‏ Numbers 22

1ဒီးပှၤအံၣ်စရ့လးဖိဟးထီၣ်,ဒီးသူၣ်ဒဲလၢမိၤအးအပျီပူၤလၢထံယၢ်ဒ့ၣ်လၢအံၤတခီ,သဃီၤဒီးဝ့ၢ်ယရံၤဃိန့ၣ်လီၤ.

2ဒီးစီၤစံးပိၢ်အဖိခွါစီၤဘၤလးထံၣ်ကယဲၢ်တၢ်လၢအံၣ်စရ့လးမၤဘၣ်ပှၤအမိၢ်ဖိလီၤ. 3ဒီးမိၤအးပျံၤတၢ်လၢပှၤဂီၢ်မုၢ်အမဲာ်ညါနးမးလီၤ.အဂ့ၢ်ဒ်အံၤ,အိၣ်ဝဲအါဂၤလီၤ.ဒီးမိၤအးဘၣ်တၢ်ကိၢ်တၢ်ဂီၤလၢပှၤအံၣ်စရ့လးဖိအမဲာ်ညါလီၤ.

4ဒီးမိၤအးန့ၣ်စံးဘၣ်မံးဒယၣ်အသူၣ်က့သးပှၢ်,ခဲကနံၣ်အံၤတၢ်အိၣ်ဖှိၣ်တဖုအံၤကလ့ၣ်ထီၣ်ကွံာ်ကယဲၢ်တၢ်ဝးတရံးပှၤ,ဒ်ဂီၤဘုၣ်ဂီၤဖံးလ့ၣ်ထီၣ်ကွံာ်နီၣ်ဧိၤမံၤဧိၤလၢတၢ်ပျီပူၤအသိးန့ၣ်လီၤ.ဒီးအဆၢအကတီၢ်ဖဲန့ၣ်စီၤစံးပိၢ်အဖိခွါစီၤဘၤလးမ့ၢ်ပှၤမိၤအးဖိအစီၤပၤလီၤ.

5ဒီးမၢလီၤကလူးတဖၣ်ဆူစီၤဘဧိၢ်အဖိခွါစီၤဘံးလၣ်အအိၣ်ဆူပသူၣ်လၢအအိၣ်လၢထံမိၢ်ပှၢ်အနံၤ,အိၣ်လၢအပှၤဂီၢ်မုၢ်အဖိအကီၢ်ပူၤ,ဒ်သိးအကကိးန့ၢ်အီၤ,ဒီးစံးဝဲဒၣ်,ကွၢ်ကွၢ်,ပှၤဂီၢ်မုၢ်တဖုဟဲထီၣ်လံလၢအဲၤကူပတူးအပူၤလံ.ကွၢ်ကွၢ်,လုၣ်ဘၢကွံာ်ဟီၣ်ခိၣ်ချၢ,ဒီးအိၣ်သဃီၤဒီးယမဲာ်ညါလီၤ. 6ဒီးခဲကနံၣ်အံၤဟဲတက့ၢ်,ဆိၣ်အၢပှၤဂီၢ်မုၢ်အံၤလၢယဂီၢ်တက့ၢ်,အဂ့ၢ်ဒ်အံၤ,အဂံၢ်အဘါဆူၣ်န့ၢ်ယၤတက့ၢ်လီၤ.ဘၣ်တဘၣ်ယမၤကသ့,ဒ်သိးဒီးပကကျီကွံာ်ဘၣ်အီၤ,ဒီးယကဟီထီၣ်ကွံာ်အီၤလၢထံဧိၤကီၢ်ဧိၤအပူၤလီၤ.အဂ့ၢ်ဒ်အံၤ,ယသ့ၣ်ညါလၢပှၤလၢနဆိၣ်ဂ့ၤအီၤန့ၣ်ဘၣ်တၢ်ဆိၣ်ဂ့ၤအီၤ,ဒီးပှၤလၢနဆိၣ်အၢအီၤန့ၣ်ဘၣ်တၢ်ဆိၣ်အၢအီၤလီၤ.

