‏

လံာ်စီၤပီလူးကွဲးန့ၢ်စီၤဖံၤလ့မိၣ်.

PHILEMON.

‏ Philemon

1 ပှၤဘၣ်တၢ်စၢဃာ်လၢယ့ၣ်ရှူးခရံာ်အဃိယၤစီၤပီလူး,ဒီးပဒီပုၢ်ဝဲၢ်စီၤတံၤမသ့း,စံးဘၣ်ပှၤလၢပအဲၣ်အီၤဒီးပှၤမၤဃုာ်တၢ်ဒီးပှၤ,စီၤဖံၤလ့မိၣ်, 2 ဒီးပှၤလၢတၢ်အဲၣ်အီၤပဒီပုၢ်ဝဲၢ်မုၣ်နီၢ်အးဖံ,ဒီးပှၤသုးဖိသကိးဒီးပှၤစီၤအၢ်ဃံၤပူးဒီးတၢ်အိၣ်ဖှိၣ်အိၣ်လၢနဟံၣ်ပူၤန့ၣ်, 3 မ်တၢ်ဘျုးတၢ်ဖှိၣ်,ဒီးတၢ်ဃူတၢ်ဖိးလၢပပၢ်ယွၤ,ဒီးကစၢ်ယ့ၣ်ရှူးခရံာ်အအိၣ်န့ၣ်,ဘၣ်သုတက့ၢ်.

4 ယနၢ်ဟူလၢနတၢ်အဲၣ်တၢ်ကွံဒီးနတၢ်နာ်လၢအအိၣ်ဒီးနၤ,ဘၣ်ဃးဒီးကစၢ်ယ့ၣ်ရှူးဒီးပှၤစီဆှံခဲလၢာ်အဂ့ၢ်ဒီး 5 ယစံးထီၣ်ပတြၢၤယွၤဒီးသ့ၣ်နီၣ်ထီၣ်က့ၤနၤလၢယတၢ်ထုကဖၣ်အပူၤတဘိယူၢ်ဃီ, 6 ဒ်သိးနတၢ်နာ်အတၢ်ရ့လိာ်ကကဲထီၣ်လၢတၢ်အၢၣ်လီၤအီလီၤကယဲၢ်တၢ်အဂ့ၤအိၣ်လၢပပူၤလၢယ့ၣ်ရှူးခရံာ်အဂီၢ်လီၤ. 7 အဂ့ၢ်ဒ်အံၤ,ဒီပုၢ်ဝဲၢ်ဧၢ,ယသူၣ်ခုယသးခု,ယသူၣ်မုာ်ယသးမုာ်လၢနတၢ်အဲၣ်တၢ်ကွံအဃိဒိၣ်မးလီၤ.အဂ့ၢ်ဒ်အံၤ,ပှၤစီဆှံအသးဒိးတၢ်မၤမုာ်လၢနဃိလီၤ. 8 မၤသးဒ်န့ၣ်ဒီး,ဒ်သိးနကမၤတၢ်လၢနဂ့ၤမၤအီၤဒီး,ယပာ်ဆူၣ်ယသးလၢခရံာ်အပူၤ,ဒီးမၤလိာ်နၤသ့, 9 ဘၣ်ဆၣ်ဒီး,လၢတၢ်အဲၣ်တၢ်ကွံအဃိန့ၣ်,ယၤစီၤပီလူးလၢအသးပှၢ်,ဒီးခဲကနံၣ်အံၤဘၣ်စၢဃာ်စ့ၢ်ကီးလၢခရံာ်အဃိ,ယဃ့ကညးနၤလီၤ. 10 ယဃ့ကညးနၤလၢယဖိစီၤအီးန့ၤစံမူး,လၢယထီၣ်ဖိအီၤလၢယဘၣ်တၢ်စၢဃာ်အပူၤန့ၣ်အဂီၢ်လီၤ. 11 လၢထံးလၢမကိာ်န့ၣ်,အဝဲဒၣ်အဘျုးတအိၣ်ဘၣ်လၢနဂီၢ်ဘၣ်,မ့မ့ၢ်ခဲကနံၣ်အံၤအဘျုးအိၣ်လၢနဂီၢ်ဒီးလၢယဂီၢ်လီၤ. 12 အဝဲဒၣ်န့ၣ်,ယမၢအက့ၤက့ၤဆူနအိၣ်လီၤ.ဒီးတူၢ်လိာ်အီၤတက့ၢ်.မ့ၢ်ယသးဒၣ်ယဲလီၤ. 13 အဝဲဒၣ်န့ၣ်,ယသးအိၣ်လၢယကဟံးဃာ်အီၤလၢယဂီၢ်,လၢအကမၤစၢၤယၤလၢနလီၢ်လၢတၢ်သးခုအကစီၣ်အတၢ်စၢဃာ်အပူၤ, 14 ဘၣ်ဆၣ်ဒီးလၢနတသ့ၣ်ညါဘၣ်န့ၣ်ယသးတအိၣ်မၤတၢ်နီတမံၤဘၣ်.ဒ်သိးနမၤဘျုးယၤန့ၣ်သုတမ့ၢ်ဒ်လၢတၢ်မၢဆူၣ်အသိးတဂ့ၤ,မ့ၢ်ဒ်သးအိၣ်တီနံဒၣ်တၢ်အသိးန့ၣ်လီၤ. 15 အဂ့ၢ်ဒ်အံၤ,ဘၣ်တဘၣ်အဟးဖးဒီးနၤတစိၢ်အံၤမ့ၢ်ဒ်သိးနကန့ၢ်က့ၤအီၤအထူအယိာ်, 16 တမ့ၢ်လၢၤဘၣ်ဒ်ကုၢ်အသိးဘၣ်,မ့ၢ်လၢကုၢ်အဖီခိၣ်,ဒီပုၢ်ဝဲၢ်လၢအဘၣ်တၢ်အဲၣ်အီၤ,လီၤဆီဒၣ်တၢ်လၢယၤ,ဘၣ်ဆၣ်ဒီးလၢနၤဒိၣ်န့ၢ်အန့ၣ်တက့ၢ်ဆံးအါလဲၣ်,လၢဖံးလၢညၣ်အပူၤ,ဒီးလၢကစၢ်အပူၤလီၤ. 17 မၤသးဒ်န့ၣ်ဒီး,နမ့ၢ်ပာ်ယၤလၢပှၤန့ၢ်ဃုာ်တၢ်ဒီးနၤဒီး,တူၢ်လိာ်အီၤဒ်ယၤအသိးတက့ၢ်.

