Numbers 34
1ဒီးယွၤကတိၤတၢ်ဒီးစီၤမိၤရှ့,ဒီးစံးဝဲဒၣ်, 2မၤလိာ်ပှၤအံၣ်စရ့လးဖိဒီးစံးဘၣ်အီၤ,တုၤသုလဲၤနုာ်လၢကီၢ်ကနၤဧၣ်အပူၤဒီး,(အန့ၣ်ကကဲထီၣ်တၢ်န့ၢ်သါအီၤ,ကီၢ်ကနၤဧၣ်ဒီးအဃၢၤတဖၣ်န့ၣ်), 3သုတၢ်လၢကလံၤထံးတခီန့ၣ်ကအိၣ်လၢပှၢ်မုၢ်ကနၢစံၣ်လၢအဒိၣ်အဃၢၤ,ဒီးသုကီၢ်အဃၢၤလၢကလံၤထံးတခီန့ၣ်ကမ့ၢ်ပီၣ်လဲၣ်အံသၣ်အကတၢၢ်လၢမုၢ်ထီၣ်တခီလီၤ. 4ဒီးသုကီၢ်အဃၢၤန့ၣ်ကဃၣ်ဝဲလၢကလံၤထံးတခီဆူဧးကရးဘံၣ်အတၢ်စိခိၣ်,ဒီးလဲၤထီၣ်ဆူစံၣ်,ဒီးအကတၢၢ်လၢကလံၤထံးတခီန့ၣ်ကအိၣ်လၢကၤဒ့ၣ်ဘၢ်န့,ဒီးကလဲၤဒံးပၢၢ်လၢဃစၢ်အးဒၢ်,ဒီးလဲၤထီၣ်ဆူဧၤစမိၣ်လီၤ. 5ဒီးကီၢ်အဃၢၤန့ၣ်ကလဲၤတရံးလၢဧၤစမိၣ်ပၢၢ်လၢအဲၤကူပတူးအထံမိၢ်ပှၢ်,ဒီးအကတၢၢ်န့ၣ်ကအိၣ်လၢပီၣ်လဲၣ်နံၤန့ၣ်လီၤ. 6ဒီးကီၢ်အဃၢၤလၢမုၢ်နုာ်တခီန့ၣ်သုကအိၣ်ဒီးပီၣ်လဲၣ်ဖးဒိၣ်လၢအဃၢၤအဂီၢ်လီၤ.အဝဲန့ၣ်ကကဲထီၣ်သုကီၢ်အဃၢၤလၢမုၢ်နုာ်တခီလီၤ. 7ဒီးအအံၤကကဲထီၣ်သုကီၢ်အဃၢၤလၢကလံၤစိး,လၢပီၣ်လဲၣ်ဖးဒိၣ်န့ၣ်သုဘၣ်ထိၣ်တၢ်ပၢၢ်လၢကစၢၢ်ဃိၢ်လီၤ. 8ဒီးလၢကစၢၢ်ဃိၢ်န့ၣ်သုဘၣ်ထိၣ်တၢ်ပၢၢ်လၢတၢ်လဲၤနုာ်လၢဃမါသး,ဒီးအဃၢၤကလဲၤထီၣ်ဆူစဒး, 9ဒီးဆူစံးဖြၣ်,ဒီးအကတၢၢ်န့ၣ်ကအိၣ်လၢဃစၢ်ဧ့နၣ်လီၤ.အန့ၣ်ကကဲထီၣ်သုကီၢ်အဃၢၤလၢကလံၤစိးတခီလီၤ. 10ဒီးသုဘၣ်ထိၣ်သုကီၢ်အဃၢၤလၢမုၢ်ထီၣ်တခီလၢဃစၢ်ဧ့နၣ်ပၢၢ်လၢၡဖၣ်လီၤ. 11ဒီးအဃၢၤန့ၣ်ကလဲၤလီၤလၢၡဖၣ်ပၢၢ်လၢရံးဘလၤအိၣ်လၢဧ့ၣ်လၢမုၢ်ထီၣ်တခီ,ဒီးအဃၢၤန့ၣ်ကလဲၤလီၤပၢၢ်လၢပီၣ်လဲၣ်ကံးန့ၤရ့သးလၢမုၢ်ထီၣ်တခီလီၤ. 12ဒီးအဃၢၤန့ၣ်ကအိၣ်လၢပီၣ်လဲၣ်အံသၣ်န့ၣ်လီၤ.အဝဲန့ၣ်ကကဲထီၣ်သုကီၢ်,ဒီးအဃၢၤဝးတရံးအီၤလီၤ. 13ဒီးစီၤမိၤရှ့မၤလိာ်ပှၤအံၣ်စရ့လးဖိ,ဒီးစံးဝဲဒၣ်,အဝဲန့ၣ်မ့ၢ်ကီၢ်လၢသုကန့ၢ်ဘၣ်လၢဖးတၢ်,လၢယွၤမၤလိာ်ဟ့ၣ်လီၤပှၤခွံဒူၣ်,ဒီးတခီဒူၣ်လီၤ. 