Num 13 | KswSKMB | STEP | ဒီးယွၤကတိၤတၢ်ဒီးစီၤမိၤရှ့,ဒီးစံးဝဲဒၣ်,

‏ Numbers 13

1 ဒီးယွၤကတိၤတၢ်ဒီးစီၤမိၤရှ့,ဒီးစံးဝဲဒၣ်, 2 မၢလီၤပှၤလဲၤကွၢ်ကီၢ်ကနၤဧၣ်လၢယဟ့ၣ်လီၤအီၤလၢပှၤအံၣ်စရ့လးဖိတက့ၢ်.လၢအပၢ်အဒူၣ်န့ၣ်သုဘၣ်မၤအီၤတဒူၣ်တဂၤ,တဒူၣ်တဂၤ,ပဒိၣ်လၢအကျါကိးဂၤဒဲးလီၤ.

3 ဒီးဖဲယွၤအထးခိၣ်န့ၣ်စီၤမိၤရှ့မၢလီၤအီၤလၢပှၢ်မုၢ်ကနၢပၤရၣ်အပူၤလီၤ.ပှၤခဲလၢာ်န့ၣ်မ့ၢ်ပှၤအံၣ်စရ့လးဖိအခိၣ်တဖၣ်လီၤ.

4 ဒီးအအံၤမ့ၢ်အမံၤတဖၣ်လီၤ.လၢရူၤဘ့ၣ်တဒူၣ်ဖိအကျါန့ၣ်စီၤစးကူၢ်အဖိခွါစီၤၡးမူၤ,

5 လၢစူၤမ့းအိၣ်တဒူၣ်ဖိအကျါန့ၣ်စီၤဃိရံၤအဖိခွါစီၤၡၤဖး,

6 လၢယူဒၤတဒူၣ်ဖိအကျါန့ၣ်စီၤယဖူန့ၤအဖိခွါစီၤကၤလ့း,

7 လၢယံးစၣ်ကၢ်တဒူၣ်ဖိအကျါန့ၣ်စီၤယိၤသးအဖိခွါစီၤယံးကအၤလး,

8 လၢအ့ၤဖရဲၣ်တဒူၣ်ဖိအကျါန့ၣ်စီၤနိၣ်အဖိခွါစီၤယိၤရှူ,

9 လၢဘံၣ်ယၤမံၣ်တဒူၣ်ဖိအကျါန့ၣ်စီၤရါဖူၤအဖိခွါစီၤပးလတံၤ,

10 လၢစဘူလိၣ်တဒူၣ်ဖိအကျါန့ၣ်စီၤစိဒံၤအဖိခွါစီၤကးဒံၤအ့လး,

11 လၢယိၤသးတဒူၣ်ဖိအကျါန့ၣ်ပှၤမနၤရှ့ၤတဒူၣ်ဖိန့ၣ်စီၤစူစံၤအဖိခွါစီၤကၤဒံ,

12 လၢဒၣ်တဒူၣ်ဖိအကျါန့ၣ်စီၤကမးလံၤအဖိခွါစီၤဧးမံၤအ့လး,

13 လၢအၤရှ့ၢ်တဒူၣ်ဖိအကျါန့ၣ်စီၤမံၤက့လးအဖိခွါစီၤစသူၢ်,

14 လၢနးသၤလံတဒူၣ်ဖိအကျါန့ၣ်စီၤဝးဖစံၤအဖိခွါစီၤဃၤနဘံ,

15 လၢကးတဒူၣ်ဖိအကျါန့ၣ်စီၤမၤကံအဖိခွါစီၤကအူၤအ့လးန့ၣ်လီၤ.

16 အဝဲသ့ၣ်တဖၣ်န့ၣ်မ့ၢ်ပှၤလၢစီၤမိၤရှ့မၢအလဲၤကွၢ်ထံဧိၤကီၢ်ဧိၤအမံၤတဖၣ်လီၤ.ဒီးစီၤမိၤရှ့ယုၢ်စီၤနိၣ်အဖိခွါစီၤယိၤရှူအမံၤလၢစီၤယဟိၤရှူလီၤ.

