‏ Numbers 32

1ဒီးပှၤရူၤဘ့ၣ်ဖိ,ဒီးပှၤကးဖိအိၣ်ဒီးဆၣ်ဖိကီၢ်ဖိအအဒၢအါအါကလဲာ်လီၤ.ဒီးထံၣ်ဘၣ်ကီၢ်ယၤစ့ၢ်ဒီးကီၢ်ကံးလဧး,ဒီးကွၢ်ကွၢ်,တၢ်အလီၢ်န့ၣ်မ့ၢ်ဆၣ်ဖိကီၢ်ဖိအလီၢ်လီၤ.

2ဒီးပှၤကးဖိ,ဒီးပှၤရူၤဘ့ၣ်ဖိဟဲကတိၤတၢ်ဒီးစီၤမိၤရှ့,ဒီးပှၤလုၢ်တၢ်အဒိၣ်စီၤအလၤဧစၢ်,ဒီးတၢ်အိၣ်ဖှိၣ်အပဒိၣ်တဖၣ်,ဒီးစံးဝဲဒၣ်, 3ဧးတၤရိး,ဒီးဒံၤဘိၣ်,ဒီးယၤစ့ၢ်,ဒီးနံးမရၤ,ဒီးဃ့ၡဘိၣ်,ဒီးအ့လဧၤလ့ၤ,ဒီးစဘၣ်,ဒီးနဘိ,ဒီးဘဧိၣ်, 4ကီၢ်လၢယွၤကျီကွံာ်လၢပှၤအံၣ်စရ့လးဖိအတၢ်အိၣ်ဖှိၣ်အမဲာ်ညါန့ၣ်မ့ၢ်ဆၣ်ဖိကီၢ်ဖိအကီၢ်,ဒီးနခ့နပှၤတဖၣ်အံၤအိၣ်ဒီးဆၣ်ဖိကီၢ်ဖိလီၤ. 5ဒီးစံးဝဲဒၣ်,ပမ့ၢ်အိၣ်ဒီးတၢ်ဘျုးတၢ်ဖှိၣ်လၢနမဲာ်ညါဒီး,မ်တၢ်ဟ့ၣ်လီၤနခ့နပှၤလၢကီၢ်အံၤလၢတၢ်ဟံးဃာ်အဂီၢ်တက့ၢ်,မ်တၢ်သုတဒုးခီဂာ်ပှၤလၢထံယၢ်ဒ့ၢ်တဂ့ၤ.

6ဒီးစီၤမိၤရှ့စံးဘၣ်စီၤကးအဖိ,ဒီးစီၤရူၤဘ့ၣ်အဖိ,သုဒီပုၢ်ဝဲၢ်ကလဲၤဒုးသုး,သုကဆ့ၣ်နီၤဖဲအံၤစ့ၢ်ကီးဧါ, 7သုမၤစၢ်လီၤပှၤအံၣ်စရ့လးဖိအသးအဂံၢ်အဘါဒ်သိးအသုတလဲၤခီဂာ်တၢ်ဆူထံဧိၤကီၢ်ဧိၤလၢယွၤဟ့ၣ်လီၤအီၤန့ၣ်မ့ၢ်အဘၣ်မနုၤလဲၣ်. 8လၢယမၢသုပၢ်တဖၣ်လဲၤတၢ်လၢကၤဒ့ၣ်ဘၢ်န့ဒ်သိးအကကွၢ်ထံဧိၤကီၢ်ဧိၤန့ၣ်အဝဲသ့ၣ်မၤဝဲဒ်န့ၣ်လီၤ. 9ဒီးလဲၤဝဲဆူအ့ၡကိၤလးအကျိ,ဒီးထံၣ်ဘၣ်ထံဧိၤကီၢ်ဧိၤန့ၣ်,ဒီးမၤစၢ်လီၤပှၤအံၣ်စရ့လးဖိအသးအဂံၢ်အဘါ,ဒ်သိးအသုတလဲၤနုာ်လၢထံဧိၤကီၢ်ဧိၤလၢယွၤဟ့ၣ်လီၤအီၤတဂ့ၤလီၤ. 10ဒီးယွၤအသးထီၣ်ကဲၤထီၣ်ဘၣ်အီၤလၢမုၢ်တနံၤန့ၣ်,ဒီးဆိၣ်လီၤအသးဒီးစံးဝဲဒၣ်, 11မ့ၢ်မးပှၤလၢအဟးထီၣ်လၢကီၢ်အဲၤကူပတူးလၢအသးပှၢ်အနံၣ်ခံဆံဒီးဆူအဖီခိၣ်,တဘၣ်ထံၣ်ဘၣ်ထံဧိၢ်ကီၢ်ဧိၤလၢယဆိၣ်လီၤယသးလၢအဂ့ၢ်ဒီးစီၤအၤဘြၤဟၣ်,ဒီးစီၤအံၤစဲး,ဒီးစီၤယၤကိာ်နီတဂၤဘၣ်,(အဂ့ၢ်ဒ်အံၤ,တပိာ်ဘၣ်ယခံလၢလၢပှဲၤပှဲၤဘၣ်). 12ကထံၣ်ဘၣ်ဝဲထဲစီၤယဖူန့ၤအဖိခွါစီၤကၤလ့ၤ,ဒီးစီၤနိၣ်အဖိခွါစီၤယိၤရှူဧိၤလီၤ.မ့ၢ်အပိာ်ယွၤအခံလၢလၢပှဲၤပှဲၤအဃိလီၤ.

