧနၤယၤ,ဒီးစီၤအူၤရံယၤ,ဒီးစီၤဃံးလကံယၤ,ဒီးစီၤမၤစ့ယၤတဖၣ်ဆၢထၢၣ်လၢအစုထွဲ,ဒီးစီၤပဒါယၤ,ဒီးစီၤမံၤၡအ့လး,ဒီးစီၤမၤလကံယၤ,ဒီးစီၤဃၤရှူာ်,ဒီးစီၤဃၤၡဘးဒနၤ,ဒီးစီၤစကၤရယၤ,ဒီးစီၤမရှူလၣ်တဖၣ်လၢအစုစ့ၣ်လီၤ.

5 ဒီးစီၤဧ့စြၤအိးထီၣ်လံာ်လၢပှၤဂီၢ်မုၢ်ခဲလၢာ်အမဲာ်ညါ,(အဂ့ၢ်ဒ်အံၤ,အိၣ်ဝဲလၢပှၤဂီၢ်မုၢ်ခဲလၢာ်အဖီခိၣ်,)ဒီးတုၤအအိးထီၣ်ဝဲဒီး,ပှၤဂီၢ်မုၢ်ခဲလၢာ်ဆၢထၢၣ်ဝဲလီၤ.

6 ဒီးစီၤဧ့စြၤစံးထီၣ်ပတြၢၤယွၤ,ကစၢ်ဖးဒိၣ်,ဒီးပှၤဂီၢ်မုၢ်ခဲလၢာ်စံးဆၢ,အၤမ့ၣ်,အၤမ့ၣ်,အိၣ်ဒီးအစုယူာ်ထီၣ်အသး,ဒီးဆုးလီၤအခိၣ်,ဒီးတီၤလီၤကဒွံကျိာ်,ဒီးဘူၣ်ထီၣ်ဘါထီၣ်တၢ်လီၤ.

7 ဒီးစီၤယ့ၤရှူ,ဒီးစီၤဘၤနံ,ဒီးစီၤရှ့ရ့ဘယၤ,စီၤယၤမံၣ်,စီၤဧးကူာ်,စီၤၡၤဘသဲၤ,စီၤဟိၤဒံယၤ,စီၤမၤစ့ယၤ,စီၤက့လံတၤ,စီၤဧစၤရယၤ,စီၤယိစဘး,စီၤဃၤနၣ်,စီၤပလါယၤ,ဒီးပှၤလ့ၤဝံဖိသ့ၣ်တဖၣ်န့ၣ်ဒုးနၢ်ပၢၢ်ပှၤဂီၢ်မုၢ်လၢတၢ်သိၣ်တၢ်သီ,ဒီးပှၤဂီၢ်မုၢ်ဆၢထၢၣ်လၢအလီၢ်န့ၣ်လီၤ.

8 ဒီးအဝဲသ့ၣ်တဖၣ်ဖးလံာ်န့ၣ်လၢယွၤအတၢ်သိၣ်တၢ်သီအပူၤလီၤတံၢ်လီၤဆဲး,ဒီးဟ့ၣ်ဝဲအခီပညီ,ဒီးဒုးနၢ်ပၢၢ်ပှၤလၢတၢ်လၢအဖးဝဲလီၤ.

9 ဒီးစီၤနဃ့မယၤလၢအမ့ၢ်တၢ်အခိၣ်,ဒီးပှၤကွဲးလံာ်စီၤဧ့စြၤဒီးပှၤလ့ၤဝံဖိလၢအသိၣ်လိပှၤဂီၢ်မုၢ်န့ၣ်စံးဘၣ်ပှၤဂီၢ်မုၢ်ခဲလၢာ်တၢ်လၢမုၢ်တနံၤအံၤစီဆှံဝဲလၢယွၤသုကစၢ်အဂီၢ်လီၤ.သုတဟီၣ်တယၢၤတဂ့ၤ.မ်သုမဲာ်ထံအသုတလီၤတဂ့ၤ.အဂ့ၢ်ဒ်အံၤ,တုၤပှၤဂီၢ်မုၢ်နၢ်ဟူတၢ်သိၣ်တၢ်သီအတၢ်ကတိၤန့ၣ်ဒီး,အမဲာ်ထံလီၤခဲလၢာ်လီၤ.

10 ဒီးစံးဘၣ်အီၤ,လဲၤ,အီၣ်တၢ်အသိ,ဒီးအီတၢ်အဆၢ,ဒီးပှၤလၢတၢ်ကတဲာ်ကတီၤအသးလၢအဂီၢ်တအိၣ်ဘၣ်တဖၣ်န့ၣ်ဟ့ၣ်ယုၢ်အီၤလၢအဂီၢ်တဖၣ်တက့ၢ်.အဂ့ၢ်ဒ်အံၤ,တၢ်လၢမုၢ်တနံၤအံၤ,စီဆှံဝဲလၢပကစၢ်အဂီၢ်လီၤ.ဒီးသုတသူၣ်အုးသးအုးတဂ့ၤ.အဂ့ၢ်ဒ်အံၤ,ယွၤအတၢ်သူၣ်ခုသးခုန့ၣ်မ့ၢ်သုဂံၢ်သုဘါလီၤ.