17 ဒီးစီၤမိၤရှ့မၢအလဲၤကွၢ်ကီၢ်ကနၤဧၣ်,ဒီးစံးဘၣ်အီၤ,လဲၤထီၣ်လၢအံၤလၢကလံၤထံးတခီ,ဒီးလဲၤထီၣ်ဆူကစၢၢ်ကလိန့ၣ်တက့ၢ်. 18 ဒီးကွၢ်ကီၢ်တဘ့ၣ်န့ၣ်မ့ၢ်အမၤသးဒ်လဲၣ်,ဒီးပှၤဂီၢ်မုၢ်လၢအအိၣ်လၢအပူၤန့ၣ်မ့ၢ်အဂံၢ်အဘါဆူၣ်ဧါ,အဂံၢ်အဘါစၢ်ဧါ,မ့ၢ်စှၤဂၤဧါ,မ့ၢ်အါဂၤဧါ, 19 ဒီးကီၢ်လၢအဝဲသ့ၣ်အိၣ်လၢအပူၤန့ၣ်မ့ၢ်အမၤသးဒ်လဲၣ်,မ့ၢ်ဂ့ၤဧါ,မ့ၢ်အၢဧါ,ခူဧိၤဝ့ၢ်ဧိၤလၢအအိၣ်ဝဲဆိးဝဲလၢအပူၤန့ၣ်မ့ၢ်အမၤသးဒ်လဲၣ်,ဝ့ၢ်တဝီတဖၣ်,မ့ၢ်ဝ့ၢ်အိၣ်ဒီးအခိၣ်ဒူတဖၣ်လဲၣ်, 20 ဒီးကီၢ်န့ၣ်မ့ၢ်အမၤသးဒ်လဲၣ်,မ့ၢ်တၢ်သိ,မ့ၢ်တၢ်ဃဲၤလဲၣ်,သ့ၣ်အိၣ်တအိၣ်လၢအပူၤလဲၣ်,ပာ်သုသးခူတလ့ၢ်တက့ၢ်,ဒီးဟဲက့ၤစိာ်လၢကီၢ်န့ၣ်အတၤသၣ်တက့ၢ်.တၢ်လၢမုၢ်နံၤတဖၣ်န့ၣ်မ့ၢ်စပံးသၣ်မံဆိအမုၢ်နံၤတဖၣ်လီၤ.

21 ဒီးအဝဲသ့ၣ်လဲၤထီၣ်ဝဲ,ဒီးကွၢ်ထံဧိၤကီၢ်ဧိၤလၢပှၢ်မုၢ်ကနၢစံၣ်ပၢၢ်လၢရဃိာ်ဖဲပှၤလဲၤဆူဃမါသးလီၤ.

22 ဒီးလဲၤထီၣ်လၢကလံၤထံး,ဒီးလဲၤတုၤလၢဃ့ဘြိၣ်ဒီးစီၤဧနးအဖိအလံၤ,စီၤအဃံမ့ၣ်,စီၤရှ့ၤၡဲ,ဒီးစီၤတးလမဲအိၣ်ဝဲဖဲန့ၣ်လီၤ.(ဒီးဝ့ၢ်ဃ့ဘြိၣ်ဘၣ်တၢ်တ့အီၤနွံနံၣ်ဆိန့ၢ်ဝ့ၢ်စိၤဧၣ်လၢအဲၤကူပတူးအပူၤတက့ၢ်လီၤ.)

23 ဒီးလဲၤတုၤလၢထံအ့ၡကိၤလး,ဒီးပဲာ်လီၤစပံးမုၢ်အဒ့တဒ့အိၣ်ဒီးစပံးသၣ်တကူၤဖဲန့ၣ်,ဒီးယိးဝဲလၢနီၣ်ယိးဘိလၢပှၤခံဂၤအဘၢၣ်စၢၤလီၤ.ဒီးဟဲစိာ်စ့ၢ်ကီးသလဲသၣ်ဒီးချၢၣ်ဒၢသၣ်လီၤ.

24 ဒီးပှၤယုၢ်တၢ်အလီၢ်န့ၣ်အမံၤလၢထံအ့ၡကိၤလးလၢစပံးသၣ်တကူၤလၢပှၤအံၣ်စရ့လးဖိပဲာ်လီၤအီၤဖဲန့ၣ်အဃိလီၤ.

25 ဒီးအနံၤလွံၢ်ဆံအလီၢ်ခံန့ၣ်ဟဲက့ၤကဒါက့ၤဝဲလၢအကွၢ်ထံဧိၤကီၢ်ဧိၤလီၤ. 26 ဒီးဟဲက့ၤ,ဒီးလဲၤဆူစီၤမိၤရှ့,ဒီးစီၤအၤဟရိၣ်,ဒီးကယဲၢ်ပှၤအံၣ်စရ့လးဖိအတၢ်အိၣ်ဖှိၣ်အအိၣ်လၢပှၢ်မုၢ်ကနၢပၤရၣ်,လၢကၤဒ့ၣ်,ဒီးဟဲက့ၤစိာ်တၢ်ကတိၤလၢအဂီၢ်,ဒီးလၢကယဲၢ်တၢ်အိၣ်ဖှိၣ်အဂီၢ်,ဒီးဒုးနဲၣ်အီၤလၢကီၢ်န့ၣ်အတၤသၣ်လီၤ.

