Proverbs 22
1ပှၤဃုထၢအမံၤဂ့ၤအသၣ်ဂ့ၤန့ၣ်အလီၢ်အိၣ်ဒိၣ်န့ၢ်တၢ်ထူးဒိၣ်တၢ်တီၤအါတက့ၢ်လီၤ.ဒီးတၢ်အဲၣ်ဂ့ၤန့ၢ်ကျိၣ်ဧိၤစ့ဧိၤဒီးထူဧိၤလွဲဧိၤတက့ၢ်လီၤ. 2ပှၤထူးပှၤတီၤဒီးပှၤဖှီၣ်ဖိယာ်ဖိသဂၢၢ်လိာ်အသးလီၤ.ယွၤတ့လီၤအီၤခဲလၢာ်လီၤ. 3ပှၤကူၣ်တၢ်ဘၣ်န့ၣ်,ထံၣ်ဘၣ်တၢ်အၢ,ဒီးပာ်တဒၢအသးလီၤ.မ့မ့ၢ်ပှၤအတမၤလိဘၣ်တၢ်ဘၣ်န့ၣ်လဲၤဒၣ်တၢ်,ဒီးဘၣ်တၢ်နးတၢ်ဖှီၣ်လီၤ. 4တၢ်သူၣ်စူၤသးစူၤဒီးတၢ်ပျံၤယွၤန့ၣ်အကတၢၢ်မ့ၢ်တၢ်ထူးတၢ်တီၤ,တၢ်လၤကပီၤ,ဒီးတၢ်မူန့ၣ်လီၤ. 5တၤဆှုၣ်တၤမဲ,ဒီးတၢ်ပျံၤသကွီၤအိၣ်ဝဲလၢပှၤလီတၢ်အကျဲလီၤ.ပှၤလၢအကွၢ်လီၤအသးန့ၣ်ကအိၣ်ယံၤဒီးအီၤလီၤ. 6ဆှၢဖိဒံဖိသၣ်လၢအကျဲဧိၤကပူၤဧိၤန့ၣ်တက့ၢ်.ဒီးတုၤအသးပှၢ်ဒီး,တဟးဖးဒီးအီၤဘၣ်. 7ပှၤထူးပှၤတီၤကပၢပှၤဖှီၣ်ဖိယာ်ဖိ,ဒီးပှၤလၢအလိၢ်စ့န့ၣ်ကကဲထီၣ်စ့ကစၢ်အကုၢ်လီၤ. 8ပှၤလၢအဖှံတၢ်မၤအၢန့ၣ်ကကူးတၢ်နးတၢ်ဖှီၣ်,ဒီးအသးထီၣ်အနီၣ်တီၢ်ကဟးဂီၤလီၤ. 9ပှၤလၢအဟံးစုကွၢ်မဲာ်တၢ်န့ၣ်ကဘၣ်တၢ်ဆိၣ်ဂ့ၤလီၤ.အဂ့ၢ်ဒ်အံၤ,ဟ့ၣ်လီၤအတၢ်အီၣ်လၢပှၤဖှီၣ်ဖိယာ်ဖိလီၤ. 10ဟီထီၣ်ကွံာ်ပှၤလၢအမၤတၢ်တရီတပါန့ၣ်တက့ၢ်,ဒီးတၢ်ဂ့ၢ်လိာ်ဘှီလိာ်ကဟးထီၣ်,မ့ၢ်မးတၢ်အ့ၣ်လိာ်ဆိးက့လိာ်,ဒီးတၢ်ဒုၣ်ဒွဲၣ်န့ၣ်ကဆိတ့ၢ်လီၤ. 11ပှၤလၢအအဲၣ်တၢ်သးကဆှီန့ၣ်,တၢ်ဘျုးတၢ်ဖှိၣ်အိၣ်ဝဲလၢအထးခိၣ်လိၤန့ၣ်,ဒီးစီၤပၤကဒီတံၤဒီသကိးဒီးအီၤလီၤ. 12ယွၤအမဲာ်ပၢၤတၢ်သ့ၣ်ညါလီၤ.မ့မ့ၢ်အကမၤဟးဂီၤပှၤလီတၢ်အတၢ်ကတိၤလီၤ. 13ပှၤအကၢၣ်စံးဝဲဒၣ်,ခ့ယုၢ်တဒုအိၣ်ဝဲလၢခိလီၤ.တၢ်ကမၤသံယၤလၢကျဲပူၤလီၤ. 14ပိာ်မုၣ်ဟးဂီၤအထးခိၣ်န့ၣ်မ့ၢ်တၢ်ပူၤယိာ်လီၤ.ပှၤလၢယွၤသးဘၣ်အၢအီၤန့ၣ်ကလီၤတဲာ်လၢအပူၤလီၤ. 15ပှၤဟးဂီၤဖိအတၢ်ဘိၣ်အသးလၢဖိသၣ်အသးကံၢ်ပူၤလီၤ.တၢ်သိၣ်ဃီၣ်အနီၣ်တီၢ်န့ၣ်ကဟီထီၣ်ကွံာ်ဝဲယံၤဒီးအီၤလီၤ. 16ပှၤမၤဆူၣ်မၤစိးပှၤဖှီၣ်ဖိယာ်ဖိ,ဒ်သိးအတၢ်ကအါထီၣ်,ဒီးပှၤလၢအဟ့ၣ်တၢ်လၢပှၤထူးပှၤတီၤန့ၣ်ကဘၣ်ထဲတၢ်ဖှီၣ်တၢ်ယာ်လီၤ. 17ဒိးနနၢ်,ဒီးကနၣ်ပှၤကူၣ်တၢ်သ့အတၢ်ကတိၤ,ဒီးပာ်နသးလၢယတၢ်သ့ၣ်ညါတက့ၢ်. 18အဂ့ၢ်ဒ်အံၤ,နမ့ၢ်ပၢၤအီၤလၢနသးကံၢ်ပူၤ,ဒီးမ့ၢ်အိၣ်ဝဲဆိးဝဲလၢနပျုၤဒီး,မ့ၢ်တၢ်အမုာ်လီၤ. 19ဒ်သိးနကသန့ၤနသးလၢယွၤဒီး,ယဘိးဘၣ်သ့ၣ်ညါနၤလၢမုၢ်မဆါတနံၤအံၤ,နၤဒၣ်လဲာ်လီၤ. 20ယကွဲးန့ၢ်လံနၤလၢတၢ်အဂ့ၤဘၣ်ဃးဒီးတၢ်ကူၣ်ထီၣ်ဖးလီၤ,ဒီးတၢ်သ့ၣ်ညါ, 21ဒ်သိးယကဘိးဘၣ်သ့ၣ်ညါနၤလၢတၢ်မ့ၢ်တၢ်တီအတၢ်ကတိၤ,ဒ်သိးနကက့ၤစိာ်တၢ်မ့ၢ်တၢ်တီအတၢ်ကတိၤဆူပှၤလၢအမၢလီၤနၤအအိၣ်န့ၣ်တမ့ၢ်ဘၣ်ဧါ. 22ပှၤဖှီၣ်ဖိယာ်ဖိမ့ၢ်အဖှီၣ်အယာ်အဃိဒီး,ဂုာ်ဆူၣ်ပျိဆူၣ်အတၢ်တဂ့ၤ.ဒီးမၤအၢပှၤဘၣ်နးဘၣ်ဖှီၣ်လၢပဲတရီအပူၤန့ၣ်တဂ့ၤ. 23အဂ့ၢ်ဒ်အံၤ,ယွၤကလိာ်အကွီၢ်,ဒီးဂုာ်ဆူၣ်ပှၤအသးသမူလၢအဂုာ်ဆူၣ်အတၢ်လီၤ. 24ဒီတံၤဒီသကိးဒီးပှၤလၢအသးထီၣ်တဂ့ၤ.ဒီးလဲၤတၢ်ဒီးပှၤလၢအသးထီၣ်ချ့န့ၣ်တဂ့ၤ. 25နကမၤလိဘၣ်ဖုးအကျဲ,ဒီးနသးကဘၣ်ဘၣ်ဖုးပျံၤသကွီၤလီၤ. 26ကဲထီၣ်ပှၤလၢအဟံးစု,လၢအအုၣ်ကီၤအသးလၢပှၤဂၤအကမၢ်အဂီၢ်အကျါတဂ့ၤ. 27နလိးက့ၤတၢ်မ့ၢ်တအိၣ်ဘၣ်ဒီး,ပှၤကဟံးထီၣ်ကွံာ်နလီၢ်မံလၢနဖီလာ်,မ့ၢ်အဘၣ်မနုၤလဲၣ်. 28သုးကီၢ်အဃၢၤအပနီၣ်လၢပျၢၤလၢနပၢ်တဖၣ်ပာ်လီၤဝဲန့ၣ်တဂ့ၤ. 29နထံၣ်ဘၣ်ပှၤလၢအခုတဂၤဧါ.ကဆၢထၢၣ်လၢစီၤပၤအမဲာ်ညါလီၤ.တဆၢထၢၣ်ဘၣ်လၢပှၤလၢအမံၤတဟူသၣ်တဖျါဘၣ်အမဲာ်ညါဘၣ်.
Copyright information for
KswSKMB