7ဒီးမိၤအးအသူၣ်က့သးပှၢ်,ဒီးမံးဒယၣ်အသူၣ်က့သးပှၢ်န့ၣ်ဟးထီၣ်ဒီးတၢ်ကတိၤလၢဝံအကျိာ်အဘူးအလဲလၢအစုပူၤလီၤ.ဒီးဟဲဆူစီၤဘံးလၣ်အအိၣ်,ဒီးတဲဘၣ်အီၤလၢစီၤဘၤလးအတၢ်ကတိၤလီၤ.

8ဒီးအဝဲဒၣ်စံးဘၣ်အီၤ,မံခဲမုၢ်နၤဖဲအံၤတက့ၢ်.ဒီးယကဟဲစိာ်န့ၢ်သုတၢ်ကတိၤ,ဒ်ယွၤကတိၤတၢ်ဒီးယၤအသိးန့ၣ်လီၤ.ဒီးမိၤအးအပဒိၣ်တဖၣ်အိၣ်ဒီးစီၤဘံးလၣ်လီၤ.

9ဒီးယွၤဟဲဆူစီၤဘံးလၣ်အအိၣ်ဒီးစံးဝဲဒၣ်,ပှၤအိၣ်ဒီးနၤအံၤ,မ့ၢ်မတၤတဖၣ်လဲၣ်.

10ဒီးစီၤဘံးလၣ်စံးဘၣ်ယွၤ,စီၤစံးပိၢ်အဖိခွါ,မိၤအးအစီၤပၤဘၤလးမၢလီၤပှၤဆူယအိၣ်, 11ဒီးစံး,ကွၢ်ကွၢ်,ပှၤဂီၢ်မုၢ်တဖုဟဲထီၣ်လံလၢအဲၤကူပတူးအပူၤလၢအလုၣ်ဘၢဟီၣ်ခိၣ်ချၢန့ၣ်လီၤ.ခဲကနံၣ်အံၤဟဲတက့ၢ်,ဆိၣ်အၢအီၤလၢယဂီၢ်တက့ၢ်.ဘၣ်တဘၣ်ယမၤနၢၤအီၤကသ့,ဒီးယကဟီထီၣ်ကွံာ်အီၤလီၤ.

12ဒီးယွၤစံးဘၣ်စီၤဘံးလၣ်,လဲၤဒီးအီၤတဂ့ၤ,ဆိၣ်အၢပှၤဂီၢ်မုၢ်န့ၣ်တဂ့ၤ,အဂ့ၢ်ဒ်အံၤ,အဝဲသ့ၣ်တဖၣ်န့ၣ်ဘၣ်ဆိၣ်ဂ့ၤဝဲလီၤ.

13ဒီးမုၢ်ဆ့ၣ်ထီၣ်န့ၣ်စီၤဘံးလၣ်ဂဲၤဆၢထၢၣ်,ဒီးစံးဘၣ်စီၤဘၤလးအပဒိၣ်တဖၣ်,က့ၤက့ၤဆူသုကီၢ်ဒၣ်သုဝဲတက့ၢ်.အဂ့ၢ်ဒ်အံၤ,ယွၤတဟ့ၣ်ယလဲၤဒီးသုဘၣ်.

14ဒီးမိၤအးအခိၣ်တဖၣ်ဂဲၤဆၢထၢၣ်,ဒီးက့ၤက့ၤဆူစီၤဘၤလးအအိၣ်,ဒီးစံးဝဲဒၣ်,စီၤဘံးလၣ်ဟဲဒီးပှၤအသးတအိၣ်ဘၣ်.

15ဒီးစီၤဘၤလးမၢလီၤကဒီးပှၤအခိၣ်အါန့ၢ်ဒီးအလၤအကပီၤဒိၣ်န့ၢ်အဝဲသ့ၣ်တဖၣ်န့ၣ်တက့ၢ်လီၤ. 16ဒီးဟဲဝဲဆူစီၤဘံးလၣ်အအိၣ်,ဒီးစံးဘၣ်အီၤ,စီၤစံးပိၢ်အဖိခွါစီၤဘၤလးစံးဒ်အံၤ,မ်တၢ်အသုတတြီနဟဲဆူယအိၣ်နီတမံၤတဂ့ၤ. 17အဂ့ၢ်ဒ်အံၤ,ယကပာ်တၢ်လၤကပီၤဒိၣ်ဒိၣ်ကလဲာ်လၢနလိၤ,ဒီးကယဲၢ်တၢ်လၢနစံးဘၣ်ယၤခဲလၢာ်ယကမၤလီၤ.ဟဲလၢ်တက့ၢ်,ဆိၣ်အၢပှၤဂီၢ်မုၢ်လၢယဂီၢ်တက့ၢ်.

