‏ Numbers 3

1လၢမုၢ်နံၤလၢယွၤကတိၤတၢ်ဒီးစီၤမိၤရှ့လၢကစၢၢ်စံၤနါအလိၤန့ၣ်စီၤအၤဟရိၣ်ဒီးစီၤမိၤရှ့အစၢၤအသွဲၣ်မ့ၢ်အအံၤလီၤ.

2ဒီးအအံၤမ့ၢ်စီၤအၤဟရိၣ်အဖိခွါတဖၣ်အမံၤလီၤ.

3အဖိဝဲၢ်ကိစီၤနၤဒးဒီးစီၤအဘံဟူၤ,ဒီးစီၤအလၤဧစၢ်ဒီးစီၤအံသမၢ်လီၤ.အအံၤမ့ၢ်စီၤအၤဟရိၣ်အဖိခွါ,ပှၤလုၢ်တၢ်အဒိၣ်လၢအဒိးတၢ်ဖှူအီၤလၢအဝဲဒၣ်ပာ်စီဆှံဒ်သိးအကမၤပှၤလုၢ်တၢ်အဒိၣ်အတၢ်တဖၣ်အမံၤလီၤ.

4ဒီးတုၤအဟ့ၣ်မ့ၣ်အူလီၤဆီဒၣ်တၢ်လၢယွၤအမဲာ်ညါဒီး,စီၤနၤဒးဒီးစီၤအဘံဟူၤသံဝဲလၢယွၤအမဲာ်ညါလၢပှၢ်မုၢ်ကနၢစံၤနါ,ဒီးအဖိအလံၤတအိၣ်ဘၣ်,ဒီးစီၤအလၤဧစၢ်,ဒီးစီၤအံသမၢ်န့ၣ်မၤပှၤလုၢ်တၢ်အဒိၣ်အတၢ်လၢအပၢ်အမဲာ်ညါလီၤ.

5ဒီးယွၤကတိၤတၢ်ဒီးစီၤမိၤရှ့,ဒီးစံးဝဲဒၣ်, 6ဒုးဟဲဘူးလ့ၤဝံအဒူၣ်,ဒီးပာ်အီၤလၢပှၤလုၢ်တၢ်အဒိၣ်စီၤအၤဟရိၣ်အမဲာ်ညါ,ဒ်သိးအကမၤအခ့အပှၤအတၢ်တက့ၢ်.

7ဒီးဘၣ်ကွၢ်အဝဲဒၣ်အတၢ်ကွၢ်ဒီးတၢ်အိၣ်ဖှိၣ်ခဲလၢာ်အတၢ်ကွၢ်လၢတၢ်အိၣ်ဖှိၣ်အဒဲအမဲာ်ညါ,ဒ်သိးအကမၤဒဲအတၢ်မၤလီၤ. 8ဒီးဘၣ်ကွၢ်ကယဲၢ်တၢ်အိၣ်ဖှိၣ်အဒဲအတၢ်ဖိတၢ်လံၤ,ဒီးပှၤအံၣ်စရ့လးဖိအတၢ်ကွၢ်ဒ်သိးအကမၤဒဲအခ့အပှၤအတၢ်မၤလီၤ.

9ဒီးနဘၣ်ဟ့ၣ်ပှၤလ့ၤဝံဖိလၢစီၤအၤဟရိၣ်ဒီးအဖိခွါတဖၣ်လီၤ.တၢ်ဟ့ၣ်လီၤအီၤသပှၢ်တၢၢ်လၢပှၤအံၣ်စရ့လးဖိအကျါလီၤ.

10ဒီးနဘၣ်ပာ်လီၤစီၤအၤဟရိၣ်ဒီးအဖိခွါ,ဒီးအဝဲသ့ၣ်ဘၣ်တိၢ်န့ၢ်ဝဲလၢအပှၤလုၢ်တၢ်အဒိၣ်အတၢ်လီၤ.ဒီးပှၤတခီဘီမုၢ်ဖိလၢအသုးဘူးအသးန့ၣ်ကဘၣ်တၢ်မၤသံအီၤလီၤ.

