Psa 63 | KswSKMB | STEP | စီၤဒၤဝံးအထါလၢအအိၣ်ဝဲလၢယူဒၤအပှၢ်မုၢ်ကနၢ. ယွၤဧၢ,နမ့ၢ်ယကစၢ်လီၤ.ယဃုနၤဂီၤဂီၤ,ယသးအံၤသူအသးလၢနၤ,ယဖံးယညၣ်ဆၢန့ၢ်နၤလၢကီၢ်လၢအဃ့,ဒီးတၢ်ဘှံးအသး,ဖဲထံတအိၣ်ဘၣ်.

‏ Psalms 63

စီၤဒၤဝံးအထါလၢအအိၣ်ဝဲလၢယူဒၤအပှၢ်မုၢ်ကနၢ.

1 ယွၤဧၢ,နမ့ၢ်ယကစၢ်လီၤ.ယဃုနၤဂီၤဂီၤ,ယသးအံၤသူအသးလၢနၤ,ယဖံးယညၣ်ဆၢန့ၢ်နၤလၢကီၢ်လၢအဃ့,ဒီးတၢ်ဘှံးအသး,ဖဲထံတအိၣ်ဘၣ်. 2 ဒ်သိးယကထံၣ်ဘၣ်နစိနကမီၤဒီးနလၤနကပီၤဒ်ယထံၣ်ဘၣ်နၤလၢတၢ်အလီၢ်စီဆှံပူၤအသိးန့ၣ်လီၤ. 3 အဂ့ၢ်ဒ်အံၤ,နဘျုးနဖှိၣ်ဂ့ၤန့ၢ်တၢ်မူတက့ၢ်လီၤ.ယပျုၤကစံးထီၣ်ပတြၢၤနၤလီၤ. 4 ဖဲယသးသမူအဖၢမုၢ်ဒီး,ယကစံးထီၣ်ပတြၢၤနၤဒ်န့ၣ်လီၤ.ယကယူာ်ထီၣ်ယစုလၢနမံၤလီၤ. 5 ယသးကအီၣ်ဘျဲးအီၣ်တၢ်အီၣ်ဝံၣ်,ဒီးသိဧိၤချါဧိၤ,ဒီးယထးခိၣ်ကစံးထီၣ်ပတြၢၤနၤလၢပျုၤလၢအသးခုလီၤ.

6 တုၤယသ့ၣ်နီၣ်ထီၣ်က့ၤနၤလၢယလီၢ်မံအဖီခိၣ်ဒီး,ယဆိကမိၣ်လၢနဂ့ၢ်နကျိၤလၢပှၤဆိးသီအကတီၢ်တဖၣ်အဖၢမုၢ်လီၤ. 7 အဂ့ၢ်ဒ်အံၤ,နမ့ၢ်တၢ်မၤစၢၤယၤ,ဒီးယကသူၣ်ဖှံသးညီလၢနဒံးဆ့အကဒုပူၤလီၤ. 8 ယသးသန့ၤအသးလၢနၤ,နစုထွဲမၤစၢၤယၤလီၤ. 9 ဒီးပှၤလၢအဃုမၤဟးဂီၤယသးတဖၣ်န့ၣ်လဲၤလီၤဆူဟီၣ်ခိၣ်အဖီလာ်န့ၣ်လီၤ. 10 တၢ်ကဟ့ၣ်လီၤကွံၤအီၤဆူနးအစိကမီၤအပူၤ,ဒီးကကဲထီၣ်လၢထွံၣ်မံၤအဂီၢ်လီၤ.

11 ဒီးစီၤပၤန့ၣ်ကသးခုလၢယွၤအပူၤလီၤ.ကယဲၢ်ပှၤလၢအဆိၣ်တၢ်လၢအီၤတဂၤလၢ်လၢ်န့ၣ်ကပာ်ကဖိအသးလီၤ.အဂ့ၢ်ဒ်အံၤ,ပှၤလၢအကတိၤတၢ်ကဘျံးကဘျၣ်အထးခိၣ်ကဘၣ်တၢ်ဆွံတံာ်အီၤလီၤ.