Num 5 | KswSKMB | STEP | ဒီးယွၤကတိၤတၢ်ဒီးစီၤမိၤရှ့,ဒီးစံးဝဲဒၣ်,

‏ Numbers 5

1 ဒီးယွၤကတိၤတၢ်ဒီးစီၤမိၤရှ့,ဒီးစံးဝဲဒၣ်, 2 မၤလိာ်ပှၤအံၣ်စရ့လးဖိလၢအကဒုးဟးထီၣ်ကွံာ်ကယဲၢ်ပှၤဘၣ်တၢ်ဆါအၢ,ဒီးကယဲၢ်ပှၤလၢအအိၣ်ဒီးတၢ်ယွၤလီၤ,ဒီးကယဲၢ်ပှၤလၢအတကဆှီဘၣ်လၢတၢ်သံအဃိတဂၤလၢ်လၢ်လၢပှၤသူၣ်ဒဲအလီၢ်ပူၤန့ၣ်တက့ၢ်. 3 ပိာ်ခွါမ့ၢ်ဂ့ၤ,ပိာ်မုၣ်မ့ၢ်ဂ့ၤ,သုဘၣ်ဒုးဟးထီၣ်အီၤလၢပှၤသူၣ်ဒဲအလီၢ်ပူၤဆူခိ,ဒ်သိးအသုတမၤတကဆှီဘၣ်ပှၤသူၣ်ဒဲအလီၢ်တဖၣ်လၢယအိၣ်ယဆိးလၢအသးကံၢ်ပူၤန့ၣ်တဂ့ၤလီၤ.

4 ဒီးပှၤအံၣ်စရ့လးဖိမၤဒ်န့ၣ်,ဒီးဒုးဟးထီၣ်ကွံာ်အီၤလၢပှၤသူၣ်ဒဲအလီၢ်ပူၤဆူခိလီၤ.ဒ်ယွၤမၤလိာ်စီၤမိၤရှ့အသိးန့ၣ်ပှၤအံၣ်စရ့လးဖိမၤဝဲဒ်န့ၣ်သိးလီၤ.

5 ဒီးယွၤကတိၤတၢ်ဒီးစီၤမိၤရှ့,ဒီးစံးဝဲဒၣ်, 6 စံးဘၣ်ပှၤအံၣ်စရ့လးဖိ,တုၤပိာ်ခွါဂ့ၤဂ့ၤ,ပိာ်မုၣ်ဂ့ၤဂ့ၤ,မၤကမၣ်ယွၤလၢတၢ်တဖၣ်တမံၤမံၤလၢပှၤကညီအတၢ်ဒဲးဘးခဲလၢာ်အကျါဒီး,အတၢ်ဒဲးဘးမ့ၢ်အိၣ်ဒီး, 7 ဘၣ်တဲလီၤကျဲၤလီၤအတၢ်ကမၣ်လၢအမၤ,ဒီးဘၣ်ဟ့ၣ်က့ၤလၢအတၢ်ကမၣ်အဃိလၢတၢ်အကစၢ်ဒၣ်ဝဲ,ဒီးပာ်ဖှိၣ်ယဲၢ်ပူတပူဒီးအီၤ,ဒီးဘၣ်ဟ့ၣ်ဝဲလၢပှၤဒိးတၢ်မၤကမၣ်လၢအီၤလီၤ.

8 မ့မ့ၢ်ပှၤတဂၤန့ၣ်အပှၤပှ့ၤက့ၤတၢ်လၢအကဒိးန့ၢ်တၢ်လၢတၢ်ကမၣ်အဃိန့ၣ်မ့ၢ်တအိၣ်ဘၣ်ဒီး,မ်တၢ်လၢအဟ့ၣ်က့ၤတၢ်လၢတၢ်ကမၣ်အဃိလၢယွၤ,ကဲလၢပှၤလုၢ်တၢ်အဒိၣ်အတၢ်န့ၣ်တက့ၢ်.လၢန့ၣ်အမဲာ်ညါတၢ်မၤပူၤဖျဲးအသိဖါတဒုလၢတၢ်ကမၤပူၤဖျဲးလၢအီၤလၢအဃိအိၣ်ဒံးလီၤ.