11ဒီးယွၤကတိၤတၢ်ဒီးစီၤမိၤရှ့,ဒီးစံးဝဲဒၣ်, 12ဒီးယဲဒၣ်အံၤ,ကွၢ်ကွၢ်,ယဟံးန့ၢ်ပှၤလ့ၤဝံဖိလၢပှၤအံၣ်စရ့လးဖိအကျါလၢကယဲၢ်ပှၤဝဲၢ်ကိလၢအအိးထီၣ်ပှၤအဒၢလီၢ်လၢပှၤအံၣ်စရ့လးဖိအကျါခဲလၢာ်အလီၢ်လီၤ.အန့ၣ်ဒီးပှၤလ့ၤဝံဖိကကဲထီၣ်ယတၢ်လီၤ.

13အဂ့ၢ်ဒ်အံၤ,ကယဲၢ်တၢ်ဝဲၢ်ကိန့ၣ်မ့ၢ်ယတၢ်လီၤ.မုၢ်နံၤလၢယကျီသံကွံာ်ကယဲၢ်တၢ်ဝဲၢ်ကိလၢကီၢ်အဲၤကူပတူးအပူၤန့ၣ်ယပာ်စီဆှံကယဲၢ်တၢ်ဝဲၢ်ကိလၢပှၤအံၣ်စရ့လးဖိအကျါ,ပှၤကညီမ့ၢ်ဂ့ၤ,ဆၣ်ဖိကီၢ်ဖိမ့ၢ်ဂ့ၤ,လၢယဂီၢ်လီၤ.ဘၣ်ကဲထီၣ်ယတၢ်လီၤ.ယဲဒၣ်အံၤယမ့ၢ်ယွၤလီၤ.

14ဒီးယွၤကတိၤတၢ်ဒီးစီၤမိၤရှ့လၢပှၢ်မုၢ်ကနၢစံၤနါဒီးစံးဝဲဒၣ်, 15ဂံၢ်ပှၤလ့ၤဝံဖိဒ်အပၢ်အဟံၣ်တဖၣ်အသိး,ဒ်အဒူၣ်တဖၣ်အသိးန့ၣ်တက့ၢ်.ကယဲၢ်ပှၤပိာ်ခွါလၢအသးပှၢ်တလါဒီးဆူအဖီခိၣ်ကိးဂၤဒဲးန့ၣ်နဘၣ်ဂံၢ်အီၤလီၤ. 16ဒီးစီၤမိၤရှ့ဂံၢ်အီၤဒ်ယွၤအကလုၢ်အသိး,ဒ်တၢ်မၤလိာ်အီၤအသိးန့ၣ်လီၤ.

17ဒီးအအံၤမ့ၢ်စီၤလ့ၤဝံအဖိခွါလၢအမံၤ,စီၤက့ရၡိၣ်,ဒီးစီၤကဃး,ဒီးစီၤမရၤရံၤလီၤ.

18ဒီးအအံၤမ့ၢ်စီၤက့ရၡိၣ်အဖိခွါအမံၤဒ်အဒူၣ်တဖၣ်အသိးန့ၣ်စီၤလံးဘနံၤ,ဒီးစီၤၡံမံၤလီၤ.

19ဒီးစီၤကဃးအဖိခွါဒ်အဒူၣ်တဖၣ်အသိးန့ၣ်မ့ၢ်စီၤဧၤမရၣ်,ဒီးစီၤယံးစတၢ်,ဒီးစီၤဃ့ဘြိၣ်,ဒီးစီၤဧူးစံၤအ့လးလီၤ.

20ဒီးစီၤမရၤရံၤအဖိခွါဒ်အဒူၣ်တဖၣ်အသိးန့ၣ်မ့ၢ်စီၤမးဃလံၤ,ဒီးစီၤမူၡံၤလီၤ.အအံၤမ့ၢ်ပှၤလ့ၤဝံဖိအဒူၣ်တဖၣ်ဒ်အပၢ်အဟံၣ်တဖၣ်အသိးန့ၣ်လီၤ.

21ဒီးပှၤလံးဘနံၤဖိအဒူၣ်,ဒီးပှၤစီၤၡမၤဖိအဒူၣ်န့ၣ်,ကဲထီၣ်ဝဲလၢစီၤက့ရၡိၣ်လီၤ.အန့ၣ်မ့ၢ်ပှၤက့ရၡိၣ်အဒူၣ်တဖၣ်လီၤ. 22ဒီးပှၤလၢအဘၣ်တၢ်ဂံၢ်အီၤလၢအကျါ,ဒ်အပိာ်ခွါလၢအသးပှၢ်တလါ,ဒီးအါန့ၢ်အန့ၣ်အသိးန့ၣ်ပှၤလၢအဘၣ်တၢ်ဂံၢ်အီၤလၢအကျါန့ၣ်မ့ၢ်ပှၤနွံကထိ,ဒီးယဲၢ်ကယၤလီၤ.

