‏ Proverbs 8

1တၢ်ကူၣ်သ့ကိးထီၣ်တၢ်,တမ့ၢ်ဘၣ်ဧါ,ဒီးတၢ်ကူၣ်တၢ်ဆးထုထီၣ်အကလုၢ်,တမ့ၢ်ဘၣ်ဧါ. 2ဆၢထၢၣ်ဝဲလၢတၢ်အလီၢ်ထီၣ်ထီလၢကျဲအဃၢၤ,လၢကျဲဘျီၣ်ပူၤလီၤ. 3ကိးပသူထီၣ်ဝဲလၢပဲတရီအခီၣ်ထံးဖဲပှၤလဲၤနုာ်လၢဝ့ၢ်ပူၤ,လၢကျဲစၢၤပူၤလီၤ. 4ပှၤကညီသ့ၣ်ဧၢ,ယကိးထီၣ်သု,ဒီးယကလုၢ်ဘၣ်ပှၤကညီဖိလီၤ. 5ပှၤလၢအတမၤလိဘၣ်တၢ်ဘၣ်သ့ၣ်ဧၢ,နၢ်ပၢၢ်တၢ်ဒုးကူၣ်တၢ်တက့ၢ်,ဒီးပှၤဟးဂီၤဖိသ့ၣ်ဧၢ,အိၣ်ဒီးသုသးလၢအနၢ်ပၢၢ်တၢ်တက့ၢ်. 6ကနၣ်တၢ်တက့ၢ်,အဂ့ၢ်ဒ်အံၤ,ယကတိၤတၢ်အိၣ်ဖျါ,ဒီးတၢ်အလိၤကထီၣ်ဖျဲးလၢယပျုၤလီၤ. 7အဂ့ၢ်ဒ်အံၤ,ယထးခိၣ်ကကတိၤတၢ်မ့ၢ်တၢ်တီ,ဒီးယပျုၤသးဘၣ်အၢတၢ်ကတိၤကဘျံးကဘျၣ်လီၤ.

8ယထးခိၣ်အတၢ်ကတိၤခဲလၢာ်အိၣ်လၢတၢ်တီတၢ်လိၤအပူၤ,တၢ်လီတၢ်ဝ့ၤ,တၢ်ဒၢကူဒၢက့ၣ်တအိၣ်လၢအပူၤဘၣ်. 9ဖျါဝဲလၢကယဲၢ်ပှၤလၢအနၢ်ပၢၢ်တၢ်အမဲာ်ညါ,ဒီးလိၤဝဲလၢကယဲၢ်ပှၤလၢအထံၣ်န့ၢ်တၢ်သ့ၣ်ညါအဂီၢ်လီၤ. 10ဒိးန့ၢ်ယသိၣ်လိတၢ်လၢစ့အမဲာ်ညါ,ဒီးတၢ်သ့ၣ်ညါလၢထူစီအမဲာ်ညါတက့ၢ်. 11အဂ့ၢ်ဒ်အံၤ,တၢ်သ့ၣ်ညါဂ့ၤန့ၢ်တၢ်မျၢ်ပလဲ,ဒီးကယဲၢ်တၢ်လုၢ်ဒိၣ်ပှ့ၤဒိၣ်ခဲလၢာ်န့ၣ်တၢ်တထိၣ်သတြီၤဘၣ်ဒီးအီၤဘၣ်.

12ယဲဒၣ်တၢ်ကူၣ်သ့အံၤယအိၣ်ယဆိးဒီးတၢ်ကူၣ်တၢ်ဆး,ဒီးယထံၣ်န့ၢ်တၢ်သ့ၣ်ညါကူၣ်ထီၣ်တၢ်သ့ဖးလီၤတၢ်ဘၣ်တဖၣ်လီၤ. 13တၢ်ပျံၤယွၤမ့ၢ်တၢ်သးဟ့တၢ်အၢလီၤ.တၢ်ပာ်အသးထီၣ်ထီ,ဒီးတၢ်ပာ်ကဖိအသး,ဒီးကျဲအၢ,ဒီးထးခိၣ်လီတၢ်,ယသးဟ့လီၤ. 14တၢ်ဒုးကူၣ်တၢ်မ့ၢ်ယတၢ်,ဒီးတၢ်သူၣ်ဖးသးဖးလီၤ.ယမ့ၢ်တၢ်ကူၣ်တၢ်ဆး,ယအိၣ်ဒီးတၢ်ဂံၢ်တၢ်ဘါလီၤ. 15စီၤပၤကဲစီၤပၤလၢယၤ,ပှၤစံၣ်ညီၣ်ကွီၢ်စံၣ်ညီၣ်တီတၢ်လၢယၤလီၤ.

