Proverbs 3
1ယဖိခွါဧၢ,သးပ့ၤနီၣ်ယသိၣ်က့ၤသီက့ၤတၢ်တဂ့ၤ.မ်နသးတိၢ်န့ၢ်ယတၢ်မၤလိာ်တက့ၢ်. 2အဂ့ၢ်ဒ်အံၤ,ကပာ်ဖှိၣ်မုၢ်နံၤအါနံၤ,ဒီးသးသမူအနံၣ်,ဒီးတၢ်ဃူတၢ်ဖိးလၢနဂီၢ်လီၤ. 3ဒုးလဲၤသဒၣ်တၢ်ဘျုးတၢ်ဖှိၣ်,ဒီးတၢ်မ့ၢ်တၢ်တီလၢနၤတဂ့ၤ,စၢထီၣ်အီၤလၢနကိာ်လိၤ,ကွဲးအီၤလၢနသးအဘ့ၣ်ဘၣ်လိၤန့ၣ်တက့ၢ်. 4မ့မ့ၢ်ဒ်န့ၣ်ဒီးနကဘၣ်တၢ်အသး,ဒီးဘီၣ်ထီၣ်ညီထီၣ်လၢယွၤဒီးပှၤကညီအမဲာ်ညါလီၤ. 5သန့ၤနသးလၢယွၤလၢနသးဒီဖျၢၣ်ညါတက့ၢ်.ဒီးသုတသန့ၤနသးလၢနတၢ်ကူၣ်တၢ်ဆးဒၣ်နဲတဂ့ၤ. 6သ့ၣ်ညါယွၤလၢနကျဲခဲလၢာ်အပူၤတက့ၢ်.ဒီးအဝဲဒၣ်ကမၤလိၤနကျဲလီၤ. 7ကဲထီၣ်ပှၤလၢအကူၣ်တၢ်သ့လၢနမဲာ်ညါဒၣ်နဲအပူၤတဂ့ၤ.ပျံၤယွၤ,ဒီးဟးထီၣ်ကွံာ်လၢတၢ်အၢအအိၣ်န့ၣ်တက့ၢ်. 8ကကဲထီၣ်တၢ်အဆးလၢနဒ့အဂီၢ်,ဒီးတၢ်နူာ်ကံၢ်လၢနဃံအဂီၢ်လီၤ. 9မၤလၤကပီၤယွၤလၢနစုလီၢ်နခီၣ်ခိၣ်,ဒီးလၢနတၢ်အါထီၣ်ခဲလၢာ်အတၤသၣ်ဆိတက့ၢ်. 10တုၤနုၤတစုနသိၣ်ဧိၤဖီဧိၤကပှဲၤဒီးတၢ်အါအါကလဲာ်,ဒီးနနီၣ်စံၢ်စပံးသၣ်န့ၣ်ကပှဲၤလုၣ်ကွံာ်ဒီးစပံးထံအသီလီၤ. 11ယဖိခွါဧၢ,ယွၤသိၣ်ဃီၣ်တၢ်န့ၣ်သုတမၤတရီတပါတဂ့ၤ.အသိၣ်က့ၤသီက့ၤတၢ်န့ၣ်သုတသးကိၢ်လၢအဃိတဂ့ၤ. 12အဂ့ၢ်ဒ်အံၤ,ပှၤလၢယွၤအဲၣ်အီၤန့ၣ်ယွၤသိၣ်ဃီၣ်အီၤဒ်ပၢ်သိၣ်ဃီၣ်အဖိလၢအအဲၣ်ဝဲအသိးန့ၣ်လီၤ. 13ပှၤလၢအထံၣ်န့ၢ်တၢ်ကူၣ်သ့,ဒီးပှၤလၢအမၤန့ၢ်တၢ်သူၣ်ဆးသးဆးန့ၣ်ဘၣ်ဆိၣ်ဂ့ၤဝဲလီၤ. 14အဂ့ၢ်ဒ်အံၤ,တၢ်န့ၢ်ဘၣ်အီၤန့ၣ်ဂ့ၤန့ၢ်တၢ်န့ၢ်ဘၣ်ကျိၣ်ဧိၤစ့ဧိၤ,ဒီးအတၢ်အါထီၣ်ဂ့ၤန့ၢ်ထူစီတက့ၢ်လီၤ. 15အပှ့ၤဒိၣ်န့ၢ်တၢ်မျၢ်ပလဲတက့ၢ်,ဒီးကယဲၢ်တၢ်လၢအဘၣ်နသးခဲလၢာ်န့ၣ်နတထိၣ်သတြီၤဘၣ်ဒီးအီၤဘၣ်. 16မုၢ်နံၤအါအိၣ်ဝဲလၢအစုထွဲ,ဒီးတၢ်ထူးတၢ်တီၤ,ဒီးတၢ်လၤတၢ်ကပီၤလၢအစုစ့ၣ်လီၤ. 17အကျဲန့ၣ်မ့ၢ်ကျဲအမုာ်,ဒီးကယဲၢ်အကျဲဧိၤကပူၤဧိၤမ့ၢ်တၢ်ဃူတၢ်ဖိးလီၤ. 