‏ Numbers 4

1ဒီးယွၤကတိၤတၢ်ဒီးစီၤမိၤရှ့ဒီးစီၤအၤဟရိၣ်,ဒီးစံးဝဲဒၣ်, 2ဂံၢ်စီၤကဃးအဖိခွါလၢစီၤလ့ၤဝံအဖိခွါအကျါ,ဒ်အဒူၣ်တဖၣ်အသိး,ဒ်အပၢ်အဟံၣ်အသိးန့ၣ်, 3လၢအသးပှၢ်အနံၣ်သၢဆံဒီးအါန့ၢ်အန့ၣ်ပၢၢ်လၢအနံၣ်ယဲၢ်ဆံ,ကယဲၢ်ပှၤလၢအလဲၤနုာ်လၢပှၤသုးမုၢ်အကျါ,ဒ်သိးအကမၤတၢ်လၢတၢ်အိၣ်ဖှိၣ်အဒဲပူၤန့ၣ်တက့ၢ်.

4အအံၤမ့ၢ်စီၤကဃးအဖိခွါတဖၣ်အတၢ်မၤလၢတၢ်အိၣ်ဖှိၣ်အဒဲပူၤန့ၣ်,တၢ်စီဆှံကတၢၢ်တဖၣ်လီၤ.

5ဒီးတုၤပှၤဂီၢ်မုၢ်ဟးထီၣ်ဒီး,စီၤအၤဟရိၣ်ဒီးအဖိခွါကဘၣ်ဟဲ,ဒီးကဘၣ်ရူာ်လီၤတၢ်ကျၢၢ်ဘၢအယၣ်နီၢ်ကျၢၢ်ဘၢတၢ်,ဒီးကျၢၢ်ဘၢတၢ်အၢၣ်လီၤအီလီၤအတလါဒီးအီၤလီၤ. 6ဒီးဘၣ်ပာ်တၢ်ကျၢၢ်ဘၢတၢ်ဖံးလၢအဖီခိၣ်,ဒီးဘၣ်ဒါလီၤယၣ်လါဒီဘ့ၣ်ညါတဘ့ၣ်လၢအဖီခိၣ်ဒီးပာ်အနီၣ်ယိးဘိလီၤ.

7ဒီးဘၣ်ဒါလီၤယၣ်လါလၢတၢ်မဲာ်ညါကိၣ်အစီၢ်နီၤခိၣ်အဖီခိၣ်,ဒီးပာ်လီခီဘ့ၣ်ဘၣ်တဖၣ်,ဒီးနီၣ်တၢၤတဖၣ်,ဒီးသလၢတဖၣ်,ဒီးတၢ်ကျၢၢ်ဘၢလၢအကကျၢၢ်ဘၢတၢ်လၢအီၤတဖၣ်ဒီးကိၣ်တထံၣ်ဃီဘၣ်အိၣ်လၢအဖီခိၣ်လီၤ.

8ဒီးဘၣ်ဒါလီၤယၣ်ဂီၤလၢအဖီခိၣ်,ဒီးကျၢၢ်ဘၢအီၤဒီးတၢ်ကျၢၢ်ဘၢတၢ်ဖံး,ဒီးပာ်အနီၣ်ယိးဘိလီၤ.

9ဒီးဘၣ်ဟံးန့ၢ်ယၣ်လါ,ဒီးကျၢၢ်ဘၢတၢ်ကပီၤအမ့ၣ်အူဒၢမိၢ်ပှၢ်,ဒီးအမ့ၣ်အူဒၢတဖၣ်,ဒီးအနီၣ်တံာ်မ့ၣ်အူ,ဒီးနီၣ်တံာ်အလီခီ,ဒီးသိအလီခီတဖၣ်လၢအမၤတၢ်လၢအီၤလီၤ. 10ဒီးဘၣ်ပာ်အီၤ,ဒီးအတၢ်ဖိတၢ်လံၤခဲလၢာ်လၢတၢ်ကျၢၢ်ဘၢတၢ်ဖံးအပူၤ,ဒီးဘၣ်ပာ်အီၤလၢနီၣ်ယိးဘိအလိၤလီၤ.

11ဒီးဘၣ်ဒါလီၤယၣ်လါလၢတၢ်လုၢ်လီၢ်ထူအဖီခိၣ်,ဒီးကျၢၢ်ဘၢအီၤလၢတၢ်ကျၢၢ်ဘၢတၢ်ဖံး,ဒီးပာ်အနီၣ်ယိးဘိလီၤ.