16ပဒိၣ်ဖးဒိၣ်ပၢတၢ်လၢယၤ,ဒီးပှၤအိၣ်ဖျဲၣ်ပဒိၣ်,ဟီၣ်ခိၣ်အပှၤစံၣ်ညီၣ်ကွီၢ်ခဲလၢာ်လီၤ. 17ယအဲၣ်ပှၤလၢအအဲၣ်ယၤ,ဒီးပှၤလၢအဃုယၤဂီၤဂီၤန့ၣ်ကထံၣ်န့ၢ်ယၤလီၤ. 18တၢ်ထူးတၢ်တီၤဒီးတၢ်လၤကပီၤအိၣ်ဝဲဒီးယၤတၢ်စုလီၢ်ဂၢၢ်တၢ်ခီၣ်ခိၣ်ကျၢၤ,ဒီးတၢ်တီတၢ်လိၤလီၤ. 19ယတၤသၣ်ဂ့ၤန့ၢ်ထူ,ဂ့ၤန့ၢ်ထူစီ,ဒီးယတၢ်အါထီၣ်ဂ့ၤန့ၢ်စ့လၢအဘၣ်တၢ်ဃုထၢအီၤတက့ၢ်လီၤ. 20ယလဲၤတၢ်လၢတၢ်တီတၢ်လိၤအကျဲလၢတၢ်စံၣ်ညီၣ်အကျဲတဖၣ်, 21ဒ်သိးယကဒုးန့ၢ်ဘၣ်ပှၤလၢအအဲၣ်ယၤလၢတၢ်န့ၢ်သါ,ဒီးယကမၤပှဲၤအတၢ်ပာ်ဖှိၣ်အလီၢ်လီၤ.

22ယွၤတ့န့ၢ်ယၤလၢအကျဲခီၣ်ထံးလၢအတၢ်မၤလၢပျၢၤတဖၣ်အမဲာ်ညါလီၤ. 23တၢ်ဖှူယၤလၢကစၢၤကစၢၤ,လၢအခီၣ်ထံး,လၢဟီၣ်ခိၣ်တချုးကဲထီၣ်ဒံးဘၣ်, 24ဖဲထံယိာ်ပူၤတအိၣ်ဘၣ်န့ၣ်ယအိၣ်ဖျဲၣ်,ဖဲထံထီၣ်ပၢၢ်ပှဲၤဒီးထံတအိၣ်ဘၣ်န့ၣ်လီၤ. 25လၢကစၢၢ်ကလိတချုးအိၣ်ဂၢၢ်ဒံးဘၣ်,လၢတၢ်စိခိၣ်တချုးအိၣ်ဒံးဘၣ်ဒီး,ယအိၣ်ဖျဲၣ်, 26ဖဲအတတ့ဒံးဘၣ်ဟီၣ်ခိၣ်,ဒီးပှၢ်မုၢ်ကနၢဒီးဟီၣ်ခိၣ်အကမူၣ်အဂံၢ်ခိၣ်ထံးလီၤ. 27ဖဲအကတဲာ်ကတီၤမူခိၣ်န့ၣ်ယအိၣ်ဖဲန့ၣ်,လၢအတိၤကဝီၤလၢထံယိာ်အဖံးခိၣ်, 28ဖဲအပာ်ထီၣ်တၢ်အၢၣ်လၢထးခီ,ဖဲအမၤကျၢၤထီၣ်ထံယိာ်ပူၤအထံထီၣ်ပၢၢ်, 29ဖဲအတနီၢ်ပီၣ်လဲၣ်နံၤဒ်သိးထံဧိၤနိဧိၤအသုတလဲၤပူၤကွံာ်အနံၤတဂ့ၤ,ဖဲအပာ်လီၤဟီၣ်ခိၣ်အခီၣ်ထံးန့ၣ်, 30ယအိၣ်ဒီးအီၤ,ဒ်ပှၤမၤတၢ်သ့တဂၤအသိး,ယကဲထီၣ်အတၢ်သူၣ်ဖှံသးညီတနံၤဘၣ်တနံၤ,ယသူၣ်ပိၢ်သးဝးလၢအမဲာ်ညါတထံၣ်ဃီ, 31ယသူၣ်ပိၢ်သးဝးလၢလၢာ်ခိၣ်ဟီၣ်ခိၣ်အဖီခိၣ်,ယတၢ်သူၣ်ဖှံသးညီအိၣ်ဝဲဒီးပှၤကညီဖိလီၤ.

32ဒီးခဲကနံၣ်အံၤဖိသ့ၣ်လံၤသ့ၣ်ဧၢ,ကနၣ်ယကလုၢ်တက့ၢ်.အဂ့ၢ်ဒ်အံၤ,ပှၤလၢအတိၢ်န့ၢ်ယကျဲတဖၣ်န့ၣ်ဘၣ်ဆိၣ်ဂ့ၤဝဲလီၤ.

33ကနၣ်တၢ်သိၣ်လိ,ဒီးကူၣ်ထီၣ်တၢ်သ့တက့ၢ်,ဒီးညိကွံာ်အီၤတဂ့ၤ. 34ပှၤလၢအဒိကနၣ်ယကလုၢ်,လၢအခိးတၢ်လၢယတြဲၤအဂီၤထံးတနံၤဘၣ်တနံၤ,လၢအပၢၤတၢ်လၢယကျဲစၢၤအထူၣ်န့ၣ်ဘၣ်ဆိၣ်ဂ့ၤဝဲလီၤ. 35အဂ့ၢ်ဒ်အံၤ,ပှၤလၢအထံၣ်န့ၢ်ယၤန့ၣ်ထံၣ်န့ၢ်တၢ်အမူ,ဒီးကဘၣ်ယွၤအသးလီၤ. 36မ့မ့ၢ်ပှၤလၢအတချုးန့ၢ်ဘၣ်ယၤဘၣ်န့ၣ်မၤအၢလီၤအသးလီၤ.ကယဲၢ်ပှၤလၢအသးဟ့ယၤန့ၣ်အဲၣ်တၢ်သံခဲလၢာ်လီၤ.