9 ဒီးကယဲၢ်တၢ်ဂံၢ်ဘၣ်ဃးဒီးပှၤအံၣ်စရ့လးဖိအတၢ်စီဆှံခဲလၢာ်လၢအဟဲစိာ်ဆူပှၤလုၢ်တၢ်အဒိၣ်န့ၣ်ကကဲထီၣ်အတၢ်လီၤ. 10 ဒီးဖဲဒၣ်ပှၤအတၢ်စီဆှံတမံၤမံၤန့ၣ်ကကဲထီၣ်အတၢ်,ဖဲဒၣ်တၢ်လၢပှၤဟ့ၣ်ပှၤလုၢ်တၢ်အဒိၣ်တဂၤဂၤန့ၣ်ကကဲထီၣ်အတၢ်လီၤ.

11 ဒီးယွၤကတိၤတၢ်ဒီးစီၤမိၤရှ့,ဒီးစံးဝဲဒၣ်, 12 ကတိၤတၢ်ဒီးပှၤအံၣ်စရ့လးဖိ,ဒီးစံးဘၣ်အီၤ,ဖဲဒၣ်ပှၤအမါမ့ၢ်ဃၣ်ကပၤအသးဒီးမၤကမၣ်ဘၣ်အီၤ, 13 ဒီးပှၤဂၤမံဃုာ်ဒီးအီၤ,ဒီးအိၣ်သဒၢဒီးအဝၤအမဲာ်,ဒီးအိၣ်ခူသူၣ်,ဒီးတကဆှီဘၣ်ဝဲဘၣ်,ဒီးပှၤအုၣ်အသးတအိၣ်ဘၣ်,ဒီးပှၤတဖီၣ်န့ၢ်ဘၣ်အီၤဖဲအမၤတၢ်အဖၢမုၢ်ဘၣ်, 14 ဒီးတၢ်သးက့ၣ်အသးမ့ၢ်ဘၣ်အဝၤ,ဒီးသးက့ၣ်အမါ,ဒီးအဝဲဒၣ်ဘၣ်အၢမ့ၢ်ဂ့ၤ,မ့တမ့ၢ်ဘၣ်တၢ်သးက့ၣ်အသးမ့ၢ်ဘၣ်အဝၤဒီး,အသးက့ၣ်အမါ,ဒီးတဘၣ်အၢဘၣ်မ့ၢ်ဂ့ၤဒီး, 15 ပှၤတဂၤန့ၣ်ဘၣ်ဟဲစိာ်အမါဆူပှၤလုၢ်တၢ်အဒိၣ်အအိၣ်,ဒီးဘၣ်ဟဲစိာ်အတၢ်မၤဘူၣ်လၢအဂီၢ်,ဘုမုယီၤအကိၣ်ကမူၣ်အ့ဖးဆံဆဲၣ်ပူတပူလီၤ.ဒီးတဘၣ်လူသိလၢအဖီခိၣ်ဘၣ်,တဘၣ်ပာ်လီၢ်ဘၣ်လၢအဖီခိၣ်ဘၣ်,အဂ့ၢ်ဒ်အံၤ,မ့ၢ်တၢ်မၤဘူၣ်ကိၣ်လၢသးက့ၣ်အဃိ,တၢ်မၤဘူၣ်ကိၣ်တၢ်သ့ၣ်နီၣ်ထီၣ်က့ၤတၢ်လၢအဒုးသ့ၣ်နီၣ်ထီၣ်က့ၤတၢ်ကမၣ်လီၤ.

16 ဒီးပှၤလုၢ်တၢ်အဒိၣ်ဘၣ်ဒုးသုးဘူးပိာ်မုၣ်,ဒီးပာ်အီၤလၢယွၤအမဲာ်ညါလီၤ.