14အဂ့ၢ်ဒ်အံၤ,ပှၤရူၤဘ့ၣ်ဖိတဒူၣ်,ဒ်အပၢ်တဖၣ်အဟံၣ်အသိးန့ၣ်,ဒီးပှၤကးဖိတဒူၣ်,ဒ်အပၢ်တဖၣ်အဟံၣ်အသိးန့ၣ်န့ၢ်ဘၣ်လံအတၢ်န့ၢ်သါလံ.ဒီးပှၤမနၤရှ့ၤဖိတခီဒူၣ်န့ၣ်န့ၢ်ဘၣ်လံအတၢ်န့ၢ်သါလံ. 15ခံဒူၣ်ဒီးတခီဒူၣ်န့ၣ်န့ၢ်ဘၣ်လံအတၢ်န့ၢ်သါတၢ်လၢထံယၢ်ဒ့ၣ်လၢအအံၤတခီ,သဃီၤဒီးယရံၤဃိလၢမုၢ်ထီၣ်တခီလံ. 16ဒီးယွၤကတိၤတၢ်ဒီးစီၤမိၤရှ့,ဒီးစံးဝဲဒၣ်, 17အအံၤမ့ၢ်ပှၤအမံၤလၢအဘၣ်နီၤဖးကီၢ်အဆၢလၢသုဂီၢ်တဖၣ်,ပှၤလုၢ်တၢ်အဒိၣ်စီၤအလၤဧစၢ်,ဒီးစီၤနိၣ်အဖိခွါစီၤယိၤရှူန့ၣ်လီၤ. 18ဒီးသုဘၣ်ဟံးန့ၢ်လၢပှၤတဒူၣ်ပဒိၣ်တဂၤ,လၢပှၤတဒူၣ်ပဒိၣ်တဂၤ,ဒ်သိးအကနီၤဖးန့ၢ်အတၢ်န့ၢ်သါတၢ်အဆၢလီၤ. 19ဒီးအအံၤမ့ၢ်ပှၤတဖၣ်န့ၣ်အမံၤ, စီၤယဖူန့ၤအဖိခွါစီၤကၤလ့းလၢပှၤယူဒၤဖိတဒူၣ်အကျါ, 20ဒီးစီၤဧးမံၤဟူးအဖိခွါစီၤၡံမူၤအ့လးလၢပှၤစူၤမ့းအိၣ်ဖိတဒူၣ်အကျါ, 21ဒီးစီၤကံးစလိၣ်အဖိခွါစီၤအလံဒးလၢပှၤဘံၣ်ယၤမံၣ်ဖိတဒူၣ်အကျါ, 22ဒီးစီၤယၤကလံၤအဖိခွါစီၤဘူးကံၤ,ပှၤဒၣ်ဖိတဒူၣ်အပဒိၣ်, 23ဒီးစီၤအ့ဖိးအဖိခွါစီၤဃနံၤအ့လး,စီၤယိၤသးအဖိအလံၤအပဒိၣ်န့ၣ်လၢပှၤမနၤရှ့ၤဖိတဒူၣ်အကျါ, 24ဒီးစီၤၡံးဖတၣ်အဖိခွါစီၤကမူၤအ့လး,ပှၤအ့ဖရဲၣ်ဖိတဒူၣ်အပဒိၣ်, 25ဒီးစီၤပၢ်နးအဖိခွါစီၤအလံစဖၣ်,ပှၤစဘူလိၣ်ဖိတဒူၣ်အပဒိၣ်, 26ဒီးစီၤဧးစၣ်အဖိခွါစီၤပးလတံၤအ့လး,ပှၤယံးစၣ်ကၢ်ဖိတဒူၣ်အပဒိၣ်, 27ဒီးစီၤၡလိၤမံအဖိခွါစီၤအဃံဟူး,ပှၤအၤရှ့ၢ်ဖိတဒူၣ်အပဒိၣ်, 28ဒီးစီၤဧးမံၤဟူးအဖိခွါစီၤပဒၤအ့လး,ပှၤနးသၤလံဖိတဒူၣ်အပဒိၣ်, 29အဝဲသ့ၣ်တဖၣ်န့ၣ်မ့ၢ်ပှၤလၢယွၤမၤလိာ်အီၤ,ဒ်သိးအကနီၤဖးတၢ်န့ၢ်သါအဆၢလၢကီၢ်ကနၤဧၣ်အပူၤလၢပှၤအံၣ်စရ့လးဖိအဂီၢ်လီၤ.
Copyright information for
KswSKMB