Pro 30 | KswSKMB | STEP | စီၤယၤက့ၣ်အဖိခွါစီၤအၤကူၢ်အတၢ်ကတိၤ.ပှၤတဂၤန့ၣ်စံးဘၣ်စီၤအံၤသအ့လး,စံးဘၣ်စီၤအံၤသအ့လးဒၣ်လဲာ်ဒီးစီၤအူးကါလး,

‏ Proverbs 30

1 စီၤယၤက့ၣ်အဖိခွါစီၤအၤကူၢ်အတၢ်ကတိၤ.ပှၤတဂၤန့ၣ်စံးဘၣ်စီၤအံၤသအ့လး,စံးဘၣ်စီၤအံၤသအ့လးဒၣ်လဲာ်ဒီးစီၤအူးကါလး,

2 မ့ၢ်မးယလီၤဂာ်ဆၣ်ဖိကီၤဖိအါန့ၢ်ပှၤကညီကိးဂၤဒဲးတက့ၢ်လီၤ.ဒီးပှၤကညီအတၢ်ကူၣ်တၢ်ဆးန့ၣ်တအိၣ်ဘၣ်ဒီးယၤဘၣ်. 3 ဒီးယတမၤလိတ့ၢ်ဘၣ်တၢ်ကူၣ်သ့ဘၣ်,ဒီးယတသ့ၣ်ညါတ့ၢ်ဘၣ်တၢ်စီဆှံဘၣ်. 4 မ့ၢ်မတၤထီၣ်ဘးမူခိၣ်ဒီးဟဲက့ၤလီၤတဂၤလဲၣ်.မ့ၢ်မတၤပာ်ဖှိၣ်ကလံၤလၢအစုခိၣ်ပူၤတဂၤလဲၣ်.မ့ၢ်မတၤဘိၣ်ထီၣ်ထံလၢယၣ်ပူၤတဂၤလဲၣ်.မ့ၢ်မတၤမၤခၢၣ်သနၢၢ်ဟီၣ်ခိၣ်အကတၢၢ်တဖၣ်တဂၤလဲၣ်,အမံၤဒ်လဲၣ်,ဒီးအဖိခွါအမံၤဒ်လဲၣ်.နမ့ၢ်သ့ၣ်ညါဒီး,စံး.

5 ယွၤအကလုၢ်ကထါန့ၣ်ကဆှီဝဲကိးထံၣ်ဒဲးလီၤ.အဝဲဒၣ်မ့ၢ်ကတီၤတဘ့ၣ်လၢပှၤသန့ၤအသးလၢအီၤအဂီၢ်လီၤ.

6 ပာ်ဖှိၣ်တၢ်ဒီးအတၢ်ကတိၤတဂ့ၤ,ကသိၣ်ဃီၣ်ဘၣ်ဖုးနၤ,ဒီးတၢ်ကထံၣ်န့ၢ်နၤလၢပှၤကတိၤတၢ်ကဘျံးကဘျၣ်လီၤ.

7 ယဃ့တ့ၢ်တၢ်ခံမံၤလၢနၤလီၤ.ယတချုးသံဒံးဘၣ်ဒီး,ဟ့ၣ်လီၤအီၤလၢယၤတက့ၢ်. 8 ပာ်လီတၢ်,ဒီးတၢ်ကတိၤ,ကဘျံးကဘျၣ်န့ၣ်ယံၤဒီးယၤတက့ၢ်.တၢ်ဖှီၣ်တၢ်ယာ်မ့ၢ်ဂ့ၤ,တၢ်ထူးတၢ်တီၤမ့ၢ်ဂ့ၤ,ဟ့ၣ်လီၤယၤတဂ့ၤ,ဒုးအီၣ်ယၤလၢတၢ်အီၣ်ဖဲအကလၢလၢယဂီၢ်တက့ၢ်.

9 ယကအီၣ်ကုးအီပှဲၤဘၣ်ဖုးဒီးသမၢနၤ,ဒီးစံး,ယွၤန့ၣ်မ့ၢ်မတၤတဂၤလဲၣ်.မ့တမ့ၢ်ဘၣ်ဒ်န့ၣ်ဒီး,ယကဘၣ်ဖှီၣ်ဘၣ်ယာ်,ဒီးဟုၣ်ဘၣ်ဖုးတၢ်,ဒီးကိးထီၣ်တရီတပါယွၤအမံၤန့ၣ်လီၤ.