17 ဒီးပှၤလုၢ်တၢ်အဒိၣ်ဘၣ်ဟံးန့ၢ်ထံစီဆှံလၢလီခီဟီၣ်ခိၣ်အပူၤ,ဒီးလၢဟီၣ်ခိၣ်အကမူၣ်လၢအအိၣ်လၢတၢ်အိၣ်အလီၢ်အဃီဒါန့ၣ်ပှၤလုၢ်တၢ်အဒိၣ်ဘၣ်ဟံးန့ၢ်ဝဲ,ဒီးပာ်လၢထံကျါလီၤ.

18 ဒီးပှၤလုၢ်တၢ်အဒိၣ်န့ၣ်ဘၣ်ပာ်ပိာ်မုၣ်လၢယွၤအမဲာ်ညါ,ဒီးဒုးအိၣ်ဘ့ၣ်ခိၣ်ပိာ်မုၣ်အခိၣ်,ဒီးပာ်တၢ်မၤဘူၣ်ကိၣ်တၢ်သ့ၣ်နီၣ်ထီၣ်က့ၤလၢအမ့ၢ်တၢ်မၤဘူၣ်ကိၣ်ဘၣ်ဃးဒီးသးက့ၣ်လၢအစုပူၤ,ဒီးပှၤလုၢ်တၢ်အဒိၣ်ဘၣ်အိၣ်ဒီးထံခၣ်လၢအစုပူၤလၢအဒုးဆိၣ်အၢတၢ်လီၤ. 19 ဒီးပှၤလုၢ်တၢ်အဒိၣ်ဘၣ်ဒုးဆိၣ်ပိာ်မုၣ်,ဒီးစံးဘၣ်အီၤ,ပှၤပိာ်ခွါမ့ၢ်တမံဃုာ်ဘၣ်ဒီးနၤဘၣ်,ဒီးနမ့ၢ်တဃၣ်ကပၤနသးဆူတၢ်တကဆှီဘၣ်လၢပှၤဂၤလၢနဝၤအလီၢ်ဘၣ်ဒီး,မ်နပူၤဖျဲးဒီးထံခၣ်အံၤလၢအဒုးဘၣ်ဆိၣ်အၢတၢ်တက့ၢ်, 20 မ့မ့ၢ်နမ့ၢ်ဃၣ်ကပၤတ့ၢ်နသးဆူပှၤဂၤလၢနဝၤအလီၢ်ဒီးနဘၣ်အၢ,ဒီးနမ့ၢ်ဟ့ၣ်တ့ၢ်ပှၤပိာ်ခွါတဂၤမံဃုာ်ဒီးနၤလၢနဝၤအလီၢ်ဒီး, 21 (ပှၤလုၢ်တၢ်အဒိၣ်ဘၣ်ဒုးဆိၣ်ပိာ်မုၣ်လၢတၢ်ဆိၣ်အၢဒီးပှၤလုၢ်တၢ်အဒိၣ်ဘၣ်စံးဘၣ်ပိာ်မုၣ်,)တုၤယွၤဟ့ၣ်နကံၣ်ဒုၣ်လီၤ,ဒီးနဟၢဖၢညိးထီၣ်ဒီး,မ်ယွၤပာ်နၤလၢတၢ်ဆိၣ်အၢ,ဒီးဆိၣ်တၢ်အလီၢ်လၢနပှၤတကလုာ်အကျါန့ၣ်တက့ၢ်. 22 ဒီးထံလၢအဒုးဆိၣ်အၢတၢ်အံၤကလဲၤနုာ်လၢနဟၢဖၢပူၤဒ်သိးအကဒုးညိးထီၣ်နဟၢဖၢ,ဒီးဒုးလီၤနကံၣ်ဒုၣ်လီၤ.ဒီးပိာ်မုၣ်ဘၣ်စံး,အၤမ့ၣ်,အၤမ့ၣ်.