18ဒီးစီၤဘံးလၣ်စံးဆၢတၢ်,ဒီးစံးဘၣ်စီၤဘၤလးအခ့အပှၤ,စီၤဘၤလးမ့ၢ်ဟ့ၣ်ယၤလၢအဟံၣ်ပှဲၤဒီးကျိၣ်ဧိၤစ့ဧိၤ,ဒီးထူဧိၤလွဲဧိၤဒီး,ယခီဂာ်ယွၤယကစၢ်အထးခိၣ်,ဒ်သိးယကမၤတၢ်အဆံးတက့ၢ်မ့ၢ်ဂ့ၤ,တၢ်အအါတက့ၢ်မ့ၢ်ဂ့ၤတသ့ဘၣ်. 19ဘၣ်ဆၣ်အိၣ်လၢ်သုဝဲခဲမုၢ်နၤစ့ၢ်ကီးဒ်သိးယကသ့ၣ်ညါတၢ်လၢယွၤကစံးဘၣ်ယၤအါန့ၢ်အန့ၣ်တက့ၢ်.

20ဒီးယွၤဟဲဆူစီၤဘံးလၣ်အအိၣ်လၢမုၢ်နၤ,ဒီးစံးဘၣ်အီၤ,ပှၤတဖၣ်န့ၣ်မ့ၢ်ဟဲဆူနအိၣ်ဒီး,ဂဲၤဆၢထၢၣ်ဒီးလဲၤဒီးအီၤတက့ၢ်,ဘၣ်ဆၣ်ဒီးတၢ်ကတိၤလၢယကကတိၤတၢ်ဒီးနၤန့ၣ်နဘၣ်မၤလီၤ.

21ဒီးမုၢ်ဆ့ၣ်ထီၣ်န့ၣ်စီၤဘံးလၣ်ဂဲၤဆၢထၢၣ်,ဒီးဂီၤကၢ်အကသ့ၣ်ယီၤ,ဒီးလဲၤတၢ်ဒီးမိၤအးအခိၣ်တဖၣ်လီၤ.

22ဒီးမ့ၢ်အလဲၤတၢ်သတးဒီး,ယွၤအသးထီၣ်ကဲၤထီၣ်ဝဲလီၤ.ဒီးယွၤအကလူးတဂၤဆၢထၢၣ်လၢကျဲပူၤ,လၢအဒုၣ်အဒါအလီၢ်လီၤ.ဒီးအဝဲဒၣ်ဒီးအကသ့ၣ်ယီၤ,ဒီးအခ့အပှၤခံဂၤအိၣ်ဒီးအီၤလီၤ.

23ဒီးကသ့ၣ်ယီၤတဒုန့ၣ်ထံၣ်ဘၣ်ယွၤအကလူးတဂၤအိၣ်ဆၢထၢၣ်လၢကျဲပူၤ,ဒီးအိၣ်ဒီးအနးဘီၣ်ထီၣ်အသးလၢအစုပူၤလီၤ.ဒီးကသ့ၣ်ယီၤန့ၣ်ဃၣ်ကပၤအသးလၢကျဲ,ဒီးလဲၤထီၣ်ဆူတၢ်ပျီပူၤ,ဒီးစီၤဘံးလၣ်တီၢ်ကသ့ၣ်ယီၤဒ်သိးအကဃၣ်က့ၤအသးဆူကျဲပူၤလီၤ.

24ဒီးယွၤအကလူးန့ၣ်ဆၢထၢၣ်လၢကျဲအိၣ်လၢစပံးမုၢ်အလီၢ်ခံပူၤအဘၢၣ်စၢၤ,တၢ်အဒူၣ်အိၣ်ဝဲလၢအအံၤတခီ,ဒီးတၢ်အဒူၣ်အိၣ်ဝဲလၢအဝဲတခီလီၤ.

