Proverbs 5
1ယဖိခွါဧၢ,ကနၣ်ယတၢ်ကူၣ်သ့အကလုၢ်တက့ၢ်.ဒိးနနၢ်လၢယတၢ်ကူၣ်တၢ်ဆးအကလုၢ်တက့ၢ်. 2ဒ်သိးနကကွၢ်တၢ်ပလီၢ်နသး,ဒီးနပျုၤကပၢၤတၢ်သ့ၣ်ညါအဂ့ၢ်လီၤ. 3အဂ့ၢ်ဒ်အံၤ,ပိာ်မုၣ်ဟးဂီၤန့ၣ်အပျုၤဒုးလီၤစီၤကနဲစီ,ဒီးအထးခိၣ်ဘျ့န့ၢ်သိတက့ၢ်လီၤ. 4ဒီးအကတၢၢ်န့ၣ်ခၣ်ဝဲဒ်သဘူးအပၤစံၣ်တူးအသိး,အ့ၣ်ဝဲဒ်နးလၢအကနၣ်အ့ၣ်ခံခီလၢာ်အသိးန့ၣ်လီၤ. 5အခီၣ်လဲၤလီၤဆူတၢ်သံ,အထွဲတၢ်န့ၣ်ပၢၢ်လၢပျုၤပူၤလီၤ. 6နကကွၢ်ဆိကမိၣ်ဘၣ်ဖုးတၢ်မူအကျဲပၢၤလီၤ.အကျဲတဂၢၢ်တကျၢၤဘၣ်,ဒီးနသ့ၣ်ညါအီၤတသ့ဘၣ်. 7ဒီးခဲကနံၣ်အံၤ,ဖိခွါသ့ၣ်ဧၢ,ကနၣ်ယကလုၢ်တက့ၢ်. 8ဒီးဃၣ်ကွံာ်လၢယထးခိၣ်အတၢ်ကတိၤတဂ့ၤ,သုးနကျဲယံၤဒီးအီၤတက့ၢ်.ဒီးလဲၤဘူးဒီးအဟံၣ်အကျဲစၢၤတဂ့ၤ. 9ဒ်သိးနသုတဟ့ၣ်လီၤနလၤကပီၤလၢပှၤဂၤ,ဒီးနနံၣ်နလါလၢပှၤမၤဆူၣ်တၢ်တဂ့ၤ, 10ဒ်သိးပှၤတခီဘီမုၢ်ဖိအသုတအီၣ်နစုလီၢ်နခီၣ်ခိၣ်,ဒီးနမၤတၢ်အဘူးအလဲအသုတအိၣ်လၢပှၤတခီဘီမုၢ်ဖိအဟံၣ်ပူၤတဂ့ၤလီၤ. 11ဒီးတုၤနနီၢ်ခိ,ဒီးနဖံးနညၣ်လၢာ်ဒီး,နသူၣ်ကအုးနသးကအုးလၢနယူာ်ကတၢၢ်န့ၣ်, 12ဒီးနကစံး,ယသးဟ့တၢ်သိၣ်က့ၤသီက့ၤ,ဒီးယသးတပးကဲဘၣ်တၢ်သိၣ်ဃီၣ်ဒ်လဲၣ်. 13ဒီးယတကနၣ်ဘၣ်ယသရၣ်သ့ၣ်တဖၣ်အကလုၢ်ဘၣ်,ဒီးယတဒိးယနၢ်လၢပှၤသိၣ်လိယၤတဖၣ်အကလုၢ်ဘၣ်. 14ဘူးဒီးယအိၣ်လၢကယဲၢ်တၢ်အၢခဲလၢာ်အပူၤလၢပှၤဂီၢ်မုၢ်,ဒီးတၢ်အိၣ်ဖှိၣ်အကျါန့ၣ်လီၤ. 15အီထံလၢနထံပူၤဒၣ်နဲ,ဒီးထံလၢအယွၤလီၤလၢနထံထီၣ်ပၢၢ်အပူၤဒၣ်နဲန့ၣ်တက့ၢ်. 16မ်နထံထီၣ်ပၢၢ်ကယွၤလီၤလၢခိ,ဒီးထံကျိတဖၣ်လၢကျဲဖးလဲၢ်အပူၤန့ၣ်လီၤ. 17မ်အအိၣ်ထဲလၢနဂီၢ်ဒၣ်နဲ,ဒီးတမ့ၢ်ဘၣ်လၢပှၤဂၤလၢအအိၣ်ဒီးနၤအဂီၢ်ဘၣ်. 18မ်နထံထီၣ်ပၢၢ်ဘၣ်တၢ်ဆိၣ်ဂ့ၤတက့ၢ်,ဒီးနကသးခုဒီးနဖိၣ်သၣ်ခွါထီၣ်အမါလီၤ. 19မ့ၢ်ဝဲလၢတၤဟိမိၢ်အတၢ်အဲၣ်,ဒီးတၤယုၢ်မိၢ်အဃံအလၤလီၤ.အဧိၤနါဧိၤကဒုးဘျဲးအီၣ်နၤကိးအကတီၢ်ဒဲး,ဒီးနကမၤမူၤနသးလၢအတၢ်အဲၣ်တထံၣ်ဃီလီၤ. 20ဒီးယဖိခွါဧၢ,နကမၤမူၤနသးလၢပိာ်မုၣ်ဟးဂီၤ,ဒီးဖိးပှၤတမှံၤပိာ်မုၣ်အနုၢ်အနါန့ၣ်မ့ၢ်အဘၣ်မနုၤလဲၣ်. 21အဂ့ၢ်ဒ်အံၤ,ပှၤကညီအကျဲအိၣ်ဝဲလၢယွၤအမဲာ်ညါ,ဒီးကွၢ်ဆိကမိၣ်ဝဲအကျဲဧိၤကပူၤဧိၤခဲလၢာ်အဂ့ၢ်အကျိၤလီၤ. 22အတၢ်အၢဒၣ်ဝဲကဖီၣ်န့ၢ်ပှၤတတီတလိၤ.ဒီးအတၢ်ဒဲးဘးဒၣ်ဝဲအပျံၤကစၢဃာ်အီၤလီၤ. 23တၢ်သိၣ်က့ၤသီက့ၤတအိၣ်ဘၣ်ဒီး,ကသံဝဲ,ဒီးလၢအသးခံးဒိၣ်အပူၤန့ၣ်ကဟးဖျိးကျဲလီၤ.
Copyright information for
KswSKMB