10 ခဲၣ်တၢ်အခ့အပှၤလၢအကစၢ်အမဲာ်ညါတဂ့ၤ.ကဆိၣ်အၢဘၣ်ဖုးနၤ,ဒီးနကတူၢ်တၢ်ဒဲးဘးလီၤ.

11 ပှၤလၢအဆိၣ်အၢအပၢ်ဒီးတဆိၣ်ဂ့ၤဘၣ်အမိၢ်န့ၣ်အိၣ်ဝဲတစိၤလီၤ. 12 ပှၤလၢအကဆှီဝဲလၢအမဲာ်ဒၣ်ဝဲဘၣ်ဆၣ်ဒီး,တသ့စီဒံးဘၣ်အသးလၢအတၢ်ဘၣ်အၢန့ၣ်အိၣ်ဝဲတစိၤလီၤ. 13 ပှၤလၢအမဲာ်အိၣ်ထီၣ်ထီဆံးထီလဲၣ်,ဒီးအမဲာ်ဖံးပာ်ထီၣ်ထီအသးန့ၣ်အိၣ်ဝဲတစိၤလီၤ. 14 ပှၤလၢအမဲမ့ၢ်နး,ဒီးအမဲထွံၣ်မ့ၢ်ဒီ,ဒ်သိးအကအီၣ်ကွံာ်ပှၤဖှီၣ်ဖိယာ်ဖိလၢဟီၣ်ခိၣ်ချၢ,ဒီးပှၤဘၣ်ဖှီၣ်ဘၣ်နးလၢပှၤကညီအကျါန့ၣ်အိၣ်ဝဲတစိၤလီၤ.

15 သလံၤအိၣ်ဝဲဒီးအဖိမုၣ်ခံဘိ,စံးဝဲ,ဟ့ၣ်,ဟ့ၣ်န့ၣ်လီၤ.တၢ်သၢမံၤအိၣ်ဝဲလၢအတဘျဲးအီၣ်ဘၣ်,မ့ၢ်လံ,တၢ်လွံၢ်မံၤ,လၢအတစံးဘၣ်အါလံန့ၣ်ဘၣ်. 16 တၢ်ပျုၤပူၤ,ပှၤတူာ်ဖိအဒၢလီၢ်,ဟီၣ်ခိၣ်လၢအတပှဲၤဘၣ်ဒီးထံ,ဒီးမ့ၣ်အူ,တစံး,အါလံန့ၣ်ဘၣ်.

17 ပှၤအမဲာ်လၢအတပးကဲဘၣ်အပၢ်,ဒီးမၤတရီတပါတၢ်ဒိကနၣ်အမိၢ်အကလုၢ်န့ၣ်စိးဝၣ်ဃးလၢကစၢၢ်ကဆူးန့ၣ်ကစိးကွံာ်အီၤ,ဒီးလံာ်ဧိၤတြၤဧိၤအဖိကအီၣ်ကွံာ်အီၤလီၤ. 18 တၢ်လၢအလီၤလးကဲၣ်ဆိးလၢယမဲာ်ညါအိၣ်သၢမံၤလီၤ.မ့ၢ်မးတၢ်လၢယနၢ်တပၢၢ်ဘၣ်န့ၣ်အိၣ်လွံၢ်မံၤ,

19 လံာ်ဧိၤတြၤဧိၤအကျဲလၢမူကပိာ်လိၤ,ဂုၢ်ဧိၤဒးဧိၤအကျဲလၢလၢၢ်လိၤ,ကဘီအကျဲလၢပီၣ်လဲၣ်ပူၤ,ဒီးပှၤကညီအိၣ်ဒီးပှၤမုၣ်ကနီၤအကျဲလီၤ. 20 ပိာ်မုၣ်လၢအအဲၣ်ဘၢအဝၤအကျဲန့ၣ်မ့ၢ်ဒ်န့ၣ်သိးလီၤ.အီၣ်ဝဲ,ဒီးတြူာ်အထးခိၣ်,ဒီးစံးဝဲဒၣ်,ယတမၤတၢ်အၢဘၣ်.