23ဒီးပှၤက့ရၡိၣ်ဖိအဒူၣ်တဖၣ်န့ၣ်ဘၣ်သူၣ်အဒဲလၢတၢ်အိၣ်အလီၢ်အချၢဃံလၢမုၢ်နုာ်တခီလီၤ.

24ဒီးပှၤက့ရၡိၣ်ဖိအပၢ်အဟံၣ်အပဒိၣ်န့ၣ်မ့ၢ်စီၤလၤအ့လးအဖိခွါစီၤအ့လယၤစာ်လီၤ.

25ဒီးပှၤက့ရၡိၣ်ဖိအဖိခွါအတၢ်ကွၢ်ဘၣ်ဃးဒီးတၢ်အိၣ်ဖှိၣ်အဒဲန့ၣ်မ့ၢ်တၢ်အိၣ်အလီၢ်,ဒီးဒဲ,အတၢ်ကျၢၢ်ဘၢ,ဒီးယၣ်နီၣ်ကျၢၢ်ဘၢတၢ်လၢတၢ်အိၣ်ဖှိၣ်အဒဲအကျဲစၢၤအဂီၢ်, 26ဒီးတၢ်ဂၢၤအယၣ်လီၤစဲၤ,ဒီးယၣ်နီၣ်ကျၢၢ်ဘၢတၢ်လၢဂၢၤအကျဲစၢၤအဂီၢ်လၢအအိၣ်လၢဒဲအဃၢၤ,ဒီးလၢတၢ်လုၢ်လီၢ်အဃၢၤဝးတရံးဝဲ,ဒီးအပျံၤတဖၣ်လၢအမၤတၢ်ခဲလၢာ်အဂီၢ်လီၤ.

27ဒီးပှၤဧၤမရၣ်ဖိအဒူၣ်,ဒီးပှၤယံးစဟၢ်ဖိအဒူၣ်,ဒီးပှၤဃ့ဘြိၣ်ဖိအဒူၣ်,ဒီးပှၤဧူးစံၤအ့လးဖိအဒူၣ်န့ၣ်ကဲထီၣ်ဝဲလၢစီၤကဃးလီၤ.အန့ၣ်မ့ၢ်ပှၤကဃးဖိအဒူၣ်တဖၣ်လီၤ. 28ဒီးအဖိခွါလၢအသးပှၢ်တလါဒီးအါန့ၢ်အန့ၣ်တၢ်ဂံၢ်ဃိးကထိဒီးဃုကယၤလီၤ.မ့ၢ်ပှၤလၢအကွၢ်တၢ်ဘၣ်ဃးဒီးတၢ်အလီၢ်စီဆှံအတၢ်ကွၢ်လီၤ.

29ဒီးစီၤကဃးအဖိခွါအဒူၣ်တဖၣ်န့ၣ်ဘၣ်သူၣ်အဒဲလၢတၢ်အိၣ်အလီၢ်အကပၤလၢကလံၤထံးတခီလီၤ. 30ဒီးပှၤကဃးဖိအပၢ်အဟံၣ်အဒူၣ်တဖၣ်အပဒိၣ်န့ၣ်မ့ၢ်စီၤဧူးစံၤအ့လးအဖိခွါစီၤအလံစဖၣ်လီၤ.

31ဒီးအကွၢ်တၢ်န့ၣ်မ့ၢ်တလါ,ဒီးစီၢ်နီၤခိၣ်,ဒီးမ့ၣ်အူဒၢမိၢ်ပှၢ်,ဒီးတၢ်လုၢ်လီၢ်တဖၣ်,ဒီးတၢ်အလီၢ်စီဆှံအတၢ်ဖိတၢ်လံၤလၢပှၤမၤအတၢ်လၢအီၤ,ဒီးယၣ်နီၣ်ကျၢၢ်ဘၢတၢ်,ဒီးကယဲၢ်တၢ်ဘၣ်ဃးဒီးအမၤတၢ်ခဲလၢာ်လီၤ.

32ဒီးပှၤလုၢ်တၢ်အဒိၣ်စီၤအၤဟရိၣ်အဖိခွါစီၤအလၤဧစၢ်ကကဲထီၣ်ပှၤလ့ၤဖိအပဒိၣ်တဖၣ်အခိၣ်လီၤ.ကကွၢ်ပှၤလၢအကွၢ်တၢ်အလီၢ်စီဆှံအတၢ်လီၤ.

