Numbers 35
1ဒီးယွၤကတိၤတၢ်ဒီးစီၤမိၤရှ့လၢမိၤအးအပျီပူၤလၢယၢ်ဒ့ၣ်အနံၤ,သဃီၤဒီးယရံၤဃိ,ဒီးစံးဝဲဒၣ်, 2မၤလိာ်ပှၤအံၣ်စရ့လးဖိလၢအကဟ့ၣ်လီၤဝ့ၢ်တဖၣ်လၢအတၢ်န့ၢ်သါအကျါလၢပှၤလ့ၤဝံဖိ,ဒ်သိးအကအိၣ်ဝဲဆိးဝဲလၢအပူၤတက့ၢ်.ဒီးသုဘၣ်ဟ့ၣ်လီၤပှၤလ့ၤဝံလၢတၢ်အီၣ်ဆၣ်အလီၢ်လၢဝ့ၢ်အဂီၢ်ဝးတရံးဝဲလီၤ. 3ဒီးဝ့ၢ်တဖၣ်န့ၣ်ကအိၣ်ဒီးအီၤလၢအတၢ်အိၣ်တၢ်ဆိးအဂီၢ်,ဒီးအတၢ်အီၣ်ဆၣ်အလီၢ်တဖၣ်န့ၣ်ကအိၣ်လၢအဆၣ်ဖိကီၢ်ဖိအဒၢအဂီၢ်,ဒီးလၢအစုလီၢ်အခီၣ်ခိၣ်အဂီၢ်,ဒီးလၢအဆၣ်ဖိကီၢ်ဖိခဲလၢာ်အဂီၢ်လီၤ. 4ဒီးဝ့ၢ်အတၢ်အီၣ်ဆၣ်အလီၢ်န့ၣ်လၢသုဘၣ်ဟ့ၣ်လီၤပှၤလ့ၤဝံဖိန့ၣ်ကအိၣ်လၢဝ့ၢ်ခိၣ်ဒူဆူခိအပျၢ်တကထိဝးတရံးဝဲလီၤ. 5ဒီးသုဘၣ်ထိၣ်လၢဝ့ၢ်လၢခိလၢမုၢ်ထီၣ်တခီအပျၢ်ခံကထိ,ဒီးလၢကလံၤထံးတခီန့ၣ်အပျၢ်ခံကထိ,ဒီးလၢမုၢ်နုာ်တခီန့ၣ်အပျၢ်ခံကထိ,ဒီးလၢကလံၤစိးတခီန့ၣ်အပျၢ်ခံကထိလီၤ.ဒီးဝ့ၢ်န့ၣ်အိၣ်ဝဲလၢအသးကံၢ်ပူၤ,ဒီးတၢ်န့ၣ်ကကဲထီၣ်ဝဲလၢဝ့ၢ်အတၢ်အီၣ်ဆၣ်အလီၢ်လၢအဂီၢ်လီၤ. 6ဒီးလၢဝ့ၢ်လၢသုဘၣ်ဟ့ၣ်လီၤပှၤလ့ၤဝံဖိအကျါန့ၣ်ဘၣ်အိၣ်လၢဝ့ၢ်ဃုဝ့ၢ်လၢတူၢ်လိာ်တၢ်အဂီၢ်,လၢသုဘၣ်ပာ်အီၤလၢပှၤမၤသံပှၤကညီအဂီၢ်,ဒ်သိးအကဃ့ၢ်တၢ်ဆူန့ၣ်လီၤ.ဒီးလၢန့ၣ်အဖီခိၣ်သုဘၣ်ပာ်ဖှိၣ်ဒီးအီၤဝ့ၢ်လွံၢ်ဆံခံဝ့ၢ်လီၤ. 7ခူဧိၤဝ့ၢ်ဧိၤလၢသုဘၣ်ဟ့ၣ်လီၤပှၤလ့ၤဝံဖိခဲလၢာ်န့ၣ်မ့ၢ်လွံၢ်ဆံဃိးဝ့ၢ်လီၤ.အဝဲသ့ၣ်န့ၣ်,ဒီးအတၢ်အီၣ်ဆၣ်အလီၢ်တဖၣ်လီၤ. 