Psalms 49
ထါလၢတၢ်အခိၣ်အဂီၢ်လၢစီၤကိးရးအဖိခွါ.
1ကနၣ်တၢ်အံၤ,ပှၤဂီၢ်မုၢ်ခဲလၢာ်သ့ၣ်ဧၢ,ဒိကနၣ်,ကယဲၢ်ပှၤအိၣ်ဝဲလၢဟီၣ်ခိၣ်ချၢခဲလၢာ်သ့ၣ်သုဧၢ. 2ပှၤအဆံးဂ့ၤ,ပှၤအဒိၣ်ဂ့ၤ,ပှၤအထူးအတီၤ,ဒီးပှၤအဖှီၣ်အယာ်တပူၤဃီန့ၣ်တက့ၢ်. 3ယထးခိၣ်ကကတိၤတၢ်ကူၣ်သ့,ဒီးတၢ်ဆိကမိၣ်လၢယသးဘၣ်ဃးဒီးတၢ်သူၣ်ဆးသးဆးလီၤ. 4ယကဒိးယနၢ်လၢတၢ်ကတိၤဒိ,ယကအိးထီၣ်ယတၢ်ကတိၤအဒိၣ်အယိာ်လၢတနၢ်န့ၣ်လီၤ. 5လၢတၢ်အၢအမုၢ်နံၤတဖၣ်,လၢပှၤခိးခူသူၣ်ယၤတဖၣ်အတၢ်အၢအဃိန့ၣ်,ယပျံၤတၢ်ဘၣ်မနုၤလဲၣ်. 6ပှၤတဖၣ်န့ၣ်သန့ၤအသးလၢအစုလီၢ်အခီၣ်ခိၣ်,ဒီးပာ်ကဖိအသးလၢအတၢ်ထူးအါအတၢ်တီၤဒိၣ်အဃိန့ၣ်လီၤ. 7ပှၤကညီပှ့ၤက့ၤအဒီပုၢ်ဝဲၢ်တသ့ဘၣ်လ့ၤတက့ၤဘၣ်.ဟ့ၣ်တၢ်မၤပူၤဖျဲးအီၤလၢယွၤတသ့ဘၣ်. 8(အဂ့ၢ်ဒ်အံၤ,အသးအပှ့ၤမ့ၢ်တၢ်လုၢ်ဒိၣ်ပှ့ၤဒိၣ်,ဒီးဆိတ့ၢ်ဝဲလီၤထူလီၤယိာ်) 9ဒ်သိးအကမူဝဲလီၤစိၤလီၤထီဒီးသုတထံၣ်ဘၣ်တၢ်အုၣ်သံတဂ့ၤန့ၣ်လီၤ. 10အဂ့ၢ်ဒ်အံၤ,ထံၣ်ဘၣ်ဝဲလၢပှၤကူၣ်သ့န့ၣ်သံဝဲ,ပှၤဟးဂီၤဖိဒီးပှၤအသးခံးန့ၣ်ဟးဂီၤဝဲတပူၤဃီ,ဒီးလဲၤသဒၣ်အစုလီၢ်အခီၣ်ခိၣ်လၢပှၤဂၤအဂီၢ်လီၤ. 11ဆိကမိၣ်ဝဲလၢအဟံၣ်တဖၣ်ကအိၣ်လီၤထူလီၤယိာ်,အအိၣ်အလီၢ်တဖၣ်န့ၣ်အစိၤစိၤအဃၣ်ဃၣ်လီၤ.ကိးဝဲအဟီၣ်ခိၣ်ဒ်သိးဒီးအမံၤဒၣ်ဝဲန့ၣ်လီၤ. 12ဘၣ်ဆၣ်ဒီးပှၤကညီန့ၣ်တအိၣ်တဆိးဘၣ်လၢတၢ်လၤကပီၤအပူၤဘၣ်.မၤသးဒ်ဆၣ်ဖိကီၢ်ဖိလၢအဟးဂီၤအသိးန့ၣ်လီၤ. 13အဝဲအံၤမ့ၢ်ပှၤဟးဂီၤဖိအကျဲ,ဘၣ်ဆၣ်ဒီးလၢအလီၢ်ခံန့ၣ်ပှၤဘၣ်အသးလၢအတၢ်ကတိၤန့ၣ်လီၤ.စ့လၤ.
14တၢ်ပာ်အီၤလၢပျုၤပူၤဒ်သိအသိးန့ၣ်,တၢ်သံကကွၢ်အီၤ,ဒီးလၢမုၢ်ဆ့ၣ်ထီၣ်န့ၣ်ပှၤတီပှၤလိၤကပၢအီၤလီၤ.အဃံအလၤကမ့ၢ်လၢပျုၤပူၤကမၤလၢာ်ကွံာ်အီၤတုၤအအိၣ်အလီၢ်တအိၣ်ဘၣ်အဂီၢ်လီၤ. 15မ့မ့ၢ်ယွၤကပှ့ၤက့ၤယသးလၢပျုၤပူၤအစုပူၤလီၤ.အဂ့ၢ်ဒ်အံၤ,ကတူၢ်လိာ်ယၤလီၤ.
စ့လၤ.
16တုၤပှၤတဂၤထူးထီၣ်တီၤထီၣ်,ဒီးအဟံၣ်အလၤကပီၤအါထီၣ်ဒီး,ပျံၤတၢ်တဂ့ၤ. 17အဂ့ၢ်ဒ်အံၤ,တုၤအသံဒီး,တဟံးန့ၢ်ဘၣ်တၢ်နီတမံၤဘၣ်.အလၤကပီၤတလဲၤလီၤပိာ်အခံဘၣ်. 18အဂ့ၢ်ဒ်အံၤ,လၢအသးမူဒံးအဖၢမုၢ်န့ၣ်ဆိၣ်ဂ့ၤလီၤအသးလီၤ.ဒီးနမ့ၢ်မၤတၢ်ဂ့ၤလၢနဂီၢ်ဒၣ်နဲဒီး,ပှၤကစံးထီၣ်ပတြၢၤနၤလီၤ. 19ကလဲၤလီၤဝဲဆူအပၢ်တဖၣ်အပှၤတစိၤလီၤ,စိၤရီၤတထံၣ်လၢၤဘၣ်တၢ်ကပီၤဘၣ်. 20ပှၤကညီအိၣ်ဒီးအလၤကပီၤလၢအသူၣ်ဆးအသးဆးတအိၣ်ဘၣ်န့ၣ်မၤသးဒ်ဆၣ်ဖိကီၢ်ဖိလၢအဟးဂီၤအသိးန့ၣ်လီၤ.
Copyright information for
KswSKMB