18 မ့ၢ်မၤကမၣ်နၤတမံၤမံၤမ့ၢ်ဂ့ၤ.နစ့မ့ၢ်အိၣ်လၢအလိၤမ့ၢ်ဂ့ၤ,ပာ်က့ၤအဝဲန့ၣ်လၢယလိၤတက့ၢ်. 19 ယၤစီၤပီလူးအံၤ,ယကွဲးလၢယစုဒၣ်ယဲ,ယကလိးက့ၤတၢ်န့ၣ်,ဒ်သိးယသုတစံးဘၣ်နၤလၢနကြၢးလိးက့ၤနသးဒၣ်နဲလၢယၤန့ၣ်တဂ့ၤလီၤ. 20 မ့ၢ်လံ,ဒီပုၢ်ဝဲၢ်ဧၢ,ဒုးသူၣ်ခုသးခုယၤလၢကစၢ်အပူၤတက့ၢ်.ဒုးအိၣ်ဘှံးယသးလၢခရံာ်အပူၤတက့ၢ်. 21 ယနာ်လၢနကစူၢ်တၢ်ဒီးယကွဲးန့ၢ်နၤ,အဂ့ၢ်ဒ်အံၤ,ယသ့ၣ်ညါလၢနကမၤတၢ်အါန့ၢ်ယစံးနၤဒၣ်လဲာ်လီၤ. 22 လၢန့ၣ်အမဲာ်ညါ,ကတဲာ်ကတီၤတၢ်အိၣ်တၢ်ဆိးအလီၢ်လၢယဂီၢ်တက့ၢ်.အဂ့ၢ်ဒ်အံၤ,မ့ၢ်သုဘါထုကဖၣ်တၢ်ဒီး,ယမုၢ်လၢ်လၢတၢ်ကဟ့ၣ်က့ၤယၤလၢသုလီၤ. 23 ပှၤဘၣ်စၢဃာ်ဒီးယၤလၢယ့ၣ်ရှူးခရံာ်အဃိ,စီၤအ့းပၤဖြါ,ဒီးပှၤမၤဃုာ်တၢ်ဒီးယၤစီၤမၢ်ကူး, 24 စီၤအရံစတၢ်ဃူး,စီၤဒ့မၤ,စီၤလူၤကၣ်,သ့ၣ်တဖၣ်န့ၣ်ကတိၤဒိၣ်နၤလီၤ.

25 မ်ပကစၢ်ယ့ၣ်ရှူးခရံာ်အဘျုးအဖှိၣ်အိၣ်ဒီးသုသးတက့ၢ်.