21 ဟီၣ်ခိၣ်အိၣ်တမုာ်ဘၣ်လၢသၢမံၤအဃိ,ဒီးလွံၢ်မံၤန့ၣ်တူၢ်ဝဲတကဲဘၣ်. 22 တၢ်အခ့အပှၤ,တုၤအပၢတၢ်,ဒီးပှၤဟးဂီၤဖိ,တုၤအဘျဲးအီၣ်တၢ်, 23 ဒီးပိာ်မုၣ်လၢပှၤသးဟ့အီၤ,တုၤအန့ၢ်ဘၣ်အဝၤ,ဒီးကုၢ်ပိာ်မုၣ်လၢအန့ၢ်သါအကစၢ်အတၢ်လီၤ.

24 တၢ်လၢအဆံးလၢဟီၣ်ခိၣ်ချၢအံၤဘၣ်ဆၣ်ဒီး,ကူၣ်ဘၣ်ကူၣ်သ့ဒိၣ်ဒိၣ်ကလဲာ်န့ၣ်အိၣ်ဝဲလွံၢ်မံၤလီၤ.

25 တၢၢ်ဧိၤတြၤဧိၤတဆူၣ်ဘၣ်ဆၣ်ဒီး,ကတဲာ်ကတီၤအတၢ်အီၣ်လၢတၢ်ကိၢ်ခါလီၤ. 26 ယုၢ်ၡၤဖးတဖၣ်အဂံၢ်စၢ်အဘါစၢ်ဘၣ်ဆၣ်ဒီး,မၤအဟံၣ်လၢလၢၢ်အိပူၤလီၤ.

27 ဒွဲၣ်ဧိၤတြၤဧိၤအစီၤပၤတအိၣ်ဘၣ်ဘၣ်ဆၣ်ဒီး,ဟးဝဲတဖုတဖုခဲလၢာ်လီၤ. 28 ဒီးလ့ၢ်ဟံးဃာ်တၢ်လၢအစု,ဒီးအိၣ်ဝဲလၢစီၤပၤအနူၢ်ပူၤလီၤ.

29 တၢ်ထွဲတၢ်ဂ့ၤအိၣ်ဝဲသၢမံၤ,ဒီးလွံၢ်မံၤလၢအထွဲတၢ်ဘၣ်အိၣ်ဝဲလီၤ. 30 ခ့ယုၢ်ဆူၣ်ဝဲလၢဆၣ်ဖိကီၢ်ဖိအကျါ,ဒီးတဃၣ်ကွံာ်အသးလၢတၢ်နီတမံၤဘၣ်. 31 ထွံၣ်တကလုာ်လၢအယီၢ်ဒ့စ့ၤ,ဒီးမဲာ်တဲးလဲးဖါ,ဒီးစီၤပၤလၢတၢ်ဂဲၤဆၢထၢၣ်ထီဒါအီၤတသ့ဘၣ်လီၤ.

32 ဒီးနမ့ၢ်မၤပှၤဟးဂီၤဖိအတၢ်လၢနပာ်ထီၣ်ထီနသးအဃိမ့ၢ်ဂ့ၤ,နမ့ၢ်ကူၣ်တၢ်အၢမ့ၢ်ဂ့ၤ,ပာ်နစုလၢနထးခိၣ်အဖီခိၣ်တက့ၢ်. 33 အဂ့ၢ်ဒ်အံၤ,တၢ်စံၢ်တၢ်နုၢ်ထံဒီးကဲထီၣ်တၢ်နုၢ်ထံကိၢ်လိၣ်,ဒီးတၢ်ဝံာ်ပှၤအနါဒ့ဒီး,သွံၣ်ဟဲထီၣ်ဝဲ,ဒီးပှၤမၤဆူၣ်ထီၣ်တၢ်သးထီၣ်ဒီး,တၢ်အ့ၣ်လိာ်ဆိးက့လိာ်အိၣ်ထီၣ်ဝဲလီၤ.