‏ Numbers 31

1ဒီးယွၤကတိၤတၢ်ဒီးစီၤမိၤရှ့,ဒီးစံးဘၣ်အီၤ, 2မၤအၢဆၢပှၤမံးဒယၣ်ဖိလၢပှၤအံၣ်စရ့လးဖိအဂီၢ်တက့ၢ်.လၢခံက့ၤဒီးနကဘၣ်တၢ်ပာ်ဖှိၣ်နၤဒီးနပှၤဂီၢ်မုၢ်လီၤ.

3ဒီးစီၤမိၤရှ့ကတိၤတၢ်ဒီးပှၤဂီၢ်မုၢ်ဒီးစံးဝဲဒၣ်,ဒုးသိးထီၣ်ပှၤတနီၤနီၤလၢသုကျါလၢစုကဝဲၤလၢဒုးသုးအဂီၢ်တက့ၢ်,ဒီးမ်အလဲၤထီဒါပှၤမံးဒယၣ်ဖိ,ဒီးမၤအၢဆၢပှၤမံးဒယၣ်ဖိလၢယွၤအဂီၢ်တက့ၢ်. 4ပှၤတဒူၣ်အကျါပှၤတကထိ,ပှၤတဒူၣ်အကျါပှၤတကထိန့ၣ်သုဘၣ်မၢအလဲၤဒုးသုးလၢပှၤအံၣ်စရ့လးဖိဒူၣ်ခဲလၢာ်အကျါလီၤ.

5ဒီးနီၤဖးဝဲလၢပှၤအံၣ်စရ့လးဖိခဲလၢာ်အကျါတဒူၣ်တကထိ,တဒူၣ်တကထိ,ပှၤတဆံခံဒူၣ်အိၣ်ဒီးအစုကဝဲၤလၢအဒုးသုးအဂီၢ်လီၤ.

6ဒီးစီၤမိၤရှ့မၢအလဲၤဒုးသုး,တဒူၣ်အကျါပှၤတကထိ,တဒူၣ်အကျါပှၤတကထိ,အဝဲသ့ၣ်တဖၣ်န့ၣ်ဒီးပှၤလုၢ်တၢ်အဒိၣ်စီၤအလၤဧစၢ်အဖိခွါစီၤပံၤနဃၣ်ဒ်သိးအကဒုးသုး,အိၣ်ဒီးအတၢ်အပိးအလီစီဆှံ,ဒီးကွဲၤတဖၣ်လၢအစုပူၤလီၤ.

7ဒီးဒုးသုးဒီးပှၤမံးဒယၣ်ဖိ,ဒ်ယွၤမၤလိာ်စီၤမိၤရှ့အသိးန့ၣ်ဒီးမၤသံပှၤပိာ်ခွါခဲလၢာ်လီၤ. 8ဒီးလၢပှၤလၢအဘၣ်တၢ်မၤသံအီၤအဂၤအမဲာ်ညါန့ၣ်,မၤသံမံးဒယၣ်အစီၤပၤတဖၣ်စီၤအဝံၤ,ဒီးစီၤရ့က့ၣ်,ဒီးစီၤစူၢ်,ဒီးစီၤဃူၢ်,ဒီးစီၤရ့ဘၤ,မံးဒယၣ်အစီၤပၤယဲၢ်ဂၤလီၤ.ဒီးစီၤဘဧိၢ်အဖိခွါစီၤဘံးလၣ်စ့ၢ်ကီးမၤသံဝဲလၢနးလီၤ.

9ဒီးပှၤအံၣ်စရ့လးဖိဖီၣ်န့ၢ်မၢကဲကုၢ်ပှၤမံးဒယၣ်မုၣ်,ဒီးအဖိဆံးတဖၣ်,ဒီးမၤန့ၢ်ဆူၣ်ကယဲၢ်အဆၣ်ဖိကီၢ်ဖိ,ဒီးကယဲၢ်အတၢ်ဖိတၢ်လံၤ,ဒီးကယဲၢ်အစုလီၢ်အခီၣ်ခိၣ်ခဲလၢာ်လီၤ.