33ဒီးပှၤမးဃလံၤဖိအဒူၣ်,ဒီးပှၤမူၡံၤဖိအဒူၣ်န့ၣ်ဘၣ်ဃးဒီးစီၤမရၤရံၤလီၤ.အဝဲသ့ၣ်တဖၣ်န့ၣ်မ့ၢ်စီၤမရၤရံၤအဒူၣ်တဖၣ်လီၤ.

34ဒီးပှၤလၢအဘၣ်တၢ်ဂံၢ်အီၤ,ဒ်ကယဲၢ်ပိာ်ခွါလၢအသးပှၢ်တလါဒီးအါန့ၢ်အန့ၣ်ခဲလၢာ်ဒ်အတၢ်ဂံၢ်အသိးန့ၣ်မ့ၢ်ဃုကထိဒီးခံကယၤလီၤ. 35ဒီးပှၤမရၤရံၤဖိအပၢ်အဟံၣ်အဒူၣ်တဖၣ်အပဒိၣ်မ့ၢ်စီၤအဘံဃယ့းလးအဖိခွါစီၤစူရံၤအ့လးလီၤ.အဝဲသ့ၣ်တဖၣ်န့ၣ်ဘၣ်သူၣ်အဒဲလၢတၢ်အိၣ်အလီၢ်အကပၤလၢကလံၤစိးတခီလီၤ.

36ဒီးစီၤမရၤရံၤအဖိခွါ,အတၢ်ကွၢ်လၢအလီၤဘၣ်အီၤန့ၣ်မ့ၢ်တၢ်အိၣ်အလီၢ်အသ့ၣ်ဘ့ၣ်ဘၣ်,ဒီးအနီၣ်ဘိ,ဒီးအထူၣ်,ဒီးအခီၣ်,ဒီးအတၢ်ဖိတၢ်လံၤခဲလၢာ်,ဒီးကယဲၢ်တၢ်ဘၣ်ဃးဒီးအတၢ်မၤ, 37ဒီးတၢ်ဂၢၤဝးတရံးအထူၣ်,ဒီးအခီၣ်,ဒီးအတၢ်ကမိာ်ခံ,ဒီးအပျံၤလီၤ.

38မ့မ့ၢ်ပှၤလၢအသူၣ်အဒဲလၢတၢ်အိၣ်အလီၢ်လၢမုၢ်ထီၣ်တခီ,လၢတၢ်အိၣ်ဖှိၣ်အဒဲအမဲာ်ညါန့ၣ်ကမ့ၢ်စီၤမိၤရှ့,ဒီးစီၤအၤဟရိၣ်,ဒီးအဖိခွါတဖၣ်လီၤ.ကကွၢ်တၢ်အအလီၢ်စီဆှံအတၢ်ကွၢ်လၢပှၤအံၣ်စရ့လးဖိအတၢ်ကွၢ်အဂီၢ်လီၤ.ဒီးပှၤတခီဘီမုၢ်ဖိလၢအသုးဘူးအသးန့ၣ်ကဘၣ်တၢ်မၤသံအီၤလီၤ.

39ဒီးကယဲၢ်ပှၤလၢအဘၣ်တၢ်ဂံၢ်အီၤလၢပှၤလ့ၤဝံဖိအကျါ,လၢစီၤမိၤရှ့ဒီးစီၤအၤဟရိၣ်ဂံၢ်ဝဲလၢယွၤအတၢ်မၤလိာ်ဒ်အဒူၣ်တဖၣ်အသိးကယဲၢ်ပိာ်ခွါလၢအသးပှၢ်တလါဒီးဆူအဖီခိၣ်မ့ၢ်ခံကလးဒီးခံကထိလီၤ.

40ဒီးယွၤစံးဘၣ်စီၤမိၤရှ့,ဂံၢ်ကယဲၢ်ပှၤဝဲၢ်ကိပိာ်ခွါလၢပှၤအံၣ်စရ့လးဖိအကျါလၢအသးပှၢ်တလါဒီးအါန့ၢ်အန့ၣ်,ဒီးဟံးန့ၢ်အမံၤအတၢ်ဂံၢ်တက့ၢ်.

