‏ Psalms 18

လၢတၢ်အခိၣ်အဂီၢ်,လၢယွၤအခ့အပှၤ,စီၤဒၤဝံးကတိၤတၢ်ဒီးယွၤလၢတၢ်သးဝံၣ်အံၤအတၢ်ကတိၤလၢမုၢ်တနံၤလၢယွၤမၤပူၤမၤဖျဲးအီၤလၢအဒုၣ်အဒါခဲလၢာ်အစုပူၤ,ဒီးလၢစီၤစီလူးအစုပူၤ,ဒီးစံးဝဲဒၣ်.

1ယအဲၣ်နၤ,ယဂံၢ်ယဘါယွၤဧၢ. 2ယွၤမ့ၢ်ယလ့,ဒီးယတိာ်,ဒီးယတၢ်မၤပူၤမၤဖျဲးယၤ,ယကစၢ်,ယလၢၢ်,ယကသန့ၤယသးလၢအီၤ,ယကတီၤတဘ့ၣ်,ဒီးယတၢ်အုၣ်က့ၤခီၣ်က့ၤယၤအနၢၤ,ယတၢးထီၣ်ထီန့ၣ်လီၤ.

3ယကကိးထီၣ်ယွၤလၢအဂ့ၤဘၣ်တၢ်စံးထီၣ်ပတြၢၤအီၤ,ဒီးယကတုၤလၢတၢ်အုၣ်က့ၤခီၣ်က့ၤယၤလၢယဒုၣ်ယဒါတဖၣ်အစုပူၤလီၤ.

4တၢ်သံအပျံၤတဖၣ်အိၣ်ဝးတရံးယၤ,ဒီးတၢ်မၤဟးဂီၤအထံကျိတဖၣ်မၤပျံၤမၤဖုးယၤလီၤ. 5တၢ်ပျုၤပူၤအပျံၤတဖၣ်အိၣ်ဝးတရံးယၤ,တၢ်သံအပျံၤသကွီၤတဖၣ်လဲၤဘျီယၤလီၤ.

6တုၤယဘၣ်တၢ်ကိၢ်တၢ်ဂီၤဒီး,ယကိးထီၣ်ယွၤ,ဒီးယဃ့ကညးတၢ်လၢယကစၢ်လီၤ.ဒီးကနၣ်ဝဲယကလုၢ်လၢအနူၢ်ပူၤ,ဒီးယဃ့ကညးတၢ်လဲၤဆူအမဲာ်ညါ,ဆူအနၢ်ပူၤဒၣ်လဲာ်လီၤ.

7တုၤနုၤတစုဟီၣ်ခိၣ်ဟူးဝးဝဲ,ဒီးဆှဲးဆှိးဝဲ,ကစၢၢ်ကလိအခီၣ်ထံးတဖၣ်သုးအသးဒီးဟူးဝးဝဲလီၤ.အဂ့ၢ်ဒ်အံၤ,အသးထီၣ်ဝဲလီၤ. 8မ့ၣ်အူခုၣ်ဟဲထီၣ်လၢအနါဒ့ပူၤ,ဒီးမ့ၣ်အူလၢအထးခိၣ်အီၣ်တၢ်,မ့ၣ်အူကဖးဆိၣ်ကဲၤအသးလၢအီၤလီၤ.

9ဒီးမၤသကူးလီၤမူခိၣ်,ဒီးဟဲလီၤ,ဒီးတၢ်ခံးသူအိၣ်ဝဲလၢအခီၣ်ဖီလာ်, 10ဒီးဒိးခ့ရူာ်,ဒီးယူၤဝဲ,မ့ၢ်မးယူၤဝဲလၢကလံၤအဒံးဆ့အဖီခိၣ်လီၤ. 11ပာ်တၢ်ခံးလၢအလီၢ်ခူသူၣ်,ဒီးအဒဲအိၣ်ဝးတရံးအီၤန့ၣ်မ့ၢ်ထံတၢ်ခံး,တၢ်အၢၣ်တီၣ်လၢမူကပိာ်လိၤလီၤ.