10ဒီးဆူးထီၣ်ကွံာ်ဝဲအခူအဝ့ၢ်ဖဲအအိၣ်အဆိးလၢအပူၤခဲလၢာ်,ဒီးအလီၢ်အိၣ်ဒီးအခိၣ်ဒူဂ့ၤခဲလၢာ်,လၢမ့ၣ်အူလီၤ. 11ဒီးလၢပှၤကညီအကျါမ့ၢ်ဂ့ၤ,လၢဆၣ်ဖိကီၢ်ဖိအကျါမ့ၢ်ဂ့ၤ,ဟံးန့ၢ်ဝဲလၢတၢ်ဂုာ်န့ၢ်ခဲလၢာ်,ဒီးတၢ်မၤန့ၢ်ဆူၣ်ခဲလၢာ်လီၤ.

12ဒီးဟဲစိာ်ပှၤလၢအမၢကဲကုၢ်,ဒီးဆၣ်ဖိကီၢ်ဖိလၢအမၤန့ၢ်ဆူၣ်,ဒီးတၢ်ဖိတၢ်လံၤလၢအဂုာ်န့ၢ်န့ၣ်ဆူစီၤမိၤရှ့ဒီးပှၤလုၢ်တၢ်အဒိၣ်စီၤအလၤဧစၢ်,ဒီးပှၤအံၣ်စရ့လးဖိအတၢ်အိၣ်ဖှိၣ်အအိၣ်,ဆူပှၤသူၣ်ဒဲအလီၢ်လၢမိၤအးအပျီပူၤလၢအအိၣ်လၢထံယၢ်ဒ့ၣ်အနံၤ,သဃီၤဒီးယရံၤဃိလီၤ.

13ဒီးစီၤမိၤရှ့,ဒီးပှၤလုၢ်တၢ်အဒိၣ်စီၤအလၤဧစၢ်,ဒီးတၢ်အိၣ်ဖှိၣ်အပဒိၣ်တဖၣ်ခဲလၢာ်န့ၣ်လဲၤသဂၢၢ်ထီၣ်အီၤလၢပှၤသူၣ်ဒဲအလီၢ်လၢခိလီၤ.

14ဒီးစီၤမိၤရှ့အသးထီၣ်ပှၤသုးမုၢ်အပှၤကွၢ်အီၤတဖၣ်,ဒီးပှၤတကထိအခိၣ်တဖၣ်,ဒီးပှၤတကယၤအခိၣ်တဖၣ်လၢအဟဲက့ၤထီၣ်လၢဒုးသုးလီၤ. 15ဒီးစီၤမိၤရှ့စံးဘၣ်အီၤ,သုဒုးမူဒံးပှၤပိာ်မုၣ်ခဲလၢာ်စ့ၢ်ကီးဧါ, 16ကွၢ်ကွၢ်,မ့ၢ်လၢစီၤဘံးလၣ်အတၢ်ကတိၤသတးဒီး,အဝဲသ့ၣ်တဖၣ်ဒုးမၤကမၣ်ဘၣ်ပှၤအံၣ်စရ့လးဖိလၢယွၤလၢပဧိၢ်အတၢ်,ဒီးတၢ်သံသတြိာ်အိၣ်ထီၣ်လၢယွၤအတၢ်အိၣ်ဖှိၣ်အကျါလီၤ.

17ဒီးခဲကနံၣ်အံၤမၤသံကယဲၢ်ပှၤပိာ်ခွါလၢဖိဒံဖိသၣ်အကျါ,ဒီးမၤသံကယဲၢ်ပှၤပိာ်မုၣ်လၢအမံဃုာ်ဒီးပိာ်ခွါ,ဒီးသ့ၣ်ညါတ့ၢ်ပိာ်ခွါန့ၣ်ခဲလၢာ်တက့ၢ်. 18မ့မ့ၢ်ကယဲၢ်ဖိသၣ်ပိာ်မုၣ်လၢအတမံဃုာ်ဘၣ်ဒီးပိာ်ခွါ,ဒီးတသ့ၣ်ညါဘၣ်ပိာ်ခွါခဲလၢာ်န့ၣ်ဒုးမူဒံးအီၤလၢသုဂီၢ်ဒၣ်သုဝဲတက့ၢ်.

