Psalms 7
စီၤဒၤဝံးအထါလၢအသးဝံၣ်ထီၣ်ယွၤလၢပှၤဘံၣ်ယၤမံၣ်ဖိကူၤၡးအတၢ်ကတိၤအဃိန့ၣ်.
1ယွၤ,ယကစၢ်ဧၢ,ယသန့ၤယသးလၢနၤလီၤ.အုၣ်က့ၤခီၣ်က့ၤယၤလၢကယဲၢ်ပှၤမၤအၢမၤသီယၤအစုပူၤ,ဒီးမၤပူၤမၤဖျဲးယၤတက့ၢ်. 2ကဖှီဘၣ်ဖုးယသးဒ်ခ့ယုၢ်အသိးန့ၣ်,ကအ့ၣ်ဖှီတဲာ်ဘၣ်ဖုး,ဒီးတၢ်မၤပူၤမၤဖျဲးတအိၣ်ဘၣ်. 3ယွၤ,ယကစၢ်ဧၢ,ယမ့ၢ်မၤတ့ၢ်တၢ်အံၤ,တၢ်အၢမ့ၢ်အိၣ်လၢယစုပူၤဒီး, 4ယမ့ၢ်မၤကၣ်ပှၤလၢအဃူလိာ်ဖိးလိာ်ဒီးယၤလၢတၢ်အၢဒီး,(မ့ၢ်မးယမၤပူၤဖျဲးပှၤလၢအမ့ၢ်ယဒုၣ်ယဒါကလီကလီ,) 5မ်တၢ်အဒုၣ်အဒါလူၤယသးသမူ,ဒီးချုးန့ၢ်ဒီးယီၢ်တံၢ်အီၤပၢၢ်လၢဟီၣ်ခိၣ်,ဒီးဒုးအိၣ်ယလၤကပီၤလၢဟီၣ်ခိၣ်ကမူၣ်အကျါန့ၣ်တက့ၢ်.စ့လၤ.
6ဂဲၤဆၢထၢၣ်လၢနသးထီၣ်တက့ၢ်.ယွၤဧၢ,ပာ်ဆၢထၢၣ်နသးလၢယဒုၣ်ယဒါတဖၣ်သးဒိၣ်ထီၣ်ဆူၣ်အဃိ,ဒီးဖုသံနီၣ်ထီၣ်လၢယဂီၢ်တက့ၢ်.နမၤလိာ်လံတၢ်စံၣ်ညီၣ်ကွီၢ်လံ. 7ဒီးပှၤဂီၢ်မုၢ်အတၢ်အိၣ်ဖှိၣ်ကအိၣ်ဝးတရံးနၤလီၤ.ဒီးလၢအဖီခိၣ်န့ၣ်က့ၤထီၣ်ဆူတၢ်အလီၢ်ထီၣ်ထီန့ၣ်တက့ၢ်. 8ယွၤစံၣ်ညီၣ်ပှၤဂီၢ်မုၢ်လီၤ.စံၣ်ညီၣ်ယၤ,ယွၤဧၢ,ဒ်ယတၢ်တီတၢ်လိၤအသိး,ဒီးဒ်တၢ်လၢတၢ်ပှဲၤလၢအအိၣ်လၢယပူၤအသိးန့ၣ်တက့ၢ်. 9မ်ပှၤတတီတလိၤအတၢ်အၢန့ၣ်ကတၢၢ်လၢ်တက့ၢ်.မ့မ့ၢ်ပှၤတီပှၤလိၤန့ၣ်ဒုးအိၣ်ဂၢၢ်ဆိးကျၢၤအီၤတက့ၢ်.အဂ့ၢ်ဒ်အံၤယွၤအတီအလိၤတဂၤမၤကွၢ်ပှၤအသး,ဒီးအကလ့ၢ်တဖၣ်လီၤ. 10ယကတီၤတဘ့ၣ်အိၣ်ဒီးယွၤလၢအအုၣ်က့ၤခီၣ်က့ၤပှၤလၢအသးလိၤလီၤ. 11ယွၤမ့ၢ်ပှၤစံၣ်ညီၣ်တၢ်အတီအလိၤ,ဒီးယွၤအသးထီၣ်ဘၣ်ပှၤတတီတလိၤကိးမုၢ်နံၤမုၢ်နၤဒဲးလီၤ. 12ပှၤမ့ၢ်တဃၣ်ဘၣ်အသးဘၣ်ဒီး,ကကျ့အနးတဘ့ၣ်လီၤ.ပညိၣ်ထီၣ်လံအချံၣ်လံ,ဒီးကတဲာ်ကတီၤလံအီၤလံ, 13ဒီးကတဲာ်ကတီၤလံတၢ်သံအစုကဝဲၤန့ၣ်လၢအဂီၢ်လံ.မၤအပျၢ်လၢမ့ၣ်အူလီၤ. 14ကွၢ်ကွၢ်,အဟုးဆါလၢတၢ်အၢ,ဒီးဒၢထီၣ်လၢတၢ်နးတၢ်ဖှီၣ်,ဒီးဆံးစၢ်န့ၢ်တၢ်ကဘျံးကဘျၣ်လီၤ. 15ခူၣ်လီၤတၢ်ပူၤ,ဒီးဘၢၣ်ဝဲ,ဘၣ်ဆၣ်ဒီးလီၤတဲာ်လၢတၢ်ပူၤလၢအမၤဝဲလီၤ. 16အတၢ်နးတၢ်ဖှီၣ်ကဘၣ်အခိၣ်ဒၣ်ဝဲဒီးအတၢ်အၢကလီၤဘၣ်လၢအခိၣ်ဒီဒၣ်ဝဲန့ၣ်လီၤ. 17ယကစံးထီၣ်ပတြၢၤယွၤဒ်အတၢ်တီတၢ်လိၤအသိးန့ၣ်ဒီးယကသးဝံၣ်ထီၣ်တၢ်ထီကတၢၢ်ယွၤအမံၤလီၤ.
Copyright information for
KswSKMB