12လၢတၢ်ကဲၤဆှုၣ်ဆှုၣ်လၢအမဲာ်ညါန့ၣ်တၢ်အၢၣ်တီၣ်ဟးထီၣ်ဝဲ,သူၣ်ဒီးမ့ၣ်အူကဖးလီၤ. 13ဒီးယွၤမၢလီသီၣ်လၢမူခိၣ်,ဒီးတၢ်ထီကတၢၢ်ဒုးသီၣ်ထီၣ်အကလုၢ်,သူၣ်ဒီးမ့ၣ်အူကဖးလီၤ. 14ဒီးပျၢ်အပျၢ်တဖၣ်ဒီးမၤပြံပြါဝဲ,ဒီးခးလီဝၢ်ဒံးအါအါကလဲာ်,ဒီးမၤဃာ်အီၤလီၤ.

15ဒီးထံအကျိၤတဖၣ်န့ၣ်ဖျါဝဲဒီးဟီၣ်ခိၣ်အခီၣ်ထံးတဖၣ်န့ၣ်အိၣ်ဖျါထီၣ်ဝဲလၢနသိၣ်ဃီၣ်တၢ်,ယွၤဧၢ,လၢနနါဒ့အူသဖှိတၢ်တဘျီအမဲာ်ညါလီၤ.

16မၢလီၤဝဲလၢတၢ်ထီၣ်ထီ,ဟံးန့ၢ်ထီၣ်ယၤ,ထုးထီၣ်ယၤလၢထံဒိၣ်အကျါလီၤ. 17ဒီးမၤပူၤမၤဖျဲးယၤဒီးယဒုၣ်ယဒါလၢအဂံၢ်ဆူၣ်အဘါဆူၣ်တဂၤ,ဒီးလၢပှၤလၢအသးဟ့ယၤတဖၣ်အစုပူၤလီၤ.အဂ့ၢ်ဒ်အံၤ,ဆူၣ်န့ၢ်ယၤတက့ၢ်လီၤ.

18လၢယတၢ်နးတၢ်ဖှီၣ်အမုၢ်နံၤန့ၣ်အဝဲသ့ၣ်လဲၤဘျီယၤလီၤ.ဘၣ်ဆၣ်ဒီးယွၤမ့ၢ်တၢ်အိၣ်တၢ်ဆိးအလီၢ်လၢယဂီၢ်လီၤ. 19ဒီးဒုးဟးထီၣ်ယၤဆူအလီၢ်ဖးလဲၢ်,မၤပူၤမၤဖျဲးယၤလီၤ.အဂ့ၢ်ဒ်အံၤ,ဘၣ်အသးလၢယၤလီၤ.

20ယွၤဟ့ၣ်ကၣ်တၢ်လၢယၤဒ်ယတၢ်တီတၢ်လိၤအသိးန့ၣ်,ဒ်ယစုကဆှီအသိးန့ၣ်ဒုးန့ၢ်ဆၢယၤလၢတၢ်လီၤ. 21အဂ့ၢ်ဒ်အံၤ,ယတိၢ်န့ၢ်လံယွၤအကျဲတဖၣ်လံ,ယတမၤကမၣ်ဘၣ်ယကစၢ်ဘၣ်. 22အဂ့ၢ်ဒ်အံၤ,အစံၣ်ညီၣ်တၢ်ခဲလၢာ်အိၣ်ဝဲလၢယမဲာ်ညါ,ဒီးအတၢ်မၤလိာ်တဖၣ်န့ၣ်ယတလုၣ်သ့ၣ်ခါပတာ်ဘၣ်, 23ဒီးယလၢထီၣ်ပှဲၤထီၣ်လၢအမဲာ်ညါ,ဒီးယပလီၢ်ယသးလၢယတၢ်အၢလီၤ. 24မၤသးဒ်န့ၣ်ဒီးယွၤဟ့ၣ်ကၣ်တၢ်လၢယၤဒ်ယတၢ်တီတၢ်လိၤအသိးန့ၣ်,ဒ်ယစုကဆှီလၢအမဲာ်ညါအသိးန့ၣ်လီၤ.