12ဒီးဘၣ်ဟံးန့ၢ်ကယဲၢ်တၢ်ဖိတၢ်လံၤလၢအမၤတၢ်လၢအီၤလၢတၢ်အလီၢ်စီဆှံအပူၤ,ဒီးပာ်ဝဲလၢယၣ်လါအပူၤ,ဒီးကျၢၢ်ဘၢအီၤဒီးတၢ်ကျၢၢ်ဘၢတၢ်ဖံး,ဒီးပာ်လီၤဝဲလၢနီၣ်ယိးတၢ်အဖီခိၣ်လီၤ.

13ဒီးဘၣ်ဟံးထီၣ်ကွံာ်ဖၣ်ဆါလၢတၢ်လုၢ်လီၢ်အဖီခိၣ်,ဒီးဒါလီၤယၣ်လါလၢအဖီခိၣ်လီၤ.ဒီးလၢအဖီခိၣ်န့ၣ်ဘၣ်ပာ်ကယဲၢ်အတၢ်ဖိတၢ်လံၤလၢအမၤတၢ်လၢအီၤ,သပၢၤမ့ၣ်အူတဖၣ်,အနီၣ်ကွးတဖၣ်,ဒီးအတပူာ်တဖၣ်,ဒီးသလၢဖှံတၢ်တဖၣ်,ဒီးကယဲၢ်တၢ်လုၢ်လီၢ်အပိးအလီခဲလၢာ်လီၤ. 14ဒီးဘၣ်ဒါလီၤတၢ်ကျၢၢ်ဘၢတၢ်ဖံးလၢအဖီခိၣ်,ဒီးပာ်နီၣ်ယိးဘိလီၤ.

15ဒီးတုၤစီၤအၤဟရိၣ်ဒီးအဖိခွါတဖၣ်ကျၢၢ်ဘၢတၢ်အလီၢ်စီဆှံ,ဒီးကယဲၢ်တၢ်အလီၢ်စီဆှံအတၢ်ဖိတၢ်လံၤခဲလၢာ်ဝံၤဒီး,တုၤပှၤဂီၢ်မုၢ်ကလဲၤတၢ်ဒီး,လၢတၢ်န့ၣ်အလီၢ်ခံပှၤကဃးအဖိခွါတဖၣ်ဘၣ်ဟဲဒ်သိးအကစိာ်ဝဲလီၤ.ဘၣ်ဆၣ်ဒီးတဘၣ်ထိးတၢ်စီဆှံဘၣ်,ကသံဘၣ်ဖုးလီၤ.တၢ်တဖၣ်န့ၣ်မ့ၢ်စီၤကဃးအဖိခွါတဖၣ်အတၢ်ယိးလၢတၢ်အိၣ်ဖှိၣ်အဒဲပူၤလီၤ.

16ဒီးပှၤလုၢ်တၢ်အဒိၣ်စီၤအၤဟရိၣ်အဖိခွါစီၤအလၤဧစၢ်အတၢ်မၤန့ၣ်မ့ၢ်တၢ်ဘၣ်ဃးဒီးသိလၢတၢ်ကပီၤအဂီၢ်,ဒီးတၢ်နၢမူဆိၣ်ကဲၤ,ဒီးတၢ်မၤဘူၣ်ကိၣ်တထံၣ်ဃီ,ဒီးသိဖှူတၢ်,တၢ်ကွၢ်တၢ်အိၣ်အလီၢ်ဒီဖျၢၣ်ညါ,ဒီးကယဲၢ်တၢ်အိၣ်လၢအပူၤလၢတၢ်အလီၢ်စီဆှံအပူၤ,ဒီးလၢအတၢ်ဖိတၢ်လံၤအပူၤန့ၣ်လီၤ.

17ဒီးယွၤကတိၤတၢ်ဒီးစီၤမိၤရှ့ဒီးစီၤအၤဟရိၣ်,ဒီးစံးဝဲဒၣ်, 18ဒီၣ်တဲာ်ကွံာ်ပှၤကဃးဖိအဒူၣ်တဒူၣ်လၢပှၤလ့ၤဝံဖိတဂ့ၤ. 19မၤအီၤလၢတၢ်အံၤ,တုၤအသုးဘူးအသးဆူတၢ်စီဆှံကတၢၢ်တဖၣ်ဒီး,ဒ်သိးအကမူဝဲ,ဒီးအသုတသံတဂ့ၤဒီး,စီၤအၤဟရိၣ်ဒီးအဖိခွါတဖၣ်ဘၣ်လဲၤနုာ်,ဒီးပာ်အီၤတဂၤလၢအတၢ်မၤ,ဒီးတဂၤလၢအတၢ်ယိးစုာ်စုာ်လီၤ. 20မ့မ့ၢ်အဝဲသ့ၣ်တဘၣ်လဲၤနုာ်ကွၢ်တၢ်စီဆှံတဖၣ်ထဲတပနာ်ဧိၤဘၣ်,ကသံဘၣ်ဖုးလီၤ.

