Psalms 132
ပှၤတမှံၤအတၢ်သးဝံၣ်.
1ယွၤဧၢ,သ့ၣ်နီၣ်ထီၣ်က့ၤစီၤဒၤဝံးလၢအတၢ်နးတၢ်ဖှီၣ်ခဲလၢာ်အပူၤန့ၣ်တက့ၢ်. 2အဝဲဒၣ်န့ၣ်ဆိၣ်လီၤအသးလၢယွၤအမဲာ်ညါ,ဆိၣ်လီၤအသးလၢစီၤယၤကိာ်အကစၢ်အမဲာ်ညါဒ်အံၤ, 3ယတချုးထံၣ်န့ၢ်ဒံးဘၣ်တၢ်အလီၢ်လၢယွၤအဂီၢ်,အအိၣ်အဆိးအလီၢ်လၢစီၤယၤကိာ်အကစၢ်အဂီၢ်န့ၣ်ဒီး, 4ယတဟဲနုာ်ဘၣ်လၢယဟံၣ်အဒဲပူၤဘၣ်,ဒီးယတလဲၤထီၣ်လၢယလီၢ်မံခးအလိၤဘၣ်, 5ဒီးယတဟ့ၣ်မံဘၣ်ယမဲာ်,ယတဒုးမံခ့ဘၣ်ယမဲာ်ဖံးဘၣ်လီၤ. 6ကွၢ်ကွၢ်,ပနၢ်ဟူတၢ်တမံၤန့ၣ်လၢအ့ဖရးသးအပူၤ,ပထံၣ်န့ၢ်တၢ်တမံၤန့ၣ်လၢသ့ၣ်အပှၢ်လၢ်ကျါလီၤ. 7ပကလဲၤနုာ်လၢအအိၣ်အဆိးအလီၢ်,ပကဘူၣ်က့ၤဘါက့ၤလၢအခီၣ်ယီၢ်လီၤအထံးလီၤ. 8ယွၤဧၢ,ဂဲၤဆၢထၢၣ်,လဲၤနုာ်လၢနအိၣ်ဘှံးအလီၢ်,နဲဒၣ်တဂၤဒီးနစိနကမီၤအတလါတဖျၢၣ်န့ၣ်တက့ၢ်. 9မ်နပှၤလုၢ်တၢ်အဒိၣ်တဖၣ်ကူထီၣ်သိးထီၣ်ဒီးတၢ်တီတၢ်လိၤ,ဒီးမ်နပှၤစီဆှံတဖၣ်ကိးပသူထီၣ်လၢအသးခုအဃိတက့ၢ်. 10လၢနခ့နပှၤစီၤဒၤဝံးအဃိန့ၣ်ဃၣ်ကွံာ်နပှၤဒိးဖှူအသးအမဲာ်တဂ့ၤ. 11ယွၤဆိၣ်တၢ်ဒီးစီၤဒၤဝံးလၢတၢ်မ့ၢ်တၢ်တီ,တကဒံကဒါဘၣ်လၢအီၤန့ၣ်,ယကပာ်နနီၢ်ခိအတၤသၣ်လၢနလီၢ်ပစိာ်အဖီခိၣ်လီၤ. 12နဖိနလံၤမ့ၢ်တိၢ်န့ၢ်ဖံးဃာ်ယတၢ်အၢၣ်လီၤအီလီၤ,ဒီးယတၢ်အုၣ်ယသးလၢယကသိၣ်လိအီၤဒီး,အဝဲသ့ၣ်တဖၣ်အဖိအလံၤကဆ့ၣ်နီၤစ့ၢ်ကီးလၢနလီၢ်ပစိာ်အဖီခိၣ်လီၤထူလီၤယိာ်လီၤ. 13အဂ့ၢ်ဒ်အံၤ,ယွၤဃုထၢလံစံယိၣ်,ဘၣ်အသးလၢအကကဲထီၣ်အအိၣ်အဆိးအလီၢ်လီၤ. 14အအံၤတပူၤမ့ၢ်ယအိၣ်ဘှံးအလီၢ်လီၤစိၤလီၤထီလီၤ.ယကအိၣ်ကဆိးဖဲအံၤလီၤ.အဂ့ၢ်ဒ်အံၤ,ဘၣ်ယသးလၢအီၤလီၤ. 15ယကဆိၣ်ဂ့ၤအတၢ်အီၣ်တၢ်အီသပှၢ်ပှၢ်,အပှၤဖှီၣ်ဖိယာ်ဖိန့ၣ်ယကဒုးဘျဲးအီၣ်အီၤလၢကိၣ်လီၤ. 16ဒီးယကဒုးကူဒုးသိးအပှၤလုၢ်တၢ်အဒိၣ်လၢတၢ်အုၣ်က့ၤခီၣ်က့ၤ,ဒီးအပှၤစီဆှံတဖၣ်ကကိးပသူထီၣ်လၢအသးခုအဃိလီၤ. 17ဖဲန့ၣ်ယကဒုးဒိးထီၣ်စီၤဒၤဝံးအနၢၤတဘိ,ယကကတဲာ်ကတီၤမ့ၣ်အူဒၢတဖျၢၣ်လၢယပှၤဒိးဖှူအသးတဂၤအဂီၢ်လီၤ. 18ယကဒုးကူဒုးသိးအဒုၣ်အဒါလၢတၢ်မဲာ်ဆှးလီၤ.မ့မ့ၢ်အခိၣ်သလုးကဘီၣ်ထီၣ်ညီထီၣ်လၢအကစၢ်ဒၣ်ဝဲအဖီခိၣ်လီၤ.
Copyright information for
KswSKMB