Numbers 17
1ဒီးယွၤကတိၤတၢ်ဒီးစီၤမိၤရှ့,ဒီးစံးဝဲဒၣ်, 2ကတိၤတၢ်ဒီးပှၤအံၣ်စရ့လးဖိ,ဒီးဟံးန့ၢ်နီၣ်ထိးဘိလၢတဂၤတဘိ,လၢတဂၤတဘိဒ်အပၢ်အဟံၣ်တဖၣ်အသိးန့ၣ်,လၢအပဒိၣ်ဒ်အပၢ်အဟံၣ်တဖၣ်အသိးခဲလၢာ်,နီၣ်ထိးဘိတဆံခံဘိန့ၣ်တက့ၢ်.ကွဲးတဂၤအမံၤတဂၤအမံၤလၢအနီၣ်ထိးဘိဒၣ်ဝဲအလိၤန့ၣ်တက့ၢ်. 3ဒီးလၢလ့ၤဝံအနီၣ်ထိးဘိအလိၤန့ၣ်နဘၣ်ကွဲးစီၤအၤဟရိၣ်အမံၤလီၤ.အဂ့ၢ်ဒ်အံၤ,နီၣ်ထိးဘိတဘိန့ၣ်ကအိၣ်လၢအပၢ်အဟံၣ်အခိၣ်အဂီၢ်လီၤ. 4ဒီးနဘၣ်ပာ်လီၤအီၤလၢတၢ်အိၣ်ဖှိၣ်အဒဲပူၤလၢတၢ်အၢၣ်လီၤအီလီၤအမဲာ်ညါ,ဖဲယသဂၢၢ်သုလီၤ. 5ဒီးတၢ်ကမၤအသးလၢပှၤလၢယကဃုထၢအီၤတဂၤအနီၣ်ထိးဘိကဖီထီၣ်,ဒ်သိးပှၤအံၣ်စရ့လးဖိအတၢ်ကဒူးကဒ့ၣ်လၢယလိၤလၢအကဒူးကဒ့ၣ်လၢသုလိၤန့ၣ်ယကဒုးတုာ်ထီၣ်လီၤ. 6ဒီးစီၤမိၤရှ့ကတိၤတၢ်ဒီးပှၤအံၣ်စရ့လးဖိ,ဒီးကယဲၢ်အပဒိၣ်တဖၣ်ဟ့ၣ်လီၤအနီၣ်ထိးဘိ,ပဒိၣ်တဂၤတဘိတဂၤတဘိကိးဂၤဒဲး,ဒ်အပၢ်အဟံၣ်အသိးန့ၣ်,နီၣ်ထိးဘိတဆံခံဘိလီၤ.ဒီးစီၤအၤဟရိၣ်အနီၣ်ထိးဘိန့ၣ်အိၣ်ဝဲလၢနီၣ်ထိးဘိတဖၣ်အကျါလီၤ. 7ဒီးစီၤမိၤရှ့ပာ်လီၤနီၣ်ထိးဘိတဖၣ်လၢဒဲပူၤလၢယွၤအမဲာ်ညါလီၤ. 8ဒီးတၢ်မၤအသးလၢမုၢ်ဆ့ၣ်ထီၣ်တနံၤန့ၣ်စီၤမိၤရှ့လဲၤနုာ်လၢတၢ်အၢၣ်လီၤအီလီၤအဒဲပူၤ,ဒီးကွၢ်ကွၢ်,စီၤအၤဟရိၣ်အနီၣ်ထိးဘိလၢလ့ၤဝံအဟံၣ်အဂီၢ်တဘိန့ၣ်ဒိးထီၣ်လံ,ဒီးဘိၣ်ထီၣ်လံ,ဒီးဆှိးထီၣ်လံ,ဒီးသၣ်ထီၣ်လံၡၤကးသၣ်လံ. 9ဒီးစီၤမိၤရှ့ဟဲက့ၤစိာ်ထီၣ်နီၣ်ယိးဘိခဲလၢာ်လၢယွၤအအိၣ်ဆူပှၤအံၣ်စရ့လးဖိအအိၣ်,ဒီးအဝဲသ့ၣ်တဖၣ်န့ၣ်ကွၢ်ဝဲ,ဒီးဟံးန့ၢ်ဝဲတဂၤအနီၣ်ထိးဘိဒၣ်ဝဲ,တဂၤအနီၣ်ထိးဘိဒၣ်ဝဲလီၤ. 10ဒီးယွၤစံးဘၣ်စီၤမိၤရှ့,ဟဲက့ၤစိာ်စီၤအၤဟရိၣ်အနီၣ်ထိးဘိဆူတၢ်အၢၣ်လီၤအီလီၤအမဲာ်ညါ,ဒ်သိးတၢ်ကပၢၤအီၤလၢတၢ်ပနီၣ်လၢပှၤပူထီၣ်ဖိတဖၣ်အဂီၢ်န့ၣ်တက့ၢ်.ဒီးနဘၣ်ဒုးတုာ်အတၢ်ကဒူးကဒ့ၣ်လၢယလိၤဒ်သိးအသုတသံတဂ့ၤလီၤ. 11ဒီးစီၤမိၤရှ့မၤဝဲလီၤ.ဒ်ယွၤမၤလိာ်စီၤမိၤရှ့အသိးန့ၣ်မၤဝဲဒ်န့ၣ်သိးလီၤ. 12ဒီးပှၤအံၣ်စရ့လးဖိကတိၤတၢ်ဒီးစီၤမိၤရှ့,ဒီးစံးဝဲဒၣ်,ကွၢ်ကွၢ်ပကသံလၢတၢ်သံသတြိာ်,တၢ်မၤဟးဂီၤပှၤ,တၢ်မၤဟးဂီၤပှၤကိးဂၤဒဲးလီၤ. 13ပှၤလၢအလဲၤဘူးဒီးယွၤအတၢ်အိၣ်အလီၢ်သပှၢ်တၢၢ်ကိးဂၤဒဲးန့ၣ်ကသံလီၤ.ပကလၢာ်လၢတၢ်သံသတြိာ်စ့ၢ်ကီးဧါ.
Copyright information for
KswSKMB