13ဒီးယွၤအသးထီၣ်ကဲၤထီၣ်ဘၣ်အံၣ်စရ့လး,ဒီးမၢအဟးဝ့ၤဝီၤတၢ်လၢပှၢ်မုၢ်ကနၢအနံၣ်လွံၢ်ဆံတုၤပှၤတစိၤလၢအမၤတၢ်အၢလၢယွၤအမဲာ်ညါန့ၣ်လၢာ်ကွံာ်ဝဲလီၤ. 14ဒီးကွၢ်ကွၢ်,သုဂဲၤဆၢထၢၣ်လၢသုပၢ်တဖၣ်အလီၢ်,ပှၤတၢ်ဒဲးဘးဖိအတၢ်အါထီၣ်,ဒ်သိးသုကမၤဒိၣ်ထီၣ်ဒံးယွၤအသးထီၣ်ဆူၣ်ဘၣ်ပှၤအံၣ်စရ့လးဖိန့ၣ်လီၤ. 15အဂ့ၢ်ဒ်အံၤ,သုမ့ၢ်ဃၣ်ကဒါသုသးလၢအပိာ်အခံဒီး,အဝဲဒၣ်ကလဲၤသဒၣ်ကဒီးအီၤလၢပှၢ်မုၢ်ကနၢ,ဒီးသုကမၤဟးဂီၤပှၤဂီၢ်မုၢ်ခဲလၢာ်လီၤ.

16ဒီးအဝဲသ့ၣ်သုးဘူးအသးဆူအအိၣ်,ဒီးစံးဝဲဒၣ်,ဖဲအံၤပကမၤသိဒီးမဲာ်တဲးလဲးအကရၢတဖၣ်လၢဆၣ်ဖိကီၢ်ဖိအဒၢအဂီၢ်,ဒီးဝ့ၢ်တဖၣ်လၢဖိဒံဖိသၣ်အဂီၢ်, 17မ့မ့ၢ်ပဝဲဒၣ်ပကစၢ်ဒၣ်ပဝဲပကလဲၤချ့ချ့အိၣ်ဒီးပစုကဝဲၤလၢပှၤအံၣ်စရ့လးဖိအမဲာ်ညါတုၤပဒုးလဲၤနုာ်အီၤဆူအလီၢ်လီၤ.ဒီးပဖိဒံဖိသၣ်ကအိၣ်ကဆိးလၢဝ့ၢ်တဖၣ်အိၣ်ဒီးအခိၣ်ဒူလၢပှၤကီၢ်ဖိအဃိလီၤ. 18ပှၤအံၣ်စရ့လးဖိတချုးန့ၢ်ဒံးဘၣ်အတၢ်န့ၢ်သါတဂၤလၢ်လၢ်န့ၣ်ဒီး,ပတဟဲက့ၤဘၣ်ဆူပဟံၣ်ပဃီဘၣ်, 19အဂ့ၢ်ဒ်အံၤ,ပတန့ၢ်ဘၣ်သါတၢ်လၢယၢ်ဒ့ၣ်ဝၢ်ဘးခီ,လၢပမဲာ်ညါဘၣ်,အဂ့ၢ်ဒ်အံၤ,ပန့ၢ်ဘၣ်သါတၢ်အိၣ်လၢယၢ်ဒ့ၣ်လၢအံၤတခီလၢမုၢ်ထီၣ်တခီလီၤ.

