Numbers 30
1ဒီးစီၤမိၤရှ့ကတိၤတၢ်ဒီးပှၤဒူၣ်တဖၣ်အခိၣ်တဖၣ်လၢပှၤအံၣ်စရ့လးဖိအဂ့ၢ်,ဒီးစံးဝဲဒၣ်,အအံၤမ့ၢ်တၢ်လၢယွၤမၤလိာ်တၢ်, 2ပှၤမ့ၢ်ဆိၣ်တၢ်ဆိၣ်လၢယွၤအဂီၢ်မ့ၢ်ဂ့ၤ,ဆိၣ်လီၤစၢဃာ်အသးမ့ၢ်ဂ့ၤ,တဘၣ်မၤဟးဂီၤအတၢ်ကတိၤဘၣ်.ကဘၣ်မၤဒ်ကယဲၢ်တၢ်လၢအထီၣ်ဖျဲးလၢအထးခိၣ်အသိးန့ၣ်လီၤ. 3ဒီးပိာ်မုၣ်လၢအသးစၢ်လၢအအိၣ်လၢပၢ်အဟံၣ်တဂၤန့ၣ်မ့ၢ်ဆိၣ်လီၤစၢဃာ်အသးလၢယွၤအဂီၢ်ဒီး, 4အပၢ်မ့ၢ်နၢ်ဟူအဆိၣ်တၢ်,ဒီးတၢ်လၢအစၢဃာ်အသးလၢအီၤ,ဒီးအပၢ်မ့ၢ်အိၣ်ဘှီၣ်ကလာ်ဒီးအီၤဒီး,အတၢ်ဆိၣ်တၢ်ကအိၣ်ဂၢၢ်ဆိးကျၢၤ,ဒီးကယဲၢ်တၢ်လၢအစၢဃာ်အသးလၢအီၤတမံၤလၢ်လၢ်န့ၣ်ကအိၣ်ဂၢၢ်ဆိးကျၢၤလီၤ. 5မ့မ့ၢ်မုၢ်တနံၤလၢအနၢ်ဟူတၢ်န့ၣ်အပၢ်မ့ၢ်တအၢၣ်လီၤအီလီၤဘၣ်ဒီး,အတၢ်ဆိၣ်ဒီးအတၢ်စၢဃာ်လၢအစၢဃာ်အသးန့ၣ်တအိၣ်ဂၢၢ်ဆိးကျၢၤဘၣ်နီတမံၤဘၣ်,ဒီးယွၤကပျၢ်အတၢ်လီၤ.အဂ့ၢ်ဒ်အံၤ,အပၢ်တအၢၣ်လီၤအီလီၤဘၣ်လီၤ. 6ဒီးမ့ၢ်အိၣ်ဒီးအဝၤ,ဒီးမ့ၢ်ဆိၣ်တၢ်မ့ၢ်ဂ့ၤ,မ့ၢ်မၤထီၣ်ဖျဲးလၢအထးခိၣ်,လၢတၢ်လၢအစၢဃာ်အသးတမံၤမံၤမ့ၢ်ဂ့ၤ, 7အဝၤမ့ၢ်နၢ်ဟူ,ဒီးမုၢ်တနံၤလၢအနၢ်ဟူမ့ၢ်အိၣ်ဘှီၣ်ကလာ်ဒီးအီၤဒီး,အတၢ်ဆိၣ်ကအိၣ်ဂၢၢ်ဆိးကျၢၤ,ဒီးအတၢ်စၢဃာ်လၢအစၢဃာ်အသးလၢအီၤကအိၣ်ဂၢၢ်ဆိးကျၢၤလီၤ. 8ဒီးမုၢ်တနံၤလၢအနၢ်ဟူတၢ်န့ၣ်မ့ၢ်တအၢၣ်လီၤအီလီၤဘၣ်ဒီး,အတၢ်ဆိၣ်လၢအဆိၣ်ဝဲ,ဒီးတၢ်လၢအထီၣ်ဖျဲးလၢအထးခိၣ်လၢအစၢဃာ်အသးလၢအီၤန့ၣ်ကကဲထီၣ်တၢ်ကလီကလီ,ဒီးယွၤကပျၢ်အတၢ်လီၤ. 