19ဒီးသုဝဲသ့ၣ်တဖၣ်န့ၣ်အိၣ်လၢပှၤသူၣ်ဒဲအလီၢ်လၢခိနွံနံၤတက့ၢ်,ဒီးကယဲၢ်ပှၤလၢအမၤသံပှၤတဂၤဂၤ,ဒီးကယဲၢ်ပှၤလၢအထိးဘၣ်ပှၤလၢအဘၣ်တၢ်မၤသံအီၤတဂၤဂၤန့ၣ်မၤကဆှီထီၣ်သုသးဒီးပှၤလၢသုဖီၣ်န့ၢ်မၢကဲကုၢ်အီၤ,လၢသၢနံၤတနံၤ,ဒီးလၢနွံနံၤတနံၤတက့ၢ်, 20ဒီးမၤကဆှီထီၣ်သုကူသုသိးခဲလၢာ်,ဒီးကယဲၢ်တၢ်လၢအမၤဝဲလၢတၢ်ဖံး,ဒီးကယဲၢ်တၢ်မၤဝဲလၢမဲာ်တဲးလဲးအဆူၣ်,ဒီးကယဲၢ်တၢ်မၤဝဲလၢသ့ၣ်ခဲလၢာ်န့ၣ်တက့ၢ်.

21ဒီးပှၤလုၢ်တၢ်အဒိၣ်စီၤအလၤဧစၢ်န့ၣ်စံးဘၣ်ပှၤသုးဖိလၢအလဲၤဒုးသုးတဖၣ်န့ၣ်,အအံၤမ့ၢ်တၢ်သိၣ်တၢ်သီအတၢ်မၤလိာ်လၢစီၤမိၤရှ့န့ၣ်, 22ထူဧိၤလွဲဧိၤ,ဒီးကျိၣ်ဧိၤစ့ဧိၤ,တိၢ်ဧိၤပှာ်ဧိၤ,ထးဧိၤတြၤဧိၤ,ပှာ်ဝါဒီးပှာ်သူ, 23ကယဲၢ်တၢ်လၢအတူၢ်မ့ၣ်အူကဲန့ၣ်သုဘၣ်ဒုးခီဂာ်အီၤလၢမ့ၣ်အူခဲလၢာ်,ဒီးကကဆှီထီၣ်လီၤ.ဘၣ်ဆၣ်ဒီးကဘၣ်တၢ်မၤကဆှီအီၤလၢတၢ်မၤကဆှီတၢ်အထံလီၤ.ဒီးကယဲၢ်တၢ်လၢအတူၢ်မ့ၣ်အူတကဲဘၣ်န့ၣ်သုဘၣ်ဒုးခီဂာ်အီၤလၢထံလီၤ. 24ဒီးနွံနံၤတနံၤန့ၣ်သုဘၣ်ဆှုၣ်သုကူသုသိး,ဒီးသုကကဆှီထီၣ်,ဒီးသုကဟဲနုာ်ဘၣ်လၢပှၤသူၣ်ဒဲအလီၢ်ပူၤလီၤ.

25ဒီးယွၤကတိၤတၢ်ဒီးစီၤမိၤရှ့,ဒီးစံးဝဲဒၣ်, 26ပှၤကညီမ့ၢ်ဂ့ၤ,ဆၣ်ဖိကီၢ်ဖိမ့ၢ်ဂ့ၤ,ဂံၢ်န့ၢ်တၢ်မၤန့ၢ်ဆူၣ်အခိၣ်တဖၣ်နဲဒၣ်ဒီးပှၤလုၢ်တၢ်အဒိၣ်စီၤအလၤဧစၢ်,ဒီးအတၢ်အိၣ်ဖှိၣ်အပၢ်အခိၣ်တဖၣ်န့ၣ်တက့ၢ်.

27ဒီးနီၤဖးတၢ်မၤန့ၢ်ဆူၣ်လၢခံပူ,တပူလၢပှၤလၢအဒုးတၢ်သ့,လၢအလဲၤဒုးသုးတဖၣ်အဂီၢ်,ဒီးတပူလၢပှၤဂီၢ်မုၢ်လၢအအိၣ်တ့ၢ်အဂီၢ်တက့ၢ်.

28ဒီးဟံးန့ၢ်အသွဲလၢပှၤလၢအလဲၤဒုးသုးတဖၣ်လၢယွၤအဂီၢ်တက့ၢ်.လၢယဲၢ်ကယၤအကျါတပူ,လၢပှၤကညီအကျါမ့ၢ်ဂ့ၤ,လၢဂီၤဖံးအကျါမ့ၢ်ဂ့ၤ,လၢကသ့ၣ်ယီၤအကျါမ့ၢ်ဂ့ၤ,လၢသိဒီးမဲာ်တဲးလဲးအကျါမ့ၢ်ဂ့ၤ,ဟံးန့ၢ်တပူလၢယဲၢ်ကယၤအကျါန့ၣ်တက့ၢ်.