25ဒီးကသ့ၣ်ယီၤထံၣ်ဘၣ်ယွၤအကလူးတဂၤ,ဒီးသနံးတၢ်အဒူၣ်န့ၣ်,ဒီးဆီၣ်သနံးဘၣ်စီၤဘံးလၣ်အခီၣ်လၢတၢ်ဒူၣ်လိၤဒီးအဝဲဒၣ်တီၢ်ကဒီးအီၤလီၤ.

26ဒီးယွၤအကလူးန့ၣ်လဲၤတၢ်ဒံး,ဒီးဆၢထၢၣ်လၢတၢ်ကဆူးအံၣ်ဖဲတၢ်ဃၣ်ကပၤအသးဆူစုထွဲဂ့ၤစုစ့ၣ်ဂ့ၤ,ကျဲတအိၣ်ဘၣ်လီၤ. 27ဒီးကသ့ၣ်ယီၤထံၣ်ဘၣ်ယွၤအကလူး,ဒီးလီၤဃံၤဝဲဒီးစီၤဘံးလၣ်အိၣ်လၢအဖီခိၣ်,ဒီးစီၤဘံးလၣ်အသးထီၣ်ကဲၤထီၣ်,ဒီးတီၢ်ကသ့ၣ်ယီၤလၢနီၣ်တီၢ်လီၤ.

28ဒီးယွၤအဲးထီၣ်ကသ့ၣ်ယီၤအထးခိၣ်,ဒီးအတၢ်စံးဘၣ်စီၤဘံးလၣ်,ဒ်သိးနကတီၢ်ယၤသၢဘျီအံၤဒီး,ယမၤတ့ၢ်နၤလၢမနုၤလဲၣ်.

29ဒီးစီၤဘံးလၣ်စံးဘၣ်ကသ့ၣ်ယီၤန့ၣ်,မ့ၢ်လၢနမၤယၤတရီတပါအဂ့ၢ်လီၤ.မ်နးတဘ့ၣ်အိၣ်လၢယစုပူၤန့ၣ်တက့ၢ်,အဂ့ၢ်ဒ်အံၤ,ခဲကနံၣ်အံၤယမၤသံနၤအံၤယသးအိၣ်လီၤ.

30ဒီးကသ့ၣ်ယီၤန့ၣ်စံးဘၣ်စီၤဘံးလၣ်,ယမ့ၢ်နကသ့ၣ်ယီၤလၢနဒိးအီၤလၢယကဲထီၣ်နတၢ်လံၤလံၤတုၤမုၢ်မဆါတနံၤအံၤတမ့ၢ်ဘၣ်ဧါ.ယမၤနၤညီနုၢ်ဒ်အံၤသိးဧါ.ဒီးစံးဝဲဒၣ်,နတမၤဘၣ်.

31ဒီးယွၤအိးထီၣ်စီၤဘံးလၣ်အမဲာ်,ဒီးထံၣ်ဘၣ်ယွၤအကလူးအိၣ်ဆၢထၢၣ်လၢကျဲပူၤ,ဒီးအနးအိၣ်ဘီၣ်ထီၣ်အသးလၢအစုပူၤ,ဒီးဆုးလီၤအခိၣ်,ဒီးထိၣ်လီၤပှီၤအသးလီၤ.

32ဒီးယွၤအကလူးန့ၣ်စံးဘၣ်အီၤ,နတီၢ်နကသ့ၣ်ယီၤသၢဘျီအံၤဘၣ်မနုၤလဲၣ်,ကွၢ်ကွၢ်,ယဲဒၣ်အံၤယဟဲထီဒါနၤလီၤ.အဂ့ၢ်ဒ်အံၤ,နကျဲမ့ၢ်တၢ်ပူထီၣ်လၢယမဲာ်ညါလီၤ. 33ဒီးကသ့ၣ်ယီၤန့ၣ်ထံၣ်ဘၣ်ယၤ,ဒီးဃၣ်အသးလၢယအိၣ်သၢဘျီလီၤ.မ့ၢ်တဃၣ်အသးလၢယအိၣ်ဘၣ်ဒီး,မ့ၢ်မးခဲကနံၣ်အံၤယကကျီသံနၤလံ,ဒီးဒုးမူဒံးအီၤလီၤ.