25လၢပှၤအဂ့ၤန့ၣ်နကပာ်ဂ့ၤနသး,လၢပှၤအလၢအပှဲၤန့ၣ်နကပာ်လၢပာ်ပှဲၤနသး, 26လၢပှၤကဆှီန့ၣ်နကပာ်ကဆှီနသး,ဒီးလၢပှၤအကီန့ၣ်နကပာ်ကီနသးလီၤ.

27အဂ့ၢ်ဒ်အံၤ,နကအုၣ်က့ၤခီၣ်က့ၤပှၤဂီၢ်မုၢ်လၢအဘၣ်နးဘၣ်ဖှီၣ်,မ့မ့ၢ်တၢ်အမဲာ်ထီၣ်ထီန့ၣ်နကဆီၣ်လီၤအီၤလီၤ.

28အဂ့ၢ်ဒ်အံၤ,နဒုးကပီၤထီၣ်ယမ့ၣ်အူဒၢ,ယွၤယကစၢ်မၤကပီၤထီၣ်ယတၢ်ခံးန့ၣ်လီၤ. 29အဂ့ၢ်ဒ်အံၤ,ယဃ့ၢ်နုာ်ဖျိလံပှၤတဖုလၢနၤ,ဒီးယစံၣ်ကပာ်လံတၢ်အဒူၣ်လၢယကစၢ်တဂၤန့ၣ်လံ.

30တၢ်လၢယွၤန့ၣ်,အကျဲလၢထီၣ်ပှဲၤထီၣ်လီၤ.ယွၤအကလုၢ်န့ၣ်ဘၣ်တၢ်ပှံၢ်အီၤလီၤ.မ့ၢ်ဝဲလၢကတီၤတဘ့ၣ်လၢကယဲၢ်ပှၤလၢအသန့ၤအသးလၢအီၤခဲလၢာ်လီၤ. 31အဂ့ၢ်ဒ်အံၤ,လၢယွၤအမဲာ်ညါန့ၣ်မ့ၢ်မတၤမ့ၢ်ကစၢ်တဂၤလဲၣ်.လၢပကစၢ်အဖီခိၣ်န့ၣ်မ့ၢ်မတၤမ့ၢ်လၢၢ်တဂၤလဲၣ်.

32ပှၤလၢအကံၢ်တူာ်ယယီၢ်ဒ့ဒီးတၢ်ဂံၢ်တၢ်ဘါန့ၣ်မ့ၢ်ယွၤလီၤ.ဒီးပာ်လၢထီၣ်ပှဲၤထီၣ်ယကျဲလီၤ. 33မၤယခီၣ်ဒ်တၤဟိမိၢ်အသိး,ဒီးဒုးဆၢထၢၣ်ယၤလၢယလီၢ်ထီၣ်ထီအဖီခိၣ်န့ၣ်လီၤ. 34သိၣ်လိယစုလၢယကဒုးတၢ်,ဒီးချံၣ်တိၢ်ဘၣ်တၢ်မၤကၢ်ကွံာ်အီၤလၢယစုလီၤ.

35ဒီးနဟ့ၣ်လီၤယၤလၢနတၢ်အုၣ်က့ၤခီၣ်က့ၤအကတီၤတဘ့ၣ်,ဒီးနစုထွဲဒုးအိၣ်ဂၢၢ်ဆိးကျၢၤယၤ,ဒီးနဆီၣ်လီၤတၢ်န့ၣ်မၤဒိၣ်ထီၣ်ယၤလီၤ. 36နမၤလဲၢ်ထီၣ်ယထွဲတၢ်,ဒီးယခီၣ်ဒ့တကနိးဘၣ်. 37ယလူၤယဒုၣ်ယဒါ,ဒီးချုးန့ၢ်အီၤ,ဒီးယတချုးမၤလၢာ်ဒံးဘၣ်အီၤဘၣ်ဒီး,ယတဟဲက့ၤကဒါက့ၤဘၣ်. 38ယကကျီကွံာ်အီၤ,ဒီးဂဲၤဆၢထၢၣ်ဝဲတကဲဘၣ်,လီၤဃံၤဝဲလၢယခီၣ်အဖီလာ်လီၤ.

39ဒီးနကံၢ်တူာ်ယယီၢ်ဒ့ဒီးတၢ်ဂံၢ်တၢ်ဘါလၢဒုးသုးအဂီၢ်,နဆီၣ်လီၤပှၤလၢအဂဲၤဆၢထၢၣ်ထီဒါယၤလၢယဖီလာ်လီၤ. 40နဟ့ၣ်လီၤယၤလၢယဒုၣ်ယဒါအကိာ်,ဒီးပှၤလၢအသးဟ့ယၤန့ၣ်ယမၤဟးဂီၤကွံာ်အီၤလီၤ.

41အဝဲသ့ၣ်ကိးထီၣ်ဘၣ်ဆၣ်ဒီး,တၢ်အုၣ်က့ၤခီၣ်က့ၤတအိၣ်ဘၣ်,ဆူယွၤအအိၣ်န့ၣ်,ဒီးတစံးဆၢဘၣ်ဝဲဘၣ်. 42ဒီးယမၤလီၤကလဲအီၤဒ်ဟီၣ်ခိၣ်အကမူၣ်လၢကလံၤအမဲာ်ညါအသိးန့ၣ်,ဒ်ကျဲအကပံာ်အသိးန့ၣ်,ယလူလီၤကွံာ်အီၤလီၤ.

43နမၤပူၤမၤဖျဲးယၤဒီးပှၤဂီၢ်မုၢ်အတၢ်အ့ၣ်လိာ်ဆိးက့လိာ်န့ၣ်,နပာ်ယၤလၢပှၤကလုာ်တဖၣ်အခိၣ်,ဒီးပှၤဂီၢ်မုၢ်လၢယတသ့ၣ်ညါတ့ၢ်ဘၣ်အီၤန့ၣ်ကမၤယတၢ်လီၤ. 44တုၤအနၢ်ဟူတၢ်လၢယဂ့ၢ်ဒီး,ကဒိကနၣ်ယကလုၢ်လီၤ.ပှၤတခီဘီမုၢ်ဖိကဆီၣ်လီၤအသးလၢယဖီလာ်လီၤ. 45ပှၤတခီဘီမုၢ်ဖိကလီၤညွံးကွံာ်,ဒီးကဟဲထီၣ်ကနိးကစုာ်လၢအလီၢ်ကးတံာ်ဃာ်တဖၣ်အပူၤလီၤ.

46ယွၤမူဝဲ,ဒီးမ်ယလၢၢ်ဘၣ်တၢ်စံးထီၣ်ပတြၢၤအီၤတက့ၢ်,ဒီးတၢ်အုၣ်က့ၤခီၣ်က့ၤယၤအကစၢ်န့ၣ်မ်အဘၣ်တၢ်ပာ်ထီၣ်ထီအီၤတက့ၢ်. 47ပှၤလၢအမၤဆၢတၢ်အၢလၢယဂီၢ်န့ၣ်မ့ၢ်ယွၤလီၤ.ဒီးမၤနၢၤမၤဃၣ်ပှၤဂီၢ်မုၢ်လၢယဖီလာ်လီၤ.

48မၤပူၤမၤဖျဲးယၤဒီးယဒုၣ်ယဒါလီၤ.မ့ၢ်မးနပာ်ယၤထီၣ်ထီန့ၢ်ပှၤလၢအဂဲၤဆၢထၢၣ်ထီဒါယၤတက့ၢ်,နမၤပူၤမၤဖျဲးယၤလၢပှၤမၤအၢတၢ်လီၤ.

49မၤသးဒ်န့ၣ်ဒီး,ကစံးထီၣ်ပတြၢၤနၤလၢပှၤကလုာ်တဖၣ်အကျါ,ယွၤဧၢ,ဒီးယကသးဝံၣ်ထီၣ်နမံၤလီၤ. 50မ့ၢ်တၢ်အုၣ်က့ၤခီၣ်က့ၤအတၢးထီလၢအစီၤပၤအဂီၢ်,ဒီးမၤဘျုးမၤဖှိၣ်အပှၤဒိးဖှူအသးတဂၤ,လၢစီၤဒၤဝံးဒီးအချံအသၣ်လီၤစိၤလီၤထီလီၤ.