8ဒီးဝ့ၢ်တဖၣ်လၢသုဘၣ်ဟ့ၣ်လၢပှၤအံၣ်စရ့လးဖိအန့ၢ်သါတၢ်အကျါန့ၣ်,လၢအအါအကျါန့ၣ်,သုကမၤန့ၢ်လၢအအါ,ဒီးလၢအစှၤအကျါန့ၣ်သုကမၤန့ၢ်လၢအစှၤလီၤ.ကယဲၢ်ပှၤဘၣ်ဟ့ၣ်တၢ်လၢဝ့ၢ်အကျါန့ၣ်ဆူပှၤလ့ၤဝံဖိ,ဒ်အတၢ်န့ၢ်သါလၢအန့ၢ်ဘၣ်သါအသိးန့ၣ်လီၤ. 9ဒီးယွၤကတိၤတၢ်ဒီးစီၤမိၤရှ့,ဒီးစံးဝဲဒၣ်, 10ကတိၤတၢ်ဒီးပှၤအံၣ်စရ့လးဖိ,ဒီးစံးဘၣ်အီၤ,တုၤသုခီဂာ်ထံယၢ်ဒ့ၣ်ဆူကီၢ်ကနၤဧၣ်အပူၤဒီး, 11သုဘၣ်ပာ်လီၤဝ့ၢ်တဖၣ်လၢအကကဲထီၣ်ဝ့ၢ်တူၢ်လိာ်တၢ်လၢသုဂီၢ်,ဒ်သိးပှၤလၢအမၤသံတၢ်,လၢအမၤသံပှၤလၢအဟးဖျိးတၢ်အဃိတဂၤကဃ့ၢ်တၢ်ဆူန့ၣ်လီၤ. 12ဒီးကကဲထီၣ်ဝဲလၢဝ့ၢ်တၢ်ပူၤဖျဲးဒီးပှၤမၤကၣ်တၢ်အစုပူၤ,ဒ်သိးပှၤလၢအမၤသံပှၤကညီအသုတသံတဂ့ၤ,တုၤလီၤလၢအဆၢထၢၣ်လၢတၢ်အိၣ်ဖှိၣ်အမဲာ်ညါလၢတၢ်စံၣ်ညီၣ်အဂီၢ်လီၤ. 13ဒီးလၢဝ့ၢ်တဖၣ်လၢသုဘၣ်ဟ့ၣ်လီၤကွံာ်အကျါန့ၣ်,ဃုဝ့ၢ်ကအိၣ်ဒီးသုလၢတၢ်တူၢ်လိာ်တၢ်အဂီၢ်လီၤ. 14သုဘၣ်ပာ်လီၤသၢဝ့ၢ်လၢယၢ်ဒ့ၣ်လၢအအံၤတခီ,ဒီးသုဘၣ်ပာ်သၢဝ့ၢ်လၢကီၢ်ကနၤဧၣ်အပူၤလၢအကကဲထီၣ်ဝ့ၢ်တူၢ်လိာ်တၢ်လီၤ. 15ဝ့ၢ်ဃုဝ့ၢ်န့ၣ်ကကဲထီၣ်တၢ်တူၢ်လိာ်တၢ်လၢပှၤအံၣ်စရ့လးဖိအဂီၢ်,ဒီးလၢပှၤတခီဘီမုၢ်ဖိအဂီၢ်,ဒီးလၢပှၤလၢအအိၣ်အဆိးလၢအကျါအဂီၢ်,ဒ်သိးပှၤလၢအမၤသံပှၤတဂၤဂၤလၢအဟးဖျိးတၢ်အဃိန့ၣ်ကဃ့ၢ်ပူၤဖျဲးဖဲန့ၣ်ကိးဂၤဒဲးလီၤ. 16ဒီးမ့ၢ်ကျီဝဲလၢနး,ဒီးပှၤသံဝဲဒီး,မ့ၢ်ဝဲလၢပှၤမၤသံဒၣ်ပှၤကညီလီၤ.ပှၤလၢအမၤသံဒၣ်ပှၤကညီန့ၣ်ကဘၣ်တၢ်မၤသံအီၤသပှၢ်တၢၢ်လီၤ. 17ဒီးမ့ၢ်ကွံာ်ဘၣ်အီၤလၢလၢၢ်လၢအစုလၢအမၤသံတၢ်သ့,ဒီးအဝဲဒၣ်သံဒီး,မ့ၢ်ဝဲလၢပှၤမၤသံဒၣ်ပှၤကညီလီၤ.