20ဒီးစီၤမိၤရှ့စံးဘၣ်အီၤ,သုမ့ၢ်မၤတၢ်န့ၣ်တမံၤ,သုမ့ၢ်လဲၤဒုးသုးအိၣ်ဒီးသုစုကဝဲၤလၢယွၤအမဲာ်ညါ, 21ဒီးသုမ့ၢ်လဲၤခီဂာ်ယၢ်ဒ့ၣ်အိၣ်ဒီးသုစုကဝဲၤခဲလၢာ်လၢယွၤအမဲာ်ညါ,တုၤလီၤအဟီထီၣ်ကွံာ်အဒုၣ်အဒါလၢအမဲာ်ညါ,

22ဒီးကီၢ်ဖိဃၣ်ဝဲလၢယွၤအမဲာ်ညါဒီးလၢအလီၢ်ခံန့ၣ်သုကဟဲက့ၤဒီးသုတၢ်ဒဲးဘးတအိၣ်ဘၣ်လၢယွၤအမဲာ်ညါဒီးလၢအံၣ်စရ့လးအမဲာ်ညါဘၣ်,ဒီးကီၢ်အံၤကကဲထီၣ်သုတၢ်န့ၢ်သါလၢယွၤအမဲာ်ညါလီၤ. 23မ့မ့ၢ်သုမ့ၢ်တမၤဘၣ်ဒ်န့ၣ်ဘၣ်ဒီး,ကွၢ်ကွၢ်,သုမၤကမၣ်ဘၣ်လံယွၤလံ.ဒီးသ့ၣ်ညါသုဝဲလၢသုတၢ်ဒဲးဘးကထံၣ်န့ၢ်သုန့ၣ်တက့ၢ်. 24မၤခူဧိၤဝ့ၢ်ဧိၤလၢသုဖိဒံဖိသၣ်အဂီၢ်,ဒီးကရၢတဖၣ်လၢသုသိဒီးမဲာ်တဲးလဲးအဂီၢ်,ဒီးတၢ်လၢအထီၣ်ဖျဲးလၢသုထးခိၣ်န့ၣ်မၤတက့ၢ်.

25ဒီးပှၤကးဖိ,ဒီးပှၤရူၤဘ့ၣ်ဖိကတိၤတၢ်ဒီးစီၤမိၤရှ့ဒီးစံးဝဲဒၣ်,နခ့နပှၤကမၤဒ်ပကစၢ်မၤလိာ်ဝဲအသိးန့ၣ်လီၤ. 26ပဖိဒံဖိသၣ်,ပဖိပမါ,ပသိပမဲာ်တဲးလဲး,ဒီးပဆၣ်ဖိကီၢ်ဖိအဒၢခဲလၢာ်န့ၣ်ကအိၣ်ဘၣ်ဖဲန့ၣ်လၢကံးလဧးအဝ့ၢ်တဖၣ်အပူၤလီၤ. 27မ့မ့ၢ်နခ့နပှၤကလဲၤခီဂာ်တၢ်,အိၣ်ဒီးအစုကဝဲၤကိးဂၤဒဲး,လၢယွၤအမဲာ်ညါဒ်သိးအကဒုးသုးဒ်ပကစၢ်စံးဝဲအသိးန့ၣ်လီၤ.

28ဒီးစီၤမိၤရှ့မၤလိာ်ပှၤလုၢ်တၢ်အဒိၣ်စီၤအလၤဧစၢ်,ဒီးစီၤနိၣ်အဖိခွါစီၤယိၤရှူ,ဒီးပှၤအံၣ်စရ့လးဖိအဒူၣ်တဖၣ်အပၢ်အခိၣ်တဖၣ်လၢအဝဲသ့ၣ်အဂ့ၢ်အကျိၤ, 29ဒီးစီၤမိၤရှ့စံးဝဲဒၣ်,ပှၤကးဖိ,ဒီးပှၤရူၤဘ့ၣ်ဖိမ့ၢ်ခီဂာ်ယၢ်ဒ့ၣ်ဒီးသု,အိၣ်ဒီးအစုကဝဲၤဒ်သိးအကဒုးသုးလၢယွၤအမဲာ်ညါကိးဂၤဒဲး,ဒီးပှၤကီၢ်ဖိဃၣ်ဝဲလၢသုမဲာ်ညါဒီး,သုဘၣ်ဟ့ၣ်လီၤအီၤလၢကီၢ်ကံးလဧးလၢအတၢ်န့ၢ်သါလီၤ. 30မ့မ့ၢ်အဝဲသ့ၣ်မ့ၢ်တခီဂာ်ဘၣ်တၢ်ဒီးသု,အိၣ်ဒီးအစုကဝဲၤဘၣ်ဒီး,ဘၣ်န့ၢ်သါတၢ်လၢသုကျါလၢကီၢ်ကနၤဧၣ်အပူၤလီၤ.