27 ဒီးစံးဘၣ်တဲဘၣ်အီၤ,ဒီးစံးဝဲဒၣ်,ပလဲၤနုာ်ကီၢ်န့ၣ်ဖဲနမၢပလဲၤ,ဒီးယွၤမၤဝဲဒီးတၢ်နုၢ်ထံဒီးကနဲစီလီၤ.ဒီးအဝဲအံၤမ့ၢ်အတၤသၣ်လီၤ. 28 ဘၣ်ဆၣ်ဒီးပှၤဂီၢ်မုၢ်လၢအအိၣ်ဝဲဆိးဝဲလၢကီၢ်ပူၤန့ၣ်အဂံၢ်ဆူၣ်အဘါဆူၣ်,ဒီးအဝ့ၢ်တဖၣ်အိၣ်ဒီးအခိၣ်ဒူ,ဒိၣ်မး,ဒီးပထံၣ်ဘၣ်စ့ၢ်ကီးစီၤဧနးအဖိအလံၤဖဲန့ၣ်လီၤ. 29 ဒီးပှၤဧမၤလ့းဖိအိၣ်ဝဲဆိးဝဲလၢကလံၤထံးတခီ,ဒီးပှၤဃ့ၤသးဖိ,ဒီးပှၤယဘူၣ်ဖိ,ဒီးပှၤအမိၢ်ဖိအိၣ်ဝဲဆိးဝဲလၢကစၢၢ်ကလိ,ဒီးပှၤကနၤဧၣ်ဖိအိၣ်ဝဲလၢပီၣ်လဲၣ်နံၤ,ဒီးလၢထံယၢ်ဒ့ၣ်အဃၢၤလီၤ.

30 ဒီးစီၤကၤလ့းတဂၤန့ၣ်ဒုးအိၣ်ဘှီၣ်ပှၤဂီၢ်မုၢ်လၢစီၤမိၤရှ့အမဲာ်ညါ,ဒီးစံးဝဲဒၣ်,မ်ပလဲၤထီၣ်တဘျီဃီဒီးမၤန့ၢ်အီၤတက့ၢ်.အဂ့ၢ်ဒ်အံၤ,ပမၤနၢၤမၤဃၣ်အီၤသ့ကစီဒီလီၤ.

31 မ့မ့ၢ်ပှၤလၢအလဲၤထီၣ်ဒီးအီၤတဖၣ်စံးဝဲဒၣ်,ပလဲၤထီဒါပှၤဂီၢ်မုၢ်န့ၣ်တသ့ဘၣ်.အဂ့ၢ်ဒ်အံၤ,အဂံၢ်အဘါဆူၣ်န့ၢ်ပဂံၢ်ပဘါတက့ၢ်လီၤ.

32 ဒီးဟဲစိာ်ထီၣ်တၢ်ကတိၤအအၢဘၣ်ဃးဒီးကီၢ်န့ၣ်လၢအလဲၤကွၢ်ဝဲဆူပှၤအံၣ်စရ့လးဖိအအိၣ်,ဒီးစံးဝဲဒၣ်,ကီၢ်လၢပလဲၤကွၢ်အီၤတဘ့ၣ်န့ၣ်မ့ၢ်ကီၢ်လၢအအီၣ်ကွံာ်ပှၤလၢအအိၣ်အဆိးလၢအပူၤ,ဒီးကယဲၢ်ပှၤလၢပထံၣ်ဘၣ်လၢအပူၤန့ၣ်မ့ၢ်ပှၤလၢအနီၢ်ဒိၣ်လီၤ.

33 ဒီးပထံၣ်ဘၣ်ပှၤနီၢ်ဒိၣ်ဖိဖဲန့ၣ်,စီၤဧနးအဖိအလံၤဟဲလၢပှၤနီၢ်ဒိၣ်လီၤဒီးလၢပမဲာ်ညါဒၣ်ပဝဲန့ၣ်ပမၤသးဒ်ဒွဲၣ်ဧိၤတြၤဧိၤအသိးန့ၣ်,ဒီးဒ်န့ၣ်အသိးလၢအဝဲသ့ၣ်တဖၣ်အမဲာ်ညါလီၤ.