ပှၤလၢအမၤသံဒၣ်ပှၤကညီန့ၣ်ကဘၣ်တၢ်မၤသံအီၤသပှၢ်တၢၢ်လီၤ. 18ဒီးမ့ၢ်တီၢ်အီၤလၢသ့ၣ်တကူာ်လၢအစုလၢအမၤသံတၢ်သ့,ဒီးအဝဲဒၣ်သံဒီး,မ့ၢ်ဝဲလၢပှၤမၤသံဒၣ်ပှၤကညီလီၤ.ပှၤလၢအမၤသံဒၣ်ပှၤကညီန့ၣ်ကဘၣ်တၢ်မၤသံအီၤသပှၢ်တၢၢ်လီၤ. 19ပှၤမၤကၣ်တၢ်သွံၣ်အကစၢ်ဒၣ်ဝဲန့ၣ်ကမၤသံပှၤမၤဒၣ်ပှၤကညီတဂၤန့ၣ်လီၤ.တုၤအဘၣ်သဃိာ်အီၤဒီး,ကမၤသံအီၤလီၤ. 20ဒီးမ့ၢ်ဆဲးအီၤလၢအသးဟ့တၢ်အဃိ,မ့ၢ်အိၣ်ခိးဒီးကွံာ်အီၤလၢတၢ်တုၤအသံ, 21မ့ၢ်ထီဒါအီၤဒီးထိအီၤလၢအစု,ဒီးအဝဲဒၣ်သံဒီး,ပှၤလၢအမၤဝဲတဂၤန့ၣ်ကဘၣ်တၢ်မၤသံအီၤသပှၢ်တၢၢ်လီၤ.မ့ၢ်ဝဲလၢပှၤမၤသံဒၣ်ပှၤကညီလီၤ.တုၤအဘၣ်သဃိာ်အီၤဒီး,ပှၤမၤကၣ်တၢ်သွံၣ်န့ၣ်ကမၤသံပှၤလၢအမၤသံဒၣ်တၢ်န့ၣ်လီၤ. 22မ့တမ့ၢ်ဘၣ်ဒ်န့ၣ်,ဒီးတထီဒါဘၣ်ဝဲဒီး,မ့ၢ်အဆဲးတၢ်သတူၢ်ကလာ်,ဒီးတခီတအိၣ်ခိးဘၣ်ဝဲဒီး,မ့ၢ်ကွံာ်တ့ၢ်တၢ်တမံၤလၢ်လၢ်လၢအလိၤ, 23ဒီးတခီတထံၣ်ဘၣ်ဒီး,မ့ၢ်ကွံာ်အီၤလၢလၢၢ်တုၤအသံဒီး,မ့တမ့ၢ်ဘၣ်အဒုၣ်အဒါ,ဒီးမ့ၢ်တဃုမၤအၢအီၤဒီး, 24တၢ်အိၣ်ဖှိၣ်ဘၣ်စံၣ်ညီၣ်တၢ်လၢပှၤမၤသံတၢ်ဒီးပှၤမၤကၣ်တၢ်သွံၣ်အဘၢၣ်စၢၤန့ၣ်ဒ်တၢ်စံၣ်ညီၣ်တဖၣ်အံၤအသိးန့ၣ်လီၤ. 25ဒီးတၢ်အိၣ်ဖှိၣ်ဘၣ်မၤထူၣ်ဖျဲးပှၤမၤသံတၢ်လၢပှၤမၤကၣ်တၢ်သွံၣ်အစုပူၤ,ဒီးတၢ်အိၣ်ဖှိၣ်ဘၣ်ဒုးက့ၤက့ၤအီၤဆူအဝ့ၢ်တူၢ်လိာ်တၢ်ဖဲအဃ့ၢ်ဆူအပူၤ,ဒီးကအိၣ်ဖဲန့ၣ်တုၤပှၤလုၢ်တၢ်အခိၣ်လၢအဘၣ်တၢ်ဖှူအီၤလၢသိဖိစီဆှံတဂၤသံဝဲလီၤ. 