29ဟံးန့ၢ်အီၤလၢအဝဲသ့ၣ်အတဝာ်အကျါန့ၣ်,ဒီးဟ့ၣ်လီၤပှၤလုၢ်တၢ်အဒိၣ်,စီၤအလၤဧစၢ်လၢတၢ်ဝံၢ်လၢယွၤအဂီၢ်တက့ၢ်.

30ဒီးလၢပှၤအံၣ်စရ့လးဖိအတဝာ်အကျါန့ၣ်နဘၣ်ဟံးန့ၢ်ယဲၢ်ဆံပူတပူလၢပှၤကညီအကျါ,လၢဂီၤဖံးအကျါ,လၢကသ့ၣ်ယီၤအကျါ,ဒီးလၢသိဒီးမဲာ်တဲးလဲးအကျါ,လၢဆၣ်ဖိကီၢ်ဖိအဒၢခဲလၢာ်အကျါန့ၣ်,ဒီးဟ့ၣ်လီၤအီၤလၢပှၤလ့ၤဝံဖိလၢအကွၢ်ယွၤအတၢ်အိၣ်အလီၢ်အတၢ်ကွၢ်လီၤ.

31ဒီးစီၤမိၤရှ့,ဒီးပှၤလုၢ်တၢ်အဒိၣ်စီၤအလၤဧစၢ်မၤဝဲဒ်ယွၤမၤလိာ်စီၤမိၤရှ့အသိးန့ၣ်လီၤ.

32ဒီးတၢ်ဂုာ်န့ၢ်လၢအအိၣ်လီၤတဲာ်လၢတၢ်လၢအမၤန့ၢ်ဆူၣ်လၢပှၤသုးဖိဖီၣ်န့ၢ်ဝဲန့ၣ်မ့ၢ်သိဃုကလီၤဒီးနွံကလးဒီးယဲၢ်ကထိ, 33ဒီးဂီၤဖံးနွံကလးဒီးခံကထိ, 34ဒီးကသ့ၣ်ယီၤဃုကလးဒီးတကထိ, 35ဒီးပှၤကညီသၢကလးခံကထိလၢပိာ်မုၣ်လၢအတမံဃုာ်ဘၣ်ဒီးပှၤပိာ်ခွါ,ဒီးတသ့ၣ်ညါဘၣ်ပိာ်ခွါဘၣ်လီၤ.

36ဒီးတဝာ်လၢအမ့ၢ်ပှၤလၢအလဲၤဒုးသုးတဖၣ်အဂီၢ်န့ၣ်မ့ၢ်သိသၢကလီၤဒီးသၢကလးဒီးနွံကထိဒီးယဲၢ်ကယၤလီၤ. 37ဒီးယွၤအသွဲလၢသိအကျါန့ၣ်မ့ၢ်ဃုကယၤဒီးနွံဆံဒီးယဲၢ်ဒုလီၤ.

38ဒီးဂီၤဖံးန့ၢ်အိၣ်ဝဲသၢကလးဒီးဃုကထိလီၤ.ဒီးယွၤအသွဲန့ၣ်မ့ၢ်နွံဆံခံဒုလၢအကျါလီၤ.

39ဒီးကသ့ၣ်ယီၤအိၣ်ဝဲသၢကလးဒီးယဲၢ်ကယၤလီၤ.ဒီးယွၤအသွဲန့ၣ်မ့ၢ်ဃုဆံဒီးတဒုလၢအကျါလီၤ.

40ဒီးပှၤကညီအိၣ်တကလးဒီးဃုကထိလီၤ.ဒီးယွၤအသွဲန့ၣ်မ့ၢ်သၢဆံခံဂၤလၢအကျါလီၤ.

41ဒီးစီၤမိၤရှ့ဟ့ၣ်သွဲန့ၣ်,ယွၤအတၢ်ဝံၢ်,လၢပှၤလုၢ်တၢ်အဒိၣ်စီၤအလၤဧစၢ်,ဒ်ယွၤမၤလိာ်စီၤမိၤရှ့အသိးန့ၣ်လီၤ.

