Psalms 79
စီၤအၤစာ်အထါ.
1ယွၤဧၢ,ပှၤကလုာ်တဖၣ်န့ၣ်ဟဲနုာ်လၢနတၢ်န့ၢ်သါအပူၤလံ.မၤဘၣ်အၢနနူၢ်စီဆှံလံ.မၤလီၤပှီၢ်ယရူၤၡလ့ၣ်လံ. 2ဟ့ၣ်လီၤလံနခ့နပှၤတဖၣ်အစိၣ်လၢမူခိၣ်အထိၣ်ဧိၤလံၣ်ဧိၤလၢတၢ်အီၣ်အဂီၢ်,နပှၤစီဆှံအညၣ်လၢဟီၣ်ခိၣ်အဆၣ်ဖိကီၢ်ဖိလံ. 3လူလီၤအသွံၣ်ဒ်ထံအသိးန့ၣ်,ဝးတရံးယရူၤၡလ့ၣ်လံ.ဒီးပှၤခူၣ်လီၤကွံာ်အီၤတအိၣ်ဘၣ်. 4ပကဲထီၣ်လံလၢတၢ်ဒုၣ်ဒွဲၣ်အလီၢ်လၢပှၤလၢပဃၢၤအဂီၢ်,တၢ်ကတိၤဒိတၢ်အလီၢ်,ဒီးတၢ်မၤတရီတပါအလီၢ်လၢပှၤအိၣ်ဝးတရံးပှၤအဂီၢ်လံလီၤ. 5ဆံးယံာ်လဲၣ်,ယွၤဧၢ.နကသးထီၣ်တၢ်လီၤထူလီၤယိာ်စ့ၢ်ကီးဧါ.နသးက့ၣ်ကအီၣ်တၢ်ဒ်မ့ၣ်အူအသိးန့ၣ်ဧါ. 6လူလီၤနသးကဲၤထီၣ်လၢပှၤကလုာ်တဖၣ်လၢအတသ့ၣ်ညါဘၣ်နၤဘၣ်,ဒီးလၢဘီမုၢ်တဖၣ်အဖီခိၣ်လၢအတကိးထီၣ်ဘၣ်နမံၤဘၣ်န့ၣ်တက့ၢ်. 7အဂ့ၢ်ဒ်အံၤ,အီၣ်ကွံာ်ယၤကိာ်ဒီးမၤသယုၢ်အအိၣ်အဆိးအလီၢ်လီၤ. 8သ့ၣ်နီၣ်ထီၣ်က့ၤပထူပထံးအတၢ်ဒဲးဘးလၢပဂီၢ်တဂ့ၤ.မ်နတၢ်သူၣ်ကညီၤနတၢ်သးကညီၤဟဲသဂၢၢ်ပှၤလၢအဆိအချ့တက့ၢ်.အဂ့ၢ်ဒ်အံၤ,ပဘၣ်တၢ်ဆီၣ်လီၤပှၤနးမးလီၤ. 9တၢ်အုၣ်က့ၤခီၣ်က့ၤပှၤအယွၤဧၢ,မၤစၢၤပှၤလၢနမံၤအလၤကပီၤအဃိ,ဒီးမၤပူၤမၤဖျဲးပှၤ,ဒီးပျၢ်ပတၢ်ဒဲးဘးလၢနမံၤအဃိန့ၣ်တက့ၢ်. 10ပှၤကလုာ်တဖၣ်ကစံး,အကစၢ်အိၣ်ဖဲလဲၣ်န့ၣ်,မ့ၢ်အဘၣ်မနုၤလဲၣ်.တၢ်မၤကၣ်နခ့နပှၤအသွံၣ်လၢအလူလီၤအသးန့ၣ်မ်အအိၣ်ဖျါလၢပှၤကလုာ်တဖၣ်အကျါလၢပမဲာ်ညါတက့ၢ်. 11မ်ပှၤလၢအဘၣ်စၢဃာ်အကအုကစွါန့ၣ်ဟဲထီၣ်ဆူနမဲာ်ညါတက့ၢ်.ဒ်နစုအစိကမီၤဒိၣ်ဝဲအသိးန့ၣ်မၤပူၤဖျဲးပှၤလၢအဘၣ်တၢ်ပာ်အီၤလၢတၢ်သံအဂီၢ်တက့ၢ်. 12ဒီးပှၤလၢပဃၢၤဒုၣ်ဒွဲၣ်တၢ်လၢအဒုၣ်ဒွဲၣ်နၤ,ယွၤဧၢ,ဟ့ၣ်ကၣ်အီၤနွံစးလၢအသးနါပှၢ်အပူၤန့ၣ်တက့ၢ်. 13ဒီးပဝဲဒၣ်,နပှၤဂီၢ်မုၢ်,နတၢ်အီၣ်ဆၣ်အလီၢ်အသိအံၤပကစံးထီၣ်ပတြၢၤနၤလီၤထူလီၤယိာ်လီၤ.ပကစံၣ်တဲၤတဲလီၤနတၢ်စံးထီၣ်ပတြၢၤအစိၤစိၤအဃၣ်ဃၣ်လီၤ.
Copyright information for
KswSKMB