11 ဒီးပှၤလ့ၤဝံဖိဒုးအိၣ်ဘှီၣ်ပှၤဂီၢ်မုၢ်ခဲလၢာ်,ဒီးစံးဝဲဒၣ်,အိၣ်ဃိကလာ်တက့ၢ်.အဂ့ၢ်ဒ်အံၤ,တၢ်လၢနံၤအံၤစီဆှံလီၤ.သုတသူၣ်အုးသးအုးတဂ့ၤ.

12 ဒီးပှၤဂီၢ်မုၢ်ခဲလၢာ်လဲၤဝဲဒ်သိးအကအီၣ်တၢ်,ဒီးအီတၢ်,ဒီးဟ့ၣ်ယုၢ်တၢ်အဂီၢ်တဖၣ်,ဒီးမၤတၢ်သူၣ်ခုသးခုဖးဒိၣ်လီၤ.မ့ၢ်အနူၤပၢၢ်အနၢ်ပၢၢ်တၢ်ကတိၤလၢပှၤဘိးဘၣ်သ့ၣ်ညါအီၤအဃိလီၤ.

13 ဒီးခံနံၤတနံၤန့ၣ်ပှၤဂီၢ်မုၢ်ခဲလၢာ်အပၢ်အခိၣ်တဖၣ်,ပှၤလုၢ်တၢ်အဒိၣ်,ဒီးပှၤလ့ၤဝံဖိသ့ၣ်တဖၣ်အိၣ်ဖှိၣ်ရိဖှိၣ်လၢပှၤကွဲးလံာ်စီၤဧ့စြၤအအိၣ်,ဒ်သိးအနၢ်ကပၢၢ်တၢ်သိၣ်တၢ်သီအတၢ်ကတိၤန့ၣ်လီၤ.

14 ဒီးထံၣ်န့ၢ်တၢ်ကွဲးအသးလၢတၢ်သိၣ်တၢ်သီအပူၤလၢယွၤမၤလိာ်လၢစီၤမိၤရှ့အစုပူၤလၢပှၤအံၣ်စရ့လးဖိဘၣ်အိၣ်ဝဲဆိးဝဲလၢအဒဲပူၤလၢတၢ်မၤဘူၣ်လၢလါနွံလါတလါအဖၢမုၢ်, 15 ဒီးလၢအဘၣ်ဒုးနၢ်ဟူတၢ်,ဒီးဒုးလဲၤတၢ်သီၣ်လၢအဝ့ၢ်တဖၣ်ခဲလၢာ်အပူၤ,ဒီးလၢယရူၤၡလ့ၣ်အပူၤ,ဒီးစံး,လဲၤထီၣ်ဆူကစၢၢ်,ဒီးဟဲစိာ်သ့ၣ်စၤယံးအဒ့,ဒီးသ့ၣ်စၤယံးအမံၤအဒ့,ဒီးသမ့ၤဟးဒးအဒ့,ဒီးစူၣ်ပလိၣ်အဒ့,ဒီးသ့ၣ်လၢအဒ့ခဲအဒ့တဖၣ်,ဒ်သိးအကမၤဒဲတဖၣ်ဒ်တၢ်ကွဲးအသးအသိးန့ၣ်လီၤ.

16 ဒီးပှၤဂီၢ်မုၢ်လဲၤထီၣ်,ဒီးဟဲစိာ်ဝဲ,ဒီးမၤဒဲတဖၣ်လၢအဂီၢ်ဒၣ်ဝဲကိးဂၤဒဲးလၢအဟံၣ်ခိၣ်,ဒီးလၢအဂၢၤပူၤ,ဒီးလၢယွၤအဟံၣ်အဂၢၤတဖၣ်အပူၤ,ဒီးလၢပဲတရီထံအကျဲပူၤ,ဒီးလၢအ့ဖရဲၣ်အပဲတရီအကျဲပူၤလီၤ.

17 ဒီးတၢ်အိၣ်ဖှိၣ်ခဲလၢာ်လၢအဟဲထီၣ်ဝဲလၢတၢ်မၢကဲကုၢ်အပူၤန့ၣ်မၤဒဲ,ဒီးဆ့ၣ်နီၤဝဲလၢဒဲပူၤလီၤ.အဂ့ၢ်ဒ်အံၤ,လၢစီၤနိၣ်အဖိခွါစီၤယိၤရှူအမုၢ်နံၤတဖၣ်တုၤလၢမုၢ်တနံၤန့ၣ်ပှၤအံၣ်စရ့လးဖိတမၤဘၣ်ဒ်န့ၣ်ဘၣ်,ဒီးတၢ်သူၣ်ခုသးခုဖးဒိၣ်အိၣ်ဝဲလီၤ.

18 ဒီးလၢမုၢ်ခီၣ်ထံးတုၤလၢမုၢ်နံၤအကတၢၢ်,တနံၤဘၣ်တနံၤန့ၣ်ဖးဝဲလၢလံာ်ယွၤအတၢ်သိၣ်တၢ်သီအပူၤလီၤ.ဒီးမၤဘူၣ်နွံနံၤ,ဒီးဃိးနံၤတနံၤန့ၣ်တၢ်အိၣ်ဖှိၣ်ရိဖှိၣ်အိၣ်ဝဲဒ်တၢ်စံၣ်ညီၣ်ဝဲအသိးန့ၣ်လီၤ.