23 ဒီးပှၤလုၢ်တၢ်အဒိၣ်ဘၣ်ကွဲးတၢ်ဆိၣ်အၢတဖၣ်န့ၣ်လၢလံာ်ပူၤ,ဒီးတြူာ်လီၤကွံာ်အီၤဆူထံခၣ်အပူၤန့ၣ်လီၤ. 24 ဒီးကဒုးအီပိာ်မုၣ်လၢထံခၣ်လၢအဒုးဘၣ်ဆိၣ်အၢတၢ်,ဒီးထံလၢအဒုးဘၣ်ဆိၣ်အၢတၢ်ကလဲၤနုာ်လၢအပူၤလၢတၢ်ခၣ်လီၤ.

25 ဒီးပှၤလုၢ်တၢ်အဒိၣ်ဘၣ်ဟံးန့ၢ်တၢ်မၤဘူၣ်ကိၣ်ဘၣ်ဃးဒီးသးက့ၣ်လၢပိာ်မုၣ်အစုပူၤ,ဒီးဝၢ်အီၤလၢတၢ်ဝၢ်လၢယွၤအမဲာ်ညါ,ဒီးဟဲစိာ်အီၤဆူတၢ်လုၢ်လီၢ်လီၤ. 26 ဒီးပှၤလုၢ်တၢ်အဒိၣ်ဘၣ်ဟံးန့ၢ်တတၢၤဒုၣ်လၢတၢ်မၤဘူၣ်အပူၤအတၢ်ဒုးသ့ၣ်နီၣ်ထီၣ်က့ၤတၢ်,ဒီးဆိၣ်ကဲၤဝဲလၢတၢ်လုၢ်လီၢ်အဖီခိၣ်လီၤ.လၢခံက့ၤဒီးဘၣ်ဒုးအီပိာ်မုၣ်လၢထံခၣ်န့ၣ်လီၤ.

27 ဒီးဒုးအီဝဲလၢထံဝံၤဒီး,တၢ်ကမၤအသးလၢပိာ်မုၣ်န့ၣ်မ့ၢ်ဘၣ်အၢ,ဒီးမၤကမၣ်ဘၣ်လံအဝၤဒီး,ထံလၢအဒုးဘၣ်ဆိၣ်အၢတၢ်ကလဲၤနုာ်လၢအပူၤလၢတၢ်ခၣ်,ဒီးအဟၢဖၢကညိးထီၣ်,ဒီးအကံၣ်ဒုၣ်ကလီၤ,ဒီးပိာ်မုၣ်န့ၣ်ကကဲထီၣ်တၢ်ဆိၣ်အၢအလီၢ်လၢအပှၤတကလုာ်ဒၣ်ဝဲအကျါလီၤ.

28 ဒီးပိာ်မုၣ်န့ၣ်မ့ၢ်တဘၣ်အၢဘၣ်,ဒီးမ့ၢ်ကဆှီဝဲဒီး,ကပူၤဖျဲး,ဒီးကဒၢထီၣ်လီၤ.

29 အအံၤမ့ၢ်တၢ်သိၣ်တၢ်သီဘၣ်ဃးဒီးတၢ်သးက့ၣ်ဖဲမါဃၣ်အသးဆူပှၤလၢအတမ့ၢ်ဘၣ်အဝၤဒီးဘၣ်အၢမ့ၢ်ဂ့ၤ,အဝၤဘၣ်တၢ်သးက့ၣ်အမါမ့ၢ်ဂ့ၤန့ၣ်လီၤ.

30 တုၤနုၤတစု,ဘၣ်ပာ်ပိာ်မုၣ်လၢယွၤအမဲာ်ညါ,ဒီးပှၤလုၢ်တၢ်အဒိၣ်ဘၣ်မၤအီၤလၢတၢ်သိၣ်တၢ်သီအံၤခဲလၢာ်လီၤ. 31 ဒီးပိာ်ခွါကပူၤဖျဲးဒီးတၢ်ဒဲးဘး,ဒီးပိာ်မုၣ်ကဘၣ်အတၢ်ဒဲးဘးလီၤ.