26မ့မ့ၢ်ပှၤမၤသံတၢ်မ့ၢ်ဟးထီၣ်ကွံာ်သပှၢ်တၢၢ်လၢဝ့ၢ်တူၢ်လိာ်တၢ်အဃၢၤဖဲအဃ့ၢ်ဆူအပူၤဒီး, 27ပှၤမၤကၣ်တၢ်သွံၣ်တဂၤမ့ၢ်ထံၣ်န့ၢ်အီၤလၢအဝ့ၢ်တူၢ်လိာ်တၢ်အဃၢၤလၢခိဒီး,ပှၤမၤကၣ်တၢ်သွံၣ်န့ၣ်မ့ၢ်မၤသံပှၤမၤသံတၢ်ဒီး,သွံၣ်တအိၣ်လၢအလိၤဘၣ်. 28အဂ့ၢ်ဒ်အံၤ,ကြၢးအအိၣ်တ့ၢ်လၢအဝ့ၢ်တူၢ်လိာ်တၢ်တုၤပှၤလုၢ်တၢ်အခိၣ်သံလီၤ.မ့မ့ၢ်ပှၤလုၢ်တၢ်အခိၣ်သံဝဲအလီၢ်ခံန့ၣ်ပှၤမၤသံတၢ်တဂၤကက့ၤက့ၤဘၣ်ဆူအတၢ်ဟံးဃာ်အဟီၣ်ခိၣ်လီၤ. 29တၢ်တဖၣ်န့ၣ်ကကဲထီၣ်ဝဲလၢတၢ်စံၣ်ညီၣ်အတၢ်သိၣ်တၢ်သီလီၤလၢသုစၢၤသုသွဲၣ်လၢသုအိၣ်သုဆိးအလီၢ်ကိးပူၤဒဲးလီၤ. 30ပှၤလၢအမၤသံဒၣ်ပှၤကညီတဂၤဂၤန့ၣ်,ပှၤလၢအမၤသံဒၣ်ပှၤကညီတဂၤကဘၣ်တၢ်မၤသံအီၤလၢပှၤအုၣ်အသးတဖၣ်အထးခိၣ်အဃိလီၤ.မ့မ့ၢ်ပှၤတဂၤဃီတဘၣ်အုၣ်အသးတုၤအသံဘၣ်. 31ဒီးသုတဟံးန့ၢ်တၢ်မၤပူၤဖျဲးလၢပှၤမၤသံဒၣ်ပှၤကညီလၢအဂ့ၤသံတဂၤအဂီၢ်န့ၣ်တဂ့ၤ.မ့ၢ်အကဘၣ်တၢ်မၤသံအီၤသပှၢ်တၢၢ်လီၤ. 32ဒီးသုတဟံးန့ၢ်တၢ်မၤပူၤဖျဲးလၢပှၤလၢအဃ့ၢ်တၢ်ဆူဝ့ၢ်တူၢ်လိာ်တၢ်အဂီၢ်ဒ်သိးပှၤလုၢ်တၢ်အခိၣ်တချုးသံဒံးဘၣ်န့ၣ်အကဟဲက့ၤအိၣ်လၢထံဧိၤကီၢ်ဧိၤအပူၤန့ၣ်တဂ့ၤ. 33ဒီးသုတမၤဘၣ်အၢထံဧိၤကီၢ်ဧိၤလၢသုအိၣ်လၢအပူၤတဂ့ၤ.အဂ့ၢ်ဒ်အံၤ,တၢ်သွံၣ်မၤဘၣ်အၢကီၢ်န့ၣ်လီၤ,ဒီးကီၢ်န့ၣ်ကဘၣ်တၢ်မၤပူၤဖျဲးအီၤလၢတၢ်သွံၣ်ဂၢ်လီၤလၢအပူၤသ့,ထဲလၢပှၤလၢအဂၢ်လီၤအီၤတဂၤအသွံၣ်န့ၣ်ဧိၤလီၤ. 34ဒီးမၤဘၣ်အၢကီၢ်လၢသုကအိၣ်ကဆိးလၢအပူၤ,ဖဲယအိၣ်လၢအသးကံၢ်ပူၤန့ၣ်တဂ့ၤ,အဂ့ၢ်ဒ်အံၤ,တၢ်လၢယၤယွၤတဂၤအံၤယအိၣ်ယဆိးလၢပှၤအံၣ်စရ့လးဖိအကျါလီၤ.
Copyright information for
KswSKMB