42ဒီးလၢပှၤအံၣ်စရ့လးအတၢ်တဝာ်,လၢစီၤမိၤရှ့မၤနီၤဖးကွံာ်ဒီးပှၤလၢအဒုးသုးတဖၣ်န့ၣ်, 43(ဒီးတၢ်အိၣ်ဖှိၣ်အတၢ်တဝာ်န့ၣ်မ့ၢ်သိသၢကလီၤဒီးသၢကလးဒီးနွံကထိဒီးယဲၢ်ကယၤ, 44ဒီးဂီၤဖံးသၢကလးဒီးဃုကထိ, 45ဒီးကသ့ၣ်ယီၤသၢကလးဒီးယဲၢ်ကယၤ, 46ဒီးပှၤကညီတကလးဃုကထိ), 47ဒီးပှၤအံၣ်စရ့လးဖိအတၢ်တဝာ်န့ၣ်လၢပှၤကညီအကျါမ့ၢ်ဂ့ၤ,လၢဆၣ်ဖိကီၢ်ဖိအကျါမ့ၢ်ဂ့ၤ,စီၤမိၤရှ့ဟံးန့ၢ်အပူယဲၢ်ဆံအကျါတပူ,ဒီးဟ့ၣ်လီၤဝဲလၢပှၤလ့ၤဝံဖိလၢအကွၢ်ယွၤအတၢ်အိၣ်အလီၢ်အတၢ်ကွၢ်တဖၣ်န့ၣ်,ဒ်ယွၤမၤလိာ်စီၤမိၤရှ့အသိးန့ၣ်လီၤ.

48ဒီးပှၤကွၢ်တၢ်,ပှၤလၢအအိၣ်ဝဲလၢပှၤသုးဖိတကထိတဖၣ်အဖီခိၣ်,ပှၤတကထိအခိၣ်တဖၣ်,ပှၤတကယၤအခိၣ်တဖၣ်န့ၣ်ဟဲဝဲဆူစီၤမိၤရှ့အအိၣ်, 49ဒီးစံးဘၣ်စီၤမိၤရှ့,နခ့နပှၤဂံၢ်ပှၤသုးဖိအတၢ်ဂံၢ်လၢအအိၣ်လၢပဖီလာ်,ဒီးတဟါမၢ်ဘၣ်နီတဂၤဘၣ်, 50မၤသးဒ်န့ၣ်ဒီးပဟဲစိာ်တဂၤအဂီၢ်ဒၣ်ဝဲ,တဂၤအဂီၢ်ဒၣ်ဝဲ,အတၢ်မၤဘူၣ်ယွၤလၢတၢ်လၢပထံၣ်န့ၢ်လၢကယၢထူအကျါ,ထံဖှံၣ်တိၢ်ပီၤ,ပသံး,တၢ်အကွီၤ,ဒီးထံဧိၤဖဲဧိၤ,ဒ်သိးအကမၤတၢ်ပူၤဖျဲးလၢပသးအဂီၢ်လၢယွၤအမဲာ်ညါလီၤ.

51ဒီးစီၤမိၤရှ့ဒီးပှၤလုၢ်တၢ်အဒိၣ်စီၤအလၤဧစၢ်ဟံးန့ၢ်ထူဧိၤလွဲဧိၤလၢအီၤ,မ့ၢ်တၢ်ကယၢကယဲတ့အသးခဲလၢာ်လီၤ. 52ဒီးကယဲၢ်တၢ်မၤဘူၣ်န့ၣ်အထူလၢပှၤသုးဖိတကထိအခိၣ်တဖၣ်,ဒီးပှၤသုးဖိတကယၤအခိၣ်တဖၣ်မၤဘူၣ်ဝဲန့ၣ်မ့ၢ်ၡက့လးတကလးဒီးဃုကထိဒီးနွံကယၤဒီးယဲၢ်ဆံလီၤ. 53(ပှၤသုးဖိမၤန့ၢ်ဆူၣ်တၢ်တဂၤလၢအဂီၢ်ဒၣ်ဝဲ,တဂၤလၢအဂီၢ်ဒၣ်ဝဲလီၤ).

54ဒီးစီၤမိၤရှ့ဒီးပှၤလုၢ်တၢ်အဒိၣ်စီၤအလၤဧစၢ်န့ၣ်ဟံးန့ၢ်ထူဧိၤလွဲဧိၤလၢပှၤသုးဖိတကထိအခိၣ်တဖၣ်,ဒီးလၢပှၤသုးဖိတကယၤအခိၣ်တဖၣ်,ဒီးဟဲစိာ်ဝဲဆူတၢ်အိၣ်ဖှိၣ်အဒဲပူၤ,တၢ်သ့ၣ်နီၣ်ထီၣ်က့ၤလၢပှၤအံၣ်စရ့လးဖိအဂီၢ်လၢယွၤအမဲာ်ညါလီၤ.