18ကဲထီၣ်ဝဲလၢတၢ်မူအသ့ၣ်တထံးလၢကယဲၢ်ပှၤလၢအဟံးန့ၢ်အီၤအဂီၢ်,ဒီးပှၤလၢအဟံးဃာ်အီၤန့ၣ်ဘၣ်ဆိၣ်ဂ့ၤဝဲလီၤ. 19ယွၤပာ်လီၤဟီၣ်ခိၣ်အခီၣ်ထံးလၢတၢ်ကူၣ်သ့,တ့လီၤမူခိၣ်လၢတၢ်ကူၣ်တၢ်ဆးလီၤ. 20ထံယိာ်ပူၤသ့ၣ်ဖးလီၤအသးလၢအတၢ်သ့ၣ်ညါ,ဒီးတၢ်အၢၣ်ဒုးလီၤစီၤပစီၤထံလီၤ. 21ယဖိခွါဧၢ,ဒုးဟးထီၣ်တၢ်န့ၣ်တဖၣ်လၢနမဲာ်ညါတဂ့ၤ,ပၢၤတၢ်ကူၣ်သ့အမူာ်အနီၢ်ဒီးတၢ်ပလီၢ်နသးတက့ၢ်. 22ဒီးကကဲထီၣ်တၢ်မူလၢနသးအဂီၢ်,ဒီးတၢ်ဃံတၢ်လၤလၢနကိာ်အဂီၢ်လီၤ. 23တုၤနုၤတစုနကပိာ်နကျဲအိၣ်ဒီးတၢ်သန့ၤနသး,ဒီးနခီၣ်တဘၣ်တိၢ်ဘၣ်. 24တုၤနမံလီၤဒီး,နတပျံၤဘၣ်တၢ်ဘၣ်.မ့ၢ်မးတုၤနမံလီၤဒီး,နကမံသပ့ၤမုာ်မုာ်လီၤ. 25တၢ်မၤပျံၤမၤဖုးတၢ်သတူာ်ကလာ်မ့ၢ်ဂ့ၤ,ပှၤတတီတလိၤအတၢ်မၤသယုၢ်တၢ်တုၤအဟဲမ့ၢ်ဂ့ၤ,ပျံၤတဂ့ၤ. 26အဂ့ၢ်ဒ်အံၤ,ယွၤကကဲထီၣ်နတၢ်မုၢ်လၢ်,ဒီးကပၢၤနခီၣ်ဒ်သိးအသုတဘၣ်ပျံၤသကွီၤတဂ့ၤလီၤ. 27တုၤနစုမၤသ့ဒီး,တြီတၢ်ဂ့ၤလၢပှၤလၢအဂ့ၤန့ၢ်ဘၣ်ဝဲတဂ့ၤ, 28တုၤတၢ်အိၣ်ဒီးနၤဒီး,စံးလၢနသကိး,လဲၤတၢ်ဒီးဟဲက့ၤကဒါက့ၤ,ယကဟ့ၣ်တၢ်ခဲဂီၤကိာ်န့ၣ်တဂ့ၤ. 29တုၤပှၤအိၣ်လၢနဃၢၤအိၣ်ဝဲဆိးဝဲဒီးနၤအိၣ်ဒီးတၢ်သန့ၤအသးဒီး,ကူၣ်တၢ်အၢထီဒါအီၤတဂ့ၤ. 30ပှၤမ့ၢ်တမၤအၢဘၣ်နၤဘၣ်ဒီး,ဂ့ၢ်လိာ်ဘှီလိာ်ဒီးအီၤကလီကလီတဂ့ၤ. 31သးကွံပှၤမၤအၢမၤသီတၢ်အလီၢ်တဂ့ၤ.ဒီးဃုထၢအကျဲနီတဘိတဂ့ၤ. 32အဂ့ၢ်ဒ်အံၤ,ပှၤအအသးက့ၣ်န့ၣ်မ့ၢ်တၢ်သးဘၣ်အၢအလီၢ်လၢယွၤအမဲာ်ညါ,မ့မ့ၢ်အတၢ်ကူၣ်တၢ်ဖးန့ၣ်အိၣ်ဒီးပှၤအသးလိၤလီၤ. 33ယွၤအတၢ်ဆိၣ်အၢအိၣ်ဝဲလၢပှၤတတီတလိၤအဟံၣ်ပူၤ,မ့မ့ၢ်ဆိၣ်ဂ့ၤပှၤတီပှၤလိၤအအိၣ်အဆိးအလီၢ်လီၤ. 34မၤတရီတပါပှၤမၤတရီတပါတၢ်,မ့မ့ၢ်ဟ့ၣ်ဘျုးဟ့ၣ်ဖှိၣ်တၢ်လၢပှၤအသူၣ်စူၤအသးစူၤလီၤ. 35ပှၤလၢအကူၣ်တၢ်သ့နၣ်ကန့ၢ်သါတၢ်လၤကပီၤ,မ့မ့ၢ်ပှၤဟးဂီၤဖိန့ၣ်တၢ်မဲာ်ဆှးကအူထီၣ်ကွံာ်အီၤလီၤ.
Copyright information for
KswSKMB