41ဒီးနဘၣ်ဟံးန့ၢ်ပှၤလ့ၤဝံဖိလၢယဂီၢ်,(ယဲဒၣ်အံၤယမ့ၢ်ယွၤ)လၢကယဲၢ်ပှၤဝဲၢ်ကိလၢပှၤအံၣ်စရ့လးဖိအကျါအလီၢ်,ဒီးပှၤလ့ၤဝံဖိအဆၣ်ဖိကီၢ်ဖိအဒၢလၢကယဲၢ်တၢ်ဝဲၢ်ကိလၢပှၤအံၣ်စရ့လးဖိအဆၣ်ဖိကီၢ်ဖိအဒၢအကျါအလီၢ်လီၤ.

42ဒီးစီၤမိၤရှ့ဂံၢ်ကယဲၢ်ပှၤဝဲၢ်ကိလၢပှၤအံၣ်စရ့လးဖိအကျါ,ဒ်ယွၤမၤလိာ်အီၤအသိးန့ၣ်လီၤ. 43ဒီးကယဲၢ်ပှၤဝဲၢ်ကိပိာ်ခွါလၢအမံၤအတၢ်ဂံၢ်လၢအသးပှၢ်တလါဒီးအါန့ၢ်အန့ၣ်တၢ်ဂံၢ်ခံကလးဒီးခံကထိဒီးခံကယၤဒီးနွံဆံသၢဂၤလီၤ.

44ဒီးယွၤကတိၤတၢ်ဒီးစီၤမိၤရှ့,ဒီးစံးဝဲဒၣ်, 45ဟံးန့ၢ်ပှၤလ့ၤဝံဖိလၢကယဲၢ်ပှၤဝဲၢ်ကိလၢပှၤအံၣ်စရ့လးဖိအကျါအလီၢ်,ဒီးပှၤလ့ၤဝံဖိအဆၣ်ဖိကီၢ်ဖိအဒၢလၢအဆၣ်ဖိကီၢ်ဖိအဒၢအလီၢ်တက့ၢ်.ဒီးပှၤလ့ၤဝံဖိကကဲထီၣ်ယတၢ်လီၤ.ယဲဒၣ်အံၤယမ့ၢ်ယွၤလီၤ.

46ဒီးလၢတၢ်ပှ့ၤက့ၤပှၤဝဲၢ်ကိလၢပှၤအံၣ်စရ့လးဖိအကျါလၢအအါန့ၢ်ပှၤလ့ၤဝံဖိ,ပှၤခံကယၤဒီးနွံဆံသၢဂၤအဂီၢ်န့ၣ်, 47နဘၣ်ဟံးန့ၢ်လၢအလီၢ်တဂၤစ့ယဲၢ်ၡက့လး,တဂၤယဲၢ်ၡက့လး,ဒ်အခိၣ်တဖၣ်အသိးန့ၣ်လီၤ.ဒ်တၢ်အလီၢ်စီဆှံအၡက့လးအသိးန့ၣ်လီၤ.(ၡက့လးတဘ့ၣ်န့ၣ်မ့ၢ်က့ရၤအဘ့ၣ်ခံဆံလီၤ.)

48ဒီးစ့လၢအပှ့ၤက့ၤပှၤလၢအအိၣ်အါကဲၣ်ဆိးန့ၣ်နဘၣ်ဟ့ၣ်လီၤလၢစီၤအၤဟရိၣ်ဒီးအဖိခွါတဖၣ်လီၤ. 49ဒီးပှၤလၢအအိၣ်အါန့ၢ်အဘၣ်တၢ်ပှ့ၤက့ၤအီၤလၢပှၤလ့ၤဝံဖိန့ၣ်စီၤမိၤရှ့ဟံးန့ၢ်အပှ့ၤက့ၤအစ့လီၤ. 50ဟံးန့ၢ်စ့လၢပှၤဝဲၢ်ကိလၢပှၤအံၣ်စရ့လးဖိအကျါ,စ့တကထိသၢကယၤဒီးဃုဆံဒီးယဲၢ်ၡက့လးဒ်တၢ်အလီၢ်စီဆှံအၡက့လးအသိးန့ၣ်လီၤ.

51ဒီးစီၤမိၤရှ့ဟ့ၣ်လီၤပှၤလၢအဘၣ်တၢ်ပှ့ၤက့ၤအီၤအစ့လၢစီၤအၤဟရိၣ်ဒီးအဖိခွါတဖၣ်,ဒ်ယွၤအကလုၢ်အသိး,ဒ်ယွၤမၤလိာ်စီၤမိၤရှ့အသိးန့ၣ်လီၤ.