9မ့မ့ၢ်ကယဲၢ်ပှၤမုၣ်ကမဲ,ဒီးပှၤပိာ်မုၣ်လၢအလီၤဖှၣ်ဒီးအဝၤတဂၤလၢ်လၢ်န့ၣ်အတၢ်ဆိၣ်လၢအစၢဃာ်အသးလၢအီၤန့ၣ်ကအိၣ်ဂၢၢ်ဆိးကျၢၤလၢအဂီၢ်လီၤ. 10ဒီးမ့ၢ်ဆိၣ်တၢ်လၢအဝၤအဟံၣ်ပူၤမ့ၢ်ဂ့ၤ,မ့ၢ်စၢဃာ်အသးလၢတၢ်စၢဃာ်အိၣ်ဒီးတၢ်ဆိၣ်မ့ၢ်ဂ့ၤ,ဒီးအဝၤမ့ၢ်နၢ်ဟူဝဲဒီးအိၣ်ဘှီၣ်ကလာ်ဒီးအီၤဒီး,အဆိၣ်တၢ်ခဲလၢာ်ကအိၣ်ဂၢၢ်ဆိးကျၢၤ, 11ဒီးအတၢ်စၢဃာ်လၢအစၢဃာ်အသးလၢအီၤန့ၣ်ကအိၣ်ဂၢၢ်ဆိးကျၢၤကိးမံၤဒဲးလီၤ. 12မ့မ့ၢ်မုၢ်တနံၤလၢအနၢ်ဟူဝဲန့ၣ်အဝၤမ့ၢ်ပာ်အီၤကလီကလီသပှၢ်တၢၢ်ဒီး,တၢ်ထီၣ်ဖျဲးလၢအထးခိၣ်လၢအဆိၣ်တၢ်အဂ့ၢ်မ့ၢ်ဂ့ၤ,လၢတၢ်စၢဃာ်လၢအစၢဃာ်အသးအဂ့ၢ်မ့ၢ်ဂ့ၤ,တအိၣ်ဂၢၢ်တဆိးကျၢၤဘၣ်နီတမံၤဘၣ်.အဝၤမၤအီၤကလီကလီ,ဒီးယွၤကပျၢ်အတၢ်လီၤ. 13ကယဲၢ်တၢ်ဆိၣ်ဒီးကယဲၢ်တၢ်ဆိၣ်လၢအစၢဃာ်အီၤဒ်သိးအကဆိၣ်လီၤအသးန့ၣ်အဝၤမၤဂၢၢ်မၤကျၢၤသ့,မ့တမ့ၢ်ဘၣ်မၤဟးဂူာ်မၤဟးဂီၤသ့လီၤ. 14မ့မ့ၢ်အဝၤမ့ၢ်အိၣ်ဘှီၣ်ကလာ်ဒီးအီၤတနံၤဘၣ်တနံၤဒီး,အတၢ်ဆိၣ်ခဲလၢာ်မ့ၢ်ဂ့ၤ,အတၢ်စၢဃာ်လၢအအိၣ်လၢအလိၤခဲလၢာ်မ့ၢ်ဂ့ၤ,ဒုးအိၣ်ဂၢၢ်ဆိးကျၢၤဝဲလီၤ.မုၢ်တနံၤလၢအနၢ်ဟူဝဲန့ၣ်မ့ၢ်အအိၣ်ဘှီၣ်ကလာ်ဒီးအီၤဒီး,မ့ၢ်အဒုးအိၣ်ဂၢၢ်ဆိးကျၢၤဝဲလီၤ. 15ဒီးလၢအနၢ်ဟူဝဲန့ၣ်အလီၢ်ခံန့ၣ်မ့ၢ်မၤဟးဂီၤအီၤသပှၢ်တၢၢ်ဒီး,ကတူၢ်ဘၣ်ပိာ်မုၣ်အတၢ်အၢတၢ်သီလီၤ. 16တၢ်တဖၣ်န့ၣ်မ့ၢ်တၢ်သိၣ်တၢ်သီလၢယွၤမၤလိာ်စီၤမိၤရှ့လၢပှၤမါပှၤဝၤအဘၢၣ်စၢၤ,ဒီးလၢအပၢ်ဒီးအဖိမုၣ်အသးစၢ်အိၣ်လၢအပၢ်အဟံၣ်အဘၢၣ်စၢၤန့ၣ်လီၤ.
Copyright information for
KswSKMB