34ဒီးစီၤဘံးလၣ်စံးဘၣ်ယွၤအကလူး,ယမၤလံတၢ်ဒဲးဘးလံ,အဂ့ၢ်ဒ်အံၤ,ယတသ့ၣ်ညါဘၣ်လၢနဆၢထၢၣ်ထီဒါယၤလၢကျဲပူၤဘၣ်.ဒီးခဲကနံၣ်အံၤမ့မ့ၢ်တၢ်အၢလၢနမဲာ်ညါဒီး,ယကက့ၤကဒါက့ၤလၢယလီၢ်ခံလီၤ.

35ဒီးယွၤအကလူးန့ၣ်စံးဘၣ်စီၤဘံးလၣ်,လဲၤတၢ်ဒီးပှၤတဖၣ်န့ၣ်တက့ၢ်.ဘၣ်ဆၣ်ဒီးထဲတၢ်ကတိၤလၢယကတိၤဒီးနၤန့ၣ်နဘၣ်ကတိၤတၢ်လီၤ.ဒီးစီၤဘံးလၣ်လဲၤဝဲဒီးစီၤဘၤလးအပဒိၣ်တဖၣ်န့ၣ်လီၤ.

36ဒီးစီၤဘၤလးနၢ်ဟူဝဲလၢစီၤဘံးလၣ်ဟဲဝဲ,ဒီးလဲၤသဂၢၢ်ထီၣ်အီၤဆူမိၤအးအဝ့ၢ်တဖျၢၣ်လၢအအိၣ်လၢထံအၢ်နိၣ်အနံၤလၢတၢ်အဃၢၤအကတၢၢ်န့ၣ်လီၤ. 37ဒီးစီၤဘၤလးစံးဘၣ်စီၤဘံးလၣ်,ယမၢပှၤလဲၤကိးန့ၢ်နၤသပှၢ်တၢၢ်တမ့ၢ်ဘၣ်ဧါ,နတဟဲဘၣ်ဆူယအိၣ်ဘၣ်မနုၤလဲၣ်.ယပာ်တၢ်လၤကပီၤလၢနလိၤတသ့ဘၣ်ဧါ.

38ဒီးစီၤဘံးလၣ်စံးဘၣ်စီၤဘၤလး,ကွၢ်ကွၢ်,ခဲကနံၣ်အံၤယဟဲလံဆူနအိၣ်လံ.ယစံးယဲတၢ်တမံၤမံၤကဲစ့ၢ်ကီးဧါ.တၢ်ကတိၤလၢယွၤပာ်လၢယထးခိၣ်န့ၣ်ယကကတိၤန့ၣ်လီၤ. 39ဒီးစီၤဘံးလၣ်န့ၣ်လဲၤတၢ်ဒီးစီၤဘၤလး,ဒီးဟဲတုၤလၢကံးရယးဃူၤစိးလီၤ.

40ဒီးစီၤဘၤလးလုၢ်ဂီၤဖံးတဖၣ်,ဒီးသိတဖၣ်,ဒီးမၢလီၤတၢ်ဆူစီၤဘံးလၣ်,ဒီးဆူပဒိၣ်တဖၣ်လၢအအိၣ်ဒီးအီၤအအိၣ်လီၤ. 41ဒီးတၢ်မၤအသးလၢမုၢ်ဆ့ၣ်ထီၣ်တနံၤန့ၣ်စီၤဘၤလးဟံးန့ၢ်စီၤဘံးလၣ်ဒီးစိာ်အီၤဆူဘဧၤလးအလီၢ်ထီၣ်ထီတဖၣ်,ဒီးထံၣ်ဘၣ်ဖဲန့ၣ်ပှၤဂီၢ်မုၢ်ပၢၢ်လၢအကတၢၢ်န့ၣ်လီၤ.