Psa 45 | KswSKMB | STEP | တၢ်အဲၣ်အီၤအတၢ်သးဝံၣ်လၢတၢ်အခိၣ်အဂီၢ်,စီၤကိးရးအဖိခွါအသိၣ်တၢ်လၢဖီဒ့ၣ်ညါ. ယသးပၢၢ်ထီၣ်လၢတၢ်ဂ့ၤတမံၤ,ယကစံၣ်တဲၤတဲလီၤယမၤတၢ်လၢစီၤပၤလီၤ.ယပျ့ၤမ့ၢ်ပှၤလၢအကွဲးလံာ်ချ့တဂၤအထိၣ်ဒံးလီၤ.

‏ Psalms 45

တၢ်အဲၣ်အီၤအတၢ်သးဝံၣ်လၢတၢ်အခိၣ်အဂီၢ်,စီၤကိးရးအဖိခွါအသိၣ်တၢ်လၢဖီဒ့ၣ်ညါ.

1 ယသးပၢၢ်ထီၣ်လၢတၢ်ဂ့ၤတမံၤ,ယကစံၣ်တဲၤတဲလီၤယမၤတၢ်လၢစီၤပၤလီၤ.ယပျ့ၤမ့ၢ်ပှၤလၢအကွဲးလံာ်ချ့တဂၤအထိၣ်ဒံးလီၤ.

2 နဃံန့ၢ်နလၤန့ၢ်ပှၤကညီဖိတက့ၢ်လီၤ.တၢ်ဃံတၢ်လၤလူလီၤအသးလၢနပျုၤအလိၤလီၤ.မၤသးဒ်န့ၣ်ဒီးယွၤဆိၣ်ဂ့ၤနၤလီၤထူလီၤယိာ်လီၤ.

3 ကံၢ်တူာ်နနးလၢနကံၣ်ဒုၣ်အလိၤ,တၢ်ဒိၣ်တၢ်ဆူၣ်ဧၢ,အိၣ်ဒီးနလၤကပီၤဒီးနကဟုကညီၢ်တက့ၢ်. 4 ဒီးဘီၣ်ထီၣ်ညီထီၣ်,ဒီးဒိးတၢ်ဒီးနကဟုကညီၢ်လၢတၢ်မ့ၢ်တၢ်တီ,ဒီးတၢ်သူၣ်စူၤသးစူၤ,ဒီးတၢ်တီတၢ်လိၤအဃိတက့ၢ်.ဒီးနစုထွဲကသိၣ်လိနၤလၢတၢ်မၤပျံၤတၢ်တဖၣ်န့ၣ်လီၤ. 5 နပျၢ်အကနၣ်အ့ၣ်တၢ်လၢစီၤပၤအဒုၣ်အဒါအသးကံၢ်ပူၤ,ပှၤဂီၢ်မုၢ်လီၤဃံၤလၢနဖီလာ်လီၤ.

6 နလီၢ်ပစိာ်,ယွၤဧၢ,အိၣ်ဝဲအစိၤစိၤအဃၣ်ဃၣ်လီၤ.နဘီမုၢ်အနီၣ်ထိးစီၤပၤန့ၣ်မ့ၢ်တၢ်တီတၢ်လိၤအနီၣ်ထိးလီၤ.

7 နအဲၣ်တၢ်တီ,ဒီးနသးဟ့တၢ်အၢလီၤ.မၤသးဒ်န့ၣ်ဒီး,ယွၤဧၢ,နကစၢ်ဖှူနၤဒီးတၢ်သးခုအသိလၢနတံၤနသကိးအဖီခိၣ်လီၤ. 8 မူရၣ်,ဒီးအကၠီၣ်,ဒီးကဒါနါအဖံးန့ၣ်မ့ၢ်နကူနသိးခဲလၢာ်လၢနူၢ်ကဆီမဲအပူၤဖဲပှၤဒုးသူၣ်ခုသးခုနၤလီၤ. 9 စီၤပၤအဖိမုၣ်တဖၣ်အိၣ်ဝဲလၢနပှၤလၤကပီၤဖိအကျါလီၤ.နီၢ်ပၤမုၣ်န့ၣ်ဆၢထၢၣ်လၢနစုထွဲလၢအိဖ့ၢ်အထူပူၤန့ၣ်လီၤ.

10 ဒိကနၣ်,ဖိမုၣ်ဧၢ,ဒီးကွၢ်,ဒီးဒိကနၣ်,ဒီးသးပ့ၤနီၣ်နပှၤဂီၢ်မုၢ်,ဒီးနပၢ်အဟံၣ်တက့ၢ်. 11 ဒီးစီၤပၤကဘၣ်အသးလၢနဃံနလၤလီၤ.အဂ့ၢ်ဒ်အံၤ,အဝဲဒၣ်န့ၣ်မ့ၢ်နကစၢ်လီၤ.ဒီးဘူၣ်ထီၣ်ဘါထီၣ်အီၤတက့ၢ်. 12 ဒီးစိၢ်အဖိမုၣ်အိၣ်ဒီးအခိၣ်ဖး,ပှၤအထူးအတီၤလၢပှၤဂီၢ်မုၢ်အကျါန့ၣ်ကဃ့ဘၣ်ဘျုးလၢနမဲာ်ညါလီၤ. 13 စီၤပၤအဖိမုၣ်န့ၣ်အိၣ်ဒီးတၢ်လၤကပီၤခဲလၢာ်လၢအပူၤလီၤ.အကူအသိးမၤအသးကျီၣ်ကျဲဒီးလုၣ်ထူလီၤ.

14 တၢ်ဆှၢအီၤဆူစီၤပၤအအိၣ်ဒီးအကူအသိးကံၣ်ဃ့လီၤ.ပှၤမုၣ်လိၣ်ဘိတဖၣ်,အတံၤအသကိးလၢအပိာ်အခံန့ၣ်တၢ်ကဒုးဟဲအီၤဆူနအိၣ်လီၤ. 15 တၢ်ကဆှၢအီၤလၢတၢ်သူၣ်ခုသးခု,ဒီးလၢတၢ်သူၣ်ဖှံသးညီကဟဲနုာ်ဆူစီၤပၤအနူၢ်ပူၤလီၤ.

16 လၢနပၢ်တဖၣ်အလီၢ်နဖိတဖၣ်ကအိၣ်ဝဲလၢနကပာ်လၢပဒိၣ်ဖးဒိၣ်တဖၣ်လၢဟီၣ်ခိၣ်ဒီဘ့ၣ်ညါအပူၤလီၤ.

17 ယကဒုးသ့ၣ်နီၣ်ထီၣ်က့ၤနမံၤလၢပှၤအစိၤအဃၣ်ခဲလၢာ်လီၤ.မၤသးဒ်န့ၣ်ဒီးပှၤဂီၢ်မုၢ်ကစံးထီၣ်ပတြၢၤနၤအစိၤစိၤအဃၣ်ဃၣ်လီၤ.