21ဒီးယွၤကတိၤတၢ်ဒီးစီၤမိၤရှ့,ဒီးစံးဝဲဒၣ်, 22ဂံၢ်စီၤက့ရၡိၣ်အဖိခွါစ့ၢ်ကီး,ဒ်အပၢ်အဟံၣ်တဖၣ်အသိး,ဒ်အဒူၣ်တဖၣ်အသိးန့ၣ်တက့ၢ်. 23လၢအသးပှၢ်အနံၣ်သၢဆံဒီးအါန့ၢ်အန့ၣ်ပၢၢ်လၢအနံၣ်ယဲၢ်ဆံန့ၣ်နဘၣ်ဂံၢ်အီၤ,ကယဲၢ်ပှၤလၢအလဲၤနုာ်လၢပှၤသုးမုၢ်အကျါလၢအကမၤပှၤသုးဖိအတၢ်,ဒ်သိးအကမၤတၢ်အိၣ်ဖှိၣ်အဒဲအကုၢ်အပှၤအတၢ်မၤလီၤ.

24အအံၤမ့ၢ်ပှၤက့ရၡိၣ်ဖိအဒူၣ်တဖၣ်အတၢ်မၤလၢအကမၤတၢ်,ဒီးယိးတၢ်လီၤ. 25ဒီးဘၣ်ယိးတၢ်အိၣ်အလီၢ်အယၣ်သဒၢတၢ်,ဒီးတၢ်အိၣ်ဖှိၣ်အဒဲ,အတၢ်ကျၢၢ်ဘၢဒီးအတၢ်ကျၢၢ်ဘၢတၢ်ဖံးလၢအအိၣ်လၢအဖီခိၣ်,ဒီးယၣ်နီၣ်ကျၢၢ်ဘၢတၢ်လၢတၢ်အိၣ်ဖှိၣ်အဒဲအကျဲစၢၤအဂီၢ်, 26ဒီးတၢ်ဂၢၤအယၣ်လီၤစဲၤတဖၣ်,ဒီးယၣ်နီၣ်ကျၢၢ်ဘၢတၢ်ဂၢၤအပဲတရီအကျဲစၢၤအဂီၢ်လၢအအိၣ်လၢတၢ်အိၣ်အလီၢ်အဃၢၤဒီးတၢ်လုၢ်လီၢ်အဃၢၤဝးတရံးဝဲ,ဒီးအပျံၤတဖၣ်,ဒီးကယဲၢ်တၢ်အတၢ်ဖိတၢ်လံၤဘၣ်ဃးဒီးအတၢ်မၤ,ဒီးကယဲၢ်တၢ်လၢတၢ်မၤအီၤအလီၢ်အိၣ်န့ၣ်ကဘၣ်မၤဝဲလီၤ.

27ဖဲစီၤအၤဟရိၣ်ဒီးအဖိခွါတဖၣ်အထးခိၣ်န့ၣ်ကကဲထီၣ်ကယဲၢ်ပှၤက့ရၡိၣ်အဖိခွါအတၢ်မၤ,လၢကယဲၢ်အတၢ်ယိး,ဒီးလၢကယဲၢ်အမၤတၢ်လီၤ.ဒီးသုဘၣ်ပာ်အီၤလၢအတၢ်ယိးလၢအတၢ်ကွၢ်အလီၢ်န့ၣ်ခဲလၢာ်အပူၤလီၤ.

28အဝဲန့ၣ်မ့ၢ်ပှၤက့ရၡိၣ်အဖိခွါအဒူၣ်တဖၣ်အတၢ်မၤလၢတၢ်အိၣ်ဖှိၣ်အဒဲပူၤလီၤ.ဒီးအတၢ်ကွၢ်န့ၣ်အိၣ်ဝဲလၢပှၤလုၢ်တၢ်အဒိၣ်စီၤအၤဟရိၣ်အဖိခွါစီၤအံသမၢ်အစုပူၤလီၤ.

29စီၤမရၤရံၤအဖိခွါတဖၣ်န့ၣ်နဘၣ်ဂံၢ်အီၤဒ်အဒူၣ်တဖၣ်အသိး,ဒ်အပၢ်အဟံၣ်တဖၣ်အသိးန့ၣ်လီၤ. 30လၢအသးပှၢ်အနံၣ်သၢဆံဒီးအါန့ၢ်အန့ၣ်ပၢၢ်လၢအနံၣ်ယဲၢ်ဆံန့ၣ်နဘၣ်ဂံၢ်အီၤ,ကယဲၢ်ပှၤလၢအလဲၤနုာ်လၢပှၤသုးမုၢ်အကျါလၢအကမၤပှၤသုးဖိအတၢ်,ဒ်သိးအကမၤတၢ်အိၣ်ဖှိၣ်အဒဲအကုၢ်အပှၤအတၢ်မၤလီၤ.