31ဒီးပှၤကးဖိ,ဒီးပှၤရူၤဘ့ၣ်ဖိတဖၣ်စံးဆၢတၢ်ဒီးစံးဝဲဒၣ်,ဒ်ယွၤစံးဘၣ်နခ့နပှၤအသိးန့ၣ်ပကမၤဒ်န့ၣ်သိးလီၤ. 32ပကလဲၤခီဂာ်တၢ်အိၣ်ဒီးပစုကဝဲၤလၢယွၤအမဲာ်ညါ,ဆူကီၢ်ကနၤဧၣ်အပူၤ,ဒ်သိးပတၢ်န့ၢ်သါလၢယၢ်ဒ့ၣ်လၢအံၤတခီကကဲဒၣ်ပတၢ်လီၤ.

33ဒီးစီၤမိၤရှ့ဟ့ၣ်လီၤပှၤကးဖိ,ဒီးပှၤရူၤဘ့ၣ်ဖိ,ဒီးစီၤယိၤသးအဖိခွါစီၤမနၤရှ့ၤတခီဒူၣ်န့ၣ်လၢပှၤအမိၢ်ဖိအစီၤပၤစံဃိၣ်အဘီမုၢ်,ဒီးဘၤၡၣ်အစီၤပၤဧိာ်အဘီမုၢ်,ထံဧိၤကီၢ်ဧိၤဒီးအခူအဝ့ၢ်တဖၣ်လၢအဃၢၤ,ဝ့ၢ်တဖၣ်လၢကီၢ်ပူၤဝးတရံးဝဲလီၤ. 34ဒီးပှၤကးအဖိတ့ဒံၤဘိၣ်,ဒီးဧးတၤရိး,ဒီးဧရိၤဧ့ၢ်, 35ဒီးဧးတရိးၡိဖၣ်,ဒီးယၤဧစ့ၢ်,ဒီးယၤကဘၤဒီးဧးတရိးၡိဖၣ်,ဒီးယၤဧစ့ၢ်,ဒီးယၤကဘၤ, 36ဒီးဘ့ၤသနံးမရၤ,ဒီးဘ့ၤသဟၤရံၣ်,ဝ့ၢ်တဖၣ်အိၣ်ဒီးအခိၣ်ဒူ,ဒီးမၤသိဒီးမဲာ်တဲးလဲးအကရၢတဖၣ်လီၤ.ဒီးပှၤရူၤဘ့ၣ်ဖိတ့ဃ့ၡဘိၣ်,ဒီးအ့လဧၤလ့ၤ,ဒီးကံးရယးသံၣ်, 37ဒီးပှၤရူၤဘ့ၣ်ဖိတ့ဃ့ၡဘိၣ်,ဒီးအ့လဧၤလ့ၤ,ဒီးကံးရယးသံၣ်, 38ဒီးနဘိၤ,ဒီးဘဧၤလးမဧိၣ်,(အမံၤလဲအသး),ဒီးစံးဘမၤလီၤ.ဒီးဝ့ၢ်လၢအတ့ဝဲန့ၣ်ယုၢ်အမံၤလၢအဂၤတဖၣ်န့ၣ်လီၤ.

39ဒီးမနၤရှ့ၤအဖိခွါစီၤမၤကံၢ်အဖိတဖၣ်လဲၤဝဲဆူကံးလဧး,ဒီးမၤန့ၢ်ဝဲ,ဒီးဟီထီၣ်ကွံာ်ပှၤအမိၢ်ဖိလၢအအိၣ်လၢအပူၤလီၤ. 40ဒီးစီၤမိၤရှ့ဟ့ၣ်လီၤကံးလဧးလၢမနၤရှ့ၤအဖိခွါစီၤမၤကံၢ်,ဒီးအဝဲဒၣ်အိၣ်ဝဲဆိးဝဲလၢအပူၤလီၤ.

41ဒီးမနၤရှ့ၤအဖိခွါစီၤယၤအံၢ်လဲၤမၤန့ၢ်တဝီတဖၣ်,ဒီးယုၢ်အမံၤလၢဃၤဝီးယၤအံၢ်လီၤ.

42ဒီးစီၤနိဘၤလဲၤမၤန့ၢ်ကနး,ဒီးအတဝီတဖၣ်,ဒီးယုၢ်အမံၤလၢနိဘၤ,ဒ်အမံၤဒၣ်ဝဲအသိးန့ၣ်လီၤ.