Psalms 145
စီၤဒၤဝံးအတၢ်စံးထီၣ်ပတြၢၤ.
1ယကစၢ်,စီၤပၤဧၢ,ယကပာ်ထီၣ်ထီနၤ,ဒီးယကစံးထီၣ်ပတြၢၤနမံၤလီၤစိၤလီၤထီလီၤ. 2ယကစံးထီၣ်ပတြၢၤနၤကိးမုၢ်နံၤမုၢ်နၤဒဲး,ဒီးယကသးဝံၣ်နမံၤလီၤစိၤလီၤထီလီၤ. 3ယွၤတဂၤန့ၣ်ဒိၣ်ဝဲ,ဒီးဂ့ၤလၢပှၤစံးထီၣ်ပတြၢၤအီၤအါအါကလဲာ်လီၤ.ဒီးမ့ၢ်အဆံးဒိၣ်လဲၣ်ဆံးဒိၣ်လဲၣ်န့ၣ်ပဃုတဘၣ်ဘၣ်. 4ပှၤတစိၤကစံးထီၣ်ပတြၢၤနတၢ်မၤလၢပှၤတစိၤဒၣ်,ဒီးကဒုးနဲၣ်နတၢ်မၤအဒိၣ်တဖၣ်လီၤ. 5ယကဆိကမိၣ်လၢနကဟုနကညီၢ်အစိအကမီၤအလၤအကပီၤ,ဒီးနတၢ်မၤလီၤလးတဖၣ်အဂ့ၢ်အကျိၤလီၤ. 6ဒီးပှၤကကတိၤလၢနမၤလီၤလးတၢ်အစိအကမီၤအဂ့ၢ်အကျိၤ,ဒီးယကစံၣ်တဲၤတဲလီၤနတၢ်ဒိၣ်တၢ်ထီအဂ့ၢ်န့ၣ်လီၤ. 7တၢ်သ့ၣ်နီၣ်ထီၣ်က့ၤနမၤဂ့ၤတၢ်လၢအအါန့ၣ်ကထီၣ်ဖျဲးလၢအထးခိၣ်,ဒီးကသးဝံၣ်သးဆၢနတၢ်တီတၢ်လိၤလီၤ. 8ယွၤသူၣ်ကညီၤတၢ်သးကညီၤတၢ်,ဒီးသူၣ်အိၣ်တၢ်သးအိၣ်တၢ်,ဒီးအသးထီၣ်ကီ,ဒီးအဘျုးအဖှိၣ်ဒိၣ်နီၢ်မးလီၤ. 9ယွၤမၤဂ့ၤတၢ်ခဲလၢာ်,ဒီးအသးအိၣ်ကယဲၢ်အတ့လီၤတၢ်ခဲလၢာ်လီၤ. 10ယွၤဧၢ,နတၢ်မၤခဲလၢာ်ကစံးထီၣ်ပတြၢၤနၤ,ဒီးနပှၤစီဆှံတဖၣ်ကသးဝံၣ်နၤလီၤ. 11ကကတိၤတၢ်လၢနဘီနမုၢ်အလၤကပီၤအဂ့ၢ်အကျိၤဒီးကစံးဘၣ်တဲဘၣ်တၢ်လၢနစိနကမီၤအဂ့ၢ်အကျိၤ, 12ဒ်သိးအကဘိးဘၣ်သ့ၣ်ညါပှၤကညီဖိလၢအတၢ်မၤအဒိၣ်,ဒီးလၢအဘီအမုၢ်န့ၣ်အကဟုအကညီၢ်အိၣ်ဒီးအလၤကပီၤလီၤ. 13နဘီနမုၢ်န့ၣ်မ့ၢ်ဘီမုၢ်အထူအယိာ်,ဒီးနပၢတၢ်န့ၣ်အိၣ်ဝဲအစိၤစိၤအဃၣ်ဃၣ်လီၤ. 14ယွၤမၤစၢၤကယဲၢ်ပှၤလၢအလီၤဃံၤတဖၣ်,ဒီးဝံၣ်ဆၢထၢၣ်ကယဲၢ်ပှၤလၢအသကူးဝဲခဲလၢာ်လီၤ. 15ကယဲၢ်တၢ်အမဲာ်ခိးနၤ,ဒီးအဆၢအကတီၢ်ဘၣ်ဒီး,နဟ့ၣ်လီၤအီၤလၢအတၢ်အီၣ်လီၤ. 16နသလၣ်ထီၣ်နစု,ဒီးကယဲၢ်တၢ်သးအဆၢတၢ်န့ၣ်နဟ့ၣ်လီၤလီၤ. 17ယွၤတီဝဲလိၤဝဲလၢအကျဲခဲလၢာ်အပူၤ,ဒီးစီဆှံဝဲလၢလၢအမၤတၢ်အပူၤခဲလၢာ်လီၤ. 18ကယဲၢ်ပှၤလၢအကိးထီၣ်ယွၤ,ကယဲၢ်ပှၤလၢအကိးထီၣ်ဝဲလၢတၢ်မ့ၢ်တၢ်တီခဲလၢာ်န့ၣ်ယွၤအိၣ်ဘူးဒီးအီၤလီၤ. 19ကမၤဝဲဖဲဒၣ်ပှၤလၢအပျံၤအီၤတဖၣ်အသး,ဒီးကဒိကနၣ်အတၢ်ဃ့ကညး,ဒီးကအုၣ်က့ၤခီၣ်က့ၤအီၤလီၤ. 20ယွၤအံးက့ၤကွၢ်က့ၤကယဲၢ်ပှၤလၢအအဲၣ်အီၤခဲလၢာ်,ဒီးကမၤဟးဂီၤကယဲၢ်ပှၤတတီတလိၤဘၣ်တဖၣ်န့ၣ်လီၤ. 21ယထးခိၣ်ကကတိၤယွၤအတၢ်စံးထီၣ်ပတြၢၤ,ဒီးကယဲၢ်တၢ်ဖံးတၢ်ညၣ်ကစံးထီၣ်ပတြၢၤအမံၤစီဆှံအစိၤစိၤအဃၣ်ဃၣ်လီၤ.
Copyright information for
KswSKMB