31ဒီးအအံၤမ့ၢ်အတၢ်ယိးအတၢ်ကွၢ်အလီၢ်,ဒ်ကယဲၢ်အတၢ်မၤလၢတၢ်အိၣ်ဖှိၣ်အဒဲပူၤအသိးန့ၣ်,တၢ်အိၣ်ဖှိၣ်အလီၢ်အသ့ၣ်ဘ့ၣ်ဘၣ်တဖၣ်,ဒီးအနီၣ်ဘိတဖၣ်,ဒီးအထူၣ်တဖၣ်,ဒီးအခီၣ်တဖၣ်, 32ဒီးဂၢၤဝးတရံးဝဲအထူၣ်တဖၣ်,ဒီးအခီၣ်တဖၣ်,ဒီးအတၢ်ကမိာ်ခံတဖၣ်,ဒီးအပျံၤတဖၣ်,ဒီးအတၢ်ဖိတၢ်လံၤခဲလၢာ်,ဒီးအတၢ်ဘၣ်ဃးဒီးအမၤတၢ်ခဲလၢာ်လီၤ.ဒီးသုဘၣ်ဂံၢ်အတၢ်ယိးအတၢ်ကွၢ်အလီၢ်အတၢ်ဖိတၢ်လံၤန့ၣ်လၢအမံၤတဖၣ်လီၤ.

33အဝဲန့ၣ်မ့ၢ်စီၤမရၤရံၤအဖိခွါအဒူၣ်တဖၣ်အတၢ်မၤ,ဒ်အတၢ်မၤခဲလၢာ်အသိးလၢတၢ်အိၣ်ဖှိၣ်အဒဲပူၤ,လၢပှၤလုၢ်တၢ်အဒိၣ်စီၤအၤဟရိၣ်အဖိခွါစီၤအံသမၢ်အစုပူၤလီၤ.

34ဒီးစီၤမိၤရှ့,ဒီးစီၤအၤဟရိၣ်,ဒီးတၢ်အိၣ်ဖှိၣ်အပဒိၣ်တဖၣ်န့ၣ်ဂံၢ်ပှၤကဃးဖိဒ်အဒူၣ်တဖၣ်အသိး,ဒီးဒ်အပၢ်အဟံၣ်တဖၣ်အသိး, 35လၢအသးပှၢ်အနံၣ်သၢဆံဒီးအါန့ၢ်အန့ၣ်ပၢၢ်လၢအနံၣ်ယဲၢ်ဆံ,ကယဲၢ်ပှၤလၢအလဲၤနုာ်လၢပှၤသုးမုၢ်အကျါလၢအကမၤပှၤသုးဖိအတၢ်,ဒ်သိးအကမၤတၢ်အိၣ်ဖှိၣ်အဒဲအကုၢ်အပှၤအတၢ်မၤ, 36တၢ်ဂံၢ်အီၤ,ဒ်အဒူၣ်တဖၣ်အသိးန့ၣ်,ပှၤခံကထိ,နွံကယၤ,ဒီးယဲၢ်ဆံလီၤ.

37အဝဲသ့ၣ်တဖၣ်န့ၣ်မ့ၢ်ပှၤလၢအဘၣ်တၢ်ဂံၢ်အီၤလၢပှၤကဃးဖိအဒူၣ်တဖၣ်အကျါ,ကယဲၢ်ပှၤလၢအကမၤတၢ်လၢတၢ်အိၣ်ဖှိၣ်အဒဲပူၤ,လၢစီၤမိၤရှ့ဒီးစီၤအၤဟရိၣ်ဂံၢ်ဝဲ,ဖဲယွၤအထးခိၣ်လၢစီၤမိၤရှ့အစုပူၤလီၤ.

38ဒီးပှၤလၢအဘၣ်တၢ်ဂံၢ်အီၤလၢစီၤက့ရၡိၣ်အဖိခွါအကျါ,ဒ်အဒူၣ်တဖၣ်အသိး,ဒီးဒ်အပၢ်အဟံၣ်တဖၣ်အသိး, 39လၢအသးပှၢ်အနံၣ်သၢဆံဒီးအါန့ၢ်အန့ၣ်ပၢၢ်လၢအနံၣ်ယဲၢ်ဆံ,ကယဲၢ်ပှၤလၢအလဲၤနုာ်လၢသုးမုၢ်အကျါလၢအကမၤပှၤသုးဖိအတၢ်ဒ်သိးအကမၤတၢ်အိၣ်ဖှိၣ်အဒဲအကုၢ်အပှၤအတၢ်မၤ, 40တၢ်ဂံၢ်အီၤဒ်အဒူၣ်တဖၣ်အသိး,ဒ်အပၢ်အဟံၣ်တဖၣ်အသိးန့ၣ်ပှၤခံကထိဒီးဃုကယၤဒီးသၢဆံလီၤ. 41အဝဲသ့ၣ်တဖၣ်န့ၣ်မ့ၢ်ပှၤလၢအဘၣ်တၢ်ဂံၢ်အီၤလၢစီၤက့ရၡိၣ်အဖိခွါအဒူၣ်တဖၣ်အကျါ,ကယဲၢ်ပှၤလၢအကမၤတၢ်လၢတၢ်အိၣ်ဖှိၣ်အဒဲပူၤ,လၢစီၤမိၤရှ့ဒီးစီၤအၤဟရိၣ်ဂံၢ်ဝဲ,ဖဲယွၤအထးခိၣ်လီၤ.

42ဒီးပှၤလၢအဘၣ်တၢ်ဂံၢ်အီၤလၢစီၤမရၤရံၤအဖိခွါအဒူၣ်တဖၣ်အကျါ,ဒ်အဒူၣ်တဖၣ်အသိး,ဒ်အပၢ်အဟံၣ်တဖၣ်အသိး, 43လၢအသးပှၢ်အနံၣ်သၢဆံဒီးအါန့ၢ်အန့ၣ်ပၢၢ်လၢအနံၣ်ယဲၢ်ဆံ,ကယဲၢ်ပှၤလၢအလဲၤနုာ်လၢသုးမုၢ်အကျါလၢအကမၤပှၤသုးဖိအတၢ်,ဒ်သိးအကမၤတၢ်အိၣ်ဖှိၣ်အဒဲအကုၢ်အပှၤအတၢ်မၤ, 44တၢ်ဂံၢ်အီၤ,ဒ်အဒူၣ်တဖၣ်အသိးန့ၣ်,ပှၤသၢကထိ,ဒီးခံကယၤလီၤ.

45အဝဲသ့ၣ်တဖၣ်န့ၣ်မ့ၢ်ပှၤလၢအဘၣ်တၢ်ဂံၢ်အီၤလၢစီၤမရၤရံၤအဖိခွါအဒူၣ်တဖၣ်အကျါလၢစီၤမိၤရှ့ဒီးစီၤအၤဟရိၣ်ဂံၢ်ဝဲ,ဖဲယွၤအထးခိၣ်လၢစီၤမိၤရှ့အစုပူၤန့ၣ်လီၤ.

46ကယဲၢ်ပှၤလၢအဘၣ်တၢ်ဂံၢ်အီၤလၢပှၤလ့ၤဝံဖိအကျါ,လၢစီၤမိၤရှ့ဒီးစီၤအၤဟရိၣ်,ဒီးပှၤအံၣ်စရ့လးဖိအပဒိၣ်တဖၣ်ဂံၢ်ဝဲ,ဒ်အဒူၣ်တဖၣ်အသိး,ဒ်အပၢ်အဟံၣ်တဖၣ်အသိး, 47လၢအသးပှၢ်အနံၣ်သၢဆံဒီးဆူအဖီခိၣ်ပၢၢ်လၢအနံၣ်ယဲၢ်ဆံ,ကယဲၢ်ပှၤလၢအလဲၤနုာ်ဒ်သိးအကမၤတၢ်အခ့အပှၤအတၢ်မၤ,ဒီးယိးအတၢ်မၤလၢတၢ်အိၣ်ဖှိၣ်အဒဲပူၤန့ၣ်, 48တၢ်ဂံၢ်ပှၤဃိးကထိ,ဒီးယဲၢ်ကယၤ,ဒီးဃိးဆံလီၤ.

49ဖဲယွၤအထးခိၣ်,တၢ်ဂံၢ်အီၤလၢစီၤမိၤရှ့အစု,ဖဲဒၣ်ပှၤဒ်အမၤတၢ်အသိး,ဒ်အယိးတၢ်အသိးစုာ်စုာ်လီၤ.ဒီးဘၣ်တၢ်ဂံၢ်အီၤလၢစီၤမိၤရှ့ဒ်ယွၤမၤလိာ